’Trow soso nanga wan bakaman fu Masra’​—A rai disi fiti ete na ini a ten disi?

Son futuboi fu Gado di no trow taki wan srefi sortu sani tu. Toku den sabi heri bun sortu rai na apostel Paulus gi. A ben taki dati wi musu „trow soso nanga wan sma di de wan bakaman fu Masra”. Ala Kresten musu gi yesi na a rai disi (1 Kor. 7:39). Dan fu san ede son Kresten e denki so?

FU SAN EDE SON KRESTEN E TWEIFRI?

Kresten di e denki so kan feni taki yu abi moro sisa di no trow leki brada di no trow. Na ini furu kondre dati de so trutru. Luku tu eksempre. Na ini Korea a de so taki fu ibri 100 Kotoigi di no trow, 57 na sisa èn 43 na brada. Na ini Kolombia 66 fu ibri 100 Kotoigi na sisa èn 34 fu den na brada.

Na ini son kondre, yu abi papa nanga mama di no de Kotoigi èn den kan aksi furu moni noso tra diri kado te den umapikin fu den o trow. Son brada di no trow no man pai kande gi den sortu kado disi. Dati meki son sisa e aksi densrefi efu oiti den o man feni wan Kresten masra.a

A PRENSPARI FU FRUTROW NA TAPU YEHOVAH

A pasa wan leisi kaba taki yu srefi denki so tu? We, no frede. Yehovah sabi na ini sortu situwâsi yu de èn a sabi fa yu e firi.​—2 Kron. 6:29, 30.

Ma Yehovah taki na ini Bijbel dati wan Kresten mag trow soso nanga wan bakaman fu Masra. Fu san ede? Fu di a sabi san bun gi en pipel. A no wani taki den futuboi fu en du wan don sani di o hati den bakaten, ma a wani taki den de koloku. Na ini a ten fu Nehemia furu Dyu ben e trow nanga trakondre sma di no ben e dini Yehovah. Dati meki Nehemia sori den a takru eksempre fu Salomo. Aladi Gado ’ben lobi Salomo, . . . toku den trakondre uma meki a kownu disi sondu’ (Neh. 13:23-26). Sobun, fu meki sani waka bun nanga den futuboi fu en, Gado taigi wi fu trow soso nanga wan tru anbegiman (Ps. 19:7-10; Yes. 48:17, 18). Wi breiti taki Yehovah lobi wi èn taki a e gi wi rai di wi kan frutrow. Te wi e gi yesi na en leki wi Tiriman, dan wi e sori taki en abi a reti fu fruteri wi san fu du.​—Odo 1:5.

Wi e frustan taki yu no wani de nanga ’wan sma di no de na bribi’, fu di a kan meki taki yu no dini Gado moro (2 Kor. 6:14). A rai fu Gado bun ala ten èn furu Kresten na ini a ten disi teki a koni bosroiti fu gi yesi na Yehovah. Ma sonwan fu den no du dati.

A RAI FU GADO FITI ETE NA INI A TEN DISI

Maggy,b wan sisa na ini Australia, e fruteri san pasa nanga en di a bigin hori nanga wan man di no ben de wan Kotoigi. A taki: „Mi misi furu konmakandra soso fu kan de nanga en. Mi no ben e dini Gado fayafaya moro.” Ratana di e libi na ini India, bigin hori nanga wan boi fu en klas di ben e studeri Bijbel. Ma baka wan pisi ten a kon na krin taki a boi disi ben e studeri Bijbel soso fu kan hori nanga Ratana. Te fu kaba, Ratana gowe libi a tru anbegi èn a teki wan tra bribi fu kan trow nanga a boi.

Wan tra eksempre na di fu Ndenguè, wan sisa fu Kamerun. A ben abi 19 yari di a trow nanga wan man di no ben e dini Yehovah. A man disi taigi Ndenguè taki baka te den trow, a ben kan tan dini Yehovah. Ma tu wiki baka a trow, en masra taigi en taki a no ben mag go na den Kresten konmakandra. A sisa disi e taki: „Mi no ben abi nowan sma fu taki èn mi ben e krei furu. Mi no ben man du moro san mi wani. Mi ben e sari trutru taki mi teki so wan don bosroiti.”

A tru taki a no ala trowpatna di no de Kotoigi e bigin taki noso du ogri sani bakaten. Ma awinsi a trowpatna di no de wan Kotoigi no du den sani disi nanga yu, toku yu musu aksi yusrefi fa a matifasi fu yu nanga Yehovah o de. Fa yu o firi te yu sabi taki yu no gi yesi na a rai fu Gado di kan meki yu de koloku? A moro prenspari sani di yu musu aksi yusrefi na fa Yehovah o firi fu a bosroiti di yu teki.​—Odo 1:33.

