LEVITHIKHUSI

1 Jehova wabita Mosi, wakhuluma naye ethendeni lekuhlangana+ watsi: 2 “Khuluma nema-Israyeli,* utsi kuwo: ‘Nangabe umuntfu aletsa umnikelo wetilwane letifuywako kuJehova, kufanele kube silwane lasitsetse emhlambini wetinkhomo, nobe wetimvu nobe wetimbuti.+

3 “‘Nangabe anikela ngesilwane lasitsetse emhlambini wakhe wetinkhomo kutsi sibe ngumnikelo wekushiswa, kufanele kube ngulesidvuna lesiphile kahle.+ Lesilwane kufanele anikele ngaso ngekutitsandzela+ embikwaJehova emnyango welithende lekuhlangana. 4 Abobeka sandla sakhe enhloko yalesilwane lesingumnikelo wekushiswa futsi lesilwane sitakwemukelwa egameni lakhe kuze abuyisane naNkulunkulu.

5 “‘Ngemuva kwaloko lenkunzana kufanele ihlatjwe embikwaJehova, bese emadvodzana a-Aroni labaphristi+ eta nengati yayo futsi ayifafate kuto tonkhe tinhlangotsi teli-al’thare+ lelisemnyango welithende lekuhlangana. 6 Lenkunzana letawuba ngumnikelo wekushiswa kufanele ihlindvwe futsi icotjwe ibe ngemacatsa.+ 7 Emadvodzana a-Aroni labaphristi kufanele aletse umlilo e-al’thare+ bese afaka tinkhuni kuwo. 8 Lamadvodzana a-Aroni atawuhlelembisa lamacatsa alomnikelo,+ nenhloko kanye nemanoni* etikwetinkhuni talomlilo lose-al’thare. 9 Ematfumbu alenkunzana kanye nabogalu bayo kufanele kuwashwe ngemanti. Umphristi utakutsatsa konkhe akushise e-al’thare kuze intfutfu yako ishunce isuka kuleli-al’thare, kube ngumnikelo wekushiswa. Lona kutawuba ngumnikelo lowentiwa ngemlilo, futsi utawuba liphunga lelimnandzi* kuJehova.+

10 “‘Nangabe anikela ngesilwane lasitsetse emhlambini+ wetimvu nobe wetimbuti kutsi sibe ngumnikelo wekushiswa, kufanele kube ngulesidvuna lesiphile kahle futsi lesisesincane.+ 11 Sitawuhlatjwa embikwaJehova, enyakatfo yeli-al’thare, futsi emadvodzana a-Aroni labaphristi atawufafata ingati yaso kuto tonkhe tinhlangotsi taleli-al’thare.+ 12 Kufanele sicotjwe sibe ngemacatsa, bese umphristi uwahlelembisa etikwetinkhuni talomlilo lose-al’thare, abeke nenhloko yaso kanye nemanoni.* 13 Ematfumbu kanye nabogalu baso kufanele kuwashwe ngemanti. Umphristi utakutsatsa konkhe akushise e-al’thare kuze intfutfu yako ishunce isuka kuleli-al’thare, kube ngumnikelo wekushiswa. Lona kutawuba ngumnikelo lowentiwa ngemlilo, futsi utawuba liphunga lelimnandzi* kuJehova.

14 “‘Kodvwa nangabe aletsa tinyoni kutsi tibe ngumnikelo wekushiswa kuJehova, kufanele kube lituba nobe lizini lelivukutfu.+ 15 Umphristi utayiletsa e-al’thare ahlephule intsamo yayo, ngemuva kwaloko ashise lenyoni kuze intfutfu yayo ishunce isuka kuleli-al’thare. Kodvwa ingati yayo utayiphomphisa eceleni kwaleli-al’thare. 16 Kufanele akhiphe sikikila sayo, ayihlutse netinsiba futsi konkhe akulahle eceleni kwaleli-al’thare ngasemphumalanga, lapho kufakwa khona umlotsa.*+ 17 Lenyoni utayivula ngasetimphikweni tayo kodvwa angayihlukanisi ekhatsi. Ngemuva kwaloko lomphristi utayishisa etikwetinkhuni talomlilo lose-al’thare kuze intfutfu yayo ishunce isuka e-al’thare, kube ngumnikelo wekushiswa. Lona kutawuba ngumnikelo lowentiwa ngemlilo, futsi utawuba liphunga lelimnandzi* kuJehova.

2 “‘Nangabe umuntfu aletsa umnikelo walokutinhlavu+ kuJehova, lomnikelo wakhe kufanele kube ngufulaha locolisakele, atsele emafutsa kuwo, aphindze afake nemakha esihlahla semphepho.+ 2 Utawuletsa emadvodzaneni a-Aroni labaphristi, bese umphristi utsatsa fulaha longagcwala sandla kulofulaha locolisakele lonemafutsa, atsatse nawo onkhe lamakha esihlahla semphepho. Utawushisa e-al’thare, umelele* wonkhe lomnikelo+ kuze intfutfu yawo ishunce isuka kuleli-al’thare. Lona kutawuba ngumnikelo lowentiwa ngemlilo, futsi utawuba liphunga lelimnandzi* kuJehova. 3 Konkhe lokusalako kulomnikelo walokutinhlavu kutawuba kwa-Aroni nemadvodzana akhe.+ Loku kungcwele ngelizinga leliphakeme+ futsi kutsetfwe eminikelweni leya kuJehova leyentiwe ngemlilo.

4 “‘Nawuletsa umnikelo walokutinhlavu lobhakwe etiko, kufanele wentiwe ngafulaha locolisakele, kube tinkhwa letiyindingilizi letinemafutsa futsi letite imvubelo nobe emacebelengwane lete imvubelo labhocwe ngemafutsa.+

5 “‘Nawuletsa umnikelo walokutinhlavu lowentiwe ekesini,+ kufanele wentiwe ngafulaha locolisakele, lote imvubelo futsi lonemafutsa. 6 Lomnikelo kufanele uwente ube tincetu, bese utsela emafutsa ngetulu kwawo.+ Lona ngumnikelo walokutinhlavu.

7 “‘Nawuletsa umnikelo walokutinhlavu lowentiwe ebhodweni, loyo mnikelo kufanele wentiwe ngafulaha locolisakele kanye nemafutsa. 8 Ubowuletsa kuJehova lomnikelo walokutinhlavu lowentiwe ngaletintfo, futsi utawuniketwa umphristi bese yena uwuletsa ngase-al’thare. 9 Umphristi utawutsatsa incenye yalomnikelo walokutinhlavu imelele* wonkhe lomnikelo,+ bese uyayishisa kuze intfutfu yayo ishunce isuka kuleli-al’thare. Lona kutawuba ngumnikelo lowentiwa ngemlilo, futsi utawuba liphunga lelimnandzi* kuJehova.+ 10 Konkhe lokusalako kulomnikelo walokutinhlavu kutawuba kwa-Aroni nemadvodzana akhe. Loku kungcwele ngelizinga leliphakeme futsi kutsetfwe eminikelweni leya kuJehova leyentiwe ngemlilo.+

11 “‘Umnikelo walokutinhlavu lowuletsa kuJehova ungabofakwa imvubelo,+ ngobe akukafaneli ushise inhlama lebilile nobe luju* kutsi kube ngumnikelo lowentiwa ngemlilo kuJehova.

12 “‘Letintfo ungatinikela kuJehova tibe ngumnikelo wetitselo tekucala,+ kodvwa akukafaneli utinikele e-al’thare kutsi tibe liphunga lelimnandzi.*

13 “‘Yonkhe iminikelo yalokutinhlavu loyentako kufanele ivangwe ngeluswayi. Emnikelweni wakho walokutinhlavu kufanele ungakhohlwa kufaka luswayi njengobe lukukhumbuta ngesivumelwane saNkulunkulu. Yonkhe iminikelo loyentako kufanele ibe neluswayi.+

14 “‘Nawuletsa sivuno setitselo takho tekucala letivutsiwe kutsi sibe ngumnikelo walokutinhlavu lowentelwa Jehova, uboletsa lokutinhlavu lokusandza kuvunwa* lokugayingiwe futsi lokuhhatekile. Loku kutawuba ngumnikelo walokutinhlavu wesivuno setitselo takho tekucala letivutsiwe.+ 15 Kufanele utsele emafutsa ngetulu kwawo, bese ufaka nemakha esihlahla semphepho. Lona ngumnikelo walokutinhlavu. 16 Umphristi utawushisa incenye yawo imelele* wonkhe lomnikelo,+ futsi loku kufaka ekhatsi incenye yaloku lokutinhlavu lokuhhatekile nemafutsa kanye nawo onkhe lamakha esihlahla semphepho. Loku kutawuba ngumnikelo lowentiwa ngemlilo kuJehova.

3 “‘Nangabe umuntfu enta umhlatjelo wekuthula,+ futsi awutsetse emhlambini wetinkhomo, ngisho nome kusilwane lesidvuna nobe lesisikati, leso silwane lanikela ngaso embikwaJehova kufanele kube ngulesiphile kahle. 2 Utawubeka sandla sakhe enhloko yaso futsi lesilwane sitawuhlatjwa emnyango welithende lekuhlangana. Emadvodzana a-Aroni labaphristi, atawufafata ingati yaso kuto tonkhe tinhlangotsi teli-al’thare. 3 Utawuletsa incenye yalomhlatjelo wekuthula ibe ngumnikelo lowentiwa ngemlilo kuJehova:+ kube nemanoni+ lambonye ematfumbu, nawo onkhe emanoni lanamatsele kuwo, 4 tinso totimbili nemanoni ato langasetinyongeni kanye nemanoni lasesibindzini.+ 5 Emadvodzana a-Aroni atawubeka letintfo etikwalomnikelo wekushiswa longetulu kwetinkhuni letikulomlilo, akushise kuze intfutfu yako ishunce isuka e-al’thare.+ Lona ngumnikelo lowentiwa ngemlilo, futsi utawuba liphunga lelimnandzi* kuJehova.+

6 “‘Nangabe anikela ngesilwane lasitsetse emhlambini wetimvu nobe wetimbuti kuze sibe ngumhlatjelo wekuthula loya kuJehova, kufanele kube ngulesiphile kahle, kungaba ngulesidvuna nobe lesisikati.+ 7 Nakatawunikela ngemvu lendvuna leseyincane, kufanele ayiletse embikwaJehova. 8 Utawubeka sandla sakhe enhloko yayo futsi itawuhlatjwa embikwelithende lekuhlangana. Emadvodzana a-Aroni atawufafata ingati yayo kuto tonkhe tinhlangotsi teli-al’thare. 9 Utawutsatsa emanoni alomhlatjelo wekuthula abe ngumnikelo lowentiwa ngemlilo kuJehova.+ Kufanele ajube wonkhe umsila wayo ngasemgogodleni, atsatse nemanoni lambonye ematfumbu, nawo onkhe emanoni lanamatsele kulamatfumbu, 10 tinso totimbili nemanoni ato langasetinyongeni kanye nemanoni lasesibindzini.+ 11 Umphristi utakushisa kuze intfutfu yako ishunce isuka kuleli-al’thare. Loku kudla* futsi kungumnikelo lowentiwa ngemlilo kuJehova.+

12 “‘Nangabe anikela ngembuti, kufanele ayiletse embikwaJehova. 13 Utawubeka sandla sakhe enhloko yayo futsi itawuhlatjelwa embikwelithende lekuhlangana. Emadvodzana a-Aroni atawufafata ingati yayo kuto tonkhe tinhlangotsi teli-al’thare. 14 Naku latawunikela ngako kuze kube ngumnikelo lowentiwa ngemlilo kuJehova: emanoni lambonye ematfumbu, nawo onkhe emanoni lanamatsele kuwo,+ 15 tinso totimbili nemanoni ato langasetinyongeni kanye nemanoni lasesibindzini. 16 Umphristi utakushisa konkhe kuze intfutfu yako ishunce isuka kuleli-al’thare. Loku kudla* futsi kungumnikelo lowentiwa ngemlilo kuze kube liphunga lelimnandzi.* Onkhe emanoni ngewaJehova.+

17 “‘Akukafaneli nidle emanoni nobe ingati.+ Lona ngumtsetfo lotawuchubeka ukhona futsi lokufanele ulandzelwe titukulwane tenu kuto tonkhe tindzawo lenihlala kuto.’”

