Fa wi kan yepi fu ondrow wi Kownukondre zaal?

Ibri Kownukondre zaal fu Yehovah Kotoigi e tyari a santa nen fu Gado. Dati meki wi e si en leki wan grani fu yepi hori a zaal krin, fu moi en èn fu meki a tan bun. Wi e si dati tu leki wan prenspari pisi fu wi santa anbegi. Ala sma kan gi wan anu.

Yu kan yepi krin baka wan konmakandra. Baka ibri konmakandra, den brada nanga sisa breiti fu krin wan tu sani na ini a Kownukondre zaal. Wán leisi ibri wiki wi e krin a zaal moro fini. Wan owruman, noso wan dinari ini a diniwroko e orga a wroko disi. Nofo tron a skrifi kaba na tapu papira sortu sani wi musu du. Efu a de fanowdu, dan sma e yepi fu figi a gron, dweiri, puru stof, seti den sturu, krin den toilet, krin den fensre nanga spikri, trowe doti, den e krin dorosei fu a zaal èn a prasi. Wán leisi wan yari wi e poti wan dei fu krin ala sani finifini. Te wi e meki den pikin fu wi du wan tu fu den wroko disi, dan wi e leri den fu abi lespeki gi a presi pe wi e anbegi Gado.​—Preikiman 5:1.

Yu kan yepi fu meki sani di broko. Ibri yari wi e luku finifini efu ala sani na inisei èn na dorosei fu a Kownukondre zaal bun ete. Baka dati, wi e sorgu taki a zaal tan bun so taki wi no e meki kostu di no de fanowdu (2 Kroniki 24:13; 34:10). A fiti fu anbegi wi Gado na ini wan Kownukondre zaal di krin èn di ondrow bun. Te wi e yepi du a wroko disi, dan wi e sori taki wi lobi Yehovah èn taki wi abi lespeki gi a presi pe wi e anbegi en (Psalm 122:1). Disi e meki tu taki den sma na ini a birti e taki bun fu wi.​—2 Korentesma 6:3.

• Fu san ede wi musu sorgu gi a presi pe wi e anbegi Gado?

• Sortu sani seti fu hori a Kownukondre zaal krin?