Fa tu sma di abi verkering kan teki koni besroiti?

1-2. Fa son sma e si a ten te wan brada nanga sisa abi verkering?

TE TU sma abi verkering, dan dati kan de wan span ten gi den di e gi den furu prisiri. Efu yu abi verkering, dan yu wani taki ala sani go bun na ini a ten te unu e leri sabi unsrefi. Gi furu sma a verkering fu den ben waka bun. Tsion,a wan sisa fu Etiopia, e taki: „Wan fu den moro switi ten na ini mi libi, na di mi nanga mi masra ben abi verkering. Wi ben taki fu prenspari sani ma wi ben lafu furu tu. Mi ben breiti srefsrefi di mi kon si taki mi feni wan sma di mi lobi èn di lobi mi tu.”

² Ma wan brada fu Bakrakondre di nen Alessio e taki: „A ben gi mi prisiri fu kon leri sabi mi frow di wi ben abi verkering, ma wi ben abi problema tu.” Na ini na artikel disi wi o taki fu wan tu problema di kan kon te sma abi verkering èn wi o taki fu wan tu Bijbel gronprakseri di kan yepi den fu teki koni besroiti. Wi o luku tu fa trawan na ini a gemeente kan horbaka gi den sma di abi verkering.

FU SAN EDE SMA ABI VERKERING

3. San verkering e yepi sma fu du? (Odo 20:25)

³ A ten fu verkering, na wan switi ten, ma na wan seryusu sani tu fu di a kan taki den tu sma di de nanga makandra o trow baka ten. Tapu a trowdei fu den, a man nanga na uma e sweri na fesi Yehovah fu lobi èn lespeki makandra so langa den de na libi. Fosi wi meki wan sweri, wi musu prakseri a tori bun. (Leisi Odo 20:25.) Dati de so tu nanga a sweri di sma e meki te den trow. Te tu sma abi verkering, dan dati e gi den na okasi fu leri sabi densrefi èn fu teki bun besroiti. Son leisi den e besroiti fu trow èn son leisi den e besroiti fu no de nanga makandra moro. Efu tu sma broko a verkering fu den, dan dati no wani taki dati den du wan sani di no bun. Na presi fu dati a verkering fu den yepi den fu teki wan bun besroiti, iya, a yepi den fu kon sabi efu den musu trow noso efu den no musu trow.

4. Fu san ede wi musu si sani na wan yoisti fasi te tu sma abi verkering?

⁴ Fu san ede a prenspari gi wan sma di no trow fu si verkering na wan yoisti fasi? Te so wan sma e si a tori disi na wan yoisti fasi, dan a no o de nanga wan sma di a sabi kba taki a no o wani trow nanga en. Ma a no soso den sma di no trow musu si a tori disi na wan yoisti fasi. Wi alamala musu si en na wan yoisti fasi. Fu eksempre, son sma e denki taki efu tu sma abi verkering, dan den musu trow nomonomo nanga makandra. Fa a denki disi e meki wan sma di no trow firi? Melissa, wan sisa di no trow èn di e libi na Amerkankondre, e taki: „Te wan brada nanga wan s’sa abi verkering, dan son Kotoigi e ferwakti taki den musu trow. Disi e meki taki son sma di abi verkering e go doro awinsi den kon si taki den no o bun gi makandra. Ma tra sma no wani bigin srefsrefi nanga verkering. A sani disi kan tyari furu stress nanga broko-ede gi den.”

LERI SABI UNSREFI BUN

5-6. Te tu sma abi verkering, dan san den musu kon sabi fu densrefi na a ten dati? (1 Petrus 3:4)

⁵ Efu yu abi verkering nanga wan sma, dan san o yepi yu fu besroiti efu yu o trow noso efu yu no o trow? Leri sabi unsrefi bun. Kande fosi yu bigin nanga verkering, yu ben sabi wan tu sani kba fu a sma. Ma now yu abi na okasi fu kon sabi fa ’a sma de dipi na ini en ati’. (Leisi 1 Petrus 3:4.) Disi wani taki dati yu kan kon sabi moro fu a matifasi di a sma abi nanga Yehovah, fu den fasi fu en, èn fu a fasi fa a e denki. Baka wan pisi ten yu musu man piki den sortu aksi disi: ’A sma disi o de wan bun trowpatna gi mi?’ (Odo 31:26, 27, 30; Ef. 5:33; 1 Tim. 5:8) ’Mi kan sori en a lobi di a abi fanowdu èn mi kan gi en a ten di a abi fanowdu? A sma kan gi mi san mi abi fanowdu tu? Wi man libi nanga den swakifasi fu wisrefi?’b (Rom. 3:23) Te unu e leri sabi unsrefi, dan hori disi na prakseri: No luku nomo san na den srefi sani di un ala tu lobi. Ma suku fu sabi efu un ala tu kan fiti unsrefi te unu no e denki a srefi fu son sani.

