Den presi pe wi e kon makandra fu anbegi Gado

TRU anbegiman fu Yehovah kisi a komando fu kon makandra fu kisi leri èn fu gi makandra deki-ati (Hebr. 10:23-25). A fosi presi pe den Israelsma, a pipel fu Yehovah, ben go fu anbegi en, ben de na „a tabernakel noso a konmakandra-tenti” (Eks. 39:32, 40). Bakaten, Salomo, a manpikin fu David, ben bow wan oso noso wan tempel fu gi Gado glori (1 Kow. 9:3). Baka di a tempel dati kisi pori na ini 607 Fosi Krestes den Dyu ben kon makandra fu anbegi Gado na presi di sma e kari snoga. Te fu kaba den bow a tempel baka èn a ben tron a moro prenspari presi baka fu anbegi a tru Gado. Yesus ben gi sma leri na ini den snoga èn na ini a tempel (Luk. 4:16; Yoh. 18:20). Yesus ben hori wan konmakandra na tapu wan bergi srefi.​—Mat. 5:1–7:29.

² Baka a dede fu Yesus, den Kresten ben kon makandra na ini oso fu sma èn na tra presi fu kisi leri fu Bijbel èn fu abi demakandra nanga tra anbegiman (Tori 19:8, 9; Rom. 16:3, 5; Kol. 4:15; Fileim. 2). Son leisi a ben de fanowdu taki den fosi Kresten kon makandra na wan kibripresi, so taki den sma di ben e frufolgu den no kisi den. Iya, reti-ati futuboi fu Gado na ini owruten ben du ala muiti fu kon makandra fu „kisi leri fu Yehovah”.​—Yes. 54:13.

³ Na ini a ten disi tu, Kresten e hori konmakandra na sma oso èn na tra presi. Nofo tron wi e hori preikiwroko konmakandra na a oso fu brada nanga sisa. Den e si en leki wan grani taki sma e gebroiki den oso na a fasi disi. Furu fu den taki dati a sani disi tyari furu blesi kon gi den.

KOWNUKONDRE ZAAL

⁴ A moro prenspari presi pe Yehovah Kotoigi e kon makandra, na a Kownukondre zaal. Nofo tron den brada e bai wan pisi gron, dan den e bow wan nyun Kownukondre zaal. Son leisi den e bai wan pisi gron di abi wan gebow kaba, dan den kenki son sani na en, so taki den kan gebroiki en fu hori konmakandra. Te difrenti gemeente e hori konmakandra na ini a srefi Kownukondre zaal, dan dati moro bun èn a moro bunkopu, fu di den no abi fu gebroiki so furu moni fu bow difrenti zaal. Na son presi, a de fanowdu fu yuru wan presi fu hori konmakandra. Te wan nyun zaal bow noso te den tyari wan tu bigi kenki kon na wan zaal, dan a fiti fu hori wan spesrutu konmakandra fu gi en abra na Yehovah. Ma efu den kenki wan tu pikin sani nomo, dan a no de fanowdu fu gi en abra na Yehovah ete wan tron.

⁵ A Kownukondre zaal no musu meki nanga tumusi furu pranpran, soso fu meki sma taki fa a presi moi. Aladi wi no e bow den Kownukondre zaal na a srefi fasi na ala presi, toku ala den zaal na presi di wi man gebroiki bun (Tori 17:24). Den brada o luku a situwâsi fu a kontren te den o bow wan zaal, ma toku a zaal musu de wan presi di fiti fu hori Kresten konmakandra èn di switi fu sidon na ini.

⁶ Ala gemeente fu Yehovah Kotoigi e gi moni fu gebroiki èn fu sorgu gi a Kownukondre zaal pe den e hori konmakandra. Wi no e piki moni na ini a gemeente èn wi no e aksi sma moni tu. Wan monikisi de ini a zaal, so taki den wan di e kon na den konmakandra kan gi moni gi den sani di de fanowdu gi a zaal. Nowan sma no e dwengi den fu poti moni, ma den e du disi nanga den heri ati.​—2 Kor. 9:7.

⁷ Ala den sma fu a gemeente e si en leki wan grani fu gi moni fu sorgu gi a Kownukondre zaal èn fu yepi hori en krin. Nofo tron a de so, taki wan owruman noso wan dinari ini a diniwroko e kisi a frantwortu fu meki wan schema fu krin a zaal. Furu tron na den difrenti preikiwroko grupu e krin a zaal èn a grupu-opziener noso a brada di e yepi en e teki fesi na ini a wroko disi. Inisei nanga dorosei fu a Kownukondre zaal musu gi Yehovah nanga en organisâsi wan bun nen.