4 Jehova wachubeka watsi kuMosi: 2 “Khuluma nema-Israyeli utsi kuwo: ‘Nangabe lotsite one ngeliphutsa+ ngekutsi ente nobe nguyiphi intfo Jehova latsite ayingentiwa, naku lokufanele kwentiwe:

3 “‘Nangabe umphristi logcotjiwe*+ ona+ futsi abangela bantfu licala, kufanele aletse kuJehova inkunzana lephile kahle kuze ibe ngumnikelo walesono lasentile.+ 4 Utawuletsa lenkunzana embikwaJehova emnyango welithende lekuhlangana,+ abeke sandla sakhe enhloko yayo futsi ayihlabe embikwaJehova.+ 5 Ngemuva kwaloko, lomphristi logcotjiwe+ utawutsatsa lenye yengati yalenkunzana ayiletse ethendeni lekuhlangana, 6 bese wenya umunwe wakhe kuyo,+ antfontsisele lenye yayo embikwaJehova tikhatsi letingu-7+ embikwendvwangu yendzawo lengcwele. 7 Utawuphindze abhoce lenye yalengati etimphondvweni teli-al’thare lekushisa imphepho leneliphunga lelimnandzi,+ lelisembikwaJehova ethendeni lekuhlangana. Yonkhe lelenye ingati yalenkunzana utawubese uyitsela ngekhatsi kweli-al’thare lekwenta umnikelo wekushiswa,+ lelisemnyango welithende lekuhlangana.

8 “‘Utawutsatsa onkhe emanoni alenkunzana lengumnikelo wesono, kanye nemanoni lambonye ematfumbu, nawo onkhe emanoni lanamatsele kuwo, 9 tinso totimbili nemanoni ato langasetinyongeni kanye nemanoni lasesibindzini.+ 10 Loko lakutsatsako kufana naloko lokutsatfwa enkunzini leyentiwa umhlatjelo wekuthula.+ Ngemuva kwaloko umphristi utakushisa kuze intfutfu yako ishunce isuka e-al’thare lekwenta umnikelo wekushiswa.

11 “‘Kodvwa sikhumba salenkunzana, nayo yonkhe inyama yayo, inhloko, bogalu, ematfumbu kanye nebulongo bayo+— 12 yonkhe lenkunzana—kufanele akukhiphele ngephandle kwendzawo lenihlala kuyo, akuyise endzaweni lehlantekile lapho kulahlwa khona umlotsa,* futsi akushise emlilweni.+ Kutawushiselwa lapho kulahlwa khona umlotsa.

13 “‘Nangabe sonkhe sive sema-Israyeli siba nelicala ngenca yekona ngeliphutsa,+ kodvwa sibe singati kutsi sente intfo Jehova labetsite akukafaneli yentiwe,+ 14 bese ngemuva kwaloko siyabona kutsi sonile, kufanele siletse inkunzana letawuba ngumnikelo wesono, futsi siyiletse embikwelithende lekuhlangana. 15 Emadvodza lamadzala aka-Israyeli atawubeka tandla tawo enhloko yalenkunzana embikwaJehova, bese ayayihlaba embikwaJehova.

16 “‘Ngemuva kwaloko lomphristi logcotjiwe utawuletsa lenye ingati yalenkunzana ethendeni lekuhlangana. 17 Lomphristi utawukwenya umunwe wakhe kuyo, antfontsisele lenye yayo embikwaJehova tikhatsi letingu-7 embikwendvwangu+ yendzawo lengcwele. 18 Utawubhoca lenye yalengati etimphondvweni teli-al’thare+ lelisembikwaJehova ethendeni lekuhlangana. Yonkhe lelenye ingati yalenkunzana utawubese uyitsela ngekhatsi kweli-al’thare lekwenta umnikelo wekushiswa, lelisemnyango welithende lekuhlangana.+ 19 Utawutsatsa onkhe emanoni ayo awashise kuze intfutfu yawo ishunce isuka e-al’thare.+ 20 Kulenkunzana utawukwenta lokufana naloko lakwente kulelenye inkunzana lengumnikelo wesono. Nguleyo-ke indlela latakwenta ngayo; futsi utawukwenta kutsi labantfu babuyisane naNkulunkulu+ baphindze bacolelwe. 21 Utawutsatsa lenkunzana ayikhiphele ngephandle kwendzawo lokuhlalwa kuyo bese uyayishisa, njengobe nje ashise leyekucala.+ Lona ngumnikelo wesono wesive sema-Israyeli.+

22 “‘Nangabe umholi+ aba nelicala ngenca yekutsi wone ngeliphutsa, wenta nobe yini Jehova Nkulunkulu wakhe latsite ayingentiwa, 23 nobe nangabe abona kutsi wente sono ngekwephula umtsetfo, kufanele aletse imbuti lendvuna leseyincane futsi lephile kahle, kuze anikele ngayo. 24 Utawubeka sandla sakhe enhloko yayo, ayihlabe embikwaJehova lapho kuhlatjwa khona umnikelo wekushiswa.+ Lona ngumnikelo wesono. 25 Umphristi utawukwenya umunwe wakhe kulengati yalomnikelo wesono, ayibhoce etimphondvweni+ teli-al’thare lekwenta umnikelo wekushiswa. Yonkhe lelenye ingati utawubese uyitsela ngekhatsi kwaleli-al’thare.+ 26 Utawushisa onkhe emanoni alembuti njengobe ashise emanoni emhlatjelo wekuthula,+ kuze intfutfu yawo ishunce isuka kuleli-al’thare. Lomphristi utawukwenta kutsi lomuntfu abuyisane naNkulunkulu futsi acolelwe.

27 “‘Nangabe kukhona umuntfu lohlala kulendzawo lowona ngeliphutsa futsi abe nelicala ngenca yekwenta lenye yetintfo Jehova latsite atingentiwa,+ 28 nobe nangabe abona kutsi wonile, kufanele aletse imbuti lensikati leseyincane futsi lephile kahle kuze ente umnikelo ngenca yesono sakhe. 29 Utawubeka sandla sakhe enhloko yalembuti lengumnikelo wesono, ayihlabele lapho kuhlatjelwa khona umnikelo wekushiswa.+ 30 Umphristi utawukwenya umunwe wakhe kulengati yalomnikelo wesono, ayibhoce etimphondvweni teli-al’thare lekwenta umnikelo wekushiswa. Yonkhe lelenye ingati utawubese uyitsela ekhatsi kuleli-al’thare.+ 31 Utawutsatsa onkhe emanoni+ alembuti njengobe kwentiwa nasemhlatjelweni wekuthula.+ Ngemuva kwaloko utawashisa kuze intfutfu yawo ishunce isuka e-al’thare, kube liphunga lelimnandzi* kuJehova. Ngaleyo ndlela lomphristi utawukwenta kutsi lomuntfu abuyisane naNkulunkulu futsi acolelwe.

32 “‘Kodvwa nangabe lomuntfu aletsa imvu leseyincane kutsi ibe ngumnikelo wesono, kufanele kube ngulensikati lephile kahle. 33 Utawubeka sandla sakhe enhloko yalemvu lengumnikelo wesono, ayihlabele lapho kuhlatjelwa khona umnikelo wekushiswa.+ 34 Umphristi utawukwenya umunwe wakhe kulengati yalomnikelo wesono, ayibhoce etimphondvweni teli-al’thare lekwenta umnikelo wekushiswa.+ Yonkhe lelenye ingati utawubese uyitsela ekhatsi kuleli-al’thare. 35 Utawutsatsa onkhe emanoni alemvu njengobe kwentiwa emvini lengumhlatjelo wekuthula. Ngemuva kwaloko utawabeka etikweminikelo leya kuJehova leyentiwa ngemlilo,+ awashise kuze intfutfu yawo ishunce isuka e-al’thare. Ngaleyo ndlela lomphristi utawukwenta kutsi lomuntfu abuyisane naNkulunkulu futsi acolelwe.+

5 “‘Nangabe umuntfu eva kutsi kudzingeka kufakazwe*+ endzabeni letsite futsi yena abe angufakazi wayo, nobe kukhona lakubonile nobe lakwatiko ngaleyo ndzaba, kodvwa angayibiki, kufanele aphendvule ngesono sakhe.

2 “‘Nangabe umuntfu atsintsa nobe yini lengcolile, kungaba silwane sesiganga lesifile futsi lesingcolile, silwane lesifuywako lesingcolile, nobe lesinye setilwane letincane letingcolile letihamba tibe libulo,+ loyo muntfu utawuba ngulongcolile futsi abe nelicala ngisho nobe abengati. 3 Nakwenteka ngeliphutsa kutsi lotsite atsintse umuntfu longcolile+ nobe atsintse lenye intfo lengcolile lengamenta angahlanteki, ngemuva kwaloko bese uyakubona loko lakwentile, loyo muntfu unelicala.

4 “‘Nangabe umuntfu afunga kutsi utawukwenta intfo letsite kodvwa abe angakacabangi, futsi angakuboni loko, kungaba kutsi ufunga kwenta intfo lenhle nobe lembi, bese ngemuva kwaloko uyabona kutsi ufunge angakacabangi, loyo muntfu unelicala.*+

5 “‘Nangabe aba nelicala ngenca yakunye kwaloku, kufanele avume sono sakhe+ futsi asho kutsi siyini. 6 Lomuntfu utawuletsa umnikelo welicala kuJehova ngenca yesono lasentile.+ Utawutsatsa silwane lesisikati emhlambini wetimvu nobe wetimbuti, kungaba yimvu lensikati leseyincane nobe imbuti lensikati leseyincane, kuze ibe ngumnikelo wesono. Umphristi utawubese wenta kutsi abuyisane naNkulunkulu.

