San o yepi yu fu tan studeri Bijbel?

A o tyari furu wini kon gi yu te yu e studeri Bijbel. Ma a no ala ten a makelek. Kande yu e aksi yusrefi son leisi efu yu musu tan studeri Bijbel. Fu san ede a bun fu meki muiti fu tan studeri? San kan yepi yu fu tan studeri awinsi yu e kisi problema?

1. Fu san ede a prenspari fu studeri Bijbel?

„A wortu fu Gado de na libi. A abi krakti” (Hebrewsma 4:12). Bijbel na wan prenspari buku fu di a e sori fa Gado e denki fu yu èn a e sori taki a lobi yu. Te yu o studeri Bijbel, dan yu no o kon sabi sani nomo, ma a o yepi yu fu kon koni. Boiti dati, yu o kon sabi sortu moi sani Gado o du gi wi na ini a ten di e kon. San moro prenspari na taki Bijbel e yepi yu fu tron wan mati fu Yehovah. Te yu e studeri Bijbel a o yepi yu fu abi wan moro bun libi.

2. Fu san ede den leri fu Bijbel musu prenspari gi yu?

Den leri fu Bijbel abi furu waarde. Dati meki Bijbel e gi wi deki-ati fu ’bai san tru èn fu no seri en’ (Odo 23:23). Te den leri fu Bijbel prenspari gi yu, dan yu o meki muiti fu tan studeri awinsi a no makelek.​—Leisi Odo 2:4, 5.

3. Fa Yehovah kan yepi yu fu tan studeri?

Yehovah na yu Mekiman nanga yu Mati. A wani yepi yu fu kon sabi en moro bun. A kan gi yu „a firi nanga a krakti fu du sani di e plisi en”. (Leisi Filipisma 2:13.) Sobun, efu a muilek son leisi fu studeri noso fu du san yu leri, Yehovah kan yepi yu. Te yu e kisi tesi noso te sma e gens yu a kan gi yu a krakti fu go doro. Begi Yehovah ibri leisi baka fu yepi yu fu tan studeri Bijbel.​—1 Tesalonikasma 5:17.

SORTU TRA SANI YU KAN LERI?

4. Si a Bijbelstudie fu yu leki wan prenspari sani

Son leisi wi abi so furu fu du taki a gersi leki wi no abi ten fu studeri Bijbel. San kan yepi yu? Leisi Filipisma 1:10 èn taki fu den aksi disi:

• San yu e si leki „den moro prenspari sani” na ini a libi?

• Fa yu kan sori taki a Bijbelstudie prenspari gi yu?

1. Efu yu e furu na emre nanga santi fosi, dan den ston no o man go na inisei

2. Efu yu poti den ston fosi na ini na emre, dan yu o man poti bijna ala a santi. Na so a de tu taki te yu e du „den moro prenspari sani” fosi, yu o abi ten gi tra sani tu

Libisma abi Gado fanowdu. A Bijbelstudie o yepi yu fu kon sabi en èn fu anbegi en. Leisi Mateyus 5:3 èn taki fu na aksi disi:

• Sortu wini wi e kisi te wi e meki ten fu studeri Bijbel?

5. Tan studeri awinsi sma wani tapu yu fu du dati

FELEM: Yehovah blesi mi fu di mi horidoro (5:22)

• San den mati nanga den famiri fu Francesco du di a taigi den san a ben leri?

• Sortu blesi a kisi di a go doro nanga a studie?

Leisi 2 Timoteyus 2:24, 25 èn taki fu den aksi disi:

• Fa den famiri nanga den mati fu yu feni den sani di yu e leri?

• Soleki fa a tekst disi e sori, dan san yu musu du te sma no breiti taki yu e studeri Bijbel? Fu san ede yu musu du dati?

6. Frutrow tapu Yehovah

FELEM: Yehovah e yepi wi fu tyari kenki kon (3:56)

• Sortu kenki Jim tyari kon fu plisi Yehovah?

• San yu lobi fu na eksempre fu en?

Leisi Hebrewsma 11:6 èn taki fu den aksi disi:

• San Yehovah o du gi den sma „di e suku en fayafaya”, dati na den sma di e meki muiti fu kon sabi en èn fu plisi en?

• Te yu e luku a tekst disi, dan fa Yehovah feni en taki yu e du muiti fu studeri Bijbel?

SAN YU LERI?

A no ala ten a makelek fu studeri Bijbel, ma te yu e tan du dati yu kan kisi têgo libi. Frutrow tapu Yehovah, dan a o blesi yu.

Fa yu ben o piki den aksi disi?

• Fu san ede den leri fu Bijbel prenspari gi yu?

• Fa yu „kan kon sabi san na den moro prenspari sani”?

• Fu san ede yu musu aksi Yehovah fu yepi yu fu tan studeri Bijbel?

TRA SANI DI YU KAN LUKU

Na artikel disi e taki fu fo sani di yepi sma fu gebroiki den ten na wan bun fasi.

„Hoe ga je goed met je tijd om?” (Ontwaakt!, februari 2014)

Na ini a felem disi yu o si fa Yehovah yepi wan uma. En masra no ben frustan fu san ede a ben kenki en libi fu kan plisi Gado.

Yehovah e gi wi a krakti fu tyari wi eigi lai (5:05)

Na ini a felem disi wi o si fa wan man kon dini Yehovah fu di en frow tan studeri Bijbel.

Mi tyari waarheid go na fesi krutu (6:30)

Son sma e taki dati Yehovah Kotoigi e pori famiri. Ma a sani dati tru?

„Yehovah Kotoigi e broko osofamiri noso den e meki den kon moro tranga?” (Web-artikel)