Brada nanga sisa na heri grontapu kon si taki te now a moro bun fu ’trow soso nanga wan bakaman fu Masra’. Kresten di no trow wani meki Gado ati prisiri. Dati meki den e suku wan bun trowpatna na mindri den sma di e anbegi Gado. Michiko na wan sisa fu Yapan. Di a no ben trow ete, den famiriman fu en pruberi fu meki a trow nanga wan man di no ben de wan Kotoigi. Disi ben hebi gi en. A ben si tu taki wan tu mati fu en feni wan trowpatna na ini a gemeente. Michiko e taki: „Ibri tron mi ben taigi misrefi taki fu di Yehovah na ’wan koloku Gado’, wi srefi kan de koloku tu, efu wi trow noso efu wi no trow. Mi e bribi tu taki Yehovah e gi wi san wi e angri fu kisi. Sobun, efu wi no kan feni wan trowpatna aladi wi wani trow, dan a moro bun fu wakti” (1 Tim. 1:11). Te fu kaba Michiko feni wan bun brada èn a breiti taki a wakti.

Yu abi son brada tu di ben musu wakti fu feni wan bun patna. Bill fu Australia na wan fu den brada disi. A e taki dati son leisi a ben e si moi uma di no ben de Kotoigi èn a ben lobi fa den ben de. Ma a ben e du ala san a man fu no meki mati nanga den. Fu san ede? A no ben wani bigin nanga wan „sma di no de na bribi”. Na ini ala den yari, a ben e si sisa di a ben lobi, ma den sisa no ben lobi en. Bill wakti 30 yari fosi a feni wan sisa di fiti na en. Bill e taki: „Mi no sari taki mi wakti.” A e taki moro fara: „Mi e si en leki wan blesi taki mi nanga mi wefi kan go na ini a preikiwroko makandra, taki wi kan studeri nanga makandra èn taki wi kan dini Gado makandra. Mi breiti fu miti den mati fu mi wefi fu di den alamala na anbegiman fu Yehovah tu. Fu abi wan bun trowlibi, wi e du san Bijbel e taki.”

SANI DI YU KAN DU TE YU E WAKTI TAPU YEHOVAH

San yu kan du na ini a pisi ten te yu e wakti tapu Yehovah? Yu kan go denki fu san ede yu no trow. Efu yu si taki yu no trow ete fu di yu wani gi yesi na Yehovah, dan yu kan de seiker taki dati o meki Yehovah ati firi prisiri (1 Sam. 15:22; Odo 27:11). Tan begi Gado èn ’fruteri en ala san de na tapu yu ati’ (Ps. 62:8). Te yu e meki muiti fu feti nanga tesi èn nanga den sondu firi fu yu, dan dei fu dei yu o tron wan moro bun mati fu Yehovah. Yu kan de seiker taki Yehovah e frustan fa yu e firi èn a sabi san yu abi fanowdu fu di yu warti gi en. A no pramisi nowan sma fu gi en wan trowpatna. Ma efu yu abi wan trowpatna fanowdu trutru, dan Gado sabi san na a moro bun fasi fu gi yu san yu wani.​—Ps. 145:16; Mat. 6:32.

Son leisi yu kan firi leki a psalm skrifiman David di ben taki: „Yehovah, mi e begi yu, esi-esi, piki mi. Mi no abi krakti moro. No kibri yu fesi gi mi” (Ps. 143:5-7, 10). Te yu e firi so, dan yu musu gi yu hemel Tata ten fu sori yu san fu du. Teki ten fu leisi Bijbel èn denki dipi fu den sani di yu e leisi. Dan yu o frustan den wet fu Yehovah moro bun èn yu o si san a du gi en pipel na ini owruten. Te yu e arki en, dan dati o gi yu deki-ati fu tan gi yesi na en.

San yu kan du moro fu de koloku èn fu abi furu fu du te yu no trow? Yu kan du muiti fu tron wan moro bun mati fu Yehovah èn fu kon abi wan bun nen. Yu kan leri tu fu prati sani nanga trawan, fu wroko tranga, fu de wan sma di trawan lobi èn fu sori taki yu e tai hori na Yehovah. Den fasi disi de fanowdu fu kon abi wan koloku trowlibi (Gen. 24:16-21; Rut 1:16, 17; 2:6, 7, 11; Odo 31:10-27). Tan suku fosi a Kownukondre fu di yu e wroko tranga na ini a preikiwroko èn fu di yu e du tra sani na ini a diniwroko. Disi o meki taki yu no teki don bosroiti. Luku na eksempre fu Bill ete wan leisi. A e taki fu a ten di a ben e suku wan trowpatna: „Den yari pasa so esi! Mi gebroiki a ten dati fu dini Yehovah leki wan pionier.”

Iya, a wet fu ’trow soso nanga wan bakaman fu Masra’ fiti ete na ini a ten fu wi. Te wi e bosroiti fu trow nanga wan sma di e dini Yehovah, dan wi o gi Gado grani èn wi o de koloku. Bijbel e taki: „Koloku fu a man di abi bigi lespeki gi Yehovah. A e prisiri srefisrefi nanga den wèt fu Gado. Diri sani nanga gudu de na ini na oso fu en. Fu têgo a e du san reti” (Ps. 112:1, 3). Sobun, teki a bosroiti fu tan gi yesi na a wet di Yehovah gi wi fu ’trow soso nanga wan bakaman fu Masra’.