Ondrofenitori

Sori sar’ati gi ala sortu sma

Wan dei, wan s’sa na ini Nyun Zeeland ben e luku wan felem tapu jw.org. A felem ben e sori taki Yehovah no e firi sari nomo gi sma, ma taki a e du sani tu fu yepi den (Yes. 63:7-9). A s’sa besroiti fu du san a leri èn fu suku okasi fu yepi trawan. Moro lati a srefi dei dati, a go bai gruntu, dan a miti wan frow di ben e libi na strati. A taigi a frow taki a ben o bai wan sani gi en fu nyan. A frow ben feni en bun. Di a s’sa drai kon baka nanga a n’nyan, a gebroiki na okasi dati fu taki nanga a frow fu Yehovah èn a sori en a traktaat Pina o kaba wan dei?

A frow bigin krei. A ferteri a s’sa taki a ben kweki leki Kotoigi ma a gwe libi waarheid furu yari psa. Ma no so langa psa, a begi Yehovah fu yepi en fu drai kon baka na en. A s’sa gi a frow wan Bijbel èn a seti sani so taki a frow ben kan kisi Bijbelstudie.a

Neleki Yehovah wi kan sori sar’ati gi sma, sosrefi gi wi famiri èn gi den brada nanga s’sa fu wi na ini a gemeente. Èn wi e sori sar’ati tu te wi e suku okasi fu ferteri trawan fu Yehovah.