No poti na oso foe Jehovah na wan sé
1 „Kibri joe foetoe alaten efoe joe e go na a oso foe a troe Gado; èn meki sma go foe jere” (Prék. 5:10). Ija, a presi foe anbegi foe Jehovah de gi wi toemsi prenspari èn foe dat’ede meki moe kon a krin ini a sorgoe foe a kownoekondrezaal èn a ini wi libifasi te wi de drape, dati wi e si en leki wan presi pe „Jehovah e leri wi” (Jes. 54:13). Joe abi so wan warderi gi na Kownoekondrezaal foe joe?
2 Aladi na Kownoekondregro e tan go doro, dan foeroe sma ben sori warderi foe di den ben gi bijdrage na a Kownoekondrezaalfonsoe foe a Genootschap. Jehovah e blesi sowan gi foe sani èn na gi ensrefi krinkrin na a troe anbegi. Ma san wi e doe foe hori na presi foe anbegi foe wi ini wan boen fasi?
WI LIBIFASI DE PRENSPARI
3 Te wi e kari trawan kon na den komakandra, dan wi moe doe disi na ini a fertrow dati san den e si drape de boen gi Jehovah nen èn en Kownoekondre. Foe di a de a troe Gado, meki na wartifasi foe en de psa hemel nanga grontapoe, èn wi libifasi na ini na kownoekondrezaal moe hori na wartifasi disi hé (Ps. 148:13). Wi no ben sa wani noiti dati wi krosi nanga fa wi sorgoe wisrefi na dorosé ofoe wi waka nanga libi ben sa broeja wi brada nanga sisa ofoe meki sma di e kon fisiti na zaal naki foetoe.
4 Ibriwan foe wi moe sori lobi gi tra sma na inisé èn moe sorgoe dati a no e tjari broeja kon. Safri taki, njan, kaw kawgum èn meki sma klop, meki babari nanga switisanipapira, go foe soso na wc èn kon alaten toemsi lati, de alamala sani di e poeroe trawan prakseri èn di e broko na wartifasi di de wan marki foe Jehovah presi foe anbegi. „Na lobi no e tjari ensrefi tapoe wan fasi di no fiti” èn den sortoe takroefasi disi no moe de na ini na Kownoekondrezaal (1 Kor. 13:4, 5; Gal. 6:10). Komakandrapresi foe na grontapoe nofotron de presi di no moi foe si èn e kisi mankeri srefi te sma sondro prakseri e trowe kawgum, soekroesani nanga tra njansani. Wi alamala ma spesroetoe papa nanga mama nanga pikinnengre moe loekoe boen dati ini a fasi disi wi no doe ogri na a oso foe Jehovah. — Teki gersi Deuteronomium 23:14.
SANI DI SETI FOE KRIN A ZAAL
5 Na skin foe owroeman (nanga na komte foe loekoe na kownoekondrezaal, efoe moro leki wan gemeente e gebroiki a zaal) e meki wan schema gi na geregelde krin nanga ondrow foe na oso. Gewoonlek a de so dati boekoestudie-groepoe ala wiki te den abi na beurt sa krin a zaal èn sa wroko san de tapoe wan lijst pe tanapoe san moesoe doe. Ala sma sa hori densrefi soifri na a schema disi sodati „na wan fasi di fiti èn akroederiregeling” den kan sorgoe foe na zaal (1 Kor. 14:40). Boiti foe dati, dan wantoe tron wan spesroetoe dé, kan poti a wan sé gi wan bigi krin foe na zaal.
6 Spesroetoe te moro leki wan gemeente e gebroiki na kownoekondrezaal a de prenspari foe wi ferstan wi frantwortoe foe ondrow a zaal boen. Ini den geval disi dan na oso e ondrofeni moro slijtage, ma moro mendri wi kon kisi wan beurt foe krin a zaal. Foe memre wi oten a de wi beurt foe krin a zaal, a ben sa boen foe poti dati na tapoe wi kalender. Boekoestudieleider nanga den assistent foe den moe loekoe boen foe memre a groepoe foe den boen langa a fesi oten den abi a beurt. Loekoe Diniwroko-boekoe, blz. 63, § 2.
DOE A PISI FOE WI
7 Wi ala wani gi wan anoe na a groepoe foe wi te den de na a beurt foe krin a kownoekondrezaal. Disi e gi wi na garanti dati hebi no sa kon soso tapoe wantoe sma èn wi e njan boen foe na gesontoe activiteit èn boen demakandra. Ma wi no a foe wakti nanga krin te leki wi de na a beurt. Leki wan sma di de en wawan èn leki osofamiri wi kan jepi baka na komakandra foe libi a zaal netjes a baka. Efoe wi si papira na gron wi kan piki den; efoe stoeroe no tanapoe boen wi kan jepi foe poti den let’opoe. Fa a e gi satisfaksi foe si dati Jehovah presi foe anbegi e de boen krin foe na moeiti foe wi ede!
8 Nehemia ben ferstan o prenspari a ben de „foe no libi na oso foe wi Gado na wan sé” (Neh. 10:39; 13:11). Wi e ferstan dati na Kownoekondrezaal foe wi de na mamapresi foe na troe anbegi ini a gemeenschap foe wi èn leki so a e ferdini na lobi prakseri nanga sorgoe foe wi. Meki a de so dati wi alamala nanga jepi foe wi waka nanga libi èn foe di wi e gi wan anoe na ini den regeling foe krin na zaal hori na waartifasi foe Jehovah presi foe anbegi hé.