Wi Mekiman e meki wi kon sabi san a o du

Sensi a bigin, wi Mekiman gebroiki engel nanga profeiti fu taki nanga libisma. Boiti dati, a meki sma skrifi den boskopu nanga den pramisi fu en. Gado e pramisi taki wi kan de koloku na ini a ten di e kon. Ma pe yu kan feni den pramisi fu Gado na ini a ten disi?

A boskopu fu Gado de fu feni na ini Gado Wortu (2 Timoteyus 3:16). Fa Gado gebroiki profeiti fu skrifi den boskopu fu en? (2 Petrus 1:21) Gado poti den prakseri fu en na ini a frustan fu den man disi so taki den ben kan skrifi den. A de neleki te wan bisnisman e meki a sekretarsi fu en skrifi wan brifi gi en. Aladi na a sekretarsi skrifi a brifi, toku wi sabi taki a boskopu na fu a bisnisman. Na so a de tu taki aladi Gado gebroiki difrenti man fu skrifi a boskopu fu en, toku wi sabi taki a Santa Boskopu na fu en.

ALA SMA KAN KON SABI A BOSKOPU FU GADO

A boskopu fu Gado prenspari so te, taki a sorgu taki ’sma fu ala kondre, lo, nanga tongo’ kan kon sabi dati (Openbaring 14:6). Gado sorgu taki a heri Santa Boskopu, noso pisi fu en, de fu feni na ini moro leki 3000 tongo. Nowan tra buku na grontapu de fu feni na ini so furu tongo.