⁶ Sortu tra sani yu musu kon sabi fu a sma? Fosi yu kon lobi a sma nanga yu heri ati, a ben o bun fu taki nanga en fu wan tu prenspari sani soleki den sani di a sma wani du na ini en libi. Ma fa a de nanga tra sani fu a sma soleki a gosontu fu en èn den moni problema di a abi? A de so taki wan ogri sani miti a sma na ini en libi di du wan sani nanga en ferstan, den firi fu en, noso a fasi fa a e tyari ensrefi? Yu no abi fu taki fu ala den sani disi wantewante te un bigin abi verkering. (Luku Yohanes 16:12.) Efu yu feni taki yu no wani taki fu son sani ete na a bigin fu a verkering, dan taigi a sma dati. Awinsi fa a no fa, baka wan pisi ten a sma o abi fu kon sabi den sani dati fu man teki wan bun besroiti. Dus wan dei o kon dati yu o abi fu taki eerlijk fu den sani disi.

7. Fa tu sma di abi verkering kan kon sabi makandra? (Luku a faki „Te yu abi verkering nanga wan sma di e libi farawe”.) (Luku den prenki.)

⁷ Fa yu kan kon sabi fa a sma de dipi na ini en ati? Wan fasi na fu taki eerlijk nanga en, poti aksi gi en èn arki bun te a e taki (Odo 20:5; Yak. 1:19). Fu man du dati a ben o bun fu du sani makandra di o meki en makelek gi unu fu taki. Sani soleki fu nyan nanga makandra, fu teki wan koiri na presi pe furu sma de, èn fu preiki nanga makandra. Un kan leri sabi unsrefi tu te unu de nanga mati èn famiri. Boiti dati, du sani makandra di o sori yu fa a sma e tyari ensrefi na ini difrenti situwâsi èn nanga difrenti sma. Luku san Aschwin fu Bakrakondre ben pruberi fu du. A e taki fu a ten di a ben abi verkering nanga Alicia: „Wi ben pruberi fu du sani di ben o yepi wi fu leri sabi wisrefi moro bun. Moro furu fu den sani di wi ben du, ben de simpel sani soleki fu bori èn du tra wroko makandra. Te wi ben e du den sortu sani dati, dan wi ben man si den bun fasi nanga den swakifasi fu makandra.”

8. Fu san ede a bun te tu sma di abi verkering e studeri nanga makandra?

⁸ Unu kan leri sabi unsrefi moro bun tu te unu e studeri difrenti tori fu Bijbel makandra. Efu yu trow, dan yu musu meki ten gi na Osofamiri Anbegi so taki Gado kan de wan prenspari pisi fu yu trowlibi (Preik. 4:12). Dus a ben o bun fu meki ten fu studeri now nanga makandra na ini a verkering fu unu. Ma tu sma di abi verkering no de wan osofamiri ete èn a brada no de na edeman fu a sisa ete. Awinsi fa a no fa, te unu e studeri nanga makandra, dan dati o yepi yu fu kon sabi fa a sma nanga Yehovah de. Max nanga Laysa, wan paar di e libi na ini Amerkankondre, kon si wan tra sani di e meki taki a bun fu studeri nanga makandra. Max e taki: „Na a bigin fu a verkering fu wi, wi studeri den buku nanga den tori di e taki fu verkering, fu a trowlibi èn fu na osofamiri libi. Disi yepi wi fu taki fu furu prenspari sani di sma no e taki so makelek fu den.”

TRA SANI DI YU MUSU LUKU

9. Te tu sma abi verkering, dan san den musu hori na prakseri fosi den ferteri trawan taki den abi verkering?

⁹ Suma yu musu ferteri taki yu abi verkering? Na yu nanga a sma nanga suma yu de musu besroiti dati. Te yu bigin nanga verkering, dan yu kan besroiti fu ferteri wan tu sma nomo (Odo 17:27). Te yu du dati, dan sma no o kon aksi-aksi wan lo sani fu yu nanga a sma èn den no o poti druk na yu tapu fu teki wan besroiti. Ma efu yu no ferteri nowan sma, dan a kan psa makelek taki unu o go du sani un w’wan fu di unu no wani taki tra sma kon sabi. A sani disi kan tyari un kon na ini bigi probleem. Dati meki a bun fu taigi den sma di kan gi yu bun rai èn di kan yepi yu na tra fasi (Odo 15:22). Fu eksempre, yu kan taigi son famiriman, lepi mati, noso den owruman.

