Wi musu leri fu abi switifasi

SON sma no lobi trawan soso fu di den de tra fasi leki den, noso fu di den e taki wan tra tongo. Den sma dati abi wan takru denki fu trawan fosi den kon leri sabi den trutru.

Yu denki taki a bun fu no lobi wan sma bifo yu kon leri sabi a sma dati srefisrefi ete? Noso, a bun fu no lobi wan sma soso fu di a de tra fasi leki yu?— Nôno, a sani dati no bun, èn na so fasi yu no e sori switifasi tu. A no fu di wan sma de tra fasi leki wi, meki wi no musu abi switifasi gi en.

Denki a sani disi. Yu sabi wan sma di en skin abi wan tra kloru leki a di fu yu, noso di e taki wan tra tongo leki yu?— Kande yu sabi sma srefi di de tra fasi leki yu fu di den kisi mankeri, noso fu di den siki. Yu e sori switifasi nanga lobi gi sma di de tra fasi leki yu?—

Te wi e arki a Bigi Leriman, Yesus Krestes, dan wi sa abi switifasi gi ala sma. Èn wi sa du dati, awansi sortu kondre wan sma e komoto, noso awansi sortu kloru en skin abi. Wi musu abi switifasi gi a sma dati. A no ala sma e agri nanga dati, ma disi na wan sani di Yesus e leri wi. Meki wi taki fu a sani disi pikinso.

Wan Dyu di no ben lobi sma di ben de tra fasi leki en, ben kon na Yesus èn a aksi en: ’San mi musu du fu man libi fu têgo?’ Yesus ben sabi taki kande a man ben wani en fu taki dati wi musu abi switifasi soso gi sma di abi a srefi kloru skin leki wi, noso sma fu wi eigi kondre. Sobun, na presi taki Yesus piki na aksi ensrefi, a aksi a man: ’San a Wet fu Gado e taki dati wi musu du?’

A man piki en: ’Yu musu lobi Yehovah yu Gado nanga yu heri ati, èn yu musu lobi tra sma leki fa yu lobi yusrefi.’ Yesus taki: ’Yu piki bun. Tan du disi èn yu sa kisi têgo libi.’

Ma a man no ben wani sori switifasi noso lobi gi sma di ben de tra fasi leki en. Fu dati ede a aksi Yesus: „Suma na den tra sma di mi musu lobi?” Kande a ben wani Yesus fu taki: „Den mati fu yu na den tra sma di yu musu lobi”, noso, „Na den sma di gersi yu.” Fu piki na aksi fu a man, dan Yesus fruteri wan tori fu wan Dyu nanga wan Samariasma. A tori e taki so:

Wan man ben e waka a pasi fu a foto Yerusalem go na Yeriko. A man disi ben de wan Dyu. Di a ben de na pasi, fufuruman grabu en. Den naki en meki a fadon na gron, èn den teki en moni nanga en krosi. Den fufuruman fon en èn den libi en fu dede na sei pasi.

Wan syatu pisi ten baka dati, wan priester pasa na a pasi dati. A si a man di ben kisi bigi mankeri. San yu ben o du?— We, a priester waka pasa nomo na a tra sei fu a pasi. A no go luku srefi. A no du nowan enkri sani fu yepi a man.

Baka dati wan tra man waka pasa na tapu a pasi disi, èn a man disi ben de wan fayafaya bribiman. A ben de wan Leifisma di ben e du diniwroko na a tempel na ini Yerusalem. A ben o yepi a man?— Nôno. A du a srefi sani di a priester ben du.

Te fu kaba, wan Samariasma waka pasa. Yu kan si fa a e beni kon na ini a pasi?— A ben si taki a Dyu di ben e didon drape ben kisi bigi mankeri. Wan sani di yu musu frustan, na taki furu Samariasma nanga Dyu no ben lobi makandra kwetikweti (Yohanes 4:9). Sobun, a Samariasma disi ben o libi a man drape sondro fu yepi en? A ben o taki: ’Fu san ede mi musu yepi a Dyu disi? A no ben o yepi mi tu te mi ben kisi mankeri.’

We, a Samariasma luku a man di ben e didon na sei pasi, èn a ben e firi sari gi en. A no ben man libi en drape meki a dede. Fu dati ede, a saka fu en buriki, a waka go na a man, èn a bigin krin den soro fu en. A kanti oli nanga win na den tapu. Disi ben o yepi fu dresi den soro. Baka dati, a tai den soro nanga wan pisi krosi.

Safri a Samariasma opo a man di ben kisi mankeri, èn a poti en na tapu en buriki. Dan den waka a pasi safrisafri teleki den doro na wan pikin hotel. Drape a Samariasma yuru wan kamra pe a man ben kan tan, èn a sorgu en bun.

Now Yesus aksi a man nanga suma a ben e taki: ’Sortuwan fu den dri man disi yu denki sori taki a lobi a man di ben kisi mankeri?’ San yu ben o piki? A ben de a priester, a Leifisma, noso a Samariasma?—

A man piki: ’A man di teki ten fu sorgu a man di ben kisi mankeri, ben sori taki a ben lobi en.’ Yesus ben taki: ’Yu abi leti. Go du a srefi sani tu.’​—Lukas 10:25-37.

Dati ben de wan moi tori, a no so? A e sori krin suma na den sma di wi musu lobi. Dati a no soso den bun mati fu wi. Èn a no sma wawan di abi a srefi kloru skin leki wi, noso di e taki a srefi tongo leki wi. Yesus ben leri wi fu abi switifasi gi sma awansi fu pe den de, awansi fa den tan, noso awansi sortu tongo den e taki.

Na so Yehovah Gado de. A abi switifasi gi ala sma, awansi sortu kloru den skin abi, èn awansi sortu tongo den e taki. Yesus ben taki: ’Un Tata di de na hemel e meki a son fu en opo gi takru sma èn gi bun sma. Èn a e meki alen fadon gi bun sma èn gi takru sma.’ Fu dati ede, wi musu abi switifasi gi ala sma, neleki fa Gado abi dati.​—Mateyus 5:44-48.

Sobun, te yu e si taki wan sma kisi mankeri, dan san yu o du?— San yu o du te a sma de fu wan tra kondre, noso efu a kloru fu en skin e difrenti fu a di fu yu? Toku yu musu lobi a sma dati, èn yu musu yepi en. Efu yu feni taki yu pikin tumusi fu man yepi wan sma, dan yu kan aksi wan moro owru sma fu yepi en. Yu kan kari wan skowtu, noso wan skoromeester. Na so yu sa sori switifasi gi trawan, neleki fa a Samariasma ben du dati.

A Bigi Leriman wani taki wi musu abi switifasi. A wani taki wi musu yepi trawan, awansi suma na den. Na fu dati ede meki a fruteri a tori fu a Samariasma di ben abi switifasi.