Sma di e yepi trawan di de na nowtu o kisi blesi

Furu sma na grontapu abi nyanyan nanga wan tanpresi fanowdu. Son sma no abi nowan howpu gi a ten di e kon. Efu wi du muiti fu yepi den sortu sma disi, dan Gado o feni wi bun èn a o blesi wi.

SAN GADO WORTU E TAKI

„A sma di e du bun gi den mofinawan e leni Yehovah èn A o pai a sma dati baka gi den bun di a du.”​—ODO 19:17.

FA WI MUSU YEPI SMA DI DE NA NOWTU

Yesus fruteri wan tori fu wan man di fufuruman ben ròs èn di den ben fon te fu dede (Lukas 10:29-37). Wan tra man di no ben sabi en srefisrefi ben si a man na sei pasi èn a stop fu yepi en. A du disi aladi a man ben de fu wan tra bribi.

Fu di a man disi ben abi switifasi, meki a tai den soro fu a trawan èn a tyari en go na wan presi pe sma ben kan sorgu en. A du ala den sani disi fu sorgu taki a man ben e firi moro bun.

San wi e leri fu a tori disi? Yesus ben wani sori taki wi musu du ala san wi man fu yepi sma di de na nowtu (Odo 3:27). Gado Wortu e sori taki heri esi Gado o sorgu taki sma no o pôti moro èn den no o pina moro. Ma kande wi e aksi wisrefi o ten Gado o du dati èn fa a o du dati. Na artikel di e kon now o taki fu den blesi di a Mekiman o gi yu.