7 “‘Kodvwa nangabe angeke akhone kukhipha imvu, kufanele aletse ematuba lamabili nobe emazini lamabili emavukutfu+ kuJehova kuze abe ngumnikelo welicala lakhe. Linye litawuba ngumnikelo wesono, lelelinye libe ngumnikelo wekushiswa.+ 8 Utawaletsa kumphristi, bese lomphristi utsatsa leli lekucala lelitawuba ngumnikelo wesono, alihlephule intsamo kodvwa angayincamuli. 9 Utawuntfontsisela lenye ingati yalomnikelo wesono eluhlangotsini lweli-al’thare, bese lelenye ingati uyiphomphisela ekhatsi kwalo.+ Lona ngumnikelo wesono. 10 Utawutsatsa lelesibili ente ngalo umnikelo wekushiswa ngendlela lokuhlale kwentiwa ngayo.+ Umphristi utawukwenta kutsi lomuntfu abuyisane naNkulunkulu ngenca yesono lasentile, futsi utawucolelwa.+

11 “‘Nangabe angeke akhone kukhipha ematuba lamabili nobe emazini lamabili emavukutfu, kufanele aletse fulaha locolisakele logcwele esikoteleni lesingemalitha lamabili*+ ube ngumnikelo wesono. Kulofulaha, akukafaneli afake emafutsa nobe abeke emakha esihlahla semphepho, ngobe lona ngumnikelo wesono. 12 Lofulaha utawuletsa kumphristi, bese umphristi utsatsa lomunye wawo longagcwala sandla, lotawumelela* wonkhe lomnikelo, awushise ngetulu kweminikelo leyentiwa ngemlilo leya kuJehova, kuze intfutfu yawo ishunce isuka e-al’thare. Lona ngumnikelo wesono. 13 Umphristi utawukwenta kutsi lomuntfu abuyisane naNkulunkulu ngenca yesono lasentile, ngisho nobe kungusiphi, futsi lomuntfu utawucolelwa.+ Nobe yini letawusala kulomnikelo itawuba yemphristi,+ njengobe kwentiwa nasemnikelweni walokutinhlavu.’”+

14 Jehova wachubeka akhuluma naMosi, watsi: 15 “Nangabe lotsite angetsembeki ngekutsi ephule umtsetfo lomayelana netintfo letingcwele kuJehova, abe angakahlosi,+ kufanele aletse kuJehova imvu lendvuna lephile kahle kuze ibe ngumnikelo welicala.+ Nayikalwa ngemali yelisiliva kufanele kusetjentiswe sisindvo lesisemtsetfweni sasendzaweni lengcwele.*+ 16 Utawukhokhela licala lakhe lekona indzawo lengcwele aphindze engete incenye yako leyodvwa kuletisihlanu.+ Loko utakuniketa umphristi kuze lomphristi amente abuyisane naNkulunkulu+ ngalemvu lendvuna lengumnikelo welicala, futsi utawucolelwa.+

17 “Nangabe umuntfu ona ngekwenta nobe nguyiphi intfo Jehova latsite ayingentiwa, ngisho nobe ayente ngeliphutsa, utawuba nelicala futsi kutawudzingeka aphendvule ngesono sakhe.+ 18 Kufanele aletse kumphristi imvu lendvuna lephile kahle, lelingana nesikali lesibekiwe, kuze ibe ngumnikelo welicala.+ Umphristi utawubese wenta kutsi abuyisane naNkulunkulu ngenca yeliphutsa lalente angati, futsi utawucolelwa. 19 Lona ngumnikelo welicala. Lomuntfu unelicala ngenca yekona kuJehova.”

6 Jehova waphindze watsi kuMosi: 2 “Nangabe umuntfu ona ngekutsi angetsembeki kuJehova+ ngenca yekutsi wentele makhelwane wakhe bucili ngekutsatsa intfo labecele kutsi ambukele yona,+ nobe intfo lamboleke yona, nobe amebele nome amhumushe intfo letsite, 3 nobe atfole intfo lelahlekile kodvwa acale emanga ngayo futsi afunge emanga nganobe nguyiphi kuletintfo letimbi latentile,+ naku lokufanele akwente: 4 Nangabe onile futsi anelicala, kufanele abuyisele lentfo layebile, nobe loko lakutsetse ngebucili, nobe loko lakuhumushe makhelwane wakhe, nobe loko lacele kutsi ambukele kona, nobe loko lakutfolile, 5 nanobe yini lafunge emanga ngayo. Kufanele akhokhe nenhlawulo lephelele,+ aphindze engete incenye yayo leyodvwa kuletisihlanu. Loku kufanele akunikete umnikati waletintfo ngelilanga lokutfolakele ngalo bufakazi bekutsi unelicala. 6 Utawuletsa kumphristi imvu lendvuna lephile kahle, ibe ngumnikelo welicala lawentela Jehova. Lemvu kufanele ilingane naloko lokulindzeleke kutsi kukhokhwe nakwentiwa umnikelo welicala.+ 7 Umphristi utayinikela embikwaJehova, ente kutsi lomuntfu abuyisane naNkulunkulu. Loyo muntfu utawucolelwa nobe yini layentile lebangele kutsi abe nelicala.”+

8 Jehova wachubeka akhuluma naMosi, watsi: 9 “Tjela Aroni nemadvodzana akhe utsi: ‘Nangu umtsetfo lokufanele ulandzelwe nakwentiwa umnikelo wekushiswa:+ Umnikelo wekushiswa utawuhlala busuku bonkhe emlilweni weli-al’thare kuze kube sekuseni, nalomlilo kufanele uhlale uvutsa. 10 Umphristi utawugcoka ingubo yakhe yebuphristi leyentiwe ngelineni,+ afake nesikhindi* selineni+ kuze afihle bungcunu bakhe. Ngemuva kwaloko utawususa umlotsa*+ wemnikelo wekushiswa lobewunikelwe e-al’thare futsi washiswa ngemlilo. Lomlotsa kufanele awubeke eceleni kweli-al’thare. 11 Utawubese ukhumula letingubo,+ agcoke letinye futsi atsatse lomlotsa awuyise endzaweni lehlantekile lengaphandle kwalapho kuhlalwa khona.+ 12 Umlilo weli-al’thare kufanele uhlale uvutsa, ungacishi. Njalo ekuseni umphristi kufanele afake tinkhuni+ kuwo, aphindze abeke umnikelo wekushiswa etikwalomlilo. Utawushisa emanoni emihlatjelo yekuthula kuze intfutfu yawo ishunce isuka e-al’thare.+ 13 Umlilo kufanele uhlale uvutsa ngaso sonkhe sikhatsi kuleli-al’thare. Akukafaneli ucishe.

14 “‘Nangu umtsetfo lotawulandzelwa nakwentiwa umnikelo walokutinhlavu:+ Emadvodzana a-Aroni kufanele awuletse kuJehova embikweli-al’thare. 15 Lomunye walamadvodzana a-Aroni utawutsatsa fulaha longagcwala sandla kulofulaha locolisakele wemnikelo walokutinhlavu, kanye nencenye yemafutsa awo, atsatse nawo onkhe emakha esihlahla semphepho lakulomnikelo walokutinhlavu. Loku utakushisa e-al’thare kuze intfutfu yako ishunce isuka kuleli-al’thare, kube liphunga lelimnandzi* kuJehova futsi kumelele* wonkhe lomnikelo.+ 16 Bo-Aroni nemadvodzana akhe batawudla loko lokutawusala kulomnikelo.+ Loku kutawentiwa ngako sinkhwa lesite imvubelo futsi kudliwe endzaweni lengcwele. Kutawudlelwa ebaleni* lelithende lekuhlangana.+ 17 Kufanele kungafakwa lutfo lolunemvubelo.+ Ngibanika kona kutsi kube sabelo sabo lesitsetfwe eminikelweni leyentiwa ngemlilo.+ Kungcwele ngelizinga leliphakeme,+ njengemnikelo wesono nemnikelo welicala. 18 Kutawudliwa ngiwo onkhe emadvodzana a-Aroni,+ futsi kutawuhlale kusabelo sawo lesitsetfwe eminikelweni yaJehova leyentiwa ngemlilo, kuto tonkhe titukulwane tenu.+ Nobe yini letawutsintsa leminikelo itawuba ngcwele.’”

19 Jehova waphindze wakhuluma naMosi watsi: 20 “Nangu umnikelo bo-Aroni nemadvodzana akhe lokufanele bawuletse kuJehova ngelilanga Aroni latawugcotjwa ngalo:+ Batawuletsa fulaha locolisakele logcwele esikoteleni lesingemalitha lamabili,*+ lokusilinganiso semnikelo walokutinhlavu+ wemalanga onkhe. Kutawunikelwa ihhafu yawo ekuseni bese kutsi lelenye ihhafu kunikelwe ngayo kusihlwa. 21 Kutawufakwa emafutsa futsi kwentelwe ekesini.+ Kufanele kuhlanganiswe kahle nemafutsa bese kuletfwa kutincetu kube ngumnikelo walokutinhlavu lobhakiwe, futsi kutawuba liphunga lelimnandzi* kuJehova. 22 Indvodzana ya-Aroni letawulandzela emvakwakhe, legcotjwe kutsi ibe ngumphristi+ nayo kufanele yente lomnikelo. Lomnikelo kufanele ushiswe wonkhe embikwaJehova, futsi lona ngumtsetfo lotawuhlala usebenta. 23 Umnikelo walokutinhlavu lowentelwa umphristi kufanele ushiswe wonkhe. Akukafaneli udliwe.”

24 Jehova waphindze wakhuluma naMosi watsi: 25 “Tjela emadvodzana a-Aroni utsi: ‘Nangu umtsetfo lotawulandzelwa nakwentiwa umnikelo wesono:+ Silwane lesingumnikelo wesono sitawuhlatjwa embikwaJehova endzaweni lapho kuhlatjelwa khona umnikelo wekushiswa.+ Lomnikelo ungcwele ngelizinga leliphakeme. 26 Umphristi lonikela lomnikelo wesono nguye lokufanele awudle.+ Utawudlelwa endzaweni lengcwele, ebaleni lelithende lekuhlangana.+

27 “‘Yonkhe intfo letawutsintsa inyama yalomnikelo itawuba ngcwele, futsi nangabe kwenteka umuntfu atsela ingubo yakhe ngengati yalomnikelo, kufanele lengubo iwashelwe endzaweni lengcwele. 28 Sitja selubumba lokubiliselwe kuso lomnikelo kufanele siphihlitwe. Kodvwa nangabe ubiliselwe esitjeni selitfusi, leso sitja kufanele siwashisiswe ngemanti.

29 “‘Bonkhe labadvuna lababaphristi kufanele bawudle lomnikelo,+ futsi ungcwele ngelizinga leliphakeme.+ 30 Kodvwa-ke umnikelo wesono akukafaneli udliwe nangabe lenye yengati yawo iletfwe endzaweni lengcwele lesethendeni lekuhlangana, kuze kwentiwe kutsi umuntfu abuyisane naNkulunkulu.+ Kufanele ushiswe ngemlilo.

