Hulda doro a marki fu en

EFU wan tu yari pasa yu ben go na a pkin èilanti Sangir Besar na ini Indonesia, dan kande yu ben o si dri fu den Kresten s’sa fu wi na sesyoro. Ala sma na a èilanti sabi den fu di den e yepi sma fu ferstan Bijbel moro bun. Ma a wan leisi disi di den ben de na sesyoro, den ben e du wan heri tra wroko.

A fosi sani, na taki den ben e waka go na ini a watra di ben lai nanga ston èn den ben e suku hebi ston fu syow den go na syoro. Sonwan fu den ston disi ben bigi leki wan voetbal. Baka dati, den uma ben e go sidon tapu pkin udu bangi èn den ben e gebroiki wan amra fu naki den ston broko na ini pkinpkin pisi. Baka dati, den ben e poti den pkin ston na ini plastiek emre èn den ben e kren wan trapu fu tyari den go na a presi pe den ben e tan. Drape den ben e poti den ston na ini bigi saka di wan truck ben o tyari gwe so taki sma ben kan gebroiki den fu meki pasi.

Wán fu den s’sa disi na Hulda. A situwâsi fu en ben meki taki a ben kan gebroiki moro ten leki den tra s’sa fu du a wroko disi. A ben gwenti gebroiki a moni di a ben e meki fu sorgu gi en osofamiri. Ma now a ben wani du wan tra sani nanga a moni disi. A ben wani bai wan tablet so taki a ben kan gebroiki a JW Library^® app. Hulda ben sabi taki den felem nanga den tra sani tapu na app ben o yepi en fu du a preikiwroko moro bun èn fu ferstan Bijbel moro bun.

Ibri m’manten Hulda ben e naki ston broko tu yuru langa fu furu a baki fu wan pkin truck èn a du dati wán nanga afu mun langa. Te fu kba a ben abi nofo moni fu bai a tablet.

Hulda e taki: „Mi ben weri srefisrefi èn mi heri skin ben ati mi fu di mi ben e du a wroko disi. Ma heri esi mi frigiti ala den sani dati di mi ben man gebroiki a nyun tablet disi na ini a preikiwroko èn fu sreka moro bun gi den Kresten konmakandra.” A taki tu dati a tablet yepi en na a bigin di a COVID-19 siki ben panya na ala sei, fu di ala den konmakandra ben e hori nanga yepi fu Internet. Wi alamala breiti tu taki Hulda doro a marki fu en.