Meki wi sorgu bun gi na anbegi presi fu wi
1. Fu san ede Kownukondre zaal de?
1 Na heri grontapu moro leki 94.000 gemeente fu Yehovah Kotoigi de. Furu fu den gemeente e kon makandra na ini wan Kownukondre zaal fu studeri Bijbel èn fu abi Kresten demakandra. Den Kownukondre zaal na den moro prenspari presi fu a tru anbegi.
2. Fu san ede a de prenspari fu sorgu bun gi a Kownukondre zaal?
2 Wan seti fu ondrow a Kownukondre zaal doronomo: A wroko di wi e du fu ondrow a Kownukondre zaal na wan prenspari sani di abi fu du nanga a santa diniwroko fu wi. Na tapu bladzijde 63 fu a Bediening-buku skrifi: „Den brada nanga sisa no musu si en leki wan grani wawan fu horibaka gi a Kownukondre zaal na moni sei, ma sosrefi fu gi densrefi fu hori a zaal krin, èn fu ondrow en bun. A Kownukondre zaal, fu inisei nanga dorosei, musu prenki na organisâsi fu Yehovah na wan yoisti fasi.” Fu di den gemeente e gebroiki a Kownukondre zaal difrenti leisi ibri wiki, meki a de fanowdu fu krin èn fu sorgu a zaal doronomo. A de wan gwenti taki sma fu den gemeente di e kon makandra na ini a Kownukondre zaal e sorgu taki dati e pasa. Leki fa a ben pasa na ini Bijbel ten, na so na ini a ten disi wi musu de nanga faya fu „ondrow” wi presi fu anbegi.—2 Kron. 34:10.
3. Fa sani seti fu krin a Kownukondre zaal, èn suma kan teki prati na a grani disi?
3 Wan schema pe skrifi san musu krin èn suma musu krin a Kownukondre zaal ibri wiki, musu poti na tapu a bord pe ala den tori fu a gemeente skrifi. Den difrenti bukustudie grupu kan krin a Kownukondre zaal ibri wiki, aladi den e hori densrefi na wan lijst pe skrifi san den musu du. Ala sma di man, kan teki prati na a grani fu ondrow a Kownukondre zaal ala wiki so taki a de krin. Papa nanga mama kan yepi den pikin fu teki prati tu fu krin a Kownukondre zaal, aladi den e leri fu sori warderi gi a grani disi. Te moro leki wán gemeente e gebroiki a Kownukondre zaal, dan a de tranga fanowdu taki den e wroko bun nanga makandra so taki a no wan tu sma nomo de frantwortu fu krin na anbegi presi.
4. Sortu sani musu seti so taki den sma fu a gemeente sabi san den musu du te den musu krin a Kownukondre zaal?
4 Wan lijst nanga sani di musu du kan poti tu na a presi pe den wrokosani fu krin a zaal e tan. A lijst disi musu tyari kon na krin sortu wroko musu du ibri wiki. Wroko soleki a krin fu den shutters, den tijdschrift-tafra nanga bukutafra, a leigi fu den dotibaki, a dweiri fu a zaal, èn a krin fu den spikri. Sonwan fu den wroko no abi fu du ibri wiki; wroko soleki a krin fu sani soleki udu tafra, udu kasi, sturu, garden, nanga den lampu. Sani fu krin a zaal soleki sopo nanga pine-oil no musu de pe pikin kan teki den. Na tapu den batra disi musu skrifi krinkrin san de na ini èn fa den sani di de na ini a batra musu gebroiki.
5. O prenspari a de taki nowan sma e kisi mankeri na ini a zaal, èn sortu sani wi musu ondrosuku wanwan leisi? (Luku a faki na tapu bladzijde 4.)
5 A de tumusi prenspari taki nowan sma e kisi mankeri na ini a Kownukondre zaal (Deut. 22:8). Nanga a tori disi na prakseri, a faki di de fu feni na ini na artikel disi e sori sortu sani wi musu ondrosuku wanwan leisi so taki mankeri no pasa.
6. Fa a wroko seti fu ondrow a Kownukondre zaal?
6 Na ondrow fu a Kownukondre zaal: A skin fu owruman abi a frantwortu fu luku taki a Kownukondre zaal e ondrow. A de wan gwenti taki wan owruman noso wan dinari ini a diniwroko e kisi a frantwortu fu orga a wroko. A e seti sani na so wan fasi taki a sabi fa sani de ibri dei na a Kownukondre zaal, èn taki ala sani de krin èn e ondrow bun. A e sorgu sosrefi taki nofo wrokosani de fu du dati. A de prenspari taki nowan sani de na ini a zaal, noso na tapu a prasi fu a zaal, di ben sa man gi wan sma mankeri. Te tu noso moro gemeente e gebroiki a srefi zaal, dan den skin fu owruman fu ala den gemeente musu seti wan beheer-komte di musu orga sani di abi fu du nanga na ondrow fu a zaal nanga a dyari. A komte disi e wroko na ondro a tiri fu a skin fu owruman.
7. (a) San musu pasa ala yari so taki sani e waka bun nanga a Kownukondre zaal? (b) Sortu sani musu ondrosuku wanwan leisi? (Luku a faki na tapu bladzijde 5.)