7 “‘Nangu umtsetfo lokufanele ulandzelwe nakwentiwa umnikelo welicala:+ Lomnikelo ungcwele ngelizinga leliphakeme. 2 Silwane lesingumnikelo welicala kufanele sihlatjelwe endzaweni lapho kuhlatjelwa khona iminikelo yekushiswa, futsi ingati+ yaso kufanele ifafatwe kuto tonkhe tinhlangotsi teli-al’thare.+ 3 Umphristi utawuletsa onkhe emanoni aso,+ lokufaka ekhatsi umsila waso, emanoni lambonye ematfumbu, 4 tinso totimbili nemanoni ato langasetinyongeni kanye nemanoni lasesibindzini.+ 5 Utakushisa kuze intfutfu yako ishunce isuka e-al’thare, kube ngumnikelo lowentiwa ngemlilo kuJehova.+ Lona ngumnikelo welicala. 6 Inyama yalesilwane itawudliwa ngiwo onkhe emadvodza labaphristi,+ futsi itawudlelwa endzaweni lengcwele. Loku kungcwele ngelizinga leliphakeme.+ 7 Umtsetfo losebenta nakwentiwa umnikelo wesono uyasebenta nalapho kwentiwa umnikelo welicala. Inyama yalesilwane itawuba yalomphristi lotawube ente lomnikelo ngaso kuze umuntfu abuyisane naNkulunkulu.+

8 “‘Umphristi nakentela umuntfu lotsite umnikelo wekushiswa, sikhumba+ salesilwane lesentiwe umnikelo sitawuba salomphristi.

9 “‘Wonkhe umnikelo walokutinhlavu lobhakwe etiko, nobe lowentiwe ebhodweni nobe ekesini,+ utawuba walomphristi lowentile.+ 10 Kodvwa yonkhe iminikelo yalokutinhlavu lenemafutsa+ nobe leyomile,+ itawuba yawo onkhe emadvodzana a-Aroni, futsi onkhe atawutfola lokulinganako.

11 “‘Nangu umtsetfo lotawulandzelwa nangabe umuntfu aletsa umhlatjelo wekuthula+ kuJehova: 12 Nangabe lomhlatjelo wakhe uwekubonga,+ utawuletsa netinkhwa letiyindingilizi letite imvubelo futsi letinemafutsa, aletse nemacebelengwane lete imvubelo labhocwe ngemafutsa kanye netinkhwa letiyindingilizi letentiwe ngafulaha locolisakele, lohlanganiswe nemafutsa futsi wabhucwa kahle. 13 Utawuletsa netinkhwa letiyindingilizi letinemvubelo kanye nalemihlatjelo yakhe yekuthula, lokuyimihlatjelo yekubonga. 14 Kufanele atsatse sinkhwa sinye kuleyo naleyo nhlobo sibe yincenye lengcwele kuJehova; sitawuba salomphristi lofafata ingati yalesilwane lesingumhlatjelo wekuthula.+ 15 Inyama yalemihlatjelo yekuthula, lokuyimihlatjelo yekubonga kufanele idliwe ngalelilanga lenikelwa ngalo. Akukafaneli ayishiye kuze kube sekuseni.+

16 “‘Nangabe lomhlatjelo wakhe kungumnikelo wekufunga+ nobe wekutitsandzela,+ kufanele udliwe ngalelilanga umphristi lawenta ngalo, futsi lokusalako kuwo kungaphindze kudliwe nangelilanga lelilandzelako. 17 Kodvwa nobe nguyiphi inyama yalomhlatjelo lesele kwaze kwaba lilanga lesitsatfu, itawushiswa ngemlilo.+ 18 Nangabe inyama yalomhlatjelo wakhe wekuthula idliwa nangelilanga lesitsatfu, loyo muntfu loyinikelako angeke emukelwe, nalomnikelo wakhe angeke wemukeleke. Loku kuyintfo lembi, futsi umuntfu loyidlako utawulandzisa ngesono sakhe.+ 19 Inyama letsintse nobe yini lengcolile akukafaneli idliwe, kodvwa iboshiswa ngemlilo. Inyama lehlantekile ngiyo lengadliwa futsi nobe ngubani loyidlako kufanele ahlanteke.

20 “‘Nobe ngubani longcolile futsi lodla inyama yemhlatjelo wekuthula lenikelwe kuJehova, kufanele abulawe.+ 21 Nangabe umuntfu atsintsa nobe yini lengcolile, kungaba ngumuntfu longcolile,+ silwane lesingcolile+ nanobe yini lengcolile futsi leyenyanyekako,+ bese udla lenye yalenyama yalomhlatjelo wekuthula lenikelwe kuJehova, loyo muntfu* kufanele abulawe.’”

22 Jehova wachubeka akhuluma naMosi, atsi: 23 “Ubotjela ema-Israyeli, utsi: ‘Akukafaneli nidle emanoni+ enkunzi nobe emvu lendvuna leseyincane nobe embuti. 24 Emanoni esilwane lesitfolakele sifile nemanoni esilwane lesibulewe ngulesinye, angasetjentiselwa letinye tintfo, kodvwa akukafaneli niwadle.+ 25 Nobe ngubani lodla emanoni esilwane lanikele ngaso kuJehova saba ngumnikelo lowentiwa ngemlilo, kufanele abulawe.

26 “‘Akukafaneli nidle ingati+ kuto tonkhe tindzawo lenihlala kuto, kungaba yingati yetinyoni nobe yetilwane. 27 Nobe ngubani lodla ingati kufanele abulawe.’”+

28 Jehova waphindze wakhuluma naMosi watsi: 29 “Ubotjela ema-Israyeli utsi: ‘Nobe ngubani loletsa umhlatjelo wekuthula kuJehova kufanele atsatse incenye yalomhlatjelo ayinikele kuJehova.+ 30 Utawuletsa emanoni+ kanye nemganga kutsi kube ngumnikelo lowentiwa ngemlilo kuJehova, futsi loku utakuletsa akuphetse ngetandla, akujikitise kuze kube ngumnikelo lojikitiswako+ embikwaJehova. 31 Umphristi utawushisa lamanoni kuze intfutfu yawo ishunce isuka e-al’thare,+ kodvwa lomganga utawuba wa-Aroni nemadvodzana akhe.+

32 “‘Umlente wangesekudla wesilwane lesentiwe umhlatjelo wekuthula nitawunika umphristi futsi utawuba yincenye yakhe lengcwele.+ 33 Indvodzana ya-Aroni letawunikela ngengati yalemihlatjelo yekuthula kanye nemanoni, itawutsatsa umlente wangesekudla ube wayo.+ 34 Kulemihlatjelo yekuthula yema-Israyeli, mine ngitawutsatsa umganga wemnikelo lojikitiswako kanye nemlente loyincenye lengcwele ngikunike Aroni umphristi nemadvodzana akhe. Lona ngumtsetfo lohlala njalo lotawulandzelwa ngema-Israyeli.+

35 “‘Lena yincenye letsetfwe eminikelweni leyentiwa ngemlilo kuJehova lokufanele inikwe baphristi, lokungu-Aroni nemadvodzana akhe. Kufanele banikwe yona ngelilanga lababekwa ngalo kutsi bakhonte Jehova njengebaphristi.+ 36 Jehova utsite ngelilanga latawubagcoba+ ngalo utabanika lencenye letsetfwe kuma-Israyeli. Lona ngumtsetfo lotawuhlala njalo, kuto tonkhe titukulwane.’”

37 Ngulona-ke umtsetfo lotawulandzelwa nakwentiwa umnikelo wekushiswa,+ umnikelo walokutinhlavu,+ umnikelo wesono,+ umnikelo welicala,+ umhlatjelo lowentiwa nakubekwa baphristi,+ nemhlatjelo wekuthula,+ 38 njengobe nje Jehova asho kuMosi eNtsabeni iSinayi,+ ngelilanga atjela ema-Israyeli ehlane laseSinayi kutsi aletse iminikelo yawo kuJehova.+

8 Jehova wachubeka akhuluma naMosi, watsi: 2 “Tsatsa Aroni nemadvodzana akhe,+ utsatse netingubo tabo tebuphristi,+ emafutsa ekugcoba,+ inkunzi letawuba ngumnikelo wesono, timvu letindvuna letimbili, kanye nabhasikidi lonetinkhwa letite imvubelo,+ 3 bese uhlanganisa sonkhe sive sema-Israyeli emnyango welithende lekuhlangana.”

4 Ngako Mosi wenta njengobe Jehova amtjelile, futsi sonkhe sive sema-Israyeli sabutsana ndzawonye emnyango welithende lekuhlangana. 5 Mosi wabese ukhuluma nema-Israyeli utsi: “Nguloku Jehova latsite sikwente.” 6 Mosi wasondzeta Aroni nemadvodzana akhe, wabageza* ngemanti.+ 7 Ngemuva kwaloko wagcokisa Aroni ingubo,+ wabopha iseshi+ elukhalo lwakhe, wamgcokisa lijazi lelite imikhono,+ nesidziya+ futsi wasibopha ngelibhande lelelukiwe,*+ kuze sihlale kahle. 8 Wamgcokisa nesembatfo sesifuba,+ wafaka ne-Urimu neThumimu+ kuso. 9 Wamfaka umshuculo lokhetsekile+ enhloko, kwase kutsi ngembili kulomshuculo wabophela ngcwengcwe weligolide longcwele* futsi lomanyatelako,+ njengobe nje Jehova abemtjelile.

10 Mosi wabese utsatsa emafutsa ekugcoba, wagcoba lithende lekukhontela nato tonkhe tintfo lebetikulo,+ futsi konkhe wakungcwelisa. 11 Ngemuva kwaloko watsatsa lamanye alamafutsa wawafafata tikhatsi letingu-7 e-al’thare, waligcoba kanye nato tonkhe tintfo letitawusetjentiswa kulo, kanye nendishi netinyawo lebekwa kuto kuze konkhe kube ngcwele. 12 Ekugcineni watsatsa lamanye alamafutsa ekugcoba wawatsela enhloko ya-Aroni, wamgcoba ngawo kuze abe ngcwele.+

13 Nakacedza wasondzeta emadvodzana a-Aroni, wawagcokisa tingubo, wabopha netinseshi etinkhalo tawo futsi wawafaka* nemishuculo,+ njengobe nje Jehova abemtjelile.

14 Ngemuva kwaloko waletsa lenkunzi lebeyitawuba ngumnikelo wesono. Bo-Aroni nemadvodzana akhe babeka tandla tabo enhloko yayo.+ 15 Mosi wayihlaba, wase wenya umunwe wakhe engatini+ yayo, wabhoca lengati kuto tonkhe timphondvo teli-al’thare futsi walihlanta esonweni. Lelenye ingati wayitsela ngekhatsi kweli-al’thare kuze alingcwelise futsi alihlambulule. 16 Wabese utsatsa onkhe emanoni labembonye ematfumbu, nemanoni lasesibindzini, kanye netinso totimbili nemanoni lakuto, wakushisa kuze intfutfu yako ishunce isuka e-al’thare.+ 17 Watsatsa yonkhe lenkunzi, sikhumba sayo, inyama kanye nebulongo bayo, wakushisa ngemlilo ngephandle kwendzawo lebekuhlalwa kuyo,+ njengobe nje Jehova abemtjelile.

