Incwadzi Yesibili YaSamuweli
21 Kwaba nendlala lenkhulu+ ngesikhatsi sekubusa kwaDavide leyatsatsa iminyaka lemitsatfu lelandzelanako. Ngako Davide wabuta Jehova ngaloko futsi Jehova watsi kuye: “Sawula nendlu yakhe banelicala lengati ngobe wabulala emaGibeyoni.”+ 2 Ngako inkhosi yabita sive sakaGibeyoni+ yakhuluma naso. (Sive sakaGibeyoni besingasiwo ema-Israyeli kodvwa besingema-Amori+ lasele futsi ema-Israyeli bekafungile kutsi ngeke asibulale,+ kodvwa Sawula wasibulala ngobe anenshisekelo ngebantfu baka-Israyeli nebakaJuda.) 3 Davide watsi kumaGibeyoni: “Kufanele nginenteleni futsi ngingenta njani kuze sibuyisane khona lifa laJehova litokwemukeleka kini?” 4 EmaGibeyoni atsi kuye: “Kucabana kwetfu naSawula nendlu yakhe ngeke kucedvwe ngelisiliva nobe ngeligolide;+ futsi kute umuntfu lesitambulala ka-Israyeli.” Davide wabaphendvula watsi: “Noma ngabe yini leniyishoko ngitayenta.” 5 EmaGibeyoni atsi enkhosini: “Lendvodza leyasicotfula naleyahlela kutsi siphele ka-Israyeli,+ 6 emadvodzana ayo langu-7 kufanele aletfwe lapha kitsi. Sitawulengisa tidvumbu tawo*+ embikwaJehova eGibeya+ laSawula, longulokhetsiwe waJehova.”+ Inkhosi yaphendvula yatsi: “Ngitawaletsa.”
7 Nome kunjalo, inkhosi yaba neluvelo kuMefiboshethi,+ indvodzana yaJonathani loyindvodzana yaSawula, ngenca yesifungo lebesentiwe nguDavide naJonathani+ indvodzana yaSawula, embikwaJehova. 8 Ngako inkhosi yatsatsa bo-Arimoni naMefiboshethi emadvodzana lamabili aRispha+ loyindvodzakati ya-Aya lawatalela Sawula, nemadvodzana lasihlanu aMikhali*+ indvodzakati yaSawula lawatalela Adriyeli+ indvodzana yaBhazilayi waseMehola. 9 Wabese uwaletsa kumaGibeyoni, wona aphanyeka tidvumbu talamadvodzana kulentsaba embikwaJehova.+ Onkhe lamadvodzana langu-7 afa kanye kanye; abulawa ngemalanga ekucala ekuvuna, nakucalwa kuvuna ibhali. 10 Ngemuva kwaloko, Rispha+ indvodzakati ya-Aya watsatsa indvwangu yelisaka futsi wayendlala etikwelidvwala kusukela nakucala kuvuna kwaze kwaba ngulapho imvula levela emazulwini inetsa letidvumbu; akazange avumele tinyoni telizulu kutsi tihlale kuletidvumbu emini futsi akavumelanga kutsi tilwane tesiganga tisondzele kuto ebusuku.
11 Davide wabikelwa ngaloko lebekwentiwe nguRispha umfati lomncane waSawula, indvodzakati ya-Aya. 12 Ngako Davide wahamba wayolandza ematsambo aSawula newendvodzana yakhe Jonathani, kubaholi* baseJabeshi-gileyadi+ lebebawebe esigcawini selidolobha laseBhethi-shani, lapho emaFilisti abebalengise khona ngelilanga labulala ngalo Sawula eGilbowa.+ 13 Wabuyisa lamatsambo aSawula kanye nematsambo endvodzana yakhe Jonathani, futsi batsatsa nematsambo alamadvodza lebekabulewe.*+ 14 Babese bangcwaba ematsambo aSawula nendvodzana yakhe Jonathani endzaweni yakaBhenjamini eZela,+ ethuneni laKhishi+ longubabe waSawula. Nasebacedze konkhe loko inkhosi lebeyibayale kutsi bakwente, Nkulunkulu wabese uyakulalela kuncusa kwalabantfu balelive.+
15 Kwaphindze kwasuka imphi emkhatsini wemaFilisti nema-Israyeli.+ Ngako Davide netinceku takhe bahamba bayokulwa nemaFilisti kodvwa Davide wase udzinwa kakhulu. 16 Lomunye umuntfu wesive semaRefa+ ligama lakhe lebekungu-Ishbi-benobi, bekanesikhali lesingemakhilogremu langetulu kwalamatsatfu*+ futsi ahlome ngenkemba lensha, afuna kubulala Davide. 17 Ngekushesha, Abishayi+ indvodzana yaSeruya weta watomsita+ futsi washaya lomFilisti wambulala. Ngaso leso sikhatsi, tinceku taDavide tagcizelela kuye tatsi: “Ungasaphindzi uhambe natsi emphini!+ Akukafaneli ucishe sibane saka-Israyeli!”+
18 Ngemuva kwaloko kwaphindze kwasuka lenye imphi emkhatsini wema-Israyeli nemaFilisti+ eGobi. Ngaleso sikhatsi, Sibhekayi+ umHusha wabulala Siphayi lobekawesive semaRefa.+
19 Kwaphindze kwesuka lenye imphi emkhatsini wemaFilisti+ nema-Israyeli eGobi futsi Eli-hanani indvodzana yaJayire-oregimu waseBhetlehema wabulala Goliyathi umGathi, labekanesikhali lesinesibambo lesingangelugodvo lwembongolo yekweluka.+
20 Kwaphindze kwesuka lenye imphi eGathi, lapho bekunendvodza lesidlakela, ineminwe lesitfupha esandleni ngasinye netintwane letisitfupha elunyaweni ngalunye, bekungu-24 sekukonkhe; nayo futsi iyintalelwane yemaRefa.+ 21 Yachubeka idzelela ema-Israyeli.+ Ngako Jonathani, indvodzana yaShimeyi+ umnakaboDavide, wayibulala.
22 Lamadvodza lamane abeyintalelwane yesive semaRefa aseGathi, futsi abulawa nguDavide kanye netinceku takhe.+