Fa wi musu sori lobi gi tra sma

Fu di wi alamala na bakapikin fu a fosi man, Adam, meki wi na wán famiri. Aladi sma na ini wan osofamiri musu lobi makandra èn lespeki makandra, toku a muilek fu feni a lobi dati na ini a ten disi. Ma wi lobi-ati Gado no wani taki sma libi so nanga makandra.

SAN GADO WORTU E TAKI FU LOBI

„Un musu lobi tra sma leki fa unu lobi unsrefi.”​—LEFITIKUS 19:18.

„Tan lobi un feanti.”​—MATEYUS 5:44.

SAN A WANI TAKI FU LOBI TRA SMA

Luku san Gado e taki fu lobi na 1 Korentesma 13:4-7:

„Lobi abi pasensi èn a abi switifasi.”

Prakseri a sani disi: Fa yu e firi te trawan abi pasensi nanga switifasi èn te den no e atibron nanga yu awinsi yu meki wan fowtu?

„Lobi no e dyarusu.”

Prakseri a sani disi: Fa yu e firi te tra sma no e frutrow yu noso te den e dyarusu na yu tapu?

Lobi „no e suku en eigi bun”.

Prakseri a sani disi: Fa yu e firi te trawan abi lespeki gi a fasi fa yu e denki èn te den no e dwengi yu fu si sani na a fasi fa den e si sani?

Lobi „no e tan memre na ogri di trawan du”.

Prakseri a sani disi: Gado de klariklari fu gi sma pardon te den abi berow fu den sondu. „A no o tan suku fowtu na wi èn a no o hori wi na ati fu têgo tu” (Psalm 103:9). Wi breiti te wan sma e gi wi pardon te wi du wan sani nanga en di hati en. Dati meki wi musu de klariklari tu fu gi trawan pardon te den du wan sani nanga wi di hati wi.​—Psalm 86:5.

Lobi „no e prisiri nanga sani di no bun”.

Prakseri a sani disi: Te wan ogri miti wi, dan wi no lobi te trawan e prisiri fu a sani dati. Dati meki wi no musu prisiri tu te ogri miti tra sma, srefi te den no ben libi bun nanga wi.

Efu wi wani taki Gado blesi wi, dan wi musu sori lobi gi trawan na den fasi di kari na ini na artikel disi. Wi musu lobi trawan awinsi den yongu noso owru, èn awinsi fu sortu kondre noso bribi den de. Wán fasi fa wi kan du disi, na te wi e yepi sma di de na nowtu.