18 Ngemuva kwaloko waletsa lemvu lendvuna lebeyitawuba ngumnikelo wekushiswa, futsi bo-Aroni nemadvodzana akhe babeka tandla tabo enhloko yayo.+ 19 Mosi wayihlaba, wase ufafata ingati yayo kuto tonkhe tinhlangotsi teli-al’thare. 20 Wayicoba yaba ngemacatsa, watsatsa inhloko, nalamacatsa kanye nemanoni* wakushisa. 21 Wawasha ematfumbu nabogalu ngemanti, wase ushisa yonkhe lemvu kuze intfutfu yayo ishunce isuka e-al’thare. Lona bekungumnikelo wekushiswa loliphunga lelimnandzi.* Bekungumnikelo lowentiwa ngemlilo loya kuJehova, njengobe nje Jehova abemtjelile.

22 Waletsa nalelenye imvu lendvuna, lokuyimvu lenikelwa nakubekwa baphristi.+ Bo-Aroni nemadvodzana akhe babeka tandla tabo enhloko yayo.+ 23 Mosi wayihlaba, watsatsa lenye ingati yayo wayibhoca encenyeni lengephansi yendlebe ya-Aroni yangesekudla, nasesitfupheni sakhe sangesekudla nakubhozo wakhe wangesekudla. 24 Ngemuva kwaloko Mosi watsatsa emadvodzana a-Aroni, wabhoca lenye yalengati encenyeni lengephansi yetindlebe tawo tangesekudla, nasetitfupheni tawo tangesekudla kanye nakubobhozo bawo bangesekudla. Lelenye ingati wayifafata kuto tonkhe tinhlangotsi teli-al’thare.+

25 Wabese utsatsa emanoni, umsila, onkhe emanoni lambonye ematfumbu, nemanoni lasesibindzini, watsatsa netinso totimbili nemanoni lakuto, kanye nemlente wangesekudla.+ 26 Kulobhasikidi wetinkhwa letite imvubelo lobewusembikwaJehova, Mosi watsatsa sinkhwa lesiyindingilizi lesite imvubelo,+ nesinkhwa lesiyindingilizi lesinemafutsa+ kanye nelicebelengwane. Letintfo watibeka etikwalamanoni nalomlente wangesekudla. 27 Ngemuva kwaloko, wakutsatsa konkhe wakubeka etandleni ta-Aroni nasetandleni temadvodzana akhe, wase uyakujikitisa kuze kube ngumnikelo lojikitiswako embikwaJehova. 28 Wabese uyakutsatsa etandleni tabo, wakushisa etikwemnikelo wekushiswa kuze intfutfu yako ishunce isuka e-al’thare. Bekungumhlatjelo lowentiwa nakubekwa baphristi, loliphunga lelimnandzi.* Lona kwakungumnikelo lowentiwa ngemlilo loya kuJehova.

29 Wabese utsatsa umganga wawujikitisa kuze ube ngumnikelo lojikitiswako embikwaJehova.+ Lomganga lotsetfwe kulemvu lenikelwa nakubekwa baphristi waba waMosi, njengobe nje Jehova abemtjelile.+

30 Mosi watsatsa lamanye alamafutsa ekugcoba+ nalenye yalengati lebeyise-al’thare, wafafata ngako Aroni netingubo takhe kanye nemadvodzana akhe netingubo tawo. Ngaleyondlela wangcwelisa Aroni netingubo takhe kanye nemadvodzana a-Aroni+ netingubo tawo.+

31 Ngemuva kwaloko Mosi watsi ku-Aroni nemadvodzana akhe: “Bilisani+ lenyama emnyango welithende lekuhlangana futsi niyidlele lapho kanye nesinkhwa lesikubhasikidi losetjentiswa nakubekwa baphristi, njengobe nje Nkulunkulu angitjela, watsi: ‘Loku kutawudliwa ngu-Aroni nemadvodzana akhe.’+ 32 Inyama nesinkhwa lesitawusala kufanele nikushise ngemlilo.+ 33 Nitawuhlala edvute nemnyango welithende lekuhlangana emalanga langu-7, kuze kube ngulapho kwendlula emalanga ekubekwa kwenu, ngobe kutawutsatsa emalanga langu-7 kutsi nibekwe nibe baphristi.*+ 34 Loku lesikwente lamuhla, Jehova utsite sibokwenta kuze nitewubuyisana naye.+ 35 Nitawuhlala edvute nemnyango welithende lekuhlangana busuku nemini, emalanga langu-7,+ futsi nente umsebenti Jehova laninike wona+ kuze ningafi, ngobe nguloko Nkulunkulu langitjele kona.”

36 Aroni nemadvodzana akhe bakwenta konkhe loko Jehova labekutjele Mosi.

9 Ngelilanga lesi-8,+ Mosi wabita Aroni nemadvodzana akhe kanye nemadvodza lamadzala aka-Israyeli. 2 Watsi ku-Aroni: “Tsatsa litfole leliphile kahle lelitawuba ngumnikelo wakho wesono,+ nemvu lendvuna lephile kahle letawuba ngumnikelo wakho wekushiswa, futsi kokubili ukuletse embikwaJehova. 3 Kodvwa naku lotawukusho kuma-Israyeli: ‘Kufanele niletse imbuti lendvuna letawuba ngumnikelo wesono, nelitfole lelinemnyaka munye, kanye nemvu lendvuna lenemnyaka munye lokutawuba ngumnikelo wekushiswa, futsi letilwane kufanele tibe nguletiphile kahle. 4 Kufanele niletse nenkhabi kanye nemvu lendvuna lokutawuba ngumhlatjelo wekuthula+ lenitawunikela ngawo embikwaJehova. Nitawuletsa nemnikelo walokutinhlavu+ lobhicwe nemafutsa, ngobe lamuhla Jehova utawubonakala kini.’”+

5 Ngako-ke batsatsa letintfo Mosi labebatjele ngato batiletsa embikwelithende lekuhlangana. Onkhe ema-Israyeli asondzela futsi ema embikwaJehova. 6 Mosi wabese utsi: “Nguloku Jehova latsite nibokwenta kuze nitobona inkhatimulo yaJehova.”+ 7 Mosi watsi ku-Aroni: “Yani e-al’thare, ufike wente umnikelo wakho wesono+ kanye nemnikelo wakho wekushiswa, kuze wena kanye nendlu yakho nibuyisane naNkulunkulu.+ Utawubese wentela nalabantfu umnikelo,+ kuze babuyisane naNkulunkulu,+ njengobe nje Jehova ashito.”

8 Ngekushesha Aroni waya e-al’thare futsi wahlaba lelitfole lebelitawuba ngumnikelo wakhe wesono.+ 9 Emadvodzana akhe abese aletsa ingati+ yalo kuye, yena wenya umunwe wakhe kulengati futsi wayibhoca etimphondvweni teli-al’thare, kwatsi lelenye wayitsela ekhatsi kuleli-al’thare.+ 10 Washisa emanoni, netinso kanye nemanoni lambonye sibindzi lawatsetse kulomnikelo wesono, kuze intfutfu yako ishunce isuka e-al’thare, njengobe nje Jehova abeshito kuMosi.+ 11 Inyama yalelitfole kanye nesikhumba sayo wakushisa ngemlilo ngaphandle kwalendzawo labebahlala kuyo.+

12 Ngemuva kwaloko, wahlaba lesilwane lebesitawuba ngumnikelo wekushiswa. Emadvodzana akhe aletsa ingati yaso kuye, wayifafata kuto tonkhe tinhlangotsi teli-al’thare.+ 13 Amnika nemacatsa alesilwane lesingumnikelo wekushiswa kanye nenhloko yaso, futsi yena wakushisa kuze intfutfu yako ishunce isuka e-al’thare. 14 Wabese uwasha ematfumbu kanye nabogalu, wakushisa etikwemnikelo wekushiswa kuze intfutfu yako ishunce isuka e-al’thare.

15 Nakacedza waletsa umnikelo walabantfu futsi watsatsa imbuti lebeyitawuba ngumnikelo wabo wesono, wayihlaba wase wenta ngayo umnikelo wesono ngendlela lente ngayo kulomnikelo wekucala. 16 Waletsa nemnikelo wekushiswa, wawunikela ngendlela lokuvame kwentiwa ngayo.+

17 Ngephandle kwemnikelo wekushiswa lowentiwa ekuseni,+ waphindze waletsa nemnikelo walokutinhlavu.+ Watsatsa kuwo longagcwala sandla sakhe wawushisa kuze intfutfu yawo ishunce isuka e-al’thare.

18 Ngemuva kwaloko wahlaba lenkhabi kanye nalemvu lendvuna lebekutawuba ngumhlatjelo wekuthula lowentelwa labantfu. Emadvodzana a-Aroni abese aletsa ingati yaletilwane, yena wayifafata kuto tonkhe tinhlangotsi teli-al’thare.+ 19 Atsatsa emanoni alenkhabi,+ umsila lononile walemvu lendvuna, emanoni lambonye kwangekhatsi, tinso kanye nemanoni lambonye sibindzi,+ 20 konkhe akubeka etikwemiganga. Ngemuva kwaloko Aroni washisa lamanoni kuze intfutfu yawo ishunce isuka kuleli-al’thare.+ 21 Kodvwa lemiganga kanye nemlente wangesekudla, wakujikitisa kwaba ngumnikelo lojikitiswako embikwaJehova, njengobe nje Mosi abemtjelile.+

22 Aroni wase ubuka ngakulabantfu, waphakamisa tandla takhe futsi wababusisa,+ ngemuva kwaloko wehla e-al’thare lapho bekentela khona umnikelo wesono, nemnikelo wekushiswa kanye nemihlatjelo yekuthula. 23 Ekugcineni boMosi na-Aroni bangena ethendeni lekuhlangana, ngemuva kwaloko baphuma futsi babusisa labantfu.+

Bonkhe bantfu babese babona inkhatimulo yaJehova,+ 24 kwehla nemlilo uvela kuJehova+ washisa lomnikelo wekushiswa nalamanoni lebekase-al’thare. Bonkhe labantfu batsi nabakubona loku, bamemeta bajabulile baphindze bakhotsama.+

10 Ngemuva kwaloko, emadvodzana a-Aroni, boNadabi na-Abihu,+ batsatsa titja tabo tekufaka emalahle bafaka umlilo kanye nemphepho+ kuto. Bashisa imphepho ngemlilo longakavumeleki embikwaJehova,+ futsi Nkulunkulu bekangakabatjeli kutsi bayishise. 2 Ngako kwehla umlilo uvela kuJehova wababulala,+ bafela embikwaJehova.+ 3 Mosi wase utsi ku-Aroni: “Naku Jehova lakushito: ‘Ngitawungcweliswa kulabo labasedvute nami,+ ngikhatinyuliswe embikwabo bonkhe bantfu.’” Aroni wathula.

