LES 38
De nanga tangi gi a libi di Gado gi wi
Fu di wi de na libi, meki wi kan du furu sani di e gi wi prisiri. Awinsi wi abi problema, toku sani de di e gi wi prisiri. Fu san ede wi musu sori taki wi de nanga tangi gi a libi? Fa wi kan sori taki wi de nanga tangi gi a libi di Gado gi wi?
1. Fu san ede wi musu de nanga tangi gi a libi?
Wi musu de nanga tangi gi a libi fu di na Yehovah, wi Papa, gi wi libi. Bijbel e taki dati en „na a sma di e gi libi” (Psalm 36:9). „Na en e gi ala sma libi, a e meki den bro èn a e gi den ala sani” (Tori fu den apostel 17:25, 28). Yehovah e gi wi san wi abi fanowdu fu tan na libi. Ma a no dati wawan. A gi wi furu sani tu di kan meki wi prisiri fu a libi.—Leisi Tori fu den apostel 14:17.
2. Fa wi kan sori Yehovah taki wi de nanga tangi gi a libi di a gi wi?
Sensi a momenti di yu mama kon de nanga bere fu yu, Yehovah lobi yu. David, wan fu den anbegiman fu Gado ben taki na ini Psalm 139:16: „Yu ai ben si mi di mi ben de na ini mi mama bere.” A libi fu yu prenspari gi Yehovah. (Leisi Mateyus 10:29-31.) Yehovah e sari te wan sma e kiri wan trawan noso te a e kiri ensrefia (Eksodes 20:13). A e hati Yehovah tu te wi e du dondon sani di kan meki wi noso tra sma lasi den libi. Te wi e sorgu wisrefi bun èn te wi e lespeki a libi fu trawan, dan wi e sori taki wi de nanga tangi gi a libi di wi kisi fu Yehovah.
SORTU TRA SANI YU KAN LERI?
Wi o luku wan tu fasi fa yu kan sori taki yu de nanga tangi gi a libi.
3. Sorgu bun gi yusrefi
Wan Kresten di gi ensrefi abra na Yehovah, pramisi en taki a o du a wani fu en, en heri libi langa. A de neleki a e gi en skin leki wan ofrandi na Gado. Leisi Romesma 12:1, 2 èn taki fu den aksi disi:
Fu san ede yu musu sorgu yusrefi bun?
San na wan tu fasi fa yu kan du dati?
4. No du sani di o meki taki yu noso tra sma kisi mankeri
Bijbel e gi wi deki-ati fu no du sani di kan meki taki sma kisi mankeri noso taki den lasi den libi. Prei a FELEM fu si san na wan tu sani di yu kan du fu no kisi mankeri.
Leisi Odo 22:3 èn taki fu den aksi disi. Fa yu kan sorgu taki yu nanga trawan no kisi mankeri . . .
te yu de na oso?
te yu de na wrokope?
te yu e sport?
te yu e rèi wan wagi noso te yu sidon na ini wan wagi?
5. Lespeki a libi fu wan pikin di no gebore ete
David ben taki dati Yehovah sabi fa wan pikin e gro na ini en mama bere èn taki a e broko en ede nanga so wan pikin. Leisi Psalm 139:13-17 èn taki fu den aksi disi:
O ten a libi fu wan sma e bigin, te a gebore noso te en mama kon de nanga bere fu en? Fa Yehovah e denki fu a sani disi?
Den wet di Yehovah ben gi den Israelsma ben kibri wan uma nanga a pikin fu en di no ben gebore ete. Leisi Eksodes 21:22, 23 èn taki fu den aksi disi:
Fa Yehovah ben feni en te wan sma ben du wan sani di meki taki wan pikin di de na ini en mama bere lasi libi, awinsi a no du dati fu espresi?
Fa yu denki a feni en te wan sma e puru bere?b
Fa yu feni en taki Gado e denki so?
Srefi wan uma di e lespeki a libi kan feni son leisi taki a moro bun fu puru bere. Leisi Yesaya 41:10 èn taki fu den aksi disi:
Efu sma e dwengi wan uma fu puru bere, dan na suma a musu go suku yepi? Fu san ede?
SON SMA E TAKI: „Son leisi yu no abi tra fasi, yu abi fu puru a bere.”
Fa yu du sabi taki a libi fu wan mama nanga a pikin di de na ini en bere warti gi Yehovah?
SAN YU LERI?
Bijbel e leri wi fu lobi a libi di Yehovah gi wi èn fu sori lespeki gi a libi. Wi musu sorgu taki wi no du sani di kan meki taki wi noso tra sma kisi mankeri noso dede.
Fa yu ben o piki den aksi disi?
Fu san ede a libi fu wan sma prenspari gi Yehovah?
Fa Yehovah feni en te wan sma e kiri wan trawan fu espresi?
Fu san ede yu de nanga tangi gi a libi di Gado gi yu?
TRA SANI DI YU KAN LUKU
Fa wi kan sori Yehovah taki wi de nanga tangi gi a libi?
Gado o gi wan uma di ben puru bere pardon? Na ini na artikel disi yu o feni a piki.
Na ini na artikel disi wi o si fa Gado feni en te sma e du sport pe den kan kisi mankeri.
„’Extreme sporten’—Dient u het risico te nemen?” (Ontwaakt!, 8 oktober 2000)
Fa Bijbel kan yepi wan sma di e prakseri fu kiri ensrefi?
„Mi wani dede—Bijbel man yepi mi te mi abi a firi fu wani kiri misrefi?” (Web-artikel)
a Yehovah e broko en ede nanga den wan di lasi-ati (Psalm 34:18). A sabi taki son sani di e miti sma kan hati den so te taki den no wani libi moro. Dati meki a wani yepi den. Efu yu wani sabi fa Yehovah e yepi wan sma di e firi so, dan leisi na artikel „Mi wani dede—Bijbel man yepi mi te mi abi a firi fu wani kiri misrefi?” na a pisi „Tra sani di yu kan luku” na ini a les disi.
b Wan sma di puru bere no musu denki taki noiti Yehovah no o man gi en pardon. Efu yu wani sabi moro fu a tori disi, dan luku na artikel „San Bijbel e taki fu puru bere?” na ini a pisi „Tra sani di yu kan luku” na ini a les disi.