Bun takimakandra de leki wan broki di e meki papa nanga mama doro den pikin fu den
GI PAPA NANGA MAMA
5 Taki bun nanga makandra
SAN A WANI TAKI
Bun takimakandra na te papa, mama, nanga pikin man taki krin fa den e denki èn fa den e firi.
FU SAN EDE A PRENSPARI
A no ala ten a makelek fu abi bun takimakandra nanga yonguwan. A buku Breaking the Code e taki: „Di den pikin fu yu ben moro yongu den ben e taigi yu ala sani, ma now di den e kon moro bigi den no e taki so furu moro. Den no e taigi yu san den e denki noso san den e firi. A de leki wan bigi liba e prati unu fu makandra.” Ma juist te a gersi leki den no wani taki, den abi wan sma fanowdu fu taki.
SAN YU KAN DU
De klariklari fu arki yu pikin te a wani taki. Awinsi u musu du dati te lati neti.
„Kande yu e prakseri: „Na now i wani taki? Yu ben abi a heri dei fu du dati.” Ma fu san ede yu ben o krutu, efu a pikin wani taki fa a e firi? Na breiti yu musu breiti tog?”—Lisa.
„Mi lobi sribi fruku, ma mi kon si taki den moro bun takimakandra di mi abi nanga den pikin fu mi, na mindri neti.”—Herbert.
BIJBELTEKST: „Ibriwan sma no musu tan suku en eigi bun, ma a musu suku a bun fu trawan.”—1 Korentesma 10:24.
Arki nanga ala yu prakseri. Wan papa e taki: „Son leisi mi e prakseri wan heri tra sani te den pikin fu mi e taki nanga mi, ma den man si dati.”
Efu a muilek gi yu fu poti ala yu prakseri te den e taki nanga yu, dan kiri a tv noso saka yu telefon. Arki bun san a pikin e taki èn de nanga ala yu prakseri awinsi a tori no e sori so prenspari.
„Den pikin fu wi musu si taki wi e broko wi ede nanga a fasi fa den e firi. Efu dati no de so den no o taigi wi fa den e firi èn den o suku wan tra sma fu yepi den.”—Maranda.
„No rigeri, srefi efu yu pikin taki wan sani di no bun srefisrefi.”—Anthony.
BIJBELTEKST: „Luku bun fa unu e arki.”—Lukas 8:18.
Luku te unu de relaks. Son pikin e taki moro vrij te den no abi fu luku den papa nanga mama na ini den fesi.
„Furu leisi wi e taki te wi de ini a wagi. Wi ben man abi furu bun takimakandra na a fasi disi.”—Nicole.
Te unu sidon e nyan nanga makandra, dan disi na wan moi okasi fu taki tu.
„Te wi e nyan te neti, dan ala sma e fruteri san ben de den moro fruferi sani èn san ben de den moro prisiri sani di den miti ini a dei. A sani disi e yepi wi fu de moro bun mati fu makandra èn a e yepi wi fu si taki wi e yepi makandra.”—Robin.
BIJBELTEKST: „Ibriwan sma musu de gaw fu yere. A no musu de gaw fu taki.”—Yakobus 1:19.