4 Mosi wabita Mishayeli na-Elisafani, labangemadvodzana a-Uziyeli,+ babe lomncane wa-Aroni. Watsi kubo: “Wotani nitewutsatsa naba bomnakenu lapha embikwendzawo lengcwele nibayise ngephandle kwalendzawo lokuhlalwa kuyo.” 5 Beta bawatsatsa lamadvodzana a-Aroni asegcoke tingubo tawo, bawayisa ngephandle kwendzawo lokuhlalwa kuyo, njengobe nje Mosi abebatjelile.

6 Mosi wabese utsi ku-Aroni nakulalamanye emadvodzana akhe, bo-Eliyezeri na-Ithamari: “Ningatiyekeli tinhloko tenu tihlale tingakanakwa, ningatidzabuli netingubo tenu+ kuze ningafi, naNkulunkulu angatewusitfukutselela sonkhe lesive. Sonkhe sive sema-Israyeli lesibanakenu sitawubalilela laba Jehova lababulele ngemlilo. 7 Nibohlala nisedvute nemnyango welithende lekuhlangana, ngaphandle kwaloko nitawufa, ngobe Jehova unigcobe ngemafutsa.”+ Ngako benta njengobe Mosi abatjelile.

8 Jehova wabese utsi ku-Aroni: 9 “Wena nemadvodzana akho ningabolinatsa liwayini nobe letinye tinatfo letidzakanako nanita kulelithende lekuhlangana,+ kuze ningafi. Lona ngumtsetfo lotawuchubeka ulandzelwa ngito tonkhe titukulwane tenu. 10 Loku kutawukwenta kutsi kube nemehluko emkhatsini wentfo lengcwele nalengasingcwele, nasemkhatsini wentfo lehlantekile nalengakahlanteki,+ 11 kuze nifundzise ema-Israyeli yonkhe lemitsetfo Jehova lawatjele yona asebentisa Mosi.”+

12 Mosi wakhuluma na-Aroni nemadvodzana akhe labesele, bo-Eliyezeri na-Ithamari, watsi: “Eminikelweni leyentiwe ngemlilo kuJehova, tsatsani loko lokusele emnikelweni walokutinhlavu, nente ngako sinkhwa lesite imvubelo bese nisidlela edvute neli-al’thare,+ ngobe kungcwele ngelizinga leliphakeme.+ 13 Kufanele nikudlele endzaweni lengcwele,+ ngobe kusabelo sakho nesemadvodzana akho lesitsetfwe eminikelweni leyentiwa ngemlilo kuJehova. Nguloku-ke lengitjelwe kona. 14 Wena nemadvodzana nemadvodzakati+ akho kufanele niphindze nidle nemganga wemnikelo lojikitiswako kanye nemlente loyincenye lengcwele,+ futsi loku nikudlele endzaweni lehlantekile, ngobe kusabelo sakho nesemadvodzana akho lesitsetfwe emihlatjelweni yekuthula leletfwa ngema-Israyeli. 15 Nakuletfwa iminikelo yemanoni leyentiwa ngemlilo, kutawuletfwa nemlente loyincenye lengcwele kanye nemganga wemnikelo lojikitiswako kuze kujikitiswe embikwaJehova. Loku kutawuhlale kusabelo sakho nesemadvodzana akho+ njengobe nje Jehova ashito.”

16 Mosi wafunisisa imbuti lebekwentiwe ngayo umnikelo wesono,+ futsi watfola kutsi beyishiswe yonkhe. Ngaleso sizatfu wawatfukutselela kakhulu emadvodzana a-Aroni labesele, bo-Eliyezeri na-Ithamari, watsi: 17 “Anikawudli leni lomnikelo wesono endzaweni lengcwele+ njengobe uyintfo lengcwele ngelizinga leliphakeme, futsi Nkulunkulu aninike wona kuze nitewuphendvula ngetono tema-Israyeli, nente nekutsi abuyisane naJehova? 18 Bukani nje, ingati yawo ayikaletfwa ngekhatsi endzaweni lengcwele.+ Bekufanele noma kanjani niwudle lomnikelo endzaweni lengcwele, njengobe nje Nkulunkulu angitjelile.” 19 Aroni wamphendvula watsi: “Lamuhla umnikelo wesono nemnikelo wekushiswa wentiwe embikwaJehova,+ kodvwa nanobe kunjalo ngehlelwe nguletintfo leti. Kube ngiwudlile lomnikelo wesono lamuhla, loko bekutamjabulisa yini Jehova?” 20 Mosi watsi nakeva loko wenetiseka.

11 Jehova wabese utsi kuMosi na-Aroni: 2 “Khulumani nema-Israyeli, nitsi kuwo: ‘Nati tilwane letiphilako emhlabeni leningatidla:+ 3 Tonkhe tilwane letehlukanisa tinselo ngalokuphelele futsi letihlwabulako ngito leningatidla.

4 “‘Kodvwa ningatidli letilwane letilandzelako letihlwabulako nobe letehlukanisa tinselo: likamela, ngobe liyahlwabula kodvwa aliyehlukanisi ngalokuphelele inselo. Ngako litawuba yintfo lengcolile kini.+ 5 Ningayidli nembila,+ ngobe iyahlwabula kodvwa ayiyehlukanisi ngalokuphelele inselo. Ngaleso sizatfu itawuba yintfo lengcolile kini. 6 Ningawudli logwaja, ngobe uyahlwabula kodvwa awuyehlukanisi ngalokuphelele inselo. Ngako utawuba yintfo lengcolile kini. 7 Nengulube+ ningayidli, ngobe yehlukanisa inselo ngalokuphelele kodvwa ayihlwabuli. Ngaleso sizatfu itawuba yintfo lengcolile kini. 8 Ningayidli inyama yaletilwane nobe nititsintse natifile, futsi titawuba nguletingcolile kini.+

9 “‘Nati tilwane leningatidla kuleto letihlala emantini: Nobe yini lenetimphiko tekuntjweza netincwencwe ningayidla, kungaba kutsi iselwandle nobe emfuleni.+ 10 Kodvwa nobe ngusiphi silwane lesiselwandle nobe lesisemfuleni lesite timphiko tekuntjweza nobe tincwencwe, kuto tonkhe tilwane letihamba tisicumbi nakuto tonkhe tilwane* letihlala emantini, leso silwane sitawuba ngulesenyanyekako kini. 11 Kufanele nititsatse njengaletenyanyekako, futsi ningayidli inyama yato,+ nitenyanye nalapho setifile. 12 Konkhe lokuhlala emantini lokute timphiko tekuntjweza netincwencwe kutawuba yintfo leyenyanyekako kini.

13 “‘Nati tilwane letindizako lokufanele tenyanyeke kini futsi akukafaneli nitidle ngobe tiyenyanyeka: Lusoti,+ lingce, ingculungculu,+ 14 nhloyile, nato tonkhe tinhlobo tabolohheya, 15 nato tonkhe tinhlobo temahhwabayi, 16 inshi,* sikhova, inkanku, tonkhe tinhlobo taboloklebe, 17 sikhova lesincane, sahhukulu, sikhova lesinetindlebe letindze, 18 imfuketi, livuba, inkwazi, 19 dvoye, nato tonkhe tinhlobo tabomatalatingwenya, tsekwane, kanye nelilulwane. 20 Tonkhe tilwane letinetimphiko futsi letihamba tilibulo* tiphindze tibe netinyawo letine tiyintfo leyenyanyekako kini.

21 “‘Kuletilwane letinetimphiko futsi letihamba tilibulo tiphindze tibe netinyawo letine, ningadla kuphela leto letinemilente yekugcuma. 22 Nati leningatidla: Tinhlobonhlobo tesikhonyane, letinye tintsetse letidliwako,+ emadziya, nemaboni. 23 Tonkhe letinye tilwane letinetimphiko futsi letihamba tilibulo tiphindze tibe netinyawo letine titawuba yintfo leyenyanyekako kini. 24 Letilwane titawunenta ningcole. Wonkhe umuntfu lotitsintsako nasetifile utawuba ngulongcolile kuze kuhlwe.+ 25 Nobe ngubani lotitsatsako nasetifile kufanele awashe tingubo takhe,+ futsi utawuba ngulongcolile kuze kuhlwe.

26 “‘Nobe ngusiphi silwane lesingayehlukanisi ngalokuphelele inselo nalesingahlwabuli sitawuba yintfo lengcolile kini. Wonkhe umuntfu lositsintsako utawuba ngulongcolile.+ 27 Emkhatsini wetilwane letinetinyawo letine, tonkhe letinetidladla titawuba yintfo lengcolile kini. Wonkhe umuntfu lotitsintsako nasetifile utawuba ngulongcolile kuze kuhlwe. 28 Umuntfu lotitsatsako nasetifile kufanele awashe tingubo takhe,+ futsi utawuba ngulongcolile kuze kuhlwe.+ Letilwane titawuba yintfo lengcolile kini.

29 “‘Nati tilwane letihumako letitawuba nguletingcolile kini: Chakidze, ligundvwane,+ tonkhe tinhlobo tetibankhwa,* 30 intfulo, chamu, holoholo, umgololo, kanye nelunwabu. 31 Letilwane titawuba nguletingcolile kini.+ Wonkhe umuntfu lotitsintsako nasetifile utawuba ngulongcolile kuze kuhlwe.+

32 “‘Nakwenteka tifa futsi tiwela entfweni letsite, leyontfo itawuba ngulengcolile, kungaba sitja lesentiwe ngesigodvo, ingubo, sikhumba, nobe indvwangu yelisaka. Ngisho nome kungusiphi sitja, kufanele senyiwe emantini, futsi sitawuba ngulesingcolile kuze kuhlwe. Ngemuva kwaloko sitawubese siba ngulesihlantekile. 33 Nangabe letilwane tiwela esitjeni selubumba, leso sitja kufanele siphihlitwe. Nobe yini lebeyikulesitja itawuba yintfo lengcolile.+ 34 Nome ngukuphi kudla lokutawutsintfwa ngemanti labekulesitja kutawuba ngulokungcolile, futsi nobe yini lenatfwako lebeyikuleso sitja nayo itawuba ngulengcolile. 35 Nome yini letitawuwela kuyo nasetifile itawuba yintfo lengcolile. Leyontfo kufanele iphihlitwe, ngisho nobe kunguhhavini nobe kusitofu lesincane. Letintfo titawuba nguletingcolile futsi titawuhlala tingcolile kini. 36 Umtfombo nesicobho semanti ngiko kuphela lokutawuhlala kuhlantekile, kodvwa nobe ngubani lotsintsa letilwane nasetifile utawuba ngulongcolile. 37 Nangabe letilwane letifile tiwela enhlanyelweni leyawuhlanyelwa, leyo nhlanyelo ihlantekile. 38 Kodvwa nangabe kutselwa emanti kulenhlanyelo, bese kuyo kuwela incenye yalesilwane lesifile, lenhlanyelo itawuba yintfo lengcolile kini.

