Gado e bron sma na ini hel?

Gado o strafu den ogrisma?

Mauricio: Mi breiti fu si yu baka, Alejandro.

Alejandro: Mi srefi breiti fu si yu.

Mauricio: Mi ben prakseri wan sani di yu taki di mi ben dyaso tra dei.

Alejandro: Sortu sani?

Mauricio: Yu ben taki dati yu ben fruwondru fu yere taki Yehovah Kotoigi no e bribi na ini wan hel.

Alejandro: Ai, fu taki en leti, mi no man frustan taki unu no e bribi na ini hel.

Mauricio: Mi breiti taki yu taigi mi dati. Mi lobi fu yere fa tra sma e denki. Sma e prakseri wan lo sani fu hel, ma mi mag aksi san yusrefi e denki fu a tori?

Alejandro: We, mi heri libi mi bribi taki ogrisma o go na hel te den dede èn taki den o bron drape fu têgo.

Mauricio: Na so furu sma e denki. Alejandro, kon meki mi aksi yu: wan ogri sani miti yu wan leisi kaba?

Alejandro: Ai. Feifi yari pasa, sma kiri mi sisa.

Mauricio: Mi sari fu yere dati. Yu musu fu misi en.

Alejandro: Ai, mi e prakseri en ibri dei.

Mauricio: Mi kon si taki son sma e bribi tranga na ini wan hel fu di den si san ogrisma e du. Te yu luku en bun, dan reti-ati sma di kisi fu du nanga ogridu, wani taki den ogrisma musu kisi strafu gi den sani di den e du.

Alejandro: Soifri! Mi wani taki a man di kiri mi sisa musu kisi strafu gi san a du nanga wi famiri.

Mauricio: Mi e frustan fu san ede yu e firi so. Bijbel e leri taki Gado srefi ati e bron te sma e du ogri nanga trawan di no du noti èn a pramisi taki a o strafu den ogrisma. Luku san skrifi dyaso na ini Yesaya 3:11: „Helu fu den ogri sma! Rampu o miti den. Den sani di den du nanga tra sma, na dati o pasa nanga den!” Sobun, wi kan de seiker taki Gado o strafu den ogrisma.

Alejandro: Ma fa dati kan efu wan hel no de, soleki fa yu e taki?

Mauricio: Dati na wan bun aksi. Fu taki en syatu, a piki na taki Gado o strafu den ogrisma fu di a o pori den fu têgo. Luku san Bijbel e taki dyaso na ini 2 Tesalonikasma 1:9. Yu wani leisi a tekst disi, grantangi?

Alejandro: Ai. Dyaso skrifi: „A strafu di den sma disi o kisi, na taki den o kisi pori fu têgo, so taki den no o de moro na fesi Masra.”

Mauricio: San yu kan si dya, Alejandro, na taki howpu no de gi den ogrisma, fu di Gado o strafu den nanga têgo dede. Den no o kisi libi na ini a ten di e kon.

Alejandro: Mi e frustan san a tekst disi e taki, ma mi no e agri nanga ala sani. Ala sma e dede. Yu no feni taki sma di e du bigi ogri musu kisi wan moro hebi strafu?

Fa wan sma e sori retidu?

Mauricio: Mi si taki yu na wan sma di wani taki sani musu waka na wan reti fasi.

Alejandro: Na so a de.

Mauricio: Dati na wan moi sani. Fu taki en leti, libisma sabi san bun èn san ogri fu di na so Gado meki wi. En srefi lobi te sani e waka na wan reti fasi. Ma te kerki fesiman e leri taki Gado e bron sma na ini hel, dan den e taki dati Gado no e du sani na wan reti fasi.

Alejandro: Fa so?

Mauricio: We, luku wan eksempre. Yu sabi a Bijbel tori fu Adam nanga Eva?

Alejandro: Ai. Gado taigi den fu no nyan fu a froktu fu wan spesrutu bon, ma den trangayesi en.

Mauricio: Soifri. Meki wi leisi a pisi dati fu Bijbel makandra. A skrifi na ini Genesis 2:16, 17. Den tekst dati e taki: „Yehovah Gado gi a man a komando disi: ’Fu ibri bon na ini a dyari yu kan nyan teleki yu bere furu. Ma fu a bon di nen „Sabi san bun èn san ogri”, yu no musu nyan, bika na a dei di yu o nyan fu en, na dede yu o dede.’” Sobun, san Gado ben taki dati ben o pasa nanga Adam efu a ben o nyan fu a froktu di a no ben mag nyan?

Alejandro: A taki dati Adam ben o dede.

Mauricio: Dati tru. Prakseri a sani disi: Di Adam sondu, dan a meki taki ala libisma gebore leki sondusma.a Ma dyaso yu no e si taki Gado e taki dati sma ben o bron na ini wan hel, a no so?

Alejandro: Nôno.

Mauricio: Ma efu Adam nanga Eva ben o bron fu têgo, dan Gado no ben musu warskow den? Dati ben o de wan reti sani fu du, a no so? A ben o sori taki Gado abi lobi.

