A Mekiman fu wi lobi wi

1. WI MEKIMAN E MEKI A SON OPO

Efu a son no ben de, dan libi no ben o de na grontapu. A son e meki taki bon e kisi wiwiri, bromki, froktu, noto, nanga siri. A e sorgu tu taki den rutu fu den bon e hari watra puru na ini a gron fu tyari go na den wiwiri èn te fu kaba a watra disi e tron dampu.

Wan presi na wan bergiskin pe sma prani te.

2. A MEKIMAN FU WI E MEKI ALEN FADON

Gado gi wi alen di e meki taki sani kan gro so taki wi abi nyanyan. Gado e gi wi alen komoto fu hemel èn bun ten di e meki taki wi abi bun furu nyanyan èn taki wi firi prisiri.

Wan fowru di sidon na tapu wan taki e langa en neki fu fanga wan froktu di e fadon.

3. WI MEKIMAN E SORGU TAKI WI ABI NYANYAN NANGA KROSI

Furu papa e broko den ede fa den kan sorgu taki den osofamiri abi nofo nyanyan nanga krosi. Luku san Gado Wortu e taki: „Luku den fowru di e frei na loktu bun. Den no e sai siri, den no e koti nyanyan èn den no e kibri nyanyan na ini maksin. Toku un Tata na hemel e gi den nyanyan. Unu no warti moro den?”—Mateyus 6:25, 26.

„Leri wan sani fu den leilibromki na ini a sabana èn luku fa den e gro. . . . Ma mi e taigi unu taki srefi Kownu Salomo di ben abi someni glori no ben weri so moi leki wan fu den bromki disi. Gado e meki den sani di e gro na ini a sabana weri so moi. . . . Efu dati de so, dan a de seiker taki a o gi unu . . . sani fu weri, a no so?”—Mateyus 6:28-30.

Efu Gado man sorgu taki wi abi nyanyan nanga krosi, dan a no de fu taki dati a kan sorgu taki wi abi den tra sani di wi abi fanowdu fu man tan na libi. Te wi e suku fu du a wani fu Gado, dan a kan blesi wi te wi e du muiti fu prani nyanyan, noso a kan yepi wi fu feni wroko so taki wi kan bai den sani di wi abi fanowdu.—Mateyus 6:32, 33.

A no de fu taki dati te wi e luku a son, alen, den fowru, nanga den bromki, dan dati e gi wi deki-ati fu lobi Gado. Na ini na artikel di e kon wi o luku fa a Mekiman fu wi meki wi kon sabi san a o du.