LES 22
Fa yu kan fruteri trawan a bun nyunsu?
Te nanga now yu leri furu moi sani fu Bijbel. Kande yu e prakseri: ’Ala sma musu sabi den sani disi!’ Yu abi leti, ala sma musu kon sabi den sani disi! Ma kande yu e frede fu taigi sma san yu e leri. Wi o go luku san kan yepi yu fu no frede fu fruteri trawan a bun nyunsu. Wi o si tu fa yu kan du a sani disi nanga prisiri.
1. Fa yu kan prati den sani di yu leri nanga den sma di yu sabi?
Den disipel fu Yesus ben taki: „Wi no man tapu fu taki fu den sani di wi si èn di wi yere” (Tori fu den apostel 4:20). Den disipel ben lobi den sani di den ben leri fu Yesus so te, taki den ben wani fruteri ala sma fu den sani disi. Na so yu e firi tu? Efu dati de so, dan suku okasi fu fruteri yu famiri nanga yu mati san yu e leri. Ma yu musu du dati na wan lespeki fasi.—Leisi Kolosesma 4:6.
Wan tu fasi fa yu kan bigin preiki
Te yu e taki nanga yu famiri èn yu wani fruteri den wan sani fu Bijbel, dan yu kan taki: „Mi leri wan moi sani a wiki disi.”
Efu wan mati fu yu siki noso a abi problema, dan leisi wan Bijbeltekst gi en di o gi en deki-ati.
Efu den sma na wrokope e aksi fa yu weekend ben de, dan yu kan fruteri den san yu leri na a Bijbelstudie fu yu noso na a konmakandra.
Sori den mati fu yu a jw.org website.
Aksi wan sma efu a wani de na a Bijbelstudie fu yu noso sori en fa a kan aksi wan Bijbelstudie tapu jw.org.
2. Fu san ede yu musu preiki makandra nanga a gemeente?
Den disipel fu Yesus no ben preiki a bun nyunsu soso gi den sma di den ben sabi. Yesus ben ’seni den tu na tu go na ibri foto’ fu go preiki (Lukas 10:1). Fu di den ben du a preikiwroko na a fasi disi, meki moro furu sma ben kan yere a bun nyunsu. Den disipel ben prisiri tu fu du a preikiwroko makandra (Lukas 10:17). Efu yu wani preiki nanga a gemeente tu, dan luku san yu musu du fu man du disi.
SORTU TRA SANI YU KAN LERI?
Wi o si san kan yepi yu fu no frede fu preiki a bun nyunsu èn fa yu kan prisiri fu du a sani disi.
3. Yehovah o de nanga yu
Son sma e frede fu preiki, fu di den e prakseri san trawan o denki fu den noso san den o taigi den.
Yu e frede fu fruteri trawan san yu leri? Fu san ede?
Prei a FELEM èn taki fu na aksi disi:
San yepi den yonguwan na ini a felem disi fu no frede fu taki fu den sani di den leri fu Bijbel?
Leisi Yesaya 41:10 èn taki fu na aksi disi:
Te yu e frede fu preiki, dan fu san ede yu musu begi?
Yu ben sabi a sani disi?
Furu Yehovah Kotoigi ben denki fosi taki noiti den ben o man preiki gi tra sma. Fu eksempre, wan brada di nen Sergey ben firi leki a no warti noti èn a ben muilek gi en fu taki nanga sma fosi. Ma dan a bigin studeri Bijbel nanga Yehovah Kotoigi. Sergey e taki dati aladi a ben frede a bigin taki nanga trawan fu den sani san a ben leri. Di a ben fruteri trawan fu Bijbel a ben si taki a ben firi moro bun èn a no ben fruwakti dati. Sergey e taki tu taki a sani disi ben meki taki en bribi ben kon moro tranga.
4. Taki na wan lespeki fasi
Te yu wani fruteri trawan a bun nyunsu, dan yu no musu luku nomo san yu o taki, ma yu musu luku tu fa yu o taki en. Leisi 2 Timoteyus 2:24 nanga 1 Petrus 3:15. Baka dati taki fu den aksi disi:
Fa den tekst disi e sori wi fa wi musu taki nanga trawan fu Bijbel?
A no ala den famiri noso mati fu yu o agri nanga den sani di yu e taki. San yu kan du? San yu no musu du?
Fu san ede a moro bun fu poti aksi gi wan sma fu yepi en fu frustan wan tori, na presi fu taigi en san a musu bribi?
5. Yu o prisiri te yu o fruteri trawan a bun nyunsu
Yehovah gi Yesus a wroko fu preiki a bun nyunsu. Fa Yesus ben si a wroko dati? Leisi Yohanes 4:34 èn taki fu den aksi disi:
Te yu e nyan bun nyanyan, dan yu e tan gosontu èn a e meki yu firi bun. Yesus ben taki dati te a ben du a wani fu Gado, dan dati ben de leki nyanyan gi en. Fu san ede a ben taki dati? Fa a sani disi e sori fa a ben si a preikiwroko?
Fu san ede yu denki taki a o gi yu prisiri fu fruteri sma a bun nyunsu?
Sani di yu kan du
Te yu go na a mindriwiki konmakandra, dan luku fa den sani di yu e leri na a konmakandra kan yepi yu fu bigin taki nanga sma fu a bun nyunsu.
Aksi a sma di e studeri nanga yu san yu musu du fu man hori lezing na a mindriwiki konmakandra. Te yu e hori den lezing disi, dan a e moro makelek gi yu fu fruteri trawan san yu e leri.
Na ini a buku disi yu abi a pisi „Son sma e taki” noso „Wan sma kan aksi yu”. Gebroiki a pisi disi fu oefen fu sabi fa fu piki wan sma.
WAN SMA KAN AKSI YU: „Fa a e go nanga yu? Langa wi no miti.”
Fa yu kan gebroiki na okasi disi fu fruteri a sma san yu leri na a Bijbelstudie fu yu?
SAN YU LERI?
Wi si taki a e gi prisiri fu fruteri sma a bun nyunsu. Wi si tu taki a no muilek so fu fruteri trawan san yu leri.
Fa yu ben o piki den aksi disi?
Fu san ede wi musu fruteri trawan a bun nyunsu?
Fa yu kan du dati na wan lespeki fasi?
San kan yepi yu fu no frede fu bigin nanga a preikiwroko?
TRA SANI DI YU KAN LUKU
Na ini a felem disi yu o si fo fasi fa yu kan gebroiki a jw.org karta fu preiki.
Na artikel disi e taki fu fo fasi di wi musu abi fu man preiki a bun nyunsu.
„Yu de klariklari fu tron wan fisiman di e fanga libisma?” (A Waktitoren, september 2020)
Na ini a felem disi wi o luku na eksempre fu wan sma di kari na ini Bijbel. Wi o si fa na eksempre fu en kan gi wi deki-ati fu preiki a bun nyunsu srefi te wi yongu ete.
Na ini na artikel disi yu o si fa yu kan taki fu Bijbel nanga famiri fu yu di no sabi Yehovah.
„Doro na ati fu famiriman di no de na bribi” (A Waktitoren, 15 maart 2014)