’Fa mi o man preiki?’
Na heri grontapu wi abi brada nanga sisa di e du a preikiwroko fayafaya aladi den abi wan seryusu siki. Luku na eksempre fu Dalia di e libi na ini Vilnius, a mamafoto fu Litonia.
Dalia na wan sisa di abi sowan 35 yari. Di en mama meki en, Dalia kisi wan berurtu èn sensi a ten dati a malengri èn a no man taki bun srefisrefi. Dati meki soso en famiri man frustan en. Dalia e libi nanga en mama Galina, di e sorgu gi en. Aladi Dalia abi furu problema nanga broko-ede na ini en libi, toku a no e lasi-ati. Fu san ede?
Galina e taki: „Na ini 1999 mi nicht Apolonija kon luku wi. Wi si taki Apolonija, di de wan Yehovah Kotoigi, sabi Bijbel bun, èn Dalia bigin aksi en wan lo sani. A no teki langa fosi Dalia bigin studeri Bijbel. Son leisi mi ben e sidon nanga den fu fruteri san Dalia ben e taki. Ma mi ben si taki a ben e kisi furu wini fu den sani di a ben e leri. Ne misrefi aksi fu studeri Bijbel tu.”
O moro Dalia ben e frustan Bijbel, o moro a ben e prakseri wan sani. Te fu kaba a teki deki-ati fu aksi Apolonija: „Fa wan malengri sma leki mi o man preiki?” (Mat. 28:19, 20) Na wan switi fasi Apolonija taigi Dalia: „No frede. Yehovah o yepi yu.” Na dati Yehovah e du trutru.
Fa Dalia e preiki dan? A e du difrenti sani. Kresten sisa e yepi en fu skrifi brifi di abi wan boskopu fu Bijbel na ini. Dalia e fruteri den sisa fosi san a wani taki na ini a brifi, dan den sisa e skrifi san a taki. Boiti dati, Dalia e seni sms gi sma fu prati a bun nyunsu gi den. Te a weer moi, brada nanga sisa fu a gemeente e tyari en go na dorosei, so taki a kan taki nanga sma na strati noso na tra presi pe furu sma de.
Dalia nanga en mama go na fesi na ini a tru anbegi. Den ala tu gi densrefi abra na Yehovah èn den teki dopu na ini november 2004. Na ini september 2008 wan nyun grupu seti na ini Vilnius gi sma di e taki Pôlsutongo. Fu di a grupu ben abi moro Kownukondre preikiman fanowdu, meki Dalia nanga en mama go yepi tu. Dalia taki: „Son mun mi de nanga broko-ede fu di mi no preiki ete. Ma baka te mi begi Yehovah fu a tori disi, a no e teki langa fosi wan sma e meki mofo nanga mi fu go na ini a preikiwroko.” Fa wi lobi sisa Dalia e denki fu a situwâsi fu en? A taki: „A siki meki taki mi skin malengri, ma mi frustan no malengri. Mi breiti so te, taki mi kan fruteri tra sma fu Yehovah!”