Tan du muiti fu tron wan moro bun preikiman
1. Sortu eksempre fu a fosi yarihondro e sori taki wi musu tan go na fesi leki preikiman?
1 Kresten musu tan meki muiti fu tron moro bun preikiman. Dati meki Yesus ben gi den bakaman fu en leri so taki den ben man du a preikiwroko moro bun (Luk. 9:1-5; 10:1-11). Na fu dati ede Akwila nanga Preskela tyari Apolos go na den oso èn „den fruteri en moro fini fu a pasi fu Gado” (Tori 18:24-26). Na a srefi sani disi meki taki Paulus gi Timoteyus, di ben abi ondrofeni kaba, a deki-ati fu tan meki muiti fu gi sma leri so taki ’ala sma ben kan si taki a e go na fesi’ (1 Tim. 4:13-15). Awinsi o langa wi e dini Masra leki preikiman fu a bun nyunsu, toku wi musu tan meki muiti fu tron moro bun preikiman.
2. Fa wi kan leri fu trawan?
2 Leri fu trawan: Wan fasi fa wi kan tron moro bun preikiman, na te wi e leri fu trawan (Odo 27:17). Arki bun te a preikiman di e wroko nanga yu e taki nanga na ososma. Aksi den preikiman di abi furu ondrofeni meki den gi yu rai èn arki bun te den e taki nanga yu (Odo 1:5). Efu yu no sabi fa yu musu tyari wan gobaka, fa yu musu bigin wan Bijbelstudie, noso fa yu kan preiki na wan tra fasi, dan san yu kan du? Aksi yu grupu-opziener noso wan preikiman di abi ondrofeni meki a sori yu fa yu musu du dati. Hori na prakseri tu taki a santa yeye fu Yehovah kan meki wi tron moro bun preikiman. Sobun, tan aksi Yehovah en santa yeye te yu e begi.—Luk. 11:13.
3. San wi musu du te wan sma gi wi rai, awinsi wi no ben aksi en?
3 A kan pasa taki wan sma taigi yu fa yu kan preiki moro bun aladi yu no ben aksi en rai. No mandi te dati pasa (Preik. 7:9). Du neleki Apolos di ben abi sakafasi èn di ben de nanga tangi gi a yepi di a ben kisi. Te yu e du dati, dan yu e sori taki yu koni.—Odo 12:15.
4. Sortu prenspari reide wi abi fu tron moro bun preikiman?
4 Te wi e go na fesi, Gado e kisi grani: Yesus ben fruteri wan agersitori fu gi den bakaman fu en deki-ati fu tron moro bun preikiman. A ben taki dati en na wan droifibon èn taki den salfu bakaman fu en na den taki fu a bon. A ben taki dati a Tata e krin ibri taki „so taki a kan meki moro froktu” (Yoh. 15:2). Neleki fa wan sma di abi wan droifidyari wani taki den bon meki moro froktu, na so Yehovah wani taki wi musu tan go na fesi so taki wi kan tyari moro bun „ofrandi” te wi e preiki (Hebr. 13:15). Sortu blesi wi o kisi te wi e meki muiti fu tron moro bun preikiman? Yesus ben piki na aksi disi so: „Te unu e tan meki furu froktu . . . , dan dati o gi mi Tata glori.”—Yoh. 15:8.