Incwadzi Yekucala YemaKhosi
9 Ngekushesha nje Solomoni nakacedza kwakha indlu yaJehova nendlu* yenkhosi,+ nako konkhe labekafisa kukwakha,+ 2 Jehova wabonakala kuSolomoni kwesibili njengobe bekabonakele kuye eGibeyoni.+ 3 Jehova watsi kuye: “Ngiwuvile umthantazo wakho nesicelo losente kimi sekutsi ukhonjiswe umusa. Ngiyingcwelisile lendlu loyakhile ngekutsi ngibeke libito lami kuyo+ phakadze, futsi emehlo ami kanye nenhlitiyo yami kutawuba kuyo njalo.+ 4 Nangabe uhamba+ embikwami njengobe babe wakho Davide enta, uhamba ngebucotfo benhlitiyo+ kanye nekulunga,+ wenta konkhe lengikutjele kona+ futsi ulalela imitsetfo yami kanye netehlulelo tami,+ 5 ngitawumisa sihlalo sebukhosi sembuso wakho kuma-Israyeli kuze kube phakadze njengobe ngametsembisa babe wakho Davide ngatsi, ‘Angeke kwenteke kutsi kungabi nendvodza esitukulwaneni sakho letawuhlala esihlaweni sebukhosi saka-Israyeli.’+ 6 Kodvwa nangabe wena nemadvodzana akho ningasangilaleli futsi ningasayigcini imitsetfo yami kanye nemiyalo yami lengininikete yona, bese niyahamba niyokhonta labanye bonkulunkulu futsi nikhotsame kubo,+ 7 ngitawacotfula ema-Israyeli eveni lengawanika lona,+ nalendlu lengiyingcwelisele libito lami ngitayifulatsela+ futsi ema-Israyeli atawuba yinhlekisa,* abe yintfo yekuphukutwa ngibo bonkhe bantfu.+ 8 Lendlu itawuba tindzala.+ Wonkhe umuntfu lowendlula eceleni kwayo utawumangala kakhulu, aze ashaye inkwela atsi, ‘Jehova ukwenteleni loku kulelive nakulendlu?’+ 9 Batawubese batsi, ‘Kungobe bamlahlile Jehova Nkulunkulu wabo, lowakhipha bokhokho babo eveni laseGibhithe base baba nalabanye bonkulunkulu, babakhotsamela futsi babakhonta. Kungako-ke Jehova abaletsele yonkhe lenhlekelele.’”+
10 Ekupheleni kweminyaka lengu-20, lokusikhatsi lesasetjentiswa nguSolomoni kuze akhe tindlu letimbili, indlu yaJehova kanye nendlu* yenkhosi,+ 11 Hiramu+ inkhosi yaseThire bekaniketa Solomoni tingodvo temsedari netemjunipha kanye neligolide ngendlela lebeyifunwa+ nguSolomoni, futsi iNkhosi Solomoni yaniketa Hiramu emadolobha langu-20 lebekaseveni laseGalile. 12 Ngako Hiramu wesuka eThire wahamba wayobuka lamadolobha labekawaniketwe nguSolomoni, kodvwa akazange anetiseke ngawo.* 13 Watsi: “Ngemadolobha lanjani lawa longinikete wona mnaketfu?” Ngako lamadolobha abese abitwa ngekutsi Live laseKhabuli* kuze kube ngulamuhla. 14 Hiramu wabese utfumelela inkhosi ligolide+ lelingemathalenta* langu-120.
15 Lonangumniningwane lomayelana nalabo labakhetfwa yiNkhosi Solomoni kutsi bayisebentele,+ bakhe indlu yaJehova,+ indlu* yayo, liGcuma,*+ lubondza lwaseJerusalema, iHasori,+ iMegido+ kanye neGezeri.+ 16 (Faro inkhosi yaseGibhithe, wakhuphuka wayovimbetela iGezeri futsi wayishisa ngemlilo, wabulala nemaKhenani+ lebekahlala kulelodolobha. Ngako waniketa indvodzakati+ yakhe lebeyingumfati waSolomoni, lelidolobha laba sipho* sayo.) 17 Solomoni waphindze wakha iGezeri, iBhethi-horoni Lengentansi,+ 18 iBhalathi+ neThamari lesehlane, kulelolive, 19 kanye nawo onkhe emadolobha lokugcinwa kuwo kudla, emadolobha etinkalishi,+ emadolobha ebagibeli bemahhashi kanye nanome ngabe yini Solomoni lebekafisa kuyakha eJerusalema, eLebanoni nakuyo yonkhe indzawo lebekabusa kuyo. 20 Bonkhe bantfu labasala kuma-Amori, kumaHethi, kumaPheresi, kumaHivi kanye nakumaJebhusi+ lebebangasiyo incenye yebantfu baka-Israyeli,+ 21 intalelwane yabo leyasala kulelolive ngesizatfu sekutsi ema-Israyeli akakhonanga kuyibhubhisa, Solomoni wayenta yaba tigcili takhe kuze kube ngulamuhla.+ 22 Kodvwa Solomoni akazange ente ema-Israyeli abe tigcili+ ngobe bekangemasotja akhe, tinceku, tikhulu, tiphatsimandla tembuso kanye nebaphatsi bebashayeli betinkalishi nebebagibeli bemahhashi. 23 Bekunetindvuna talamaphini letingu-550 lebetengamele umsebenti waSolomoni, tiphetse bantfu labebasebenta.+
24 Indvodzakati+ yaFaro yakhuphuka isuka eDolobheni laDavide+ yaya endlini yayo lebeyiyakhelwe nguSolomoni; Solomoni wase wakha neliGcuma.*+
25 Katsatfu ngemnyaka,+ Solomoni bekanikela ngemihlatjelo yekushiswa nemihlatjelo yekuthula e-al’thare lebekalakhele Jehova,+ bekaphindze ashuncise naleminye imihlatjelo yekushiswa kuleli-al’thare lebelisembikwaJehova; futsi wayicedza lendlu.+
26 INkhosi Solomoni yaphindze yakha nemikhumbi leminyenti e-Esiyoni-geberi,+ lengase-Elathi, ngaselugwini lweLwandle Lolubovu eveni laka-Edomu.+ 27 Hiramu watfumela tinceku takhe lesetinesikhatsi lesidze tihamba ngemikhumbi.+ Letinceku takhe lebetihamba ngalemikhumbi leminyenti, watitfumela kutsi tiyosebenta kanye netinceku taSolomoni. 28 Tahamba taya e-Ofiri+ futsi tatsatsa emathalenta* eligolide langu-420 tawaletsa eNkhosini Solomoni.