Fa yu kan trowstu den wan di lasi wan lobiwan?

A pasa wan leisi taki yu no ben sabi san fu taigi wan mati fu yu di lasi wan lobiwan na ini dede? Son leisi wi no sabi san fu taki noso san fu du. Dati meki wi no e taki noti èn wi no e du noti. Ma sani de di wi kan du fu yepi so wan sma.

Nofo tron a de wan bigi yepi kaba te yu de nanga a sma èn te yu e taigi en fa yu e sari taki so wan sani miti en. Na ini furu kondre sma e brasa wan sma noso den e hori en anu fu sori taki den e firi gi en. Efu a sma di e sari wani taki fa a e firi, dan arki en nanga pasensi. San moro bun, na fu du wan sani gi a famiri di lasi wan lobiwan. Kande yu kan yepi den nanga wan wroko di den srefi no man du. Yu kan bori gi den, yu kan luku den pikin, noso yu kan yepi den fu seti sani gi a beri efu den wani dati. Kande den o warderi den sani disi moro leki iniwan moi sani di yu ben o taigi den.

Baka wan pisi ten, a kan taki yu e firi fu taki fu a dedewan. Kande yu kan taki fu den bun fasi fu en noso fu den prisiri sani di yu ondrofeni nanga en. Den sortu takimakandra disi kan meki a sma di e sari lafu baka. Fu eksempre, Pam, di lasi en masra Ian siksi yari pasa, taki: „Son leisi sma e fruteri mi fu den bun sani di Ian du, ma di mi no ben sabi. Den sani dati e gi mi prisiri.”

Ondrosukuman kon si taki furu sma di lasi wan lobiwan e kisi furu yepi na a bigin. Ma syatu baka dati, mati e frigiti den fu di den e go doro nanga den eigi libi. A sani disi na wan sari sani. Dati meki baka a beri, a bun fu tan meki muiti fu go luku a famiri fu a sma di dede noso fu bel den.a Furu sma breiti te trawan e du disi gi den, fu di dati e gi den na okasi fu taki fa den e firi.

Luku na eksempre fu Kaori, wan yongu uma fu Yapan. A ben sari srefisrefi di en mama dede èn di en bigi sisa dede 15 mun baka dati. Koloku taki a tan kisi yepi fu bun mati. Wan fu den mati disi na Ritsuko, wan uma di owru omeni yari moro Kaori. A ben du muiti fu tron wan bun mati fu en. Kaori taki: „Fu taki en krin, mi no ben breiti nanga dati. Mi no ben wani taki nowan sma teki a presi fu mi mama èn mi no ben denki taki wan sma ben o man du dati. Ma a fasi fa Mama Ritsuko libi nanga mi, meki mi kon lobi en srefisrefi. Ibri wiki wi ben e go makandra na ini a preikiwroko èn na den Kresten konmakandra. A ben e kari mi fu kon dringi pikinso te na en oso, a ben e tyari nyanyan gi mi, èn a ben gwenti skrifi brifi nanga karta gi mi. A switifasi di Mama Ritsuko sori gi mi yepi mi furu.”

Twarfu yari pasa sensi a mama fu Kaori dede. Now en nanga en masra na furuten preikiman. Kaori taki: „Te nanga now Mama Ritsuko e poti prakseri na mi. Ibri leisi te mi e drai go pe mi ben e tan fosi, mi e go luku en. Mi lobi de nanga en fu di a e gi mi furu deki-ati.”

Wan tra sma di ben kisi furu yepi na Poli, wan Yehovah Kotoigi na ini Siprus. Poli en masra Sozos ben abi switifasi èn a ben de wan bun owruman na ini a Kresten gemeente. A ben gwenti kari sma kon na en oso fu nyan èn fu abi wan prisiri ten. A ben lobi kari pikin di no abi papa nanga mama moro èn sisa di masra dede kaba (Yakobus 1:27). A sari taki Sozos dede di a ben abi 53 yari. A ben abi kanker na en edetonton. Poli taki: „Mi lasi mi lobi masra di ben mi ben trow 33 yari nanga en.”

Baka a beri Poli froisi go na Kanada. A go nanga Daniel, a moro yongu manpikin fu en di ben abi 15 yari. Drape den bigin go na wan gemeente fu Yehovah Kotoigi. Poli taki: „Den sma na ini mi gemeente no ben sabi srefisrefi san ben pasa nanga wi èn sortu problema wi ben abi. Toku den kon na wi, den yepi wi èn den taki sani di trowstu wi. A yepi disi kon na a yoisti ten fu di mi boi ben misi en papa srefisrefi. Den brada di e teki fesi na ini a gemeente ben poti furu prakseri na Daniel. Ala ten wan fu den ben e kari Daniel fu go du wan prisiri sani nanga mati noso fu prei bal.” Now sani e go bun nanga Poli èn nanga a boi fu en.

Furu fasi de fa wi kan yepi noso trowstu den sma di e sari fu di wan lobiwan fu den dede. Bijbel e taki fu wan moi howpu di e trowstu sma tu.