Kon krosibei na Gado
„Waka baka na eksempre fu Gado”
SMA e du bun gi trawan, den e sori sari-ati, den e gi trawan pardon, èn den e sori lobi gi trawan. A de wan sari sani taki furu sma na ini a ten disi no e sori den fasi disi. Fa a de nanga yu? Yu feni taki awansi omeni muiti yu e meki, yu no o man abi den bun fasi disi? Te yu ati e krutu yu tumusi, dan a kan de so taki sani soleki takru gwenti noso takru sani di yu ben ondrofeni, e meki taki yu feni dati yu no man abi bun fasi. Ma Bijbel e leri wi a tru tori taki wi Mekiman sabi dati wi man abi bun fasi.
Gado Wortu e gi tru Kresten a rai disi: „Fu dati ede, waka baka na eksempre fu Gado leki pikin di a lobi” (Efeisesma 5:1). Den wortu dati e sori taki Gado abi a frutrow dati den anbegiman fu en man abi bun fasi. Na sortu fasi? Yehovah Gado ben meki libisma leki wan prenki fu ensrefi, soleki fa a de (Genesis 1:26, 27). Sobun, Gado meki libisma nanga den fasi di a abi tu.a Fu dati ede, te Bijbel e gi Kresten a rai fu „waka baka na eksempre fu Gado”, dan a de neleki Yehovah srefi e taigi den: ’Mi sabi taki yu man du en. Mi sabi taki yu abi sondu, ma aladi yu no man sori den bun fasi dorodoro leki mi, toku yu man sori den na so wan fasi taki yu e plisi mi.’
San na wan tu fu den fasi fu Gado di wi man sori tu? Den tra vers e gi piki tapu na aksi disi. Fosi Paulus gi a rai fu waka baka na eksempre fu Gado, a e gebroiki den wortu „fu dati ede”. Den wortu dati abi fu du nanga a vers na fesi di e taki dati wi musu du bun gi trawan, wi musu sori sari-ati, èn wi musu gi trawan pardon (Efeisesma 4:32; 5:1). Na ini a vers di e kon baka a rai di Paulus e gi fu waka baka na eksempre fu Gado, a e taigi Kresten fu sori lobi gi trawan nanga den heri ati (Efeisesma 5:2). A moro bun eksempre di wi abi fu wan sma di e du bun gi trawan, di e sori trutru sari-ati, di e gi sma pardon nanga en heri ati, èn di e sori lobi, na Yehovah Gado. Iya, wi alamala kan waka baka a moi eksempre fu en.
Fu san ede a musu de so taki wi wani de leki Gado? Luku san o meki taki wi wani de leki Gado, soleki fa Paulus e taki: „Fu dati ede, waka baka na eksempre fu Gado leki pikin di a lobi.” Den wortu dati no e naki yu ati? Yehovah e si den anbegiman fu en leki pikin di a lobi srefisrefi. Neleki fa wan pikin boi e pruberi fu de leki en papa, na so tru Kresten e du ala san den man fu de leki den hemel Papa.
Yehovah no e dwengi libisma fu de leki en. Na presi fu dati, a gi wi a grani fu teki wi eigi bosroiti. Sobun, a de na yu fu bosroiti efu yu o waka baka na eksempre fu Gado, noso efu yu no o du dati (Deuteronomium 30:19, 20). Ma yu no musu frigiti noiti taki yu man sori den fasi di Gado abi. A no de fu taki dati efu yu wani waka baka na eksempre fu Gado, yu musu sabi fosi fa a de. Bijbel man yepi yu fu kon sabi fa Gado de èn sortu fasi a abi. Iya, den tumusi moi fasi di Gado abi, meki taki milyunmilyun sma e waka baka na eksempre fu en.
[Futuwortu]
a Te wi e leisi Kolosesma 3:9, 10, wi e kon frustan taki wi man sori den fasi fu Gado, fu di wi meki leki wan prenki fu en. Den sma di wani plisi Gado e kisi a deki-ati fu ’kon tron nyun sma di e kisi nyun fasi, . . . so taki den e kon gersi a Sma [Gado] di meki den kisi den fasi disi’.