-
San na Gado Kownukondre?Yu kan de koloku fu têgo!—Wan moi fasi fu studeri Bijbel
-
-
LES 31
San na Gado Kownukondre?
A moro prenspari tori di Bijbel e taki fu en na Gado Kownukondre. Yehovah o gebroiki a Kownukondre dati fu meki grontapu tron wan paradijs baka. San na a Kownukondre? Fa wi du sabi taki a e tiri kaba? San a Kownukondre du kaba? Èn san a o du na ini a ten di e kon? Na ini a les disi èn den tu les baka a wan disi wi o piki den aksi disi.
1. San na Gado Kownukondre èn suma na a Kownu fu en?
A Kownukondre na wan regering di Yehovah Gado seti. Yesus Krestes na a Kownu fu en èn a e tiri komoto fu hemel (Mateyus 4:17; Yohanes 18:36). Bijbel e taki fu Yesus: „A o tiri fu têgo leki Kownu” (Lukas 1:32, 33). Yesus, a Kownu fu Gado Kownukondre, o tiri ala sma na grontapu.
2. Suma e tiri makandra nanga Yesus?
Yesus no e tiri en wawan. Bijbel e taki dati sma fu „ibri lo, tongo, pipel, nanga kondre . . . o tiri grontapu leki kownu” (Openbaring 5:9, 10). Omeni sma o tiri makandra nanga Krestes? Sensi di Yesus kon na grontapu milyunmilyun sma tron bakaman fu en. Ma 144.000 sma nomo o go na hemel fu tiri makandra nanga Yesus. (Leisi Openbaring 14:1-4.) Ala den tra bakaman fu en o libi na grontapu èn a Kownukondre o tiri den.—Psalm 37:29.
3. Fu san ede Gado Kownukondre bun moro den regering fu libisma?
Awinsi den libisma tiriman wani du bun sani, toku den no abi a makti fu du ala san den wani. Wan tra sani na taki baka wan pisi ten tra tiriman e teki den presi èn kande den no e meki muiti fu yepi a pipel. Ma nowan sma o teki a presi fu Yesus, a tiriman fu Gado Kownukondre. Gado „seti wan kownukondre di noiti no o kisi pori” (Danièl 2:44). Yesus o tiri heri grontapu èn a no o desko nowan sma. A lobi ala sma, a abi switifasi èn a e du san reti. A o leri sma fu abi den srefi fasi disi.—Leisi Yesaya 11:9.
SORTU TRA SANI YU KAN LERI?
Wi o si fu san ede Gado Kownukondre bun moro den regering fu libisma.
4. Gado Kownukondre o tiri heri grontapu
Yesus Krestes abi makti moro ala libisma tiriman. Leisi Mateyus 28:18 èn taki fu na aksi disi:
Fa a tekst disi e sori taki Yesus abi makti moro libisma tiriman?
Ibri leisi baka den kondre e kenki regering èn den tiriman e tiri wan pisi fu grontapu nomo. Ma fa a de nanga Gado Kownukondre? Leisi Danièl 7:14 èn taki fu den aksi disi:
Fu san ede a bun taki Gado Kownukondre „no o kisi pori”?
Fu san ede a bun taki a o tiri heri grontapu?
5. Libisma no musu tiri moro
Fu san ede Gado Kownukondre musu puru den libisma regering? Prei a FELEM èn taki fu na aksi disi:
Sortu problema libisma regering tyari kon?
Leisi Preikiman 8:9 èn taki fu den aksi disi:
Yu feni taki Gado Kownukondre musu puru den libisma regering? Fu san ede yu piki so?
6. Gado Kownukondre abi tiriman di e frustan wi
Fu di Yesus, a Kownu fu wi, ben libi leki wan libisma na grontapu meki a kan „frustan den swakifasi fu wi” (Hebrewsma 4:15). Den 144.000 man nanga uma di Yehovah teki fu tiri makandra nanga Yesus, komopo „fu ibri lo, tongo, pipel, nanga kondre”.—Openbaring 5:9.
Yesus nanga den sma di e tiri makandra nanga en e frustan fa wi e firi èn den sabi san e miti wi. Fa yu feni en a sani disi?
