Hezekeli
32 Ngemnyaka wesi-12, ngenyanga yesi-12, ngelilanga lekucala laleyo nyanga, livi laJehova laphindze lefika kimi latsi: 2 “Ndvodzana yemuntfu, hlabela ingoma yekulila mayelana naFaro inkhosi yaseGibhithe, utsi kuye:
‘Wena bewufana nelibhubesi letive lelinemandla naleliselincane,*
Kodvwa sewuthulisiwe.
Bewufana nesilwane lesikhulu saselwandle,+ ushaya emanti emifuleni yakho
Udvunga emanti ngetinyawo takho futsi ungcolisa imifula.’*
3 Naku lokushiwo yiNkhosi Lephakeme Jehova:
‘Ngitawujikijela linethi etikwakho ngisebentisa sicumbi setive letinyenti,
Futsi sitakudvonsela ngaphandle ngelinethi lami.
4 Ngitakushiya emhlabatsini;
Ngitakulahlela endzaweni levulekile.
Ngitawubangela kutsi tonkhe tinyoni telizulu tihlale etikwakho,
Futsi ngitawenetisa tilwane tesiganga letisemhlabeni wonkhe ngenyama yakho.+
5 Inyama yakho ngitayilahlela etintsabeni
Futsi ngigcwalise tihosha ngeticucu takho letisele.+
6 Ngitawumantisa live ngengati yakho legeletako kuze kuyofika etintsabeni,
Futsi itawugcwala emifuleni.’*
7 ‘Utawutsi nawubhujiswa, ngimbonye emazulu futsi ngente tinkhanyeti tibe mnyama.
Ngitawumbonya lilanga ngemafu,
Futsi inyeti angeke ikhanye.+
8 Ngitawubangela kutsi tonkhe tibane temazulu letikhanyako tibe mnyama ngenca yakho,
Live lakho ngitalimbonya ngebumnyama,’ kusho iNkhosi Lephakeme Jehova.
9 ‘Ngitawenta tinhlitiyo tebantfu labanyenti ticindzeteleke nangiyisa bantfu bakho labatfunjiwe kuletinye tive,
Lokutive longazange sewutati.+
10 Ngitawubangela kutsi bantfu labanyenti befikelwe kwesaba,
Futsi emakhosi abo atawuchachatela etfukile ngenca yakho ngalesikhatsi ngijikitisa inkemba yami embikwawo.
Atawuvevetela angakhawuli, nguleyo naleyo yesabela kuphila kwayo,
Ngelilanga lekuwa kwakho.’
11 Ngobe naku lokushiwo yiNkhosi Lephakeme Jehova:
‘Inkemba yenkhosi yaseBhabhulona itakuhlasela.+
12 Ngitawubangela kutsi sicumbi sebantfu bakho siwe ngenkemba yemabutfo lanemandla,
Lawo lanesibhuku kunawo onkhe etiveni.+
Atawucedza ligcabho leGibhithe, futsi sicumbi sebantfu bayo siyawucotfulwa.+
13 Ngitawubhubhisa yonkhe imfuyo yayo eceleni kwemanti ayo lamanyenti,+
Futsi angeke aphindze advungwe lunyawo lwemuntfu nobe ngemasondvo emfuyo.’+
14 ‘Ngaleso sikhatsi ngiyowenta emanti ayo ahlobe,
Futsi ngitawenta imifula yayo igelete njengemafutsa,’ kusho iNkhosi Lephakeme Jehova.
15 ‘Ngitawutsi nangenta iGibhithe kutsi ibe yindzawo lengenalutfo futsi lengenamsebenti, indzawo letsatselwe konkhe lobekukuyo,+
Futsi nasengibulala bonkhe labahlala kuyo,
Ngulapho-ke bayawukwati kutsi mine nginguJehova.+
16 Lena yingoma yekulila, futsi nakanjani bantfu batayihlabela bayiphindzaphindze;
Emadvodzakati etive atayihlabela ayiphindzaphindze.
Batayiphindzaphindza bayihlabelele iGibhithe kanye nabo bonkhe bantfu bayo labanyenti,’ kusho iNkhosi Lephakeme Jehova.”
