LES 4

Sani di yu kan taki fosi yu leisi wan tekst

Mateyus 22:41-45

SAN YU MUSU DU: Yepi sma fu si fu san ede yu o leisi wan tekst.

Sabi fu san ede yu wani leisi wan tekst. Fosi yu leisi wan tekst, dan taki sani di o yepi a sma fu sabi san yu wani leri en nanga a tekst.

Luku den tra vers fu a kapitel. Te yu o taki suma e taki na ini a tekst noso suma skrifi a Bijbel buku, dan sorgu taki a sani di yu o taki, tru.
Gebroiki Bijbel fu gi sma leri. Te yu e taki nanga sma di e bribi na ini Gado, dan gebroiki Gado Wortu fu taki nanga den na presi fu fruteri den san yu srefi e denki. Na so yu e sori den taki Bijbel abi den moro bun rai.
Meki den arkiman kisi na angri fu leisi a tekst. Poti wan aksi di a tekst o piki. Noso kari wan problema, dan sori fa a tekst kan yepi fu lusu a problema dati. Yu kan kari wan sani di Gado feni bun noso di a no feni bun, dan yu kan gebroiki wan Bijbel tori fu sori sma fu san ede a bun fu gi yesi na Gado.

Luku san den arkiman sabi kaba fu a tori èn fu a tekst. Srefi efu yu o leisi wan tekst di furu fu den sabi, yu kan taki wan sani di kan hari den fu poti prakseri na a tekst baka.