Yehovah teki man nanga uma fu difrenti kondre fu tiri makandra nanga Yesus
7. Den wet fu Gado Kownukondre moro bun
Den regering e pruberi fu meki wet di e tyari wini gi a pipel èn di e kibri den. Gado Kownukondre abi wet tu èn ala sma di wani taki a Kownukondre tiri den musu gi yesi na den wet disi. Leisi 1 Korentesma 6:9-11 èn taki fu den aksi disi:
Fa yu denki taki grontapu o de te ala sma e gi yesi na den wet fu Gado?a
Yu denki taki Yehovah abi a reti fu fruwakti taki wi gi yesi na den wet disi? Fu san ede yu piki so?
Fa a tekst disi e sori taki den sma di no e libi leki fa Gado wani kan kenki?—Luku vers 11.
Den regering e pruberi fu meki wet di e tyari wini gi a pipel èn di e kibri den. Ma den wet fu Gado Kownukondre moro bun
WAN SMA KAN AKSI YU: „San na Gado Kownukondre?”
San yu ben o piki?
SAN YU LERI?
Gado Kownukondre na wan trutru regering na ini hemel di o tiri heri grontapu.
Fa yu ben o piki den aksi disi?
Suma na den tiriman fu Gado Kownukondre?
Fu san ede Gado Kownukondre bun moro libisma regering?
San Yehovah e fruwakti fu den sma di wani taki a Kownukondre tiri den?
TRA SANI DI YU KAN LUKU
Na artikel disi e sori pe a Kownukondre de.
Fu san ede Yehovah Kotoigi e horibaka gi Gado Kownukondre na presi fu horibaka gi libisma regering?
Na ini na artikel disi yu o si san Bijbel e taki fu den 144.000 sma di Yehovah teki fu tiri makandra nanga Yesus.
Fu san ede wan uma di ben de na strafu-oso bigin bribi taki na Gado wawan kan tyari kenki kon na grontapu?
„Het antwoord op mijn vragen over onrecht” (Ontwaakt!, november 2011)
-
-
Gado Kownukondre e tiri kaba!Yu kan de koloku fu têgo!—Wan moi fasi fu studeri Bijbel
-
-
LES 32
Gado Kownukondre e tiri kaba!
Gado Kownukondre bigin tiri na ini hemel na ini a yari 1914. Na ini a yari dati den lasti dei fu a grontapu disi bigin tu. Fa wi du sabi dati? Wi o luku san den Bijbel profeititori e taki, wi o luku san e pasa na grontapu èn fa sma e tyari densrefi sensi 1914.
1. San Bijbel profeititori e sori?
A Bijbel buku Danièl e sori taki Gado Kownukondre bigin tiri na a kaba fu wan ten di Bijbel e kari „seibi pisi ten” (Danièl 4:16, 17). Hondrohondro yari baka dati, Yesus ben e kari a srefi pisi ten disi „a reti ten fu den trakondre sma” èn a ben taki dati a no ben kon na wan kaba ete (Lukas 21:24). Wi o si taki den seibi pisi ten kon na wan kaba na ini a yari 1914.
2. San e pasa na grontapu sensi 1914 èn fa sma e tyari densrefi?
Den disipel fu Yesus ben aksi en: „San o de a marki taki yu kon èn taki a kaba fu a grontapu disi de krosibei?” (Mateyus 24:3) Yesus fruteri den fu den sani di ben o pasa baka di a ben o bigin tiri leki Kownu fu Gado Kownukondre. A ben taigi den taki feti, angriten nanga gronseki ben o de. (Leisi Mateyus 24:7.) Bijbel ben taki tu taki a fasi fa sma ben o tyari densrefi na ini „den lasti dei” ben o meki taki a ten ben o tranga (2 Timoteyus 3:1-5). Ala den sani disi ben de krin fu si sensi 1914.
3. Fu san ede sani kon ogri so na grontapu sensi di Gado Kownukondre bigin tiri?
Syatu baka di Yesus tron Kownu fu Gado Kownukondre na ini hemel, a go feti nanga Satan nanga den ogri yeye. Satan lasi a feti dati. Bijbel e taki dati „den fringi en go na grontapu èn den fringi den engel fu en go na grontapu makandra nanga en” (Openbaring 12:9, 10, 12). Satan e atibron srefisrefi fu di a sabi taki a o kisi pori. Fu dati ede a e meki sma na heri grontapu pina. A sani disi e yepi wi fu frustan fu san ede sani ogri so na grontapu. Gado Kownukondre o lusu ala den problema disi.
