A de na yu efu yu o abi wan bun tamara​—fa so?

FA YU kan kon abi wan trutru bun libi? Wan fasi fa yu kan du dati, na fu gebroiki a frustan fu yu fu luku sortu bakapisi den bosroiti di yu e teki now kan abi na ini a ten di e kon.

Kande a no makriki gi yu fu teki bosroiti di kan meki taki sani waka bun gi yu, yu heri libi langa. Fu san ede? Fu di furu sma wani kisi ala san den wani wantewante. Fu eksempre, kande yu e si taki yu kan abi wan koloku osofamiri libi te yu e du san Bijbel e taki (Efeisesma 5:22–6:4). Fu man du dati, yu musu meki nofo ten gi yu osofamiri, ma yu musu luku bun tu taki a wroko fu yu noso prisiri sani no e teki tumusi furu fu yu ten. Wi musu bosroiti efu wi wani kisi wini fu wan syatu pisi ten nomo, noso fu wan langa ten. Na so a de nanga furu sani na ini wi libi. San kan yepi yu fu teki koni bosroiti? Fo sani de di yu kan du.

1 Denki sortu bakapisi den bosroiti fu yu kan abi

Te yu o teki wan bosroiti, dan denki bun sortu bakapisi a o abi. Bijbel e taki: „A koniwan si taki ogri o miti en èn a go kibri” (Odo 22:3). Te yu prakseri bun sortu bakapisi wan bosroiti o abi, dan dati kan tapu yu fu du wan sani di ben kan tyari takru bakapisi kon gi yu. Ma te yu e prakseri den wini di wan bun bosroiti o abi gi yu bakaten, dan dati kan gi yu deki-ati fu du san yu bosroiti.

Aksi yusrefi: ’San o de a bakapisi fu a bosroiti fu mi baka wán yari, 10 yari, noso 20 yari? Sortu krakti den bosroiti dati o abi tapu a fasi fa mi e firi èn tapu a gosontu fu mi? Sortu krakti a bosroiti di mi o teki o abi tapu mi osofamiri èn tapu tra sma di mi lobi?’ A moro prenspari sani di yu musu aksi yusrefi na disi: ’Gado o feni a bosroiti fu mi bun? A o si mi ete leki wan mati fu en?’ Fu di na Gado meki sma skrifi Bijbel, meki a kan yepi yu fu kon si san a feni bun. Na so yu o man wai pasi gi sani di kan de wan trapu gi yu.​—Odo14:12; 2 Timoteyus 3:16.

2 Luku gi yusrefi san moro bun

Furu sma no e teki den eigi bosroiti, ma den e du nomo san trawan e du. Ma a no fu di furu sma e libi na wan spesrutu fasi, meki a sortu libi dati bun. Luku gi yusrefi san moro bun. Luku na eksempre fu Natalie.a A e taki: „Mi ben wani wan bun trowlibi. Ma mi ben kan si taki a fasi fa mi ben e libi no ben o meki mi feni a libi dati. Di mi ben de na heiskoro, ala den mati di mi ben abi ben de yongu sma di ben koni srefisrefi. Toku den ben e tan teki don bosroiti. Ala yuru den ben e kenki patna. Na so misrefi hori nanga omeni boi. Fu di mi ben e libi so, meki mi ben e sari furu.”

Te fu kaba, Natalie bigin studeri Bijbel nanga Yehovah Kotoigi. A e taki: „Furu fu den Kotoigi di mi si ben de yongu sma di de koloku èn sosrefi sma di abi wan bun trowlibi. Safrisafri mi kenki a fasi fa mi ben e denki èn ben e libi, aladi dati no ben makriki gi mi.” San ben de a bakapisi? Natalie e taki: „Ala ten mi ben wani trow nanga wan sma di mi e lespeki trutru. Te fu kaba mi trow nanga wan man di ben abi a srefi bribi leki mi. Mi e firi taki Gado gi mi wan osofamiri libi di noiti mi ben dren taki mi ben o abi.”

