WAN BRUYA GRONTAPU

4 | Tan abi wan tranga howpu

FU SAN EDE A PRENSPARI?

Den problema na ini a grontapu disi e meki sma frede èn a san dati kan meki den kon siki èn a kan meki den firi brokosaka. Furu fu den sma di ondrofeni den sani disi no denki taki a situwâsi o kon bun. San den e du?

Son sma no wani denki srefi fu san o pasa na ini a ten di e kon.
Trawan e dringi sopi èn e gebroiki drugs fu no prakseri den problema fu den.
Wan tu sma e denki taki a moro bun fu dede. Den e taki: „Fu san ede mi musu libi go doro?”

San yu musu sabi?

Sonwan fu den problema na fu wan pisi ten nomo èn sondro taki yu e fruwakti dati, a situwâsi fu yu kan kenki kon bun baka.
Srefi te a situwâsi fu yu no kenki, toku yu kan du wan tu sani di kan yepi yu fu horidoro.
Bijbel e gi a trutru howpu taki den problema fu libisma o gwe fu ala ten.

San yu kan du now?

Bijbel e taki: „Noiti un musu broko un ede nanga tamara, bika tamara o abi en eigi broko-ede. Ibri dei abi nofo fu en eigi ogri.”—Mateyus 6:34.

Luku san yu kan du tide. No meki den broko-ede fu tamara tapu yu fu du den sani di yu musu du tide.

Te yu tan prakseri taki kande takru sani o pasa, dan yu e gi yusrefi moro stress èn yu o lasi howpu.

FA YU KAN KIBRI YUSREFI?—Sani di kan yepi yu

POTI PRAKSERI NA BUN SANI

Bijbel e taki: „Den heri libi langa na soso problema e miti den mofinawan, ma gi den sma di e prisiri na ini den ati, a gersi leki a de wan fesa ala ten” (Odo 15:15). Efu yu e tan prakseri problema wawan, dan yu no o man si taki fasi de fu lusu den. Ma efu yu e hori na prakseri taki situwâsi kan kenki, dan dati kan yepi yu fu sidon prakseri bun fasi fu lusu a problema fu yu.

No luku noso arki tumusi furu nyunsu.
Na a kaba fu ibri dei, kari tu noso dri sani di yu wani taki tangi fu den.
Prakseri wan tu sani di yu musu du, ma skrifi soso den sani di yu man du tide. Prati den bigi wroko na ini moro pikinwan. Dan na a kaba fu a dei yu o si den bun bakapisi fu a muiti di yu meki.

SUKU SMA FU YEPI YU

Bijbel e taki: „Wan sma di no e moksi nanga trawan . . . o tegu gi koni” (Odo 18:1). Yu no man kren komoto fu wan dipi peti yu wawan, ma yu abi yepi fanowdu fu man du dati.

Aksi famiriman noso mati fu yepi yu.
Luku tu fa yu kan yepi den. Te wi e du sani gi trawan, dan dati o yepi wi fu no prakseri wi eigi problema nomo.
Efu yu lasi howpu èn yu e firi leki yu no wani libi go doro, dan prakseri fu go na datra. Son leisi wi kan kisi den firi disi te wi abi wan siki, soleki depressie. Furu sma feni yepi fu di den go na datra.a

a Ontwaakt! no e taigi sma sortu datrayepi noso dresi den musu teki.

Bijbel e gi trutru howpu

Wan fositen psalm skrifiman ben begi Gado, taki: „Yu wortu na wan lampu gi mi futu èn wan leti na tapu mi pasi” (Psalm 119:105). Luku fa Bijbel, Gado Wortu, na wan lampu nanga wan leti na ini wi libi.

Tapu wan dungru neti wan lampu e yepi wi fu sabi pe wi musu waka. Na so Bijbel abi koni rai di kan yepi wi fu sabi san wi musu du te wi abi fu teki muilek bosroiti.

Leti kan skèin na tapu wi pasi so taki wi kan si san de moro fara na wi fesi. Na wan srefi sortu fasi Bijbel kan meki wi si taki wan moro bun ten de na wi fesi.