SORTU TRA SANI YU KAN LERI?
Wi o luku fa wi du sabi taki a Kownukondre bigin tiri na ini 1914 èn wi o luku tu fa wi kan sori taki wi e bribi a sani disi.
4. Bijbel profeititori e sori taki Gado Kownukondre bigin tiri na ini 1914
Gado meki Kownu Nebukadnesar fu owruten Babilon kisi wan dren pe a sori en san ben o pasa na ini a ten fu en èn na ini a ten fu wi. Na ini Bijbel yu kan leisi san a dren èn fa Danièl fruklari a dren fu en. A de krin taki a dren ben abi fu du nanga a Kownukondre fu Nebukadnesar èn nanga Gado Kownukondre.—Leisi Danièl 4:17.a
Leisi Danièl 4:20-26 èn gebroiki a faki tapu bladzijde 133 fu piki den aksi disi:
(A) San Nebukadnesar si na ini a dren fu en?—Luku vers 20 nanga 21.
(B) San ben o pasa nanga a bon?—Luku vers 23.
(C) San ben o pasa na a kaba fu den „seibi pisi ten”?—Luku vers 26.
San a dren fu a bon e leri wi fu Gado Kownukondre
A PROFEITITORI (Danièl 4:20-36)
A e tiri
(A) Wan bigi bon
A no e tiri moro
(B) „Koti a bon trowe” èn meki „seibi pisi ten pasa”
A bigin tiri baka
(C) „Yu o tiri leki kownu baka”
A fosi leisi di a profeititori disi kon tru . . .
(D) Suma a bon ben e prenki?—Luku vers 22.
(E) Fu san ede a no ben e tiri moro?—Leisi Danièl 4:29-33.
(F) San pasa nanga Nebukadnesar na a kaba fu den „seibi pisi ten”? —Leisi Danièl 4:34-36.
A FOSI LEISI DI A PROFEITITORI KON TRU
A e tiri
(D) Nebukadnesar, Kownu fu Babilon
A no e tiri moro
(E) Baka 606 F.K.b Nebukadnesar lasi en frustan èn a no ben man tiri moro seibi yari langa
A bigin tiri baka
(F) Nebukadnesar kisi en frustan baka èn a bigin tiri baka
A di fu tu leisi di a profeititori kon tru . . .
(G) Suma a bon ben e prenki?—Leisi 1 Kroniki 29:23.
(H) Fu san ede den no ben e tiri moro? Fa wi du sabi taki Israel no ben abi kownu di Yesus ben de na grontapu?—Leisi Lukas 21:24.
(I) O ten Gado Kownukondre ben seti èn pe a seti?
A DI FU TU LEISI DI A PROFEITITORI KON TRU
A e tiri
(G) Den kownu fu Israel ben e teki presi gi Gado
A no e tiri moro
(H) Yerusalem kisi pori èn 2520 yari langa yu no ben abi kownu di ben teki presi gi Gado
A bigin tiri baka
(I) Yesus bigin tiri na ini hemel leki Kownu fu Gado Kownukondre
O langa den seibi pisi ten ben teki?
Son pisi fu Bijbel e yepi wi fu frustan tra pisi fu Bijbel. Fu eksempre, a Bijbel buku Openbaring e taki dati dri nanga wan afu pisi ten na a srefi leki 1260 dei (Openbaring 12:6, 14). Seibi pisi ten na tu tron a nomru dati. Dati na 2520 dei. Na ini Bijbel son leisi a wortu dei wani taki wan yari (Esekièl 4:6). Na so a de nanga den seibi pisi ten di kari na ini a buku Danièl. Den seibi pisi ten na 2520 yari.
5. Grontapu kenki sensi 1914
Yesus ben taki san ben o pasa na grontapu, baka te a ben o tron Kownu. Leisi Lukas 21:9-11 èn taki fu na aksi disi:
Sortuwan fu den sani disi yu si noso yu yere fu en?
Na apostel Paulus ben sori fa sma ben o tyari densrefi na ini den lasti dei fu a grontapu disi. Leisi 2 Timoteyus 3:1-5 èn taki fu na aksi disi:
Yu feni taki na so sma e tyari densrefi na ini a ten disi?
