Wan yonguman e luku fa sma e go na ini wan Kownukondre zaal

YONGUSMA E AKSI

Fu san ede mi ben o go na den konmakandra fu Yehovah Kotoigi?

Yehovah Kotoigi e hori konmakandra tu leisi na ini a wiki na ini den Kownukondre zaal fu den. Disi na den gebow pe den e go fu dini Gado. San e pasa na ini wan Kownukondre zaal èn fa yu kan kisi wini fu den konmakandra di e hori drape?

San e pasa na ini wan Kownukondre zaal?

Te wi e go na den Kownukondre zaal, dan wi e kisi leri fa wi kan du den sani di Bijbel e taki. Den konmakandra di e hori drape kan yepi yu fu:

kon sabi suma na Gado trutru.
frustan fu san ede so furu ogri sani e pasa.
tron wan moro bun sma.
feni bun mati.

Yu ben sabi a sani disi? Wi e kari den konmakandra presi fu Yehovah Kotoigi wan Kownukondre zaal fu di wan fu den moro prenspari tori di wi e taki fu en, na a Kownukondre fu Gado.—Mateyus 6:9, 10; 24:14; Lukas 4:43.

Sortu wini yu kan kisi?

Den sani di yu o leri o yepi yu. Den sani di wi e leri fu Bijbel na den konmakandra fu Yehovah Kotoigi o yepi yu fu „kisi koni” (Odo 4:5). Sobun, Bijbel kan yepi yu fu teki bun bosroiti na ini yu libi. A kan yepi yu tu fu feni piki tapu aksi leki:

Wan tu fu den lezing di wi e hori na ini a weekend na:

Fu san ede Bijbel musu tiri wi libi?
Pe yu kan feni yepi na ini ten fu banawtu?
San Gado Kownukondre e du now gi wi.

„Wan leisi wan boi fu mi klas ben kon nanga mi na konmakandra. A ben sidon na wi sei èn wi ben e hori wi buku fu a ben kan luku makandra nanga wi. Baka a konmakandra a taki dati a ben fruwondru fu si fa sma na ini a zaal ben gi piki tapu den aksi. A taki tu dati na ini en kerki den no abi buku leki wi fu studeri.”—Brenda.

Yu ben sabi a sani disi? Yu no abi fu pai fu kon na ini den Kownukondre zaal èn wi no e piki moni tu.

Yu o firi bun. Bijbel e taki dati Kresten musu kon makandra fu „gi makandra deki-ati” (Hebrewsma 10:24, 25). Furu sma na ini a grontapu disi e denki densrefi nomo. Ma a switi fu de makandra nanga sma di no e denki densrefi nomo, di e poti a wani fu Gado na a fosi presi èn di e hori tra sma na prakseri.

„Son leisi mi e weri èn mi no e abi krakti, ma te mi miti den trawan na a Kownukondre zaal, dan altijd mi e firi moro bun. Mi e prisiri èn mi e go na oso baka nanga nyun krakti.”—Elisa.

Yu ben sabi a sani disi? Na heri grontapu yu abi moro leki 120.000 gemeente fu Yehovah Kotoigi di e kon makandra na ini sowan 60.000 konmakandra presi. So wan 1500 Kownukondre zaal e bow ibri yari so taki moro nanga moro sma kan kon na den konmakandra disi.a

San tra yonguwan e taki

„Di mi ben de na middelbaar skoro, wan meisje fu mi klas ben kon nanga mi na zaal wan tu leisi. A ben skreki fu si fa yonguwan nanga owruwan ben e leri sani fu Bijbel makandra. No so langa pasa mi wrokobasi ben kon nanga mi tu èn a ben fruwondru fu si taki wi e gebroiki Bijbel furu. Di mi si o furu krakti a sani disi ben abi tapu en, misrefi kon kisi moro warderi gi den konmakandra fu wi!”—Jessica.

„Mi kon si taki den konmakandra e yepi mi fu no poti furu prakseri na den problema fu mi. Wi e leri fa fu abi wan bun libi èn fu tron wan moro bun sma. Mi e firi bun èn mi e kisi deki-ati te mi komopo na den konmakandra.”—Timothy.

„Wan leisi mi ben kari wan man fu kon na den konmakandra fu wi. Baka ten a taigi mi: ’Eigenlijk mi ben kon soso fu sori yu taki a bribi fu yu no bun, ma mi kon si taki na a bribi fu mi no bun!’ A switifasi fu den brada nanga sisa ben naki en ati tu. A taki: ’Un no sabi mi, ma toch un sori switifasi gi mi. A ben de leki un sabi mi omeni yari kaba!’”—Jacob.

„Son leisi mi ben e denki ’Baka zaal mi o gowe direk.’ Ma te a konmakandra e hori dan a firi dati e gowe. Te mi bigin taki nanga den trawan baka a konmakandra, mi e frigiti fu san ede mi ben wani gowe direk. Efu mi no ben e go na den konmakandra, mi no ben o abi den bun mati disi tu.”—Madison.

a Efu yu wani sabi pe wi e hori konmakandra na ini a birti fu yu, dan go na „Gemeente konmakandra fu Yehovah Kotoigi” èn klik tapu „Feni wan presi na ini yu birti”.