Aksi fu Leisiman

O seryusu Kresten musu si a meki di sma e meki mofo fu trow?

Te sma e meki mofo fu trow, dan dati e meki den firi koloku, ma a de wan seryusu sani tu. No wan lepi Kresten musu si a meki di sma e meki mofo fu trow leki wan pikin sani, èn denki taki a kan broko disi o ten a wani èn gi ibri pikinpikin sani. A pisi ten di sma meki mofo fu trow na wan ten so srefi di den tu sma kan gebroiki fu kon leri sabi makandra moro bun bifo den trow.

Te wi e taki fu a tori disi, dan wi musu hori na prakseri taki na difrenti presi èn na ini difrenti pisi ten, den gwenti di abi fu du nanga trow èn den sani di sma e du bifo den e trow, e difrenti furu. Bijbel e tyari disi kon na krin.

Den tu umapikin fu Lot, di „noiti ete ben didon nanga wan man”, ben meki mofo na wan sortu fasi fu trow nanga tu man fu a presi drape. ’Den masra fu [Lot] en umapikin ben o teki den umapikin fu en’, ma Bijbel no e taigi wi fu san ede èn fa den ben meki mofo fu trow. ¿Den umapikin ben de bigisma kaba? ¿Den ben kan taki tu suma den ben wani trow? ¿Den ben sori sma taki den ben meki mofo fu trow? Wi no sabi (Genesis 19:8-14). Wi sabi taki Yakob ben seti en eigi tori nanga a papa fu Rakèl fu trow nanga Rakèl, baka te a ben wroko seibi yari gi Rakèl papa. Ala di Yakob ben kari Rakèl „mi wefi”, toku den no ben abi seks nanga makandra na ini den yari disi (Genesis 29:18-21). Wan tra eksempre na di fu David, di ben musu wini den Filisteasma bifo a ben kan trow nanga na umapikin fu Saul. Te David ben o du san Saul ben aksi en, dan a ben kan trow nanga Mikal, na umapikin fu Saul (1 Samuèl 18:20-28). A „meki di sma ben meki mofo fu trow” na a fasi dati, ben difrenti fu makandra èn fu a fasi fa furu kondre gwenti na ini a ten disi.

A Wet fu Moses ben abi wet di ben taki fu a trow èn fu a meki di sma ben meki mofo fu trow. Fu eksempre, wan man ben kan abi moro leki wán wefi; a ben kan brokotrow fu difrenti reide ede, ala di soleki fa a sori, a wefi no ben kan du dati (Exodus 22:16, 17; Deuteronomium 24:1-4). Wan man di ben kori wan nyunwenke di no ben meki mofo ete fu trow, ben musu trow na uma efu a papa fu na uma ben wani, èn noiti moro a ben kan prati fu na uma (Deuteronomium 22:28, 29). Tra wet ben de gi a trowlibi, soleki o ten sma no ben mag abi seks nanga makandra (Lefitikus 12:2, 5; 15:24; 18:19). Sortu wet ben taki fu a meki di sma ben meki mofo fu trow?

Wan uma fu Israèl di ben meki mofo fu trow ben abi wan tra posisi na ini a wet leki wan uma di no ben meki mofo ete fu trow; na ini wan tu kefal den ben si en leki wan uma di ben trow kaba (Deuteronomium 22:23-29; Mateus 1:18, 19). Israèlsma no ben kan meki mofo fu trow nanga son famiriman noso trow nanga den. Furutron den ben de famiriman di ben abi a srefi afo, ma son leisi den no ben mag meki mofo fu trow èn trow, fu den reti ede di den abi leki erfgenaam. (Lefitikus 18:6-20; luku De Wachttoren fu 1 yuli 1982, bladzijde 28-31.) A de krin taki den futuboi fu Gado no ben musu si a meki di sma ben meki mofo fu trow leki wan pikin sani.

Israèlsma ben musu hori densrefi na ala den seti dati fu a Wet, ma Kresten no de na ondro a Wet dati, so srefi den Wet di e taki fu a meki di sma e meki mofo fu trow noso e trow (Romesma 7:4, 6; Efeisesma 2:15; Hebrewsma 8:6, 13). Fu taki en leti, Yesus ben leri taki den markitiki gi Kresten ini a tori fu trow, ben difrenti fu di fu a Wet (Mateus 19:3-9). Toku a no ben taki dati a trowlibi noso a meki di sma e meki mofo fu trow no de wan seryusu sani. So bun, o seryusu a tori di wi e taki dya, dati wani taki a meki di sma e meki mofo fu trow, de gi Kresten?

Na furu kondre sma e bosroiti gi densrefi suma den wani trow. Te wan man nanga wan uma pramisi kaba taki den o trow nanga makandra, dan sma kan taki dati den meki mofo fu trow. Furutron a no de fanowdu taki sma musu du wan spesrutu sani fu sori taki den meki mofo fu trow. A tru taki na son presi a gwenti de taki a man e gi na uma di sa tron en wefi, wan linga fu sori taki den meki mofo fu trow. Noso a gwenti de taki den e taigi famiri nanga mati taki den meki mofo fu trow, èn dati den e du kande te a famiri e kon makandra fu nyan noso na wan tra pikin fesa. Disi na sani di sma e bosroiti gi densrefi, ma a no Bijbel e taigi den san den musu du. A mofo di sma e meki fu trow, na a kruderi di den tu sma abi.a

Wan Kresten no musu hori nanga wan sma tumusi esi, noso meki mofo fu trow, noso trow tumusi esi. Wi e tyari buku kon na doro di abi den gron tapu Bijbel èn di kan yepi sma fu bosroiti efu a de wan koni sani fu bigin hori nanga wan sma noso fu bigin sreka sani fu meki mofo fu trow noso fu trow.b Wan prenspari sani fu a rai na taki a trowlibi fu wan Kresten na fu ala ten.—Genesis 2:24; Markus 10:6-9.