6. Fa yu kan sori taki yu e bribi taki Gado Kownukondre e tiri kaba?
Leisi Mateyus 24:3, 14 èn taki fu den aksi disi:
Sortu prenspari wroko di e du now e sori taki Gado Kownukondre e tiri kaba?
Fa yu kan yepi du a wroko disi?
Gado Kownukondre e tiri kaba èn a dei e doro taki a o tiri heri grontapu. Leisi Hebrewsma 10:24, 25 èn taki fu na aksi disi:
San wi musu du, now di wi e „si a dei e kon krosibei”?
Efu yu ben sabi wan sani di ben o yepi trawan èn di ben o kibri den libi, san yu ben o du?
WAN SMA KAN AKSI YU: „Fu san ede Yehovah Kotoigi e taki so furu fu 1914?”
San yu ben o piki en?
SAN YU LERI?
Bijbel profeititori èn den sani di e pasa na grontapu e sori taki Gado Kownukondre e tiri kaba. Wi e sori taki wi e bribi disi te wi e preiki fu a Kownukondre èn te wi e go na den gemeente konmakandra.
Fa yu ben o piki den aksi disi?
San pasa na a kaba fu den seibi pisi ten di kari na ini a buku Danièl?
Fu san ede yu e bribi taki Gado Kownukondre bigin tiri na ini 1914?
Fa yu kan sori taki yu e bribi taki a Kownukondre e tiri kaba?
TRA SANI DI YU KAN LUKU
Na ini na artikel disi yu kan leisi san historia skrifiman nanga tra sma e taki fu a fasi fa grontapu kenki sensi 1914.
Na ini na artikel disi yu kan leisi fa a profeititori na Mateyus 24:14 kenki a libi fu wan man.
„Mi ben lobi honkbal moro ala tra sani!” (A Waktitoren Nr. 3 2017)
Fa wi du sabi taki a profeititori di skrifi na ini Danièl kapitel 4 abi fu du nanga Gado Kownukondre?
„O ten Gado Kownukondre bigin tiri? (Pisi 1)” (A Waktitoren, 1 oktober 2014)
Fa wi du sabi taki den „seibi pisi ten” di kari na ini Danièl kapitel 4 kon na wan kaba na ini 1914?
„O ten Gado Kownukondre bigin tiri? (Pisi 2)” (A Waktitoren, 1 november 2014)
a Luku den tu lasti artikel na ini a pisi „Tra sani di yu kan luku” na ini a les disi.
b F.K. wani taki Fosi Krestes.
-
-
Den sani di a Kownukondre o duYu kan de koloku fu têgo!—Wan moi fasi fu studeri Bijbel
-
-
LES 33
Den sani di a Kownukondre o du
Gado Kownukondre e tiri kaba na ini hemel. Heri esi a o tyari bigi kenki kon na grontapu. Kon meki wi luku wan tu fu den bun sani di a Kownukondre o du te a o tiri grontapu.
1. Fa Gado Kownukondre o sorgu taki freide de na grontapu èn taki sani waka na wan reti fasi?
Yesus, a Kownu fu Gado Kownukondre, o pori ala ogrisma èn a o puru ala regering na ini a feti fu Armagedon (Openbaring 16:14, 16). Na a ten dati a pramisi disi fu Bijbel o kon tru: „Ete wan syatu pisi ten èn den ogriwan no sa de moro” (Psalm 37:10). Leki Kownu fu a Kownukondre, Yesus o sorgu taki freide de na grontapu èn taki sani waka na wan reti fasi.—Leisi Yesaya 11:4.
2. Fa a libi o de te a wani fu Gado o pasa na grontapu?
Gado Kownukondre o sorgu taki ’den reti-ati sma kisi grontapu èn taki den libi fu têgo na en tapu’ (Psalm 37:29). Prakseri fa a o de te soso bun sma de na grontapu di lobi Yehovah èn di lobi makandra! Nowan sma o siki èn ala sma o libi fu têgo.
