LES 26
Fu san ede ogri e pasa èn fu san ede libisma e pina?
Te wan ogri sani pasa, dan furu sma e aksi densrefi: „Fu san ede a sani disi pasa?” Wi breiti taki Bijbel e piki na aksi disi.
1. Fa Satan meki taki ogri bigin pasa na grontapu?
Satan Didibri no ben wani saka ensrefi moro ondro Gado. Satan ben wani tiri tra sma èn dati meki a kori den fosi libisma, Adam nanga Eva, fu trangayesi Gado. Fa Satan du a sani disi? A fruteri Eva wan lei (Genesis 3:1-5). A ben meki Eva denki taki wan bun sani ben de di den ben musu kisi, ma Yehovah no ben wani gi den. A meki a denki taki libisma o de moro koloku efu den no e gi yesi na Gado. Satan fruteri a fosi lei. A taigi Eva taki a no o dede. Dati meki Bijbel e kari en „wan leiman èn a tata fu ala lei”.—Yohanes 8:44.
2. San Adam nanga Eva bosroiti fu du?
Yehovah ben gi Adam nanga Eva furu bun sani. A ben taigi den taki den ben mag nyan fu ala den bon na ini a dyari fu Eden, boiti wán (Genesis 2:15-17). Ma toku den bosroiti fu nyan a froktu fu a bon dati. Eva „piki wan froktu fu a bon, dan a nyan fu en”. Bakaten, Adam „srefi bigin nyan” a froktu (Genesis 3:6). Den ala tu trangayesi Gado. Fu di Adam nanga Eva no ben abi sondu, meki den no ben abi a firi fu du ogri. Sobun, di den trangayesi Gado, dan den ben du dati fu espresi. Den sondu èn den sori taki den no ben wani Gado leki den tiriman. A bosroiti di den teki meki den pina furu.—Genesis 3:16-19.
3. Sortu bakapisi a bosroiti fu Adam nanga Eva ben abi gi wi?
Di Adam nanga Eva trangayesi Gado den tron sondusma èn dati meki ala den bakapikin fu den kisi sondu. Bijbel e taki fu Adam: „Wán man meki sondu kon na grontapu èn sondu tyari dede kon. Dati meki ala sma e dede.”—Romesma 5:12.
Difrenti reide de fu san ede wi e pina. Son leisi wi e pina fu di wi e teki don bosroiti. Ma son leisi wi e pina fu di tra sma e teki don bosroiti. Èn son leisi wi e pina fu di sani e pasa di wi no ben fruwakti.—Leisi Preikiman 9:11.
SORTU TRA SANI YU KAN LERI?
Wi o si taki a no Gado e meki ogri pasa na grontapu èn taki a no en e meki wi pina. Wi o si tu fa a e firi te wi e pina.
4. A sma di e meki ogri pasa
Furu sma e bribi taki na Gado e tiri grontapu. A sani dati tru? Prei a FELEM.
Leisi Yakobus 1:13 nanga 1 Yohanes 5:19. Baka dati taki fu na aksi disi:
Na Gado e meki taki wi e pina èn taki ogri e pasa?
5. Fa sani waka sensi di Satan bigin tiri grontapu?
Leisi Genesis 3:1-6 èn taki fu den aksi disi:
Sortu lei Satan fruteri?—Luku vers 4 nanga 5.
San Satan taki fu meki Eva denki taki Yehovah no ben wani gi en wan bun sani?
San Satan taki fu meki sma bribi taki den no abi Yehovah leki tiriman fanowdu fu de koloku?
Leisi Preikiman 8:9 èn taki fu na aksi disi:
A no Yehovah na a tiriman fu grontapu. Fa yu feni taki sani e go na grontapu?
Adam nanga Eva no ben abi sondu èn den ben libi na ini a Paradijs. Ma den arki Satan èn den trangayesi Yehovah
Baka di Adam nanga Eva trangayesi Gado, den bakapikin fu den kisi sondu. Dati meki sma e pina èn den e dede
Yehovah o puru sondu nanga dede èn sma no o pina moro. Libisma o libi na ini wan paradijs baka
6. Yehovah e sari te wi e pina
Fa Gado e firi te a e si taki wi e pina? Luku san Kownu David nanga na apostel Petrus skrifi. Leisi Psalm 31:7 nanga 1 Petrus 5:7. Baka dati taki fu na aksi disi:
Fa yu feni en taki Yehovah e si te yu e pina èn taki a sani dati e meki en sari?
7. Gado o sorgu taki libisma no o pina moro
Leisi Yesaya 65:17 nanga Openbaring 21:3, 4. Baka dati taki fu na aksi disi:
Awinsi sortu ogri miti libisma, Yehovah kan meki ala sani kon bun baka. Fa a sani disi e trowstu yu?
Yu ben sabi a sani disi?
Di Satan fruteri a fosi lei, a pori Yehovah nen. A meki sma bribi taki Yehovah a no wan bun tiriman èn taki a no lobi wi. Te Yehovah o sorgu taki nowan sma e pina moro, dan ala sma o si taki Satan lei gi en. Na a fasi dati a o sori taki en na a moro bun tiriman. Disi na wan fu den moro prenspari sani di ala sma musu kon frustan.—Mateyus 6:9, 10.
SON SMA E TAKI: „Gado e meki wi pina fu di a wani tesi wi.”
Fa yu ben o piki so wan sma?
SAN YU LERI?
Na Satan Didibri nanga den fosi tu libisma meki taki ogri de now na grontapu. Yehovah e sari te wi e pina èn heri esi a o sorgu taki wi no o pina moro.
Fa yu ben o piki den aksi disi?
Sortu lei Satan Didibri fruteri Eva?
Sortu bakapisi a bosroiti fu Adam nanga Eva ben abi gi wi?
Fa wi du sabi taki Yehovah e sari te wi e pina?
TRA SANI DI YU KAN LUKU
Na ini na artikel disi yu o si san Bijbel e taki fu sondu.
Na artikel disi e taki fu den lei di Satan Didibri fruteri na ini a dyari fu Eden.
„Fu san ede Gado e gi pasi taki libisma e pina?” (A Waktitoren, 1 yanuari 2014)
Na artikel disi e piki wan aksi di furu sma abi.
„Waarom heeft de Holocaust plaatsgevonden? Waarom greep God niet in?” (Web-artikel)
Na ini a felem disi yu o si wan man di no ben frustan fu san ede sma ben pina.