Hezekeli
19 “Kufanele uhlabele ingoma yekulila lemayelana nebaholi baka-Israyeli, 2 utsi:
‘Angafananiswa nani make wakho? Angafananiswa nelibhubesi lelisikati emkhatsini wemabhubesi.
Abelala emkhatsini wemabhubesi lasemancane lanemandla futsi akhulisa bantfwabakhe.
3 Wakhulisa munye kubantfwabakhe, waba libhubesi lelincane lelinemandla.+
Lafundza kudzabudzabula silwane lelisitingele,
Ladla ngisho nebantfu.
4 Tive teva ngalo futsi tagubha umgodzi kuze tilitsiye, talibamba.
Talitsatsa taya nalo eGibhithe ngemahhuka.+
5 Lomake walindza wagcine abonile kutsi angeke libuye.
Ngako watsatsa lomunye umntfwanakhe wamtfumela kutsi ahambe abe libhubesi lelincane lelinemandla.
6 Lase liyahambahamba emkhatsini walamanye emabhubesi futsi laba libhubesi lelinemandla leliselincane.
Lafundza kudzabudzabula silwane lelisitingele, ladla ngisho nebantfu.+
7 Lanyenya emkhatsini wetindzawo letivikelekile futsi labhubhisa emadolobha abo,
Kangangekutsi live lelingahlali muntfu lagcwala umsindvo wekubhodla kwalo.+
8 Tive letisetifundzeni letibomakhelwane tamelana nalo kute tilitsiye ngelinethi lato,
Futsi labanjwa emgodzini wato.
9 Balifaka ngemahhuka endlini yemabhubesi, baliyisa enkhosini yaseBhabhulona.
Balivalela kuze livi lalo lingasaphindze livakale etintsabeni taka-Israyeli.
10 Make wakho bekafana nesihlahla semagilebisi*+ lesihlanyelwe eceleni kwemanti.
Lesatsela titselo futsi sagcwala emagala ngenca yebunyenti balamanti.
11 Saba nemagala* lacinile, lalungele kutsi abe tintfonga temakhosi.
Sakhula saba sidze kunaleletinye tihlahla,
Futsi sabonakala kahle ngobe besisidze, sinemacembe lamanyenti.
12 Kodvwa sasishulwa ngentfukutselo,+ salahlelwa phansi emhlabeni,
Futsi sitselo saso somiswa ngumoya wasemphumalanga.
Emagala aso lacinile ephulwa futsi oma,+ ase ashiswa ngumlilo.+
13 Nyalo sesihlanyelwe ehlane,
Eveni lelite emanti nalelomile.+
14 Umlilo washisa emagala* aso, washisa nemahlumela aso nesitselo saso,
Futsi kute ligala lelicinile lelasala, akusalanga ngisho nentfonga yemakhosi.+
“‘Lena yingoma yekulila, futsi itawuba yingoma yekulila.’”