3. San Gado Kownukondre o du baka te a pori ogrisma?
Baka te Yesus pori den ogrisma, a o tiri leki Kownu 1000 yari langa. Na ini a pisi ten dati, en nanga den 144.000 sma di o tiri makandra nanga en o yepi sma na grontapu fu kon fri fu sondu. Baka den 1000 yari dati a heri grontapu o de wan moi paradijs èn ala sma o de koloku fu di den e gi yesi na den wet fu Yehovah. Te dati pasa, dan Yesus o gi a Kownukondre baka na en Papa, Yehovah. Dan Yehovah en ’nen o santa’ na heri grontapu (Mateyus 6:9, 10). Ala sma o si taki Yehovah na wan bun Tiriman di lobi sma. Yehovah o pori Satan, den ogri yeye nanga iniwan sma di e opo ensrefi teige en na a ten dati (Openbaring 20:7-10). Den bun sani di Gado Kownukondre o du na grontapu o tan fu têgo.
SORTU TRA SANI YU KAN LERI?
Wi o si fu san ede wi kan de seiker taki Gado o gebroiki a Kownukondre fu du ala san a pramisi na ini Bijbel.
4. Gado Kownukondre o puru ala den regering fu libisma
„Sensi di libisma bigin tiri tra libisma, sani no waka bun gi den” (Preikiman 8:9). Yehovah o gebroiki en Kownukondre fu kenki a sani disi.
Leisi Danièl 2:44 nanga 2 Tesalonikasma 1:6-8. Baka dati taki fu den aksi disi:
San Yehovah nanga en Manpikin Yesus o du nanga den libisma tiriman èn nanga den sma di e horibaka gi den?
Fu san ede yu de seiker taki Yehovah nanga Yesus o du sani na wan reti fasi?
5. Yesus na a moro bun Kownu
Leki Kownu fu Gado Kownukondre, Yesus o du furu bun sani gi sma na grontapu. Prei a FELEM fu si fa Yesus sori taki a wani yepi libisma èn taki a kisi a makti fu Gado fu du dati.
Di Yesus ben de na grontapu a sori san a Kownukondre o du. Sortuwan fu den blesi di kari dyaso yu wani si? Leisi den tekst di e taki fu den blesi disi.
DI YESUS BEN DE NA GRONTAPU . . .
KOMOTO FU HEMEL YESUS . . .
a ben basi a weer.—Markus 4:36-41.
o sorgu taki ala sani na ini a natuur kon bun baka.—Yesaya 35:1, 2.
a gi dusundusun sma nyanyan.—Mateyus 14:17-21.
o sorgu taki nowan sma na grontapu abi angri.—Psalm 72:16.
a dresi furu sikisma.—Lukas 18:35-43.
o sorgu taki ala sma de gosontu.—Yesaya 33:24.
a gi sma libi baka.—Lukas 8:49-55.
o wiki dedesma èn a o puru dede.—Openbaring 21:3, 4.
6. Gado Kownukondre o sorgu taki wi abi wan bun libi na ini a ten di e kon
A Kownukondre o sorgu taki libisma kisi a bun libi di Yehovah ben wani gi den sensi a bigin. Den o libi fu têgo na ini wan paradijs na grontapu. Prei a FELEM fu si fa Yehovah e gebroiki en Manpikin, Yesus, fu du san a abi na prakseri.
Leisi Psalm 145:16 èn taki fu na aksi disi:
Fa yu feni en taki Yehovah o „gi ala libisani san den e angri fu kisi”?
SON SMA E TAKI: „Efu wi alamala wroko makandra, wi kan lusu den problema fu grontapu.”
Sortu problema Gado Kownukondre o lusu di libisma regering no man lusu?
SAN YU LERI?
Gado Kownukondre o du san Gado ben abi na prakseri gi libisma. A o meki a heri grontapu tron wan paradijs pe soso bun sma o libi. Ala sma o dini Yehovah èn den o libi fu têgo.
Fa yu ben o piki den aksi disi?
Fa Gado Kownukondre o santa a nen fu Yehovah?
Fu san ede yu e bribi taki Gado Kownukondre o du san Gado e pramisi na ini Bijbel?
Sortuwan fu den bun sani di a Kownukondre o du, yu wani si?
TRA SANI DI YU KAN LUKU
Na ini na artikel disi yu o si san na Armagedon.
Luku san o psa na a ten di Yesus kari a „bigi banawtu”.—Mateyus 24:21.
Na ini a felem disi yu o si fa wan osofamiri e prakseri fa a o de na ini a paradijs.
Na ini na artikel „Furu aksi ben e dangra mi” yu kan leisi fa wan man di ben opo ensrefi teige lanti kon frustan taki na Gado wawan man lusu den problema fu wi.
-