LES 05
Bijbel na wan kado di Gado gi wi
Yehovah gi wi wan moi kado. Dati na Bijbel. A prati na ini 66 buku. Kande yu e aksi yusrefi: ’Fa wi kisi a Bijbel? Suma skrifi en?’ Na ini a les disi wi o piki den aksi disi.
1. Efu na libisma skrifi Bijbel, dan fu san ede wi kan taki dati a kon fu Gado?
Sowan 40 man skrifi Bijbel èn a teki sowan 1600 yari fu skrifi en. A fosi buku skrifi na ini a yari 1513 Fosi Krestes èn a lasti buku skrifi na ini a yari 98 Baka Krestes. Sonwan fu den skrifiman ben de skapuman, trawan ben de fisiman èn wan tu ben de kownu. Aladi na difrenti man skrifi Bijbel, toku ala sani di skrifi na ini e kruderi nanga makandra. Fa dati kan? Fu di na Gado meki sma skrifi Bijbel. (Leisi 1 Tesalonikasma 2:13.) Den man di skrifi Bijbel no ben skrifi den eigi sani, ma den sani di den ben e skrifi „ben komoto fu Gado, soleki fa a santa yeyea ben e sori den” (2 Petrus 1:21). Gado gebroiki en santa yeye fu meki den man disi kon sabi san den ben musu skrifi.—2 Timoteyus 3:16.
2. Ala sma man feni wan Bijbel?
„Sma fu ala kondre, lo, tongo, nanga pipel” kan feni wan Bijbel fu man leisi a bun nyunsu di de na ini. (Leisi Openbaring 14:6.) Gado sorgu taki Bijbel de fu feni na ini moro tongo leki iniwan tra buku. Bijna ala sma man feni wan Bijbel, awinsi pe den e libi èn awinsi sortu tongo den e taki.
3. Fa Yehovah sorgu taki wi abi a Bijbel te now ete?
Bijbel ben skrifi na tapu sani di ben pori makelek. Ma man di ben lobi Bijbel ben e skrifi en abra ibri tron baka. Son sma di ben abi furu makti ben pruberi fu pori Bijbel. Ma tra sma ben de klariklari fu kibri Bijbel aladi den ben kan lasi den libi. Nowan sma èn nowan sani ben kan tapu Yehovah fu gi wi en Wortu, Bijbel. Bijbel e taki: „Den sani di Gado taki e tan fu ala ten.”—Yesaya 40:8.
SORTU TRA SANI YU KAN LERI?
Wi o si fa Gado gebroiki difrenti man fu skrifi Bijbel, fa a sorgu taki wi abi en te now ete èn fa a sorgu taki bijna ala sma na grontapu kan feni wan.
4. Bijbel srefi e sori taki a kon fu Gado
Prei a FELEM. Baka dati leisi 2 Timoteyus 3:16 èn taki fu den aksi disi:
Efu na libisma skrifi Bijbel, dan fu san ede wi e kari en a Wortu fu Gado?
Yu e bribi taki Gado ben kan meki libisma kon sabi san den ben musu skrifi?
A sekretarsi e skrifi a brifi, ma a boskopu na fu a sma di taigi en san a musu skrifi. Na so a de tu taki libisma skrifi Bijbel, ma a boskopu na fu Gado
5. Sma no ben man pori Bijbel
Fu di Bijbel kon fu Gado, meki a sorgu taki wi abi en te now ete. Na ini a ten di pasa, furu man di ben abi makti pruberi fu pori Bijbel. Den kerki fesiman no ben wani taki sma leisi Bijbel. Ma toku yu ben abi furu sma di ben de klariklari fu kibri Bijbel, aladi sma ben gens den èn aladi den ben kan lasi den libi. Efu yu wani sabi moro fu so wan man, dan prei a FELEM èn taki fu den aksi disi:
Now di yu sabi o furu muiti sma du fu kibri Bijbel, dan yu no wani leisi en? Fu san ede yu e piki so?
Leisi Psalm 119:97 èn taki fu na aksi disi:
Fu san ede someni sma du so furu muiti fu vertaal Bijbel èn fu prati en?
6. Wan buku gi ala sma
Bijbel vertaal moro iniwan tra buku èn bijna ala sma kan feni wan. Leisi Tori fu den apostel 10:34, 35 èn taki fu den aksi disi:
Fu san ede Gado ben wani taki en Wortu vertaal na ini so furu tongo èn taki so furu fu en meki?
San yu lobi fu Bijbel?
Bijna
ala sma
na grontapu
man feni wan Bijbel na ini wan tongo di den e frustan
A heri Bijbel noso pisi fu en
de fu feni na ini moro leki
3000
tongo
5.000.000.000
Disi na a nomru fu Bijbel di meki
Fu nowan tra buku so furu de
SON SMA E TAKI: „Bijbel na wan owru buku di libisma skrifi.”
San yu e denki?
Sortu buweisi de taki Bijbel na a Wortu fu Gado?
SAN YU LERI?
Bijbel na a Wortu fu Gado èn Gado sorgu taki ala sma kan feni wan.
Fa yu ben o piki den aksi disi?
Fa Gado meki den man di skrifi Bijbel kon sabi san den ben musu skrifi?
Sortuwan fu den sani di yu leri na ini a les disi e sori yu taki Bijbel na a Wortu fu Gado?
Fa yu e firi now di yu sabi taki Gado du so furu muiti fu gi yu a Wortu fu en?
TRA SANI DI YU KAN LUKU
Na ini na artikel disi yu kan leisi fa sma skrifi Bijbel abra èn fa den vertaal en.
„Fa a du kon taki wi abi Bijbel teleki now?” (Ontwaakt!, november 2007)
Na ini A Waktitoren disi yu kan leisi fu dri sani di ben kan meki taki wi no abi Bijbel na ini a ten disi.
„Bijbel—Fa a du kon taki a de te now ete?” (A Waktitoren Nr. 4 2016)
Na ini a felem disi yu o si fa sma du muiti fu vertaal Bijbel awinsi fa tra sma ben gens den.