⁸ Te moro leki wán gemeente e gebroiki a srefi zaal, dan den owruman fu den difrenti gemeente e seti wan Kownukondre zaal Beheer Komte di e seti sani fu sorgu a zaal nanga a dyari. Den owruman fu den difrenti gemeente musu poti wan brada leki fesiman fu a Beheer Komte. A komte disi e wroko ondro a tiri fu den owruman fu den gemeente dati èn a e sorgu taki a konmakandra presi tan krin èn taki sani di broko e meki wantewante. Den e sorgu tu taki nofo wrokosani de na ini a gemeente fu du den difrenti wroko di musu du. A prenspari taki ala den gemeente di e gebroiki wan zaal e wroko makandra.

⁹ Te difrenti gemeente e kon makandra na ini a srefi Kownukondre zaal, dan den kan taki nanga makandra fu luku efu den o kenki den konmakandra dei nanga den konmakandra yuru. Te den owruman o hori a takimakandra disi, dan den musu hori makandra na prakseri èn den musu sori lobi gi makandra (Fil. 2:2-4; 1 Petr. 3:8). Nowan fu den gemeente musu teki bosroiti gi wan tra gemeente. Te a kring-opziener e fisiti wan fu den gemeente, dan den tra gemeente o kenki a ten di den e hori konmakandra na ini a wiki dati.

¹⁰ A Kownukondre zaal kan gebroiki fu hori trow-lezing nanga beri-lezing te sma kisi primisi fu a Diniwroko Komte fu a gemeente. Den owruman disi o luku sani finifini fu si efu den kan gi primisi fu sma du dati èn den o gebroiki den rai di den kisi fu a bijkantoro fu teki a bosroiti disi.

¹¹ Den wan di e kisi na okasi fu gebroiki a Kownukondre zaal gi den sortu sani disi, musu tyari densrefi na wan fasi di fiti gi wan tru Kresten. Den no musu du nowan sani di kan meki trawan na ini a gemeente naki futu noso di kan pori a nen fu Yehovah èn a bun nen fu a gemeente (Fil. 2:14, 15). Ten na ten, a bijkantoro kan aksi fu gebroiki a zaal gi tra sani, soleki fu hori a Kownukondre Diniwroko-skoro noso a Pionierskoro.

¹² Ala ten den memre fu a gemeente o sori taki den abi lespeki gi a konmakandra presi fu den. A fasi fa den e weri krosi, a fasi fa den e moi densrefi, nanga a fasi fa den e tyari densrefi musu sori taki na anbegi fu Yehovah na wan warti sani (Preik. 5:1; 1 Tim. 2:9, 10). Te wi e teki den rai di abi fu du nanga a tori disi, dan wi e sori warderi gi den Kresten konmakandra fu wi.

¹³ A prenspari taki sma tyari densrefi na wan yoisti fasi te konmakandra e hori. A ben o moro bun efu pikin-nengre e sidon nanga den papa nanga mama. Te sma abi yongu pikin, dan den kan kisi a deki-ati fu sidon pe den no o puru sma prakseri so makriki te den musu tyari den pikin fu den go na dorosei fu piri-ai gi den noso fu du wan tra sani.

¹⁴ Lepi brada kan kisi a frantwortu fu dini leki zaal-waktiman na den konmakandra. Den brada disi musu de sma di de na ai èn di abi switifasi. Den musu sabi tu san den musu du èn o ten a fiti fu du en. Wan tu fu den frantwortu di den abi, na fu gi sma wan switikon te den kon fu a fosi leisi èn fu meki den sma dati firi taki wi e prisiri nanga den. Den musu yepi suku sidonpresi gi sma di kon lati, den musu skrifi omeni sma de na a konmakandra èn den musu sorgu taki a zaal no banawtu noso kowru tumusi. Te a de fanowdu, dan den zaal-waktiman o memre papa nanga mama fu luku den pikin fu den, so taki den pikin no lon fosi noso baka den konmakandra. Den pikin no musu go prei na tapu a podium tu. Te wan pikin e bigin rigeri na ini zaal, dan na wan switi fasi wan fu den zaal-waktiman kan aksi a papa noso mama fu tyari a pikin go na dorosei, so taki a pikin no puru a prakseri fu den arkiman na a programa. A no de fu taki dati a wroko di den zaal-waktiman e du de wan bigi yepi fu meki sma nyan bun fu den konmakandra. A moro bun taki den wan di e kisi a frantwortu fu de zaal-waktiman na owruman nanga dinari ini a diniwroko.

