2 | „Trowstu fu Gado Buku”

BIJBEL E TAKI: „Ala sani di sma skrifi fositen, ben skrifi fu leri wi wan sani. Disi e yepi wi fu horidoro èn fu kisi trowstu fu Gado Buku, so taki wi kan abi howpu.”—ROMESMA 15:4.

San a tekst disi wani taki

Bijbel abi moi tekst di kan gi wi a deki-ati nanga a krakti di wi abi fanowdu fu horidoro te takru prakseri e trobi wi. Den leri fu Bijbel e gi wi a howpu tu dati heri esi den sani di e meki taki sma e sari no o de moro.

Fa disi kan yepi

Wi alamala e sari son leisi. Ma den sma di abi depressiviteit e firi sari doronomo, den e broko den ede tumusi nanga sani èn den kan abi den firi disi ala dei. Fa Bijbel kan yepi den?

Bijbel abi furu moi tekst di kan yepi wi fu prakseri sani di bun (Filipisma 4:8). A kan trowstu wi trutru èn a kan furu wi frustan nanga bun prakseri di o yepi wi fu abi wan korostu firi.—Psalm 94:18, 19.
Bijbel kan yepi wi fu no denki moro taki wi no warti noti.—Lukas 12:6, 7.
Furu tekst na ini Bijbel e gi wi a dyaranti taki wi no de wi wawan èn taki Gado, wi Mekiman, e frustan heri bun fa wi e firi.—Psalm 34:18; 1 Yohanes 3:19, 20.
Bijbel e pramisi taki Gado o sorgu taki wi no o memre den sani moro di e meki wi firi sari (Yesaya 65:17; Openbaring 21:4). Te wi e broko wi ede tumusi noso te wi e firi sari doronomo, dan a pramisi disi kan gi wi a krakti fu horidoro.

Fa Bijbel e yepi Jessica

Fa a du kon taki mi e firi brokosaka doronomo

„Di mi ben abi 25 yari, mi ben e stress so furu taki mi no ben man wroko moro. Datra kon si taki mi ben abi depressiviteit èn taki a siki disi ben meki taki mi e firi brokosaka doronomo. A wan momenti mi ben de rustig, dan wantronso mi ben e memre ogri sani di ben miti mi fosi. Den datra yepi mi fu frustan taki na den ogri sani di ben miti mi, ben meki taki mi ben e firi brokosaka doronomo. Boiti taki mi ben kisi dresi, mi ben abi datrayepi fanowdu tu fu man frustan te wan prakseri di opo kon na ini mi ede no bun gi mi, èn san mi kan du fu no denki so moro.”

Fa Bijbel e yepi mi

„Na a ten di a depressiviteit fu mi ben hebi srefisrefi, mi ben e bruya so te taki mi no ben sabi san fu du, mi ben e frede srefisrefi èn mi no ben man sribi. Te neti mi ben e prakseri ala sortu sani di ben e bruya mi frustan èn mi no ben man tapu fu denki so. Ma soleki fa Psalm 94:19 e taki, dan Gado kan trowstu wi te den prakseri fu wi e trobi wi. Dati meki mi ben poti mi Bijbel krosibei fu mi bedi makandra nanga wan buku pe mi ben skrifi Bijbeltekst di e gi mi deki-ati. Te mi no ben man sribi te neti, dan mi ben e leisi wan tu Bijbeltekst èn na so den prakseri fu Gado ben e trowstu mi.”

„Bijbel e gi wi a deki-ati fu rutu ibri denki puru di no de soleki fa Gado e leri wi. Fosi, mi ben e bribi taki mi no warti noti èn taki sma no kan lobi mi. Ma mi leri taki den sortu prakseri dati no e kruderi nanga san Bijbel e leri. Bijbel e sori taki Gado na wan lobi-ati Papa di e broko en ede nanga ibriwan fu wi. Safrisafri mi leri fu basi den prakseri fu mi, na presi fu meki den prakseri fu mi basi mi. Mi leri fu si misrefi soleki fa Gado e si mi. Disi ben de wan prenspari sani di yepi mi fu no firi moro leki mi no warti noti noso taki sma no lobi mi.

„Mi sabi taki na ini a ten di e kon sma no o memre nowan enkri sani moro di e meki den firi sari èn nowan sma no o denki moro taki a no warti noti. Mi sabi tu taki depressiviteit no o de moro èn tra siki di e meki sma firi brokosaka doronomo no o de tu. Disi e yepi mi fu horidoro fu di mi sabi taki na ini a ten di e kon mi no o abi a siki disi moro.”