10. Fa tu sma di abi verkering, kan sorgu taki den tan tyari densrefi na wan fasi di Yehovah feni bun? (Odo 22:3)

¹⁰ Te yu abi verkering, dan fa yu kan sorgu taki yu e tan tyari yusrefi na wan fasi di Yehovah feni bun? O moro unu o kon lobi makandra, o moro unu o wani de nanga makandra. San kan yepi yu fu no du wan sani di no fiti? (1 Kor. 6:18) No taki fu sani di no fiti, no de un w’wan na wan presi sondro wan tra sma, èn no dringi tumsi furu sopi (Ef. 5:3). Den sani disi kan wiki den sekslostu fu unu èn den kan meki en muilek fu tan du san bun. Dati meki a ben o de wan koni sani efu unu e taki nanga makandra san unu o du fu tan tyari unsrefi na wan fasi di Yehovah feni bun. (Leisi Odo 22:3.) Luku san yepi Dawit nanga Almaz fu Etiopia. Den e taki: „Wi ben gwenti de makandra na presi pe furu sma de noso wi ben de nanga mati. Noiti wi ben de wi w’wan na ini wan wagi noso wan oso. Na so wi ben luku bun fu no kon na ini situwâsi di ben o meki en muilek fu hori wisrefi.”

11. Te tu sma abi verkering, dan san den musu hori na prakseri te den o besroiti san den o du fu sori taki den lobi densrefi?

¹¹ Sma di abi verkering mag du sani fu sori taki den lobi densrefi? Son sani fiti fu du o moro unu e kon lobi unsrefi. Ma efu den lobifiri kon tranga, dan a kan muilek gi yu fu teki koni besroiti (Singi 1:2; 2:6). Boiti dati, te yu e du sani fu sori a sma taki yu lobi en, dan a kan psa makelek dati yu lasi yusrefi èn du wan sani di Yehovah no feni bun (Odo 6:27). Dati meki a bun fu taki na a bigin fu a verkering kba san Yehovah feni bun ini a tori disi èn te o fara unu o go fu sori taki un lobi unsrefic (1 Tes. 4:3-7). Aksi unsrefi den sani disi: ’Fa tra sma ben o si en efu wi ben o du sani fu sori taki wi lobi wisrefi? Den sortu sani disi kan wiki den seksfiri fu wan fu wi?’

12. Efu tu sma di abi verkering, no e agri nanga makandra, dan san den musu du?

¹² San yu kan du te unu no e agri nanga makandra? San yu musu du efu wanwan leisi unu e kisi trobi? Disi wani taki dati unu no bun gi makandra? Dati no abi fu de so. Ala paar e kisi pkinpkin trobi nanga densrefi. Tu sma abi wan bun trowlibi te den e lespeki makandra èn te den man fiti densrefi na san a trawan wani. Dus a fasi fa yu e lusu wan probleem now kan sori efu yu kan abi wan bun trowlibi. Un kan aksi unsrefi: ’Wi kan tan rustig èn taki fu wan sani na wan lespeki fasi? Wi de gaw fu taki dati wi du wan sani di no bun èn wi e pruberi fu wroko na en? Wi de gaw fu libi wan tori, fu taki sorry èn fu gi pardon?’ (Ef. 4:31, 32) Ma efu ala yuru yu e kisi trobi nanga makandra noso efu yu no e feni en nanga makandra, dan a situwâsi no o kon moro bun baka te yu trow. Efu yu kon si taki a sma no bun gi yu, dan a moro bun sani gi un ala tu na fu broko a verkering.d

13. San o yepi tu sma di abi verkering fu besroiti o langa den o hori a verkering?

¹³ O langa wan verkering musu hori? Te sma e hasti densrefi fu teki wan besroiti, dan a e psa moro furu taki den abi takru bakapisi (Odo 21:5). Dus a verkering fu yu musu de langa nofo gi yu fu leri sabi a sma bun. Ma yu no musu hari a verkering go tumsi langa efu a no de fanowdu. Bijbel e taki tu: „Te wan sma no man kisi san a e fruwakti, dan en ati o kon siki” (Odo 13:12). Boiti dati o moro yu nanga a sma de makandra, o moro muilek a o de fu hori unsrefi te den sekslostu e opo kon (1 Kor. 7:9). Na presi fu luku nomo o langa yu de na ini a verkering kba, yu kan aksi yusrefi: ’San mi musu kon sabi ete fu a sma so taki mi kan teki wan besroiti?’