A BOW FU KOWNUKONDRE ZAAL

¹⁵ Na ini a ten fu den fosi Kresten, yu ben abi sma di ben abi en moro bun leki trawan. Dati meki na apostel Paulus ben skrifi den Kresten dati: „Un musu gebroiki san unu abi bogobogo fu yepi den wan di e mankeri sani. Dan densrefi kan gebroiki san den abi bogobogo fu yepi unu te unu mankeri sani. Na so unu kan tapu den nowtu fu makandra” (2 Kor. 8:14). Na ini a ten disi wi e „tapu den nowtu fu makandra” tu. Wi e gebroiki a moni di den gemeente na heri grontapu e gi fu bow Kownukondre zaal èn fu meki den kon bun baka. Na organisâsi èn den gemeente di e kisi wini fu a seti disi, e warderi en fa den brada nanga sisa na heri grontapu e gi moni fu horibaka gi a seti disi.

¹⁶ A bijkantoro e bosroiti na ini sortu Kownukondre zaal wan gemeente o hori konmakandra. Na den e taki o ten èn pe den o bow nyun Kownukondre zaal na ini a kontren di de ondro a tiri fu den. Den e bosroiti tu efu den o kenki wan tu sani na wan zaal. Te wan rampu pasa, dan sani e seti fu meki den zaal baka èn fu meki den oso fu den brada nanga sisa son leisi.

¹⁷ A bijkantoro e luku sortu brada noso sisa wani yepi nanga a wroko fu bai gron, fu meki bow-tekening fu Kownukondre zaal, fu suku papira na lanti fu kan bow, fu du bow-wroko, èn fu sorgu gi den gebow. Fu di Kownukondre zaal de fanowdu na ini furu kondre, meki furu wrokoman de fanowdu tu. Ala dopu preikiman di e tyari densrefi bun èn di wani yepi e kisi a deki-ati fu skrifi den nen tapu a papira di sma e kisi te den wani yepi nanga a bow-wroko. Baka dati den musu gi dati na den brada fu a Diniwroko Komte fu a gemeente. Srefi preikiman di no dopu ete kan yepi te a gemeente fu den e bow wan Kownukondre zaal noso te den kenki wan tu sani na en.

KONGRESHAL

¹⁸ Furu tron den fosi Kresten ben e kon makandra na ini pikin grupu. Ma son tron „furu sma” ben e kon makandra (Tori 11:26). So a de tu na ini a ten disi taki a pipel fu Yehovah e kon makandra na ini bigi grupu fu hori kring konmakandra nanga kongres. Furu tron den e yuru wan presi na ini a kontren fu kan hori den konmakandra dati. Ma te den no man feni wan presi di fiti noso te den sortu presi dati no de na ini a kontren, dan a kan de fanowdu fu bow noso bai wan presi fu man hori den bigi konmakandra disi.

¹⁹ Son tron wi e bai wan gebow, wi e seti en kon bun baka, dan wi e gebroiki en fu hori bigi konmakandra. Ma nofo tron a de so taki wi e bai wan pisi gron èn wi e bow wan nyun konmakandra presi. A no ala den kongreshal bigi a srefi, fu di wi e luku san a kontren abi fanowdu. A bijkantoro e teki a bosroiti fu bai noso bow wan kongreshal, baka te den luku omeni a o kostu fu bow en èn omeni leisi wan yari konmakandra o hori drape.

²⁰ A bijkantoro e poti brada fu sorgu taki a kongreshal tan bun èn taki ala sani e wroko bun. Sani e seti taki den gemeente na ini den difrenti kring e krin a konmakandra presi disi baka den bigi konmakandra fu den. Boiti dati, sani musu seti fu krin a presi tu leisi wan yari èn fu luku san musu du fu meki a presi tan bun. A ben o bun efu brada nanga sisa de klariklari fu yepi nanga a wroko disi. Dati meki den gemeente e kisi a deki-ati fu horibaka gi den seti disi nanga den heri ati.​—Ps. 110:3; Mal. 1:10.

²¹ Ten na ten, wi e gebroiki den kongreshal fu hori den skoro fu na organisâsi fu wi noso fu hori spesrutu konmakandra gi owruman noso kring-opziener. Neleki a Kownukondre zaal, na so den kongreshal disi na presi di gi abra na Gado èn wi e go drape fu anbegi en. Te wi de na wan bigi konmakandra, dan wi musu sori lespeki na ini a fasi fa wi e tyari wisrefi, a fasi fa wi e weri krosi, nanga a fasi fa wi e moi wisrefi. A musu de a srefi leki te wi e go na a Kownukondre zaal fu anbegi Yehovah.

²² Someni nyun sma e kon na ini na organisâsi fu Gado na a kaba fu den lasti dei disi. Dati na wan buweisi taki Yehovah e blesi wi (Yes. 60:8, 10, 11, 22). Dati meki wi musu horibaka gi den sani di seti fu kan abi konmakandra presi pe wi e anbegi Yehovah èn wi musu sorgu taki den presi disi tan moi èn krin. Te wi e du dati, dan wi e sori taki wi e frustan o prenspari den presi disi de èn taki den e yepi wi fu gi makandra deki-ati o moro wi e si a dei fu Yehovah e kon krosibei.