San de prenspari trutru?

WAN dei, wan man kon na Yesus. A ben sabi taki Yesus ben koni trutru, èn fu dati ede a taigi en: ’Leriman, taigi mi brada fu gi mi wan tu fu den sani di a abi.’ A man ben feni taki a ben musu kisi wan tu fu den sani fu en brada.

Efu yu ben de Yesus, dan san yu ben o taki?— Yesus ben si taki a man ben abi wan problema. Ma a problema no ben de taki a ben abi den sani fanowdu di en brada ben abi. A problema fu a man ben de taki a no ben sabi san ben de prenspari trutru na ini a libi.

Meki wi denki a sani disi. San musu de moro prenspari gi wi? A musu de moi preisani, nyun krosi, noso den sortu sani dati?— Nôno, wan moro prenspari sani de. Èn disi na san Yesus ben wani leri a man. Fu dati ede, a fruteri en wan tori fu wan man di ben frigiti Gado. Yu wani yere en?—

A man disi ben gudu srefisrefi. A ben abi gron nanga maksin. Den sani di a ben prani ben e gro bun. A no ben abi nofo presi na ini den maksin fu en fu poti ala den nyanyan di a ben koti. Sobun, san a ben o du? We, a taigi ensrefi: ’Mi sa broko den maksin fu mi puru, èn mi o bow moro bigiwan. Baka dati mi o poti ala mi nyanyan nanga ala den bun sani fu mi na ini den nyun maksin disi.’

A guduman ben feni taki disi ben de wan koni sani fu du. A ben denki taki a ben du wan koni sani fu di a ben tyari furu sani kon na wan. A taigi ensrefi: ’Mi poti wan lo bun sani na wan sei. Mi o man libi fu den sani disi furu yari langa. Sobun, mi kan teki en safrisafri now. Mi sa nyan, dringi, èn prisiri.’ Ma a fasi fa a guduman ben denki no ben bun. Yu sabi fu san ede?— A ben e denki ensrefi nomo èn en a ben e denki en eigi prisiri. A ben frigiti Gado.

Fu dati ede Gado taki nanga a guduman. A taki: ’Yu donman yu. Yu o dede tideneti. We suma sa abi den sani di yu tyari kon na wan?’ A guduman dati ben kan gebroiki den sani dati baka di a dede?— Nôno, wan tra sma ben o kisi den. Yesus ben taki: „Na so sani e waka nanga a sma di e tyari gudu kon na wan gi ensrefi, ma di no gudu na ini Gado ai.”​—Lukas 12:13-21.

Yu no wani de leki a guduman dati, a no so?— A moro prenspari sani na ini en libi ben de fu kisi gudu. Dati no ben bun. Ala ten a ben wani moro. Ma a no ben „gudu na ini Gado ai”.

Furu sma de leki a guduman dati. Ala ten den wani moro. Ma a sani disi kan tyari bigi problema kon. Fu gi wan eksempre, yu abi preisani, a no so?— San na wan tu fu den preisani di yu abi? Taigi mi.— Kon meki wi taki dati wan fu den mati fu yu abi wan bal, wan popki, noso wan tra preisani di yu no abi. A ben o bun te yu e pruberi fu meki yu papa nanga yu mama bai a sani dati gi yu tu?—

Son leisi a kan gersi leki wan preisani prenspari trutru. Ma san e pasa nanga en baka wan pisi ten?— A e kon owru. A kan broko, èn te dati pasa, dan yu no wani en moro srefi. Iya, yu abi wan sani di warti moro preisani. Yu sabi san na dati?—

Dati na yu libi. Yu libi prenspari trutru, bika sondro yu libi yu no man du noti. Ma yu sa tan na libi soso te yu e du san Gado feni bun, a no so?— Sobun, no meki wi de leki a don guduman di ben frigiti Gado.

Pikin-nengre a no den wan-enkri sma di e du don sani son leisi neleki a guduman dati. Wan lo bigisma e du dati tu. Sonwan fu den ala ten wani moro leki san den abi. Kande den abi nyanyan gi a dei, krosi fu weri, nanga wan presi fu tan. Ma den wani moro. Den wani abi furu krosi. Èn den wani moro bigi oso. Den abi moni fanowdu fu man bai den sani disi. Fu dati ede, den sma disi e wroko tranga fu meki bun furu moni. Èn o moro moni den e kisi, o moro den wani abi.

Son bigisma e gebroiki so furu ten fu pruberi fu meki moni, taki den no abi ten fu de nanga den osofamiri. Èn den no abi ten gi Gado. A moni fu den man hori den na libi?— Nôno, a no man. Den kan gebroiki a moni fu den baka te den dede?— Nôno. Disi e kon fu di den dedewan no man du notinoti.​—Preikiman 9:5, 10.

A sani disi wani taki dati a no bun fu abi moni?— Nôno. Wi kan gebroiki moni fu bai nyanyan nanga krosi. Bijbel e taki dati moni e kibri sma (Preikiman 7:12). Ma efu wi lobi moni, dan wi o kisi problema. Wi sa de leki a don guduman di ben tyari gudu kon na wan gi ensrefi èn di no ben gudu na ini Gado ai.

San a wani taki fu de wan sma di gudu na ini Gado ai?— A wani taki dati wi musu poti Gado na a fosi presi na ini wi libi. Son sma e taki dati den e bribi na ini Gado. Den e denki taki a wan-enkri sani di den musu du na fu bribi nomo. Ma den sma disi gudu trutru na ini Gado ai?— Nôno, den de leki a guduman di ben frigiti Gado.

Noiti Yesus frigiti en Tata na ini hemel. A no ben pruberi fu meki wan lo moni. Èn a no ben abi furu gudu. Yesus ben sabi san ben de prenspari trutru na ini a libi. Yu sabi san na dati?— Iya, wi musu de sma di gudu na ini Gado ai.

Taigi mi, fa wi kan de sma di gudu na ini Gado ai?— Wi kan de sma di gudu na ini Gado ai te wi e du sani di e gi en prisiri. Yesus ben taki: „Ala ten mi e du san e plisi en” (Yohanes 8:29). Gado lobi te wi e du den sani di a wani wi fu du. Now, taigi mi, sortu sani yu kan du fu gi Gado prisiri?— Iya, yu kan leisi Bijbel, yu kan go na den Kresten konmakandra, yu kan begi Gado, èn yu kan yepi trawan fu kon leri sabi en. Den sani dati na trutru den moro prenspari sani na ini a libi.

Fu di Yesus ben gudu na ini Gado ai, meki Yehovah sorgu gi en. A ben gi Yesus têgo libi leki paiman. Efu wi de leki Yesus, dan Yehovah sa lobi wi èn a sa sorgu gi wi tu. Sobun, meki wi de leki Yesus, ma noiti wi musu de leki a guduman di ben frigiti Gado.