Incwadzi Yekucala YaSamuweli
9 Bekunendvodza yesive sakaBhenjamini lebekutsiwa nguKhishi+ futsi beyinjinge kakhulu. Beyiyindvodzana ya-Abiyeli, indvodzana yaSerori, indvodzana yaBekorathi, indvodzana ya-Afiya wesive sakaBhenjamini.+ 2 Khishi abenendvodzana lebekutsiwa nguSawula,+ ilibhungu futsi ilikhwa. Bekute indvodza ka-Israyeli lebeyilikhwa njengayo futsi beyiyindze kunabo bonkhe bantfu, bona bamane bafika emahlombe ayo.
3 Ngesikhatsi kulahleka timbongolo* taKhishi, longubabe waSawula, Khishi watsi kulendvodzana yakhe: “Ngicela utsatse yinye yaletinceku nihambe niyofuna letimbongolo.” 4 Bendlula esifundzeni lesinetintsaba saka-Efrayimu naseveni laseShalisha kepha abazange batitfole. Badzabula eveni laseShalimu kodvwa abatitfolanga. Bahamba nakulo lonkhe live lakaBhenjamini futsi nalapho abazange batitfole.
5 Befika eveni laseSufi, futsi Sawula wakhuluma nalenceku yakhe watsi: “Asibuyele emuva kuze babe angabese ucala kukhatsateka ngatsi esikhundleni saletimbongolo.”+ 6 Kodvwa lenceku yamphendvula yatsi: “Kunemuntfu waNkulunkulu kulelidolobha, ungumuntfu lohlonishwako. Konkhe lakushoko kuyenteka.+ Asihambe siye kuye nyalo, mhlawumbe angasitjela kutsi siye ngakuphi.” 7 Ngako Sawula watsi kulenceku yakhe: “Singamphatselani lomuntfu nasiya kuye? Sekute sinkhwa etikhwameni tetfu, kute nesipho lesingamphatsela sona lomuntfu waNkulunkulu weliciniso. Yini nje lesinayo?” 8 Lenceku yachubeka yatsi kuSawula: “Kuneluhlavu loluncane lwemali yelisiliva* esandleni sami. Ngitalinika lomuntfu waNkulunkulu weliciniso, futsi utasitjela kutsi siye ngakuphi.” 9 (Endvulo ka-Israyeli nangabe umuntfu ayobuta kuNkulunkulu abevame kutsi: “Asihambe siye kumboni wemibono.”+ Ngobe kadzeni umphrofethi abevame kubitwa ngekutsi ngumboni wemibono.) 10 Ngako Sawula watsi kulenceku yakhe: “Loku lokushito kulungile, asihambe.” Base bayahamba baya kulelidolobha lapho bekunalomuntfu waNkulunkulu weliciniso khona.
11 Ngesikhatsi basakhuphuka baya kulelidolobha, bahlangana nemantfombatane labekayokha emanti. Batsi kuwo: “Ukulendzawo yini umboni wemibono?”+ 12 Abaphendvula atsi: “Yebo ukhona. Ulapha nje embidlana. Sheshisani nimlandzele, lamuhla ute kulelidolobha ngobe bantfu benta umhlatjelo+ endzaweni lengcwele lephakeme.+ 13 Ngekushesha nje nanifika kulelidolobha nitamtfola asengakakhuphukeli kulendzawo lephakeme kuyokudla. Bantfu ngeke badle aze afike ngobe nguye locelela lomhlatjelo sibusiso. Nasekwentiwe loko, bonkhe labamenyiwe bangabese bayadla. Nyalo khuphukani masinyane futsi nitamtfola.” 14 Ngako bakhuphukela kulelidolobha. Nasebayofika ekhatsi nalelidolobha, babona Samuweli eta kubo atewubahlangabeta kute bakhuphukele kulendzawo lephakeme.
15 Kusasele lilanga kutsi Sawula afike, Jehova abetjele* Samuweli watsi: 16 “Kusasa ngalesikhatsi ngitakutfumelela indvodza levela eveni lakaBhenjamini.+ Kufanele uyigcobe ibe ngumholi webantfu bami ema-Israyeli+ futsi itawusindzisa bantfu bami esandleni semaFilisti, ngobe ngikubonile kucindzeteleka kwabo kantsi nekukhala kwabo sekufikile kimi.”+ 17 Ngesikhatsi Samuweli abona Sawula, Jehova watjela Samuweli watsi: “Nayi-ke lendvodza lengikutjele ngayo ngatsi: ‘Lona nguye lotawubusa bantfu bami.’”*+
18 Ngako Sawula wacondza kuSamuweli emkhatsini weligede, wafike watsi: “Ngicela kubuta, ikuphi indlu yemboni wemibono?” 19 Samuweli wamphendvula watsi: “Nginguye umboni wemibono. Ngicela uhambe embili uye kulendzawo lephakeme futsi lamuhla utawudla nami.+ Ekuseni ngitakukhulula kutsi uhambe, ngiphindze ngikutjele konkhe lofuna kukwati.* 20 Ungakhatsateki ngaletimbongolo lebetilahleke emalangeni lamatsatfu lendlulile+ ngobe setitfolakele. Kantsi vele tabani tonkhe tintfo letinhle taka-Israyeli? Atisito yini takho kanye nayo yonkhe indlu yababe wakho?”+ 21 Nakeva loko, Sawula wamphendvula watsi: “Mine angisiye yini umBhenjamini lovela esiveni lesincane kutendlula tonkhe ka-Israyeli,+ futsi umndeni wakitsi awusiwo yini lophansi kwendlula yonkhe imindeni yesive sakaBhenjamini? Ngako-ke yini lekwente wakhuluma nami ngalendlela?”
22 Ngemuva kwaloko Samuweli waletsa Sawula kanye nenceku yakhe endlini yekudlela futsi wabahlalisa endzaweni yetitatanyiswa. Bekunebantfu labacishe babe ngu-30. 23 Samuweli watsi kumpheki: “Letsa lenyama lengikunike yona, lengikutjele ngayo ngatsi: ‘Yibeke eceleni.’” 24 Nakeva loko lompheki watsatsa umlente nayo yonkhe inyama lehambisana nawo wakubeka embikwaSawula. Samuweli watsi: “Naku lebewubekelwe kona. Dlani ngobe bakubekele wena kuze ukudle kulelidzili, ngobe ngibatjelile ngatsi: ‘Nginetimenywa.’” Ngalelolanga Sawula wadla naSamuweli. 25 Babese bayehla besuka kulendzawo lephakeme+ baya edolobheni. Samuweli wachubeka akhuluma naSawula ngesikhatsi baseluphahleni lwendlu. 26 Bavuka ekuseni kakhulu futsi nakuphuma lilanga, Samuweli wabitela Sawula eluphahleni lwendlu watsi: “Sale ulunga kuze ngikukhulule.” Ngako Sawula walungela luhambo, futsi yena naSamuweli baphumela ngephandle. 27 Ngesikhatsi sebehlela ngasemacentselweni alelidolobha, Samuweli watsi kuSawula: “Tjela lenceku+ kutsi ihambe embili,” ngako yahamba embili. Samuweli wachubeka watsi: “Kodvwa wena mani kancane kuze ngikutjele livi laNkulunkulu.”