7 Ala yari den owruman musu ondrosuku a Kownukondre zaal finifini. Den abi a frantwortu fu seti sani, so taki ala sani di no bun noso di broko, kan meki kon bun baka. Den preikiman kan kisi kari fu go yepi te sani musu meki kon bun baka. Ala sma musu de na ai fu meki muiti taki srefi pikin problema kon bun baka èn den no musu draidrai fu sorgu gi sani di musu meki baka.
8. O ten den owruman kan kontakti a Help Desk gi sani di abi fu du nanga na ondrow fu a Kownukondre zaal?
8 Efu den owruman abi rai noso yepi fanowdu fu ondrow a Kownukondre zaal, dan den kan kontakti a Help Desk, soleki fa a skrifi na ini a brifi fu 9 april 2003, di seni go na ala skin fu owruman.
9. San musu pasa te a de fanowdu fu yuru wan dorosei wrokoman?
9 Gebroiki a moni fu a gemeente na wan yoisti fasi: Na friwani-wrokoman moro furu e ondrow den Kownukondre zaal nanga den dyari. A fasi fa den e gi densrefi e sori a lobi di den abi èn dati e meki taki wi no abi fu gebroiki so furu moni. Ma efu a de fanowdu fu yuru wan dorosei wrokoman fu du wan wroko, soleki fu kiri kakalaka nanga moisimoisi, noso fu luku den watrapeipi, dan den owruman musu suku a wrokoman nanga a moro bun prijs.
10. San musu pasa so taki a moni fu den gemeente e gebroiki na a yoisti fasi?
10 Den owruman musu seti den papira na a yoisti fasi so taki den no abi fu pai so furu belasting moni, efu dati kan ini a kondre pe den de. Te moro leki wán gemeente e gebroiki a Kownukondre zaal, dan a beheer-komte di musu sorgu gi a zaal musu abi wan eigi bankrekening, èn ala mun den musu gi den difrenti skin fu owruman wan raportu pe skrifi omeni moni den abi èn san den du nanga a moni. Den owruman abi a frantwortu fu sorgu taki a moni fu den gemeente e gebroiki na wan yoisti fasi.
11. San musu du te bigi ondrow wroko de fanowdu?
11 Te bigi ondrow wroko musu du: Te a beheer-komte e si taki bigi ondrow na a Kownukondre zaal de fanowdu, dan den e taki nanga den skin fu owruman fu kon sabi san fu du. Efu den kon si taki bigi ondrow de fanowdu noso taki yepi de fanowdu di no de fu feni na ini den gemeente di e gebroiki a srefi Kownukondre zaal, dan den musu du leki fa a skrifi na ini na inlegvel fu a brifi fu 9 april 2003, di seni go na ala den skin fu owruman. Rai de fu feni na a ondro-edeprakseri pe skrifi sortu sani den musu du te wan nyun Kownukondre zaal de fanowdu, noso te wan Kownukondre zaal musu meki kon nyun baka.
12. Fa wi kan sori taki wi abi warderi gi den konmakandra na a Kownukondre zaal?
12 Wi abi furu warderi gi a grani di wi abi fu kon makandra na ini a Kownukondre zaal! Noiti wi ben sa wani fu si den konmakandra disi leki soso sani. Wi alamala kan du sani so taki ala sani e waka bun na den konmakandra pe wi e kisi deki-ati. Wi kan du disi fu di wi e yepi nanga na ondrow fu a Kownukondre zaal. Disi e gi a soifri anbegi glori èn a e gi grani na Yehovah en nen. Meki wi teki a fasti bosroiti fu ondrow na anbegi presi fu wi bun.
[Faki na tapu bladzijde 4]
Wan lijst nanga sani di yu musu ondrosuku so taki no wan sma e kisi mankeri
◻ Wrokosani fu kiri faya te wan presi e bron musu de fu feni makriki èn musu luku ibri yari.
◻ Sani no musu de di e hendri sma fu waka fri fu go, noso fu kon na ini zaal.
◻ Den kamra pe a gemeente e poti sani di den e gebroiki, no musu abi sani na ini di kan bron esi-esi, èn den no musu abi ala sortu bongrobongro na ini.
◻ Luku efu den daki nanga den gotro fu a daki bun èn sorgu taki den tan krin.
◻ Den futupasi nanga a presi pe sma e poti den wagi musu abi faya èn den no musu abi sani di kan meki taki sma grati fadon.
◻ Yu musu ondrosuku ala stroom sistema nanga ventilator sistema.
◻ Ala sani di e leki, soleki a daki, noso den watra-peipi, musu meki bifo seryusu problema kon.
◻ A zaal musu sroto bun te nowan sma de drape.
[Faki na tapu bladzijde 5]
Sorgu gi a zaal nanga a dyari
◻ Dorosei: Fa a de nanga a daki, a ferfi fu a zaal, den shutters, nanga a bord di tanapu na fesisei fu a Kownukondre zaal nanga a nen fu wi na tapu?
◻ A dyari: Fa a de nanga a dyari? Fa a de nanga den futupasi, den skotu nanga a presi pe sma e poti den wagi?
◻ Na inisei: Fa a de nanga den tegel na gron, den garden, den sturu, den lampu? Fa a de nanga a ferfi inisei, fa a de nanga den kasi pe den buku nanga tijdschrift de; fa a de nanga a bukukasi?
◻ Wrokosani: Den faya, a geluid, den ventilator nanga na airco-sistema e wroko bun?
◻ Den toilet: Den krin èn den e wroko bun?
◻ Den papira fu a gemeente: Ala papira fu a gemeente bun èn den sani di skrifi na ini soifri?