Yeises libi nanga diniwroko

Nyanbun fu wan krosibei matifasi

BAKA a memrefesa, dan Yeises gi en apostru deki-ati, fu di a taki ati fu ati nanga den. Kande mindrineti ben psa kba. Fu dati-ede Yeises e taki nanga tranga: „Un opo, meki wi gwe fu dyaso.” Ma bifo den gwe, dan a lobi di Yeises ben lobi den ben buweigi en fu go doro fu taki nanga den, èn fu gi den wan agersitori di e gi deki-ati.

„Mi na a tru droifibon, èn mi Tata na a droifidyariman”, na so a e bigin. A Bigi Droifidyariman, Yehovah Gado, ben prani na agersi droifibon disi di a ben salfu Yeises nanga santa yeye na a ten di a ben kisi dopu na ini a bakayari fu 29 G.T. Ma Yeises e go doro fu sori taki a droifibon e agersi moro leki en wawan, fu di a e taki:

„Ibri taki na ini mi di no e meki froktu, a e teki puru èn ibriwan di e meki froktu a e krin, so taki a mag meki moro froktu. . . . Neleki fa a taki no kan meki froktu fu en srefi efu a no tan na a droifibon, na a srefi fasi unu no kan meki froktu tu, efu unu no tan ini wánfasi nanga mi. Mi na a droifibon, unu na den taki.”

51 dei baka dati, na a ten fu penkstri, den apostru nanga trawan e tron taki fu a droifibon, di santa yeye ben kanti go na den tapu. Te fu kba 144.000 sma e tron taki fu na agersi droifibon. Makandra nanga a bonskin fu a droifibon, Yeises Krestes, den e vorm wan agersi droifibon di e meki den froktu fu Gado kownukondre.

Yeises e fruklari san na a sroto fu meki froktu: „A sma di e tan ini wánfasi nanga mi, èn mi ini wánfasi nanga en, a sma disi e meki furu froktu; bika aparti fu mi unu no man du noti kwetikweti.” Ma Yeises e taki taki efu wan sma e misi fu meki froktu, „den e iti en go a dorosei leki wan taki èn a e drei gwe; èn den e piki den taki dati kon na wan èn trowe den go na ini a faya èn den e bron den.” Na a tra sei Yeises e pramisi: „Efu unu e tan na ini wánfasi nanga mi èn den wortu fu mi e tan na ini unu, aksi dan awinsi san unu wani èn unu sa kisi den.”

Yeises e go moro fara fu sori en apostru san e gi en Tata glori, namku, „taki unu tan meki furu froktu èn sori taki unu de mi disipri.” A froktu di Gado e aksi fu den taki, de, fu den sori kresten eigifasi, lobi spesrutu. Boiti fu dati, fu di Krestes ben de wan preikiman fu Gado Kownukondre, meki a froktu di Gado e aksi de so srefi a wroko fu den fu meki disipri neleki fa en ben du.

„Tan na ini mi lobi”, Yeises e gi deki-ati now. Ma fa den apostru kan du disi? „Efu unu e hori den komando fu mi”, a e taki, „dan unu sa tan na ini mi lobi.” Moro fara Yeises e fruklari: „Disi na mi komando, taki unu lobi makandra neleki fa mi ben lobi unu. No wan sma abi moro bigi lobi leki disi, taki wan sma e gi en sili abra fu na bun fu en mati.”

Baka wantu yuru, Yeises sa sori a lobi disi di e psa ala tra sani fu di a o gi en libi fu na bun fu en apostru, èn so srefi fu ala trawan di sa sori bribi ini en. Na eksenpre fu en musu buweigi en bakaman fu abi a srefi lobi fu ófer den srefi gi makandra. Leki fa Yeises ben taki wan dei kba, dan a lobi disi sa meki sma kon sabi den: „Nanga disi ala sma sa sabi taki unu na mi disipri, efu unu abi lobi gi makandra.”

Fu kon sabi en mati meki Yeises e taki: „Unu na mi mati efu unu e du san mi e komanderi unu. Mi no e kari unu moro langa srafu, bika wan srafu no sabi san en masra e du, ma mi kari unu mati, bika ala den sani di mi yere fu mi Tata mi meki unu kon sabi.”

Fa dati de wan warti matifasi fu yu abi — fu de krosibei mati fu Yeises! Ma fu tan nyanbun fu a matifasi disi, dan en bakaman musu „tan meki froktu.” Efu den du dati, Yeises e taki, „dan awasi san unu e aksi a Tata na ini mi nen a [o] gi unu.” Fu tru, dati na wan bigi paiman fu meki kownukondre froktu!

Baka di Yeises e gi den apostru agen tranga fu „lobi makandra” a e fruklari taki a grontapu no sa wani si den na ai. Toku a e trowstu den: „Efu grontapu no wani si unu na ai, unu sabi taki a no ben wani si mi na ai bifo a no ben wani si unu na ai.” Moro fara Yeises e tyari kon a krin fu san-ede grontapu no wani si en bakaman na ai, di a ben taki: „Bika unu no de wan pisi fu grontapu, ma mi teki unu puru fu grontapu, na fu dati-ede meki grontapu no wani si unu na ai.”

Te Yeises e fruklari moro fara a reide fu na si di grontapu no wani si den na ai, a e go doro fu taki: „Ala den sani disi den sa du na unu fu mi nen ede, fu di den no sabi en [Yehovah, Gado] di seni mi kon.” Den wondru wroko fu Yeises, te yu luku en bun, e krutu den wan di no wani si en na ai: „Efu mi no ben du den wroko na den mindri di no wan tra sma ben du, dan den no ben sa abi sondu; ma now den si èn no wani si mi nanga mi Tata na ai.” Fu dati-ede, so leki fa Yeises e taki, den Buku kontru: „Sondro reide den no wani si mi na ai.”

Neleki fa Yeises ben du na fesi, na so a e trowstu den agen fu di a e pramisi fu seni a yepiman, a santa yeye, di de a wroko krakti fu Gado. „A wan dati sa gi kotoigi fu mi; èn unu fu unu sei musu gi kotoigi.” Yohanes 14:31-15:27; 13:3, 35; Galasia sma 6:16; Psalm 35:19; 69:4.

▪ Oten Yehovah ben prani na agersi droifibon, èn oten èn fa trawan e tron wan pisi fu a droifibon?

▪ Te fu kba, omeni taki na agersi droifibon abi?

▪ Sortu froktu Gado e aksi fu den taki?

▪ Fa wi kan de mati fu Yeises?

▪ Fu san-ede grontapu no wani si den bakaman fu Yeises na ai?