LES 41
San Bijbel e taki fu seks?
Furu sma e syen fu taki fu seks. Ma Bijbel e taki fu seks èn a e sori taki seks a no wan fowtu sani. A bun fu sabi san Bijbel e taki fu a tori disi. Fu san ede? Fu di Bijbel komoto fu Yehovah a sma di meki wi èn di sabi san bun gi wi. Yehovah e leri wi fa wi musu tyari wisrefi èn fa wi kan de koloku fu têgo.
1. Fa Yehovah e denki fu seks?
Seks na wan kado fu Yehovah. A wani taki seks de wan prisiri sani gi wan man nanga uma di trow. Te wan trowpaar abi seks, den kan meki pikin. Te den abi seks, den e sori tu taki den lobi makandra. Dati meki Gado Wortu e taki: „Prisiri nanga a wefi di yu teki sensi yu yongu yari” (Odo 5:18, 19). Yehovah wani taki trowpaar musu tan nanga makandra. Den no musu waka gi makandra.—Leisi Hebrewsma 13:4.
2. San na hurudu?
Bijbel e taki dati ’sma di e huru no o kisi a Kownukondre fu Gado’ (1 Korentesma 6:9, 10). Den Bijbel skrifiman di skrifi den Griki Buku fu Bijbel ben gebroiki a wortu porneya te den ben taki fu hurudu. A wortu abi fu du nanga (1) man nanga uma di abi seks nanga makandra aladi den no trowa, (2) mansma di abi seks nanga tra mansma noso umasma di abi seks nanga tra umasma, èn (3) sma di abi seks nanga meti. Te wi ’no e du hurudu’, dan dati e tyari wini kon gi wi èn wi e meki Yehovah prisiri.—1 Tesalonikasma 4:3.
SORTU TRA SANI YU KAN LERI?
Wi o si san o yepi wi fu no du hurudu èn fu san ede a bun fu gi yesi na den wet fu Gado di abi fu du nanga seks.
3. Du ala san yu man fu no du hurudu
Yosef, wan anbegiman fu Yehovah, ben weigri fu abi seks nanga wan uma di no ben de en frow. Leisi Genesis 39:1-12 èn taki fu den aksi disi:
Fu san ede Yosef lon gowe?—Luku vers 9.
Yu feni taki Yosef teki wan bun bosroiti? Fu san ede yu taki dati?
San o yepi yonguwan fu lon gi hurudu neleki Yosef? Prei a FELEM.
Yehovah no wani taki wi du hurudu. Leisi 1 Korentesma 6:18 èn taki fu den aksi disi:
Sortu situwâsi kan meki taki wan sma du hurudu?
Fa yu kan lon gi hurudu?
4. San o gi yu a krakti fu no du hurudu?
San o gi yu a krakti fu no du hurudu? Prei a FELEM èn taki fu na aksi disi:
San a brada na ini a felem du di a si taki son sani di a ben e denki èn di a ben e du, ben kan meki taki a waka gi en frow?
Srefi sma di e dini Yehovah wan pisi ten kaba musu du muiti fu tan prakseri sani di krin. San o yepi yu fu no prakseri sani di no krin? Leisi Filipisma 4:8 èn taki fu den aksi disi:
Sortu sani wi musu prakseri?
Te wi e leisi Bijbel èn te wi e du a wroko fu Yehovah fayafaya, dan fa dati o yepi wi fu no sondu?
5. Den wet fu Yehovah bun gi wi
Yehovah sabi san moro bun gi wi. A e leri wi fa wi kan libi wan krin libi èn a e sori wi sortu wini dati e tyari kon. Leisi Odo 7:7-27 noso prei a FELEM. Baka dati taki fu den aksi disi:
Fa a yonguman poti ensrefi na ini wan muilek situwâsi?—Luku Odo 7:8, 9.
Odo 7:23, 26 e sori taki hurudu abi takru bakapisi. Efu yu no e du hurudu, dan sortu problema yu no o kisi?
Te wi e libi wan krin libi, dan sortu blesi wi o kisi na ini a ten di e kon?
Den sani di Bijbel e taki fu homolibi e meki taki son sma e denki taki Gado no e firi gi den sma disi. Ma Yehovah na wan Gado fu lobi. A wani taki ala sma kisi têgo libi. Ma efu wi wani kisi a libi dati, dan wi musu libi soleki fa en e taki. Leisi 1 Korentesma 6:9-11 èn taki fu na aksi disi:
Te yu luku a tekst, dan na soso a homolibi Gado no feni bun?
Efu wi wani taki Gado prisiri nanga wi, dan wi alamala musu tyari kenki kon. Sortu wini dati e tyari kon gi wi? Leisi Psalm 19:8, 11 èn taki fu den aksi disi:
Yu feni taki den wet fu Yehovah bun noso yu feni taki den hebi tumusi? Fu san ede yu piki so?
Yehovah yepi furu sma fu kenki èn fu libi soleki fa en wani. A kan yepi yu tu
SON SMA E TAKI: „Yu mag abi seks nanga suma yu wani, solanga yu lobi a sma.”
San yu ben o piki?
SAN YU LERI?
Seks na wan kado di Yehovah gi wan man nanga wan uma di trow èn a wani taki a gi den prisiri.
Fa yu ben o piki den aksi disi?
San na hurudu?
San o yepi wi fu no du hurudu?
Sortu wini wi e kisi te wi e hori wisrefi na den wet fu Yehovah?
TRA SANI DI YU KAN LUKU
Na ini na artikel disi yu o si fu san ede Gado wani taki wan man nanga wan uma musu trow, fosi den libi nanga makandra.
„San Bijbel e taki fu libi nanga makandra sondro fu trow?” (Web-artikel)
Bijbel e leri taki a homolibi no bun. Na artikel disi e sori fu san ede a sani disi no wani taki dati wi musu teige den sma di de homo.
Na ini na artikel disi yu o si fa den wet fu Gado di abi fu du nanga seks e kibri wi.
Na ini na artikel „Den sori lespeki gi mi”, yu o si fu san ede wan man di ben de wan homo fosi, kenki en libi.
a Te sma abi seks nanga den mofo, nanga a bille fu trawan noso te den e prei nanga a syenpresi fu trawan fu wiki sekslostu, dan dati na seks tu.