Tu Kresten musu sabi makandra bun bifo den e bigi prakseri fu meki mofo fu trow. Ibriwan fu den kan aksi: ’¿Mi de seiker fu a yeyefasi fu a trawan èn taki a e gi ensrefi na ini a dini fu Gado? ¿Mi denki taki mi kan dini Gado nanga a sma dati mi heri libi langa? ¿Wi kon sabi den eigifasi fu makandra nofo kaba? ¿Mi de seiker taki wi sa fiti makandra fu ala ten? ¿Wi sabi nofo fu den sani di a trawan ben du na ini a ten di pasa èn wi sabi nofo fu a situwâsi pe a de na ini?’

Te tu Kresten meki mofo kaba fu trow, dan den nanga tra sma abi a reti fu fruwakti taki den sa trow. Yesus ben frumane: „Meki un wortu Iya wani taki Iya, [èn] un No, [wani taki] No” (Mateus 5:37). Kresten di e meki mofo fu trow musu abi dati na prakseri trutru. Ma son leisi wan Kresten di meki mofo fu trow kan kon sabi taki bifo a ben meki mofo fu trow, wan seryusu sani no ben taki noso a no ben kon na krin. Kande a de wan prenspari sani fu a libi di a tra sma ben abi fosi, srefi a du di a ben du wan ogri noso hurudu. A Kresten di kon sabi den sani disi musu bosroiti san a o du. Kande den tu sma sa taki finifini fu a tori èn bosroiti taki den sa tan leki sma di meki mofo fu trow. Noso den ala tu kan bosroiti taki den wani tapu a meki di den meki mofo fu trow nanga makandra. Ala di a du di den e du dati na wan afersi fu densrefi — a no de wan sani di trawan musu go bumui na ini èn pruberi fu denki wan tra sani, noso fu krutu den sma — toku a de wan tumusi prenspari bosroiti. Na a tra sei, a sma di kon sabi a seryusu tori disi kan feni taki a wani tapu a meki mofo di a ben meki fu trow, srefi te a tra sma wani go doro nanga dati.—Luku „Aksi fu Leisiman” na ini De Wachttoren fu 15 september 1975.

A bun fu lusu den tori disi, fosi yu e go trow. Yesus ben taki dati a wan-enkri reide di Bijbel e gi sma fu brokotrow èn fu kan trow baka na por·neiʹa, seryusu seks hurudu fu wan fu den trowpatna (Mateus 5:32; 19:9). A no ben taki dati wan trow di skrifi na lantibuku kan broko te wan sma kon sabi taki en trowpatna ben abi wan bigi problema noso ben du wan ogri bifo den ben trow.

Fu eksempre, na ini a ten fu Yesus, sma ben kan kisi gwasi fu tra sma. ¿Wan Dyu masra di ben kon sabi taki a patna fu en (efu a ben sabi noso no ben sabi) ben abi gwasi di a trow nanga en, ben mag brokotrow? So bun, wan Dyu di ben de ondro a Wet ben kan brokotrow, ma Yesus no ben taki dati disi ben fiti gi den bakaman fu en. Luku wan tu situwâsi fu a ten disi. Wan man di abi syphilis, herpes na a syenpresi, HIV, noso wan tra seryusu siki di kan gi abra na tra sma, kan trow sondro fu taki dati a abi a siki. Kande a kisi a siki fu di a ben du hurudu bifo noso na ini a ten di a ben meki mofo kaba fu trow. Efu a wefi kon sabi baka ten taki a masra abi a siki noso taki fosifosi a masra ben du hurudu (noso srefi taki a no man kisi pikin noso taki a no man abi seks), dan dati no e kenki noti na a trow di den trow kaba. Bijbel no e gi a wefi pasi fu brokotrow te a masra ben libi wan yayo libi fosifosi bifo den trow, neleki fa a masra no mag brokotrow te a wefi ben kisi wan siki noso no ben taigi en taki a ben abi bere fu wan tra man di den trow. Den trow kaba èn den abi wan fruplekti na makandra.

A tru taki den sari situwâsi dati no e pasa furu, ma den eksempre disi musu poti krakti na tapu a prenspari penti: Sma no musu si a meki di den e meki mofo fu trow leki wan pikin sani. Bifo èn na ini a ten di den meki mofo fu trow, Kresten musu pruberi fu kon sabi makandra bun. Den musu de eerlijk fu sani di a trawan wani sabi noso di a abi a reti fu sabi. (Na son kondre, wet e fruplekti paar taki den musu meki datra ondrosuku den bifo den e trow. Tra paar ben sa wani du so wan ondrosuku fu densrefi.) So bun, a prisiri èn a seryusu fasi fu a meki di tu sma meki fu trow sa abi wan lespeki marki, ala di den tu sma dati sa go na ini wan trowlibi di e gi moro prisiri èn di de moro seryusu srefi.—Odo 5:18, 19; Efeisesma 5:33.

[Futuwortu]