39 “‘Nangabe silwane lenivumelekile kusidla sifa, nobe ngubani lositsintsako utawuba ngulongcolile kuze kuhlwe.+ 40 Nome ngubani losidlako nasesifile kufanele awashe tingubo takhe futsi utawuba ngulongcolile kuze kuhlwe.+ Nome ngubani lositsatsako nasesifile, naye kufanele awashe tingubo takhe futsi utawuba ngulongcolile kuze kuhlwe. 41 Tonkhe tilwane letisemhlabeni letihamba tisicumbi, tiyenyanyeka.+ Ngaleso sizatfu akukafaneli nitidle. 42 Ningadli nome ngusiphi silwane lesihamba ngesisu nobe lesinetinyawo letine, ningadli nanobe ngutiphi tilwane letihamba tisicumbi futsi letinetinyawo letinyenti, ngobe letilwane tiyenyanyeka.+ 43 Ningatenti kutsi nenyanyeke ngekudla nobe ngutiphi tilwane letihamba tisicumbi, futsi ningatingcolisi bese niba ngulabangakahlanteki ngenca yato.+ 44 Mine nginguJehova Nkulunkulu wenu,+ ngako kufanele nitingcwelise kuze nibe ngcwele,+ ngobe mine ngingcwele.+ Ningatingcolisi ngekudla nobe ngutiphi tilwane letisemhlabeni letihamba tisicumbi. 45 Mine nginguJehova, lowanihola wanikhipha eveni laseGibhithe kuze ngikhombise kutsi nginguNkulunkulu wenu.+ Kufanele nibe ngcwele,+ ngobe mine ngingcwele.+

46 “‘Ngulona-ke umtsetfo lomayelana netilwane letinetinyawo letine, tilwane letindizako, tonkhe tilwane* letihlala emantini, nato tonkhe tilwane letisemhlabeni letihamba tisicumbi, 47 kuze kutewuba nemehluko emkhatsini walokungcolile nalokungakangcoli nasemkhatsini wetilwane leningatidla naleto lokungakafaneli nitidle.’”+

12 Jehova wachubeka wakhuluma naMosi, watsi: 2 “Naku lotakutjela ema-Israyeli: ‘Nangabe umfati akhulelwa bese ubeleka umntfwana wemfana, utawuba ngulongcolile emalanga langu-7 njengalapho asesikhatsini.+ 3 Ngelilanga lesi-8, loluswane lutawusokwa.+ 4 Emalangeni langu-33 lalandzelako, lomake utawuchubeka atihlambulula ekopheni kwakhe. Akukafaneli atsintse nome yini lengcwele, futsi kufanele angeti endzaweni lengcwele kuze kube ngulapho kuphela emalanga akhe ekutihlambulula.

5 “‘Nangabe abeleka umntfwana wentfombatane, utawuba ngulongcolile emalanga langu-14 njengalapho asesikhatsini. Emalangeni langu-66 lalandzelako, utawuchubeka atihlambulula ekopheni kwakhe. 6 Nakuphela emalanga akhe ekutihlambulula nakatele umntfwana wemfana nome wentfombatane, utawuletsa imvu lendvuna lenemnyaka munye kuze ibe ngumnikelo wekushiswa,+ aletse nelizini lelivukutfu nobe lituba lelitawuba ngumnikelo wesono. Loku utakuletsa kumphristi emnyango welithende lekuhlangana. 7 Lomphristi utakunikela embikwaJehova futsi ente kutsi lomake abuyisane naNkulunkulu, bese uba ngulohlantekile ekopheni kwakhe. Lona ngumtsetfo lomayelana nemfati lobeleka umntfwana wemfana nome wentfombatane. 8 Kodvwa nangabe angakhoni kukhipha imvu, kufanele aletse ematuba lamabili nobe emazini lamabili emavukutfu.+ Linye litawuba ngumnikelo wekushiswa, lelelinye libe ngumnikelo wesono, futsi umphristi utakwenta kutsi abuyisane naNkulunkulu bese uba ngulohlantekile.’”

13 Jehova wachubeka akhuluma naMosi na-Aroni watsi: 2 “Nangabe umuntfu avuvuka, nobe aba nesilondza, nobe avelwa libala esikhumbeni*+ futsi kube njengebulephelo,* kufanele aletfwe ku-Aroni umphristi nobe kulenye yemadvodzana akhe labaphristi.+ 3 Umphristi utawuhlolisisa lelibala lelivele esikhumbeni salomuntfu. Nangabe boya lobukulo sebumhlophe, nalelibala libonakala lingene ekhatsi enyameni, loko kusuke kubulephelo. Umphristi utalihlolisisa futsi asho kutsi lomuntfu ungcolile. 4 Kodvwa nangabe lelibala lelisesikhumbeni salomuntfu limhlophe futsi lingakangeni ekhatsi enyameni, neboya lobukulo bungakashintji baba mhlophe, lomphristi utamsusa emkhatsini webantfu, ahlale yedvwa emalanga langu-7.+ 5 Umphristi utamhlolisisa ngelilanga lesi-7. Lesifo nasibonakala sesiphelile futsi singakandzi emtimbeni walomuntfu, lomphristi utamsusa emkhatsini webantfu, achubeke ahleli yedvwa lamanye emalanga langu-7.

6 “Umphristi utawuphindze amhlolisise ngelilanga lesi-7. Nangabe lesifo sesiphelile futsi singakandzi emtimbeni walomuntfu, lomphristi utawukusho kutsi uhlantekile,+ bekumane kusilondza nje. Lomuntfu utawubese uwasha tingubo takhe, abe ngulohlantekile. 7 Kodvwa nangabe lesilondza* sandzile emtimbeni walomuntfu ngemuva kwekutsi ete kumphristi kuze kushiwo kutsi sewuhlantekile, kufanele aphindze* abuyele kumphristi. 8 Umphristi utawusihlolisisa, futsi nangabe lesilondza sesandzile emtimbeni walomuntfu, lomphristi utawukusho kutsi ungcolile. Lesi sifo sebulephelo.+

9 “Nangabe umuntfu aba nebulephelo, kufanele aletfwe kumphristi, 10 futsi lomphristi utamhlolisisa.+ Nakavuvuka futsi kumhlophe lapho avuvuke khona, neboya lobulapho sebugucuke baba mhlophe futsi sekunesilondza lesivulekile,+ 11 loko kusuke kubulephelo lobusolo bungapheli. Umphristi utawukusho kutsi lomuntfu ungcolile. Kufanele angamsusi emkhatsini walabanye bantfu+ ngobe ungcolile. 12 Nangabe lobulephelo bandza bugcwala kuwo wonkhe umtimba, kusuka enhloko kuya etinyaweni, konkhe lapho kubona khona umphristi, 13 futsi umphristi sekamhlolisisile, wabona kutsi lobulephelo sebugcwele kuso sonkhe sikhumba sakhe, utawubese uyasho kutsi lomuntfu uhlantekile.* Sonkhe sikhumba sakhe sesigucuke saba mhlophe, ngako uhlantekile. 14 Kodvwa nakuvela silondza lesivulekile esikhumbeni sakhe, lomuntfu utawuba ngulongcolile. 15 Umphristi nakabona lesilondza lesivulekile, utawusho kutsi lomuntfu ungcolile.+ Lesilondza singcolile, futsi lesi sifo sebulephelo.+ 16 Kodvwa nangabe lesilondza siphindze sigucuka siba mhlophe, lomuntfu kufanele ete kumphristi. 17 Umphristi utamhlolisisa,+ futsi nangabe lesilondza sesigucuke saba mhlophe, utawubese uyasho kutsi lomuntfu uhlantekile.

18 “Nakwenteka umuntfu avelwa litfumba bese liyaphola, 19 kodvwa kuleyondzawo avuvuke futsi kube mhlophe nobe kuvele libala lelibovu sakuba mhlophe, lomuntfu kufanele aye kumphristi. 20 Umphristi utamhlolisisa,+ futsi nangabe loko lokuvelile kungene ekhatsi enyameni, neboya lobukuleyo ndzawo sebugucuke baba mhlophe, lomphristi utawukusho kutsi lomuntfu ungcolile. Lesi sifo sebulephelo lesivele lapho bekunelitfumba khona. 21 Kodvwa nangabe umphristi amhlolisisa futsi abona kutsi kute boya lobugucuke baba mhlophe, nekutsi loko lokuvelile akukangeni ekhatsi enyameni kantsi futsi sekuyaphela, lomphristi utamsusa emkhatsini webantfu, ahlale yedvwa emalanga langu-7.+ 22 Nangabe-ke kubonakala sekwandzile esikhumbeni salomuntfu, umphristi utawukusho kutsi lomuntfu ungcolile. Lesi sifo sebulephelo. 23 Kodvwa nangabe lelibala solo lisendzaweni yinye futsi lingakandzi, loko kumane kukuvuvuka kwalelitfumba, ngako umphristi utawukusho kutsi lomuntfu uhlantekile.+

24 “Nangabe umuntfu aba nesibati sekusha, bese kulesibati kuvela libala lelibovu sakuba mhlophe nobe kuvele libala lelimhlophe, 25 umphristi utalihlolisisa. Nangabe boya lobukulelibala sebugucuke baba mhlophe futsi lelibala libonakala lingene ekhatsi enyameni, loko kutawube kubulephelo lobuvele kulesibati. Umphristi utawusho kutsi lomuntfu ungcolile. Lesi sifo sebulephelo. 26 Kodvwa nangabe umphristi alihlolisisa abone kutsi kute boya lobugucuke baba mhlophe nekutsi lelibala alikangeni ekhatsi enyameni, kantsi futsi seliyaphela, utawubese uyamsusa emkhatsini webantfu, ahlale yedvwa emalanga langu-7.+ 27 Umphristi utamhlolisisa ngelilanga lesi-7. Nakubonakala kutsi lelibala selandzile emtimbeni, utawukusho kutsi lomuntfu ungcolile. Lesi sifo sebulephelo. 28 Kodvwa nangabe lelibala solo lisendzaweni yinye, lingandzi emtimbeni futsi seliphela, loko kusuke kukuvuvuka nje kwalesibati. Umphristi utawukusho kutsi lomuntfu uhlantekile ngobe bekumane kukuvuvuka kwesibati.

29 “Nangabe umuntfu lomdvuna nobe lomsikati avelwa silondza enhloko nobe esilevini, 30 umphristi utasihlolisisa.+ Nangabe sibonakala singene ekhatsi enyameni, netinwele letikuso setimtfubi futsi setitincane, umphristi utawukusho kutsi lomuntfu ungcolile. Lesi silondza lesivele enhloko nome esilevini futsi kusuke kusifo sebulephelo lesisenhloko nobe esilevini. 31 Kodvwa umphristi nakabona kutsi lesilondza asikangeni ekhatsi enyameni nekutsi kute tinwele letimnyama kuso, lomuntfu utamsusa emkhatsini webantfu, ahlale yedvwa emalanga langu-7.+ 32 Umphristi utasihlolisisa ngelilanga lesi-7. Nangabe lesilondza singakandzi, futsi kute netinwele letimtfubi letivelile kuso, naso singakangeni ekhatsi enyameni, 33 lomuntfu kufanele ahhule, kodvwa angahhuli kulendzawo lenesilondza. Umphristi utawubese uyamsusa emkhatsini webantfu, ahlale yedvwa emalanga langu-7.