FA TRAWAN KAN HORBAKA GI TU SMA DI ABI VERKERING?

14. Na sortu fasi trawan kan horbaka gi tu sma di abi verkering? (Luku a prenki.)

¹⁴ Efu wi sabi tu sma di abi verkering, dan fa wi kan yepi den? Wi kan kari den fu kon nyan nanga wi, fu kon na wi Osofamiri Anbegi noso fu go du wan prisiri sani makandra (Rom. 12:13). Na ini den sortu situwâsi dati den tu sma kan kon leri sabi densrefi moro bun. Kande den abi wan sma fanowdu fu go nanga den na wan presi so taki den no de den w’wan. Kande yu kan rèi nanga den na ini a wagi. Noso yu kan kari den kon na yu oso so taki den no de den w’wan (Gal. 6:10). Alicia di wi ben taki fu en kba, e memre ete san en nanga Aschwin ben lobi. A e taki: „Wi ben breiti te son brada nanga s’sa ben taki dati wi ben kan go na den oso efu wi ben abi wan presi fanowdu fu de makandra aladi tra sma drape.” Efu tu sma di abi verkering aksi yu fu kon nanga den so taki den no de den w’wan, dan yu kan si dati leki wan moi okasi fu yepi den mati fu yu. Ma luku bun taki yu no e libi den tu sma dati den w’wan. Sorgu tu taki yu e ferstan o ten yu musu libi den so taki den kan taki nanga densrefi.​—Fil. 2:4.

15. San mati kan du fu yepi den tu sma di abi verkering? (Odo 12:18)

¹⁵ Wi kan yepi tu sma di abi verkering te wi e luku bun san wi e taki èn san wi no e taki. Son leisi wi o abi fu hori wisrefi kande fu no taki noti. (Leisi Odo 12:18.) Fu eksempre, kande wi wani ferteri trawan taki den tu sma abi verkering, ma kande na den tu sma dati wani ferteri trawan a nyunsu. Wi no musu taktaki sani fu den tu sma di abi verkering èn wi no musu krutu den persoonlijk besroiti di den e teki (Odo 20:19; Rom. 14:10; 1 Tes. 4:11). Boiti dati, wi no musu taki sani noso aksi sani di kan meki den tu sma firi taki den musu trow nomonomo. Wan sisa di nen Elise nanga en masra kan memre disi ete: „Wi ben firi wan fasi te trawan ben kon aksi wi san wi seti gi a trowdei fu wi aladi wi no ben taki fu den sani dati ete nanga makandra.”

16. San wi musu du te tu sma broko a verkering fu den?

¹⁶ Fa a de efu tu sma besroiti fu broko a verkering fu den? Wi musu luku bun fu no go bemui na ini a tori noso fu teki sei (1 Petr. 4:15). Wan sisa di nen Lea e taki: „Mi ben kon yere san trawan ben e taki fu san ede mi nanga wan brada broko a verkering fu wi. A sani dati ben hati mi srefsrefi.” Soleki fa wi ben taki kba, dan te wan verkering broko, dan dati no wani taki dati den tu sma teki wan don besroiti. Eigenlijk a wani taki dati a verkering yepi den tu sma fu teki wan bun besroiti. Ma tòg a besroiti di den teki fu broko a verkering, kan meki den sari srefsrefi èn a kan meki den firi leki den de den w’wan. Dati meki wi kan suku okasi fu yepi den.​—Odo 17:17.

17. Te tu sma abi verkering, dan san den musu du go doro?

¹⁷ Soleki fa wi si kba, dan a ten fu verkering kan de wan switi ten ma a kan abi en problema tu. Jessica e memre disi: „Mi o taigi yu eerlijk, verkering tya wroko. Ma a no e hati mi srefsrefi taki mi gi so furu fu mi ten nanga krakti fu kon leri sabi mi masra.” Efu yu abi verkering, dan tan du muiti fu kon leri sabi makandra bun. Efu yu du dati, dan yu o abi wan bun verkering. Iya, yu o abi wan verkering di o yepi un ala tu fu teki koni besroiti.