TAN NA AI!
A feti na Ukraini e meki taki na heri grontapu a muilek fu feni nyanyan
Tapu 19 mei 2022, den VN-raiman di abi a frantwortu fu luku efu ala sani na grontapu de veilig (VN-veiligheidsraad) yere fu moro leki 75 tiriman taki „a COVID-19 siki di panya na heri grontapu nanga a fasi fa a weer kon kenki, ben meki kaba taki na heri grontapu a muilek fu feni nyanyan, ma now a feti na Ukraini meki taki a problema disi kon moro bigi”. Syatu baka dati wan koranti di nen The Economist fruklari taki a „feti meki taki a no o teki langa moro fosi wan bigi angriten o kon na heri grontapu”. Bijbel ben taki kaba dati na ini a ten disi a ben o de wan bigi problema fu feni nyanyan. Ma Bijbel e sori tu san wi kan du te disi miti wi.
Bijbel ben taki kaba taki a ben o muilek fu feni nyanyan
Yesus ben taki: ’A wan kownukondre o go feti nanga a tra kownukondre. Na ini a wan presi baka a trawan angriten o de.’—Mateyus 24:7.
A Bijbel buku Openbaring e taki fu fo man di e rèi na tapu asi. Wan fu den man disi e prenki feti. Leti na en baka wan trawan e kon di e prenki angriten, wan ten pe a ben o muilek fu feni nyanyan èn pe sma ben o aksi bun furu moni gi nyanyan. „Mi si wan blaka asi èn a sma di ben e sidon na en tapu ben abi wan wegi na ini en anu. Dan mi yere wan sten. . . . A taki: ’Wán kilo aleisi gi wán dei moni, nanga dri kilo groto gi wán dei moni.’”—Openbaring 6:5, 6.
Den Bijbel profeititori disi di e taki fu angriten e kon tru now na ini a ten di Bijbel e kari „den lasti dei” (2 Timoteyus 3:1). Efu yu wani sabi moro fu „den lasti dei” nanga den fo asi fu Openbaring, dan luku a felem di nen Grontapu kenki sensi 1914 èn leisi na artikel di nen „Suma na den fo man na tapu den asi?”
Fa Bijbel kan yepi wi
Bijbel abi moi rai di e sori wi san wi kan du te problema e miti wi, soleki te den prijs fu nyanyan-sani e kren noso srefi te a muilek fu feni nyanyan. Luku wan tu eksempre na ini na artikel „Gebroiki yu moni nanga koni—Fa yu kan du dati.”
Bijbel e gi wi a howpu tu taki a libi o kon moro betre. A e pramisi wi taki wan ten o kon pe ’furu nyanyan o de na grontapu’ èn pe ala sma o abi nofo fu nyan (Psalm 72:16). Fu sabi sortu howpu Bijbel abi gi a ten di a kon èn fu san ede yu kan de seiker disi o kon tru, dan leisi na artikel di nen „Echte hoop op betere tijden.”