17 Ngemnyaka wesi-12, ngelilanga lesi-15 laleyo nyanga, livi laJehova lefika kimi, latsi: 18 “Ndvodzana yemuntfu, lilela bantfu labanyenti baseGibhithe futsi yona uyehlisele phansi emhlabatsini, yona kanye nemadvodzakati etive letinemandla, kanye nalabo labehlela emgodzini.*
19 “‘Ucabanga kutsi umuhle kakhulu kunalabanye bantfu yini? Yehlela phansi emgodzini uyolala kanye nebantfu labangakasoki!’
20 “‘Batakuwa emkhatsini walabo lababulewe ngenkemba.+ IGibhithe* seyinikelwe enkembeni; yidvonse kanye nabo bonkhe bantfu bayo labanyenti.
21 “‘Libutfo lelinemandla kakhulu litawukhuluma naye nebasiti bakhe basekujuleni kweliThuna.* Nakanjani batawubulawa ngenkemba futsi behlele phansi balale njengebantfu labangakasoki. 22 I-Asiriya ikhona lapho kanye naso sonkhe sicumbi sebantfu bayo. Emathuna ayo amtungeletile, bonkhe babulewe ngenkemba.+ 23 Emathuna ayo asekujuleni kwemgodzi,* futsi sicumbi sayo situngelete lithuna layo, bonkhe babulewe ngenkemba, ngobe ngesikhatsi basaphila bebenta bantfu besabe.
24 “‘I-Elamu+ ilapho ikanye nabo bonkhe bantfu bayo labanyenti futsi batungelete lithuna layo, bonkhe babulewe ngenkemba. Behlele phansi emhlabatsini bangakasoki, labo lababangela kwesaba eveni lalabaphilako. Nyalo batawetfwala lihlazo labo kanye nalabo labehlela phansi emgodzini.* 25 Bayakhele umbhedze emkhatsini webantfu labafile, nabo bonkhe bantfu bayo labanyenti labatungelete emathuna ayo. Bonkhe abakasoki, babulewe ngenkemba ngobe ngesikhatsi basaphila bebenta bantfu besabe; batawetfwala lihlazo labo bakanye nalabo labehlela emgodzini.* Live lase-Elamu selifakwe emkhatsini wetidvumbu.
26 “‘Ngulapho kunesive saseMesheki nesaseThubali+ khona, kanye nabo bonkhe bantfu bakhona. Emathuna abo ayitungeletile. Bonkhe abakasoki, bagwazwe ngenkemba yaphumela ngale, ngobe ngesikhatsi basaphila bebenta bantfu besabe. 27 Angeke yini balale kanye nelibutfo lelibulewe ngenkemba, lelingakasoki nalelinemandla, lelingene phansi eThuneni* kanye netikhali talo temphi? Batawufaka tinkemba talo ngephansi kwetinhloko* talo, bafake netono talo ematsanjeni alo, ngobe ngesikhatsi lelibutfo lisaphila belenta bantfu besabe. 28 Kodvwa wena, utawupitjitwa emkhatsini webantfu labangakasoki, futsi utawulala kanye nalabo lababulewe ngenkemba.
29 “‘I-Edomu+ ikhona lapho, nemakhosi ayo kanye nabo bonkhe baholi bayo, bangcwatjwa kanye nalabo lababulawa ngenkemba ngisho nobe bebanemandla; nabo batawungcwatjwa nebantfu labangakasoki+ bakanye nalabo labehlela emgodzini.*
30 “‘Ngulapho tonkhe tindvuna* tasenyakatfo tikhona khona, kanye nabo bonkhe bantfu baseSidoni,+ labehlele phansi bahlazekile bakanye nalababulewe, ngisho nangetulu kweluvalo lolubangelwe bukhulu babo. Batawulala bangakasoki bakanye nalabo lababulewe ngenkemba futsi batawetfwala lihlazo labo kanye nalabo labehlela phansi emgodzini.*
31 “INkhosi Lephakeme Jehova itsi: ‘Faro utakubona konkhe loku, futsi utawudvudvuteka ngenca yako konkhe lokwenteke kubantfu bakhe labanyenti;+ Faro kanye nalo lonkhe libutfo lakhe batawubulawa ngenkemba.’
32 “INkhosi Lephakeme Jehova itsi: ‘Ngenca yekutsi ngesikhatsi Faro asaphila wente bantfu besaba, yena kanye nabo bonkhe bantfu bakhe labanyenti batawungcwatjwa nebantfu labangakasoki, lokungulabo lababulewe ngenkemba.’”