3 Prakseri sortu wini yu o kisi bakaten

Wan tra sani di kan yepi yu fu no feti fu kisi ala sani wantewante, na taki yu musu sabi krin sortu libi yu wani na ini a ten di e kon, èn yu musu seti sani nownow kaba fu man abi a libi dati (Odo 21:5). No prakseri den 70 noso 80 yari nomo di furu sma e libi. Na presi fu dati, pruberi fu si nownow kaba fa yu o nyan bun fu a têgo libi di Bijbel e taki fu en.

Bijbel e taki dati Gado gebroiki a frulusu-ofrandi fu Krestes Yesus fu seti sani, so taki libisma kan libi fu têgo (Mateyus 20:28; Romesma 6:23). Gado pramisi taki heri esi a sani di a ben abi na prakseri gi libisma nanga grontapu o kon tru. Den sma di lobi Gado abi na okasi fu libi fu têgo na ini wan moi grontapu di seti kon bun baka (Psalm 37:11; Openbaring 21:3-5). Yu kan kon abi a libi dati te yu prakseri den wini di yu o kisi bakaten.

4 Du muiti fu doro den marki fu yu

San yu kan du fu kisi wini fu a libi dati di Gado pramisi? Wan sani di yu kan du na fu teki leri fu Gado (Yohanes 17:3). Te yu e kon sabi den tru leri fu Bijbel finifini, dan dati o yepi yu fu bribi taki den sani di Gado pramisi o kon tru. A bribi dati o gi yu deki-ati fu tyari den kenki kon di de fanowdu, so taki Gado feni yu bun.

Luku na eksempre fu Michael. A e fruteri: „Di mi ben abi 12 yari mi bigin dringi sopi pasa marki èn mi bigin gebroiki drugs. Mi ben e moksi nanga wan grupu ogri boi èn mi ben e fruwakti taki mi ben o dede fosi mi tapu 30 yari. Fu di ala ten mi ben de nanga atibron èn fu di mi ben bruya, meki mi pruberi fu kiri misrefi omeni leisi. Mi ben e howpu taki mi ben o feni wan moro bun libi, ma mi no ben sabi fa.” Di Michael ben de na heiskoro, wan fu den ogri mati fu en bigin studeri Bijbel nanga Yehovah Kotoigi. Michael bosroiti fu du dati tu.

Den sani di Michael leri fu Bijbel kenki a fasi fa a ben e si a tamara fu en. „Mi leri taki na ini a ten di e kon grontapu o tron wan paradijs baka èn taki sma o libi na ini freide, sondro broko-ede. Mi bigin si a sani disi leki a libi di mi ben wani. Ne mi bigin du muiti fu tron wan mati fu Yehovah. Toku sani no ben e waka bun ala ten. Srefi baka di mi bigin studeri Bijbel mi dringi sopi drungu wan tu leisi èn mi ben e hori nanga wan meisje.”

Fa Michael ben man wini den problema disi èn san yepi en fu tyari kenki kon na ini en libi? A e taki: „A sma di ben e studeri Bijbel nanga mi ben gi mi deki-ati fu leisi Bijbel ibri dei èn fu abi demakandra nanga sma di ben wani plisi Gado. Mi kon si taki den ogri mati fu mi ben abi krakti na mi tapu ete. Aladi den ben de leki famiri gi mi, toku mi tapu fu moksi nanga den.”

Michael bigin luku sortu sani a ben kan du nownow kaba èn san na den moro prenspari sani di ben o yepi en fu libi soleki fa Gado wani. Yu kan du dati tu. Skrifi na tapu papira sortu marki yu wani doro na ini a ten di e kon èn san yu musu du fu doro den marki dati. Fruteri den wan di wani horibaka gi yu sortu marki yu poti gi yusrefi èn aksi den fu yepi yu fu doro den marki dati.

No draidrai fu leri sani fu Gado èn fu du den sani di yu leri. Du sani nownow kaba fu meki a lobi di yu abi gi Gado èn gi a Wortu fu en, Bijbel, kon moro tranga. Disi na san Gado Wortu e taki fu wan sma di e du san a e leri fu Bijbel: ’Ala sani di a e du, o waka bun.’​—Psalm 1:1-3.

[Futuwortu]