Hezekeli
31 Ngemnyaka wesi-11, ngenyanga yesitsatfu, ngelilanga lekucala laleyo nyanga, livi laJehova laphindze lefika kimi latsi: 2 “Ndvodzana yemuntfu, tjela Faro inkhosi yaseGibhithe nebantfu bakhe labanyenti,+ utsi:
‘Ngubani lomkhulu njengawe?
3 Bekunem-Asiriya, umsedari waseLebanoni,
Bewunemagala lamahle lafana netihlahla letihlangene, futsi umudze ngesicu;
Sihloko sawo besisidze sifika emafini.
4 Emanti awukhulisa waba mkhulu, tiyalu temanti letishonako nato tawukhulisa waba mudze.
Bewutungeletwe yimifudlana lapho bewuhlanyelwe khona;
Tonkhe tihlahla tesiganga betimunya emanti emiseleni yalemifudlana.
5 Kungako wakhula waba mudze kunaleti letinye tihlahla tesiganga.
Emagala awo lamakhulu andza, futsi emagala awo akhula aba madze
Ngenca yekutsi bekamanyenti emanti emifudlaneni yawo.
6 Tonkhe tinyoni telizulu takha tidleke tato emagaleni awo,
Tonkhe tilwane tesiganga tatalela ngephansi kwemagala awo,
Futsi tonkhe tive letinkhulu betihlala emtfuntini wawo.
7 Lomsedari waba muhle kakhulu futsi waba nemagala lamadze,
Ngobe timphandze tawo betishona phansi emantini lamanyenti.
8 Kute lomunye umsedari ensimini yaNkulunkulu+ lowawufanana nalowo.
Kute sihlahla semjunipha lebesinemagala lanjengewaso,
Futsi kute sihlahla sepleni lebesifana nemagala awo.
Kute lesinye sihlahla ensimini yaNkulunkulu lebesisihle kunawo.
9 Ngawenta waba muhle, waba nemacembe lamanyenti,
Futsi tonkhe letinye tihlahla tase-Edeni, lokuyinsimu yaNkulunkulu weliciniso betiwudlela umona.’
10 “Ngako-ke, iNkhosi Lephakeme Jehova itsi: ‘Ngenca yekutsi wona* ube mudze kangaka, waba mudze waze wayofika emafini, nenhlitiyo yawo yatikhukhumeta ngenca yebudze bawo, 11 ngiyawunikela esandleni sembusi lomkhulu wetive.+ Nakanjani uyawumelana nawo, futsi mine ngitawulahla ngenca yebubi bawo. 12 Bantfu bakuletinye tive, lokubantfu labanesibhuku lesikhulu batawujuba bese bawushiya etintsabeni, emacembe awo atawuhhohlokela kuwo onkhe ematsafa, emagala awo atawephuka asakatekele kuyo yonkhe imifudlana yelive.+ Tonkhe tive temhlaba titawusuka emtfuntini wawo tiwushiye kanjalo. 13 Tonkhe tinyoni telizulu tiyawuhlala etikwalesihlahla lesiwile, futsi tonkhe tilwane tesiganga tiyawuhlala emagaleni aso.+ 14 Loku kutawenteka kuze kube bete sihlahla eceleni kwalamanti lesitawukhula sibe sidze kangaka nobe sikhule size siyofika emafini futsi singabikhona sihlahla lesiwatfola kahle emanti lesitawukhula size sifike emafini. Ngobe tonkhe tiyawubulawa, tiye phansi emhlabatsini kanye nemadvodzana ebantfu, nawo laya phansi emgodzini.’*
15 “Naku lokushiwo yiNkhosi Lephakeme Jehova: ‘Ngiyawubangela kutsi kulilwe ngelilanga loyokwehlela ngalo phansi eThuneni.* Ngako-ke, ngiyawuvimba emanti lashonako, ngibambe imifudlana yawo kuze kungaphumi emanti lamanyenti. Ngiyawuletsa lifu lelimnyama eLebanoni ngenca yawo, futsi tihlahla tesiganga tiyawubuna. 16 Ngiyawubangela tive kutsi tichachateliswe kwesaba ngenca yemsindvo wekuwa kwawo, nangiwehlisela phansi eThuneni* wona kanye nabo bonkhe labaya phansi emgodzini,* kanye nato tonkhe tihlahla tase-Edeni,+ lokutihlahla telikhetselo naletinhle kakhulu taseLebanoni, tonkhe tihlahla letiwatfola kahle emanti, tiyawudvudvuteka phansi emhlabatsini. 17 Letihlahla setehlele phansi eThuneni* kanye naye,* taya kulabo lababulawa ngenkemba+ kanye nabo bonkhe labamsekelako* lebebahlala ngephansi kwemtfunti wakhe emkhatsini wetive.’+
18 “INkhosi Lephakeme Jehova itsi: ‘Ngusiphi kuletihlahla tase-Edeni lebesisihle futsi sisikhulu njengawe?+ Kodvwa uyawehliselwa phansi emhlabatsini kanye nato tonkhe tihlahla tase-Edeni. Uyawulala emkhatsini walabangakasoki, ulale kanye nalabo lababulawa ngenkemba. Nguloko-ke lokuyakwenteka kuFaro kanye nakubantfu bakhe labanyenti.’”