Ondrofenitori fu a Jaarboek 2014
Yepi gi wan man di breni, dofu èn babaw
Na ini 1999, a dofusma-tongo gemeente na ini Kobe Yapan, kisi na adres fu wan dofuman di nen Hirofumi. Di wan brada go na en oso, a mama fu Hirofumi no ben wani meki a brada taki nanga en. Di a brada go baka difrenti leisi èn a begi a mama efu a mag taki nanga a dofu manpikin fu en, dan te fu kaba a mama tyari Hirofumi kon na a doro. Hirofumi en wiwiri ben langa èn a no ben kan. A ben abi wan langa barba tu. A ben gersi wan sma di ben lasi na busi omeni tenti yari. Yu no ben man si efu a ben breiti noso sari. Boiti taki Hirofumi ben dofu, a ben breni. A brada skreki, ma a bigin taki dofusma-tongo nanga Hirofumi èn a meki Hirofumi firi nanga en anu san a ben taki. Hirofumi ben e tan tanapu nomo. Tin yari na fesi, di Hirofumi ben abi 31 yari, a kon breni èn sensi a ten dati a no ben taki nanga wan tra libisma.
Baka tu dei a brada go baka na a oso fu Hirofumi. A mama fu Hirofumi ben fruwondru di a brada kon baka. A ben denki taki a no ben o kon moro, baka di a si taki Hirofumi dofu èn a breni. A brada aksi baka fu si Hirofumi èn a mama tyari en kon na a doro. Baka di a brada fisiti Hirofumi wán mun sondro taki Hirofumi piki en wan sani, a mama taigi a brada taki a no abi fu meki muiti moro fu kon luku en. Ma a brada tan go baka. A ben tyari kuku gi Hirofumi èn a du ala san a man fu sori en taki a ben broko en ede nanga en. Di a du a sani disi ete tu mun èn Hirofumi no piki en noti, a brada ben denki taki na fu soso a ben meki muiti.
A bosroiti fu go luku Hirofumi ete wan lasti leisi. Fosi a go, dan a begi Yehovah fu yepi en fu si efu a ben musu tan go na a man disi. Di a doro na a oso, a meki Hirofumi firi nanga en anu san a ben taigi en na ini dofusma-tongo. A brada taigi en taki wan Gado de di nen Yehovah, taki a Gado disi de na hemel èn taki a e luku en. A fruteri en taki a Gado disi e frustan heri bun fa Hirofumi e firi. A fruteri en tu taki Yehovah lobi en èn wani yepi en. Dati meki wan Kotoigi fu Yehovah kon na en oso. Biginbigin Hirofumi no du noti, ma dan a seki a brada en anu èn en ai bigin lon watra. A sani disi naki a brada en ati èn ensrefi bigin krei. Na so a brada bigin wan Bijbelstudie nanga Hirofumi.
A brada studeri 11 yari langa nanga Hirofumi. Na a pisi ten dati Hirofumi ben e go na wan dofusma-tongo gemeente di de fara fu en oso. Ma dan a bigin go na wan gemeente di de krosibei fu pe a e tan. Nowan sma fu a gemeente disi ben sabi taki dofusma-tongo. Ma na ini wan nanga afu yari, 22 brada nanga sisa fu a gemeente disi leri fu taki dofusma-tongo so taki den ben man yepi Hirofumi. Na ini yanuari 2012, Hirofumi hori en fosi lezing na a Theokrasia Diniwroko-skoro èn wan sma ben vertaal gi en. Na ini oktober fu a srefi yari dati a tron wan preikiman.
„Na 30 yari kaba mi e suku a buku disi!”
Agnes, wan zendeling na ini Indonesia ben gwenti fu preiki gi wan uma di ben abi sowan 40 yari èn di ben de nanga bere. Na uma ben e seri gruntu na wowoyo. A ben lobi fu leisi den tijdschrift fu wi èn a ben lobi taki fu Bijbel te a ben abi ten. Wan dei di Agnes ben go na a uma na wowoyo, na uma no ben de drape. A masra fu na uma taigi Agnes taki na uma ben kisi a beibi fu en. Agnes bosroiti fu go luku en. A tyari Mi buku nanga Bijbel tori gi en leki kado èn a ben domru a buku na ini kado papira. Na uma ben breiti taki Agnes kon luku en nanga a beibi, èn a ben fruwondru di Agnes sori en a kado. Na uma puru a kado papira, a luku a buku neleki a no ben man bribi san a e si èn a aksi: „Pe yu feni a buku disi? Na 30 yari kaba mi e suku a buku disi! Mi waka na ala bukuwenkri fu suku en èn mi aksi ala sma. Nowan sma ben abi en, nowan sma ben sabi en. Nowan enkri buku moi leki a buku disi.” Ne na uma fruteri Agnes taki di a ben de wan pikin meisje, en omu ben abi a Bijbel tori-buku èn taki a ben lobi fu leisi en. Now na uma e leisi a buku disi baka èn en moro bigi umapikin lobi fu leisi en tu. Den ala tu e kisi Bijbelstudie now.