PISI 8
Te wan sari sani miti unu
„A sani disi e gi unu bigi prisiri srefisrefi, aladi unu ben de nanga sari fu wan syatu pisi ten fu di unu kisi difrenti tesi.”—1 Petrus 1:6
Awinsi yu e du ala san yu man fu abi wan koloku osofamiri-libi, toku sani kan pasa di yu no ben fruwakti. Den sani disi kan meki en muilek gi yu fu tan abi prisiri (Preikiman 9:11). Fu di Gado lobi wi, meki a e yepi wi te problema e miti wi. Efu yu e fiti den Bijbel rai di e kon now, dan yu nanga yu osofamiri o man horidoro, awansi o bigi den problema de.
1 FRUTROW TAPU YEHOVAH
SAN BIJBEL E TAKI: „Trowe ala un hebi na en tapu, bika a e broko en ede nanga unu” (1 Petrus 5:7). Noiti no denki taki na Gado meki taki yu abi problema (Yakobus 1:13). Te yu kon moro krosibei na Yehovah, dan a o gi yu a moro bun yepi (Yesaya 41:10). „Fruteri en ala san de na tapu un ati.”—Psalm 62:8.
Yu o kisi trowstu tu te yu e leisi èn e studeri Bijbel ibri dei. Dan yu o si taki Yehovah „e trowstu wi te wi de na ini ala sortu banawtu” (2 Korentesma 1:3, 4; Romesma 15:4). A pramisi taki a o gi yu „a freide fu Gado di bigi moro iniwan sani di libisma man frustan”.—Filipisma 4:6, 7, 13.
SAN YU KAN DU:
Begi Yehovah fu yepi yu fu no bruya èn fu man denki krin
Luku den difrenti sani di yu kan du fu lusu a problema èn teki a moro bun bosroiti
2 SORGU GI YUSREFI NANGA YU OSOFAMIRI
SAN BIJBEL E TAKI: „Sma di abi frustan e kon sabi moro fu wan tori èn koni sma e suku fu leri sani” (Odo 18:15). Pruberi fu sabi a fini fu a tori. Luku san ibri memre fu yu osofamiri abi fanowdu. Taki nanga den. Arki den.—Odo 20:5.
San yu kan du te wan lobiwan fu yu dede? No frede fu sori fa yu e firi. Hori na prakseri taki ’Yesus srefi ben krei’ (Yohanes 11:35; Preikiman 3:4). A prenspari tu fu rostu bun èn fu sribi nofo (Preikiman 4:6). Disi o gi yu krakti fu man pasa wan muilek situwâsi.
SAN YU KAN DU:
Abi a gwenti fu taki krin nanga yu osofamiri. Dan te problema miti unu, a o makriki gi den fu taki nanga yu
Taki nanga trawan di ben abi a srefi sortu problema leki yu
3 SUKU YEPI
SAN BIJBEL E TAKI: ’Wan trutru mati e sori lobi ala ten. En na wan brada di gebore te nowtu de’ (Odo 17:17). Den mati fu yu wani yepi yu, ma kande den no sabi san den musu du. No frede fu taigi den krin san unu abi fanowdu (Odo 12:25). Suku yepi na lepi Kresten di kan gi yu deki-ati. Den Bijbel rai di den o gi yu o yepi yu.—Yakobus 5:14.
Yu o feni a yepi di yu abi fanowdu te yu gwenti abi demakandra nanga sma di e bribi na ini Gado èn na ini den pramisi fu en. Yu o kisi furu trowstu tu te yu e yepi trawan di abi deki-ati fanowdu. Fruteri den fu Yehovah nanga den pramisi fu en. Yepi sma di abi problema, èn no hari yusrefi puru fu den sma di lobi yu èn di e broko den ede nanga yu.—Odo 18:1; 1 Korentesma 15:58.
SAN YU KAN DU:
Taki nanga wan bun mati èn meki a yepi yu
Taki krin san yu abi fanowdu