Alejandro: Mi denki so.

Mauricio: Luku tu san Gado taigi Adam nanga Eva, baka di den sondu. Yu wani leisi Genesis 3:19, grantangi?

Alejandro: A bun. A e taki: „Yu o broko sweti, fu di yu o abi fu wroko tranga fu feni nyanyan. Na so a o de teleki yu dede èn yu drai go baka na a gron di mi teki yu puru na ini, bika na fu doti yu meki èn na doti yu o tron baka.”

Mauricio: Grantangi. Soleki fa Gado taki, dan pe Adam ben o go te a dede?

Alejandro: A ben taki dati Adam ben o tron doti baka.

Mauricio: Soifri. Yu no denki taki efu wan sma ben o drai go baka na wan presi, dan a ben musu de drape kaba?

Alejandro: Iya.

Mauricio: We, pe Adam ben de fosi Gado meki en?

Alejandro: A no ben de.

Mauricio: Na so a de. Yu e si tu taki di Gado strafu en, a no taki noti fu wan hel. Efu Gado ben sabi taki a ben o seni Adam go na wan hel fu bron en, dan yu denki taki a ben o de wan bun sani fu taigi en taki a ben o tron doti baka?

Alejandro: Nôno, dati no ben o de wan bun sani.

Didibri e du san Gado wani?

Mauricio: Kande wi musu luku ete wan sani di abi fu du nanga a leri taki sma e bron na ini wan hel.

Alejandro: Sortu sani?

Mauricio: We, suma sma e si leki a „basi” fu hel? Suma e strafu den sma di de drape, soleki fa den e taki?

Alejandro: Na Didibri.

Mauricio: Ma Didibri na a moro bigi feanti fu Gado. Efu Gado e seni sma go na wan hel fu meki Didibri pina den, dan yu no denki taki disi ben o sori taki Gado nanga Didibri e wroko makandra?

Alejandro: Wakti, noiti mi si en so.

Mauricio: Kon meki wi teki wan eksempre. Yu na wan papa, a no so?

Alejandro: Ai, mi abi wan boi. A tapu 15 yari.

Mauricio: Kon meki wi taki dati a boi fu yu e trangayesi yu ibri leisi baka. A e du wan lo ogri sani di e meki yu firi sari. San yu ben o du?

Alejandro: Mi ben o pruberi fu yepi en.

Mauricio: Mi de seiker taki yu ben o tan du dati fu meki a kon na tapu a reti pasi baka.

Alejandro: Ai, na dati mi ben o du.

Mauricio: Kon meki wi taki dati awinsi san yu e du, toku a no wani arki. Te fu kaba, yu kon si taki tra fasi no de leki fu strafu en.

Alejandro: Iya, na so a de.

Mauricio: Ma fa yu ben o firi efu yu kon sabi taki wan ogri-ati man kori a boi fu yu fu trangayesi yu èn taki a leri en fu du ala den ogri sani disi?

Alejandro: Mi ati ben o bron nanga a man.

Mauricio: Now mi wani sabi fa yu e denki. Efu yu ben sabi taki wan ogri man di e du ala sortu fisti sani kori yu boi fu trangayesi yu, dan yu ben o aksi a man dati fu strafu a boi gi yu?

Alejandro: Kwetikweti. Mi no ben o du dati.

Mauricio: Efu na Satan Didibri e kori sma fu du ogri, dan yu denki taki Gado ben o aksi en fu strafu den srefi sma dati?

Alejandro: Nôno, mi no denki.

Mauricio: We, efu Gado wani strafu den ogrisma èn bron den na ini wan hel, dan fu san ede Didibri, a moro bigi feanti fu En, ben o du san Gado wani èn strafu den?

Alejandro: Noiti mi si en so.

Yehovah o puru ala ogridu

Mauricio: Ma yu kan de seiker taki Gado o strafu den ogrisma di no wani kenki. Meki mi sori yu wan lasti tekst di e tyari a tori disi kon na krin. A tekst dati na Psalm 37:9. Yu wani leisi a tekst dati?

Alejandro: A bun. A e taki: „Gado o kiri den ogri sma, ma den sma di e howpu na tapu Yehovah, na den o kisi grontapu.”

Mauricio: Grantangi. Yu si san Yehovah Gado o du nanga ogrisma?

Alejandro: A tekst e taki dati Gado o kiri den.

Mauricio: Na so a de. Fu taki en so, Gado o pori den krinkrin. Ma den bun sma, dati wani taki, „den sma di e howpu na tapu Yehovah”, o libi fu têgo dya na grontapu. Mi e frustan taki disi o meki yu aksi yusrefi wan tu sani. Fu eksempre, fu san ede Gado no e bigin tapu sma fu du ogri? Boiti dati, efu a wani strafu ogrisma trutru, dan fu san ede a no du en someni langa kaba?

Alejandro: Dati na wan tu moi aksi.

Mauricio: Kande mi kan sori yu san Bijbel e taki te wi o miti wan tra leisi.b

Alejandro: Ai, a ben o bun.