34 “Ngelilanga lesi-7, umphristi utawuphindze ahlolisise lendzawo lenesilondza. Nangabe lesilondza lesisenhloko nobe esilevini singakandzi futsi singakangeni ekhatsi enyameni, lomphristi utawusho kutsi lomuntfu uhlantekile. Lomuntfu kufanele awashe tingubo takhe, abe ngulohlantekile. 35 Kodvwa lesilondza nasibonakala sandzile ngemuva kwekutsi sekutsiwe uhlantekile, 36 lomphristi utamhlolisisa, futsi nangabe lesilondza sesandzile, lomphristi akudzingeki abuke kutsi tikhona yini tinwele letimtfubi kuso. Lomuntfu usuke angcolile. 37 Kodvwa nangabe ngemuva kwekuhlolwa kubonakala kutsi lesilondza asikandzi nekutsi kukhule tinwele letimnyama kuso, sisuke sesipholile. Lomuntfu usuke angakangcoli futsi umphristi utawukusho kutsi uhlantekile.+

38 “Nakwenteka umuntfu lomdvuna nobe lomsikati avela emabala esikhumbeni* sakhe futsi lamabala amhlophe, 39 umphristi kufanele awahlolisise.+ Nangabe lamabala amhloshana, kusuke kukucubuka lokungasikubi lokuvele esikhumbeni sakhe. Lomuntfu uhlantekile.

40 “Nangabe umuntfu aphelelwa tinwele enhloko aze abe nemphandla, loyo muntfu uhlantekile. 41 Tinwele takhe natiphela ngembili kuze kube nemphandla, loyo muntfu uhlantekile. 42 Kodvwa nangabe kuvela silondza lesibovu sakuba mhlophe lapho kunemphandla khona nobe ebuntini lakhe, loko kusuke kubulephelo lobuvele enhloko nobe ebunti. 43 Umphristi utamhlolisisa, futsi nangabe lesilondza lesisenhloko lapho kunemphandla khona nobe ebuntini lakhe sivuvuka, sibe bovu sakuba mhlophe siphindze sibonakale sibulephelo, 44 loyo muntfu usuke anesifo sebulephelo futsi ungcolile. Umphristi utawukusho kutsi lomuntfu ungcolile ngenca yesifo lesisenhloko yakhe. 45 Tingubo talomuntfu lonalesifo sebulephelo kufanele tidzatjulwe, netinwele takhe atiyekele futsi ambonye emadzevu akhe bese uyamemeta utsi: ‘Ngingcolile, ngingcolile!’ 46 Lomuntfu utawuba ngulongcolile yingci nje nakasenalesifo. Njengobe angcolile, kufanele ahlale yedvwana. Utawuhlala endzaweni lengaphandle kwalapho kuhlalwa khona.+

47 “Nangabe lesifo sebulephelo sendlulela emphahleni, kungaba nguleyentiwe ngeboya nobe ngelineni, 48 futsi sibonakale emitiyeni yengubo yelineni nobe yeboya, nobe esikhumbeni nobe entfweni leyentiwe ngesikhumba, 49 bese kuba nelibala lelimtfubi sakuba luhlata nobe libala lelibovana lalesifo emphahleni, esikhumbeni, emitiyeni yengubo, nakunobe yini leyentiwe ngesikhumba, loko kusuke kubulephelo futsi leyontfo kufanele iletfwe kumphristi. 50 Umphristi utasihlolisisa lesifo. Leyontfo lenalesifo kufanele ayisuse emkhatsini webantfu, ayibeke yodvwa emalanga langu-7.+ 51 Nangabe ayihlola ngelilanga lesi-7, kodvwa atfole kutsi lesifo sesigcwele kulengubo, nobe emitiyeni yayo nobe kulesikhumba (ngisho nobe lesikhumba sisetjentiselwa ini), lesifo sebulephelo sisuke sisibi, futsi leyontfo ingcolile.+ 52 Umphristi kufanele ashise lengubo nobe imitiya yengubo leyentiwe ngeboya nobe ngelineni kanye nanobe yini leyentiwe ngesikhumba lenalesifo sebulephelo, ngobe lesifo sisuke sisibi. Leyontfo kufanele ishiswe ngemlilo.

53 “Kodvwa nangabe umphristi ayihlola futsi atfola kutsi lesifo asikagcwali kulengubo nobe kulemitiya yayo nobe kuleyontfo leyentiwe ngesikhumba, 54 lomphristi utawutsi leyontfo ayiwashwe. Utawubese uyayisusa emkhatsini webantfu, ayibeke yodvwa lamanye emalanga langu-7. 55 Umphristi utawuphindze ayihlolisise leyontfo naseyiwashisisiwe. Nangabe lesifo sibonakala singakashintji, ngisho nobe singakagcwali kuleyontfo, isuke ingcolile. Kufanele ishiswe ngemlilo ngobe idleke ngekhatsi nobe ngephandle.

56 “Kodvwa nangabe umphristi asayihlolile lendzawo lebeyinalesifo futsi watfola kutsi seyincono ngemuva kwekutsi iwashisisiwe, utawubese uyayidzabula ayisuse kulengubo nobe kulesikhumba nobe kulemitiya yalengubo. 57 Kodvwa lesifo nasivela kulenye indzawo kulengubo nobe kulemitiya yayo nakunobe yini leyentiwe ngesikhumba, lesifo sisuke sesandza, futsi nobe yini lenalesifo kufanele ishiswe ngemlilo.+ 58 Nangabe lesifo sesiphelile kulengubo nobe kulemitiya yayo nakunobe yini leyentiwe ngesikhumba leseyiwashiwe, leyontfo kufanele iphindze iwashwe kwesibili bese iba ngulehlantekile.

59 “Lona ngumtsetfo lotawusetjentiswa lomayelana nesifo sebulephelo lesisengutjeni leyentiwe ngeboya nobe ngelineni, nobe emitiyeni yayo nakunobe yini leyentiwe ngesikhumba, kuze kushiwo kutsi leyontfo ihlantekile nobe ingcolile.”

14 Jehova wachubeka wakhuluma naMosi watsi: 2 “Lona ngumtsetfo lomayelana nemuntfu lonebulephelo lokufanele ulandzelwe ngelilanga latawuletfwa ngalo kumphristi kuze kushiwo kutsi uhlantekile.+ 3 Umphristi utawuya ngaphandle kwendzawo lokuhlalwa kuyo, ahlole lomuntfu. Nangabe lomuntfu asaphilile kulobulephelo, 4 umphristi utamtjela kutsi aletse tinyoni letimbili letihlantekile futsi letiphilako, aletse nesigodvo semsedari, indvwangu lebovu kanye nehisophu* kuze atewuhlanjululwa.+ 5 Lomphristi utawukhipha sicondziso sekutsi yinye yaletinyoni ibulawelwe esitjeni selubumba lesinemanti lakhiwe esiyalwini. 6 Utawutsatsa lelenye inyoni lephilako kanye nalesigodvo semsedari, nalendvwangu lebovu nehisophu, akwenye kanye kanye kulengati yalenyoni lebulawelwe kulamanti lakhiwe esiyalwini. 7 Ngemuva kwaloko utamfafata ngayo kangu-7 lomuntfu lohlanjululwa esifeni sebulephelo, asho nekutsi uhlantekile. Utawubese ukhulula lenyoni lephilako, itindizele iye esigangeni.+

8 “Lomuntfu lohlanjululwako kufanele awashe tingubo takhe, ahhule tonkhe tinwele futsi ageze ngemanti, ngemuva kwaloko utawuba ngulohlantekile. Nasacedzile, sekangeta endzaweni lokuhlalwa kuyo, kodvwa utawuhlala ngephandle kwelithende lakhe emalanga langu-7. 9 Ngelilanga lesi-7 kufanele ahhule tonkhe tinwele letisenhloko, ahhule nesilevu nemashiya akhe. Nasahhulile utawubese uwasha tingubo takhe aphindze ageze ngemanti, ngemuva kwaloko utawuba ngulohlantekile.

10 “Ngelilanga lesi-8, lomuntfu utawutsatsa timvu letimbili letindvuna letisetincane futsi letiphile kahle, atsatse nemvu lensikati+ lenemnyaka munye, nayo lephile kahle, nafulaha locolisakele logcwele esikoteleni lesingemalitha langaba ngu-7* futsi lobhicwe nemafutsa, lokutawuba ngumnikelo walokutinhlavu,+ kanye nemafutsa langetudlwana kwekota yelitha.*+ 11 Umphristi lomhlambululile utawuletsa lomuntfu kanye naleminikelo embikwaJehova emnyango welithende lekuhlangana. 12 Lomphristi utawutsatsa yinye kuletimvu letindvuna, anikele ngayo ibe ngumnikelo welicala+ kanye nalamafutsa langetudlwana kwekota yelitha. Utakujikitisa kube ngumnikelo lojikitiswako embikwaJehova.+ 13 Utawutsatsa lelenye imvu ayihlabele endzaweni lengcwele, lapho kuhlale kuhlatjelwa khona umnikelo wesono kanye nemnikelo wekushiswa,+ ngobe lomnikelo welicala uba wemphristi njengobe kunjalo nangemnikelo wesono.+ Lomnikelo ungcwele ngelizinga leliphakeme.+

14 “Umphristi utawubese utsatsa lenye yengati yalomnikelo welicala, ayibhoce encenyeni lengephansi yendlebe yangesekudla yalomuntfu lohlanjululwako, nasesitfupheni salomuntfu sangesekudla kanye nakubhozo wakhe wangesekudla. 15 Lomphristi utawutsatsa lamanye alamafutsa langetudlwana kwekota yelitha,+ awatsele esandleni sakhe sangesencele. 16 Utawubese wenya umunwe wakhe wangesekudla kulamafutsa lasesandleni sakhe sangesencele futsi antfontsise lamanye alamafutsa ngemuno tikhatsi letingu-7 embikwaJehova. 17 Lomphristi utawutsatsa lamanye alamafutsa lasele lasesandleni sakhe, awabhoce encenyeni lengephansi yendlebe yangesekudla yalomuntfu lohlanjululwako, nasesitfupheni salomuntfu sangesekudla kanye nakubhozo wakhe wangesekudla, etikwalapho kubhocwe khona ingati yemnikelo welicala. 18 Lomphristi utawubese utsatsa lamafutsa lasele lasesandleni sakhe awabhoce enhloko yalomuntfu lohlanjululwako, futsi loku utawukwenta embikwaJehova kuze lomuntfu abuyisane naNkulunkulu.+

19 “Umphristi utawunikela ngalomnikelo wesono,+ ente kutsi lomuntfu lohlanjululwako ekungcoleni kwakhe abuyisane naNkulunkulu. Ngemuva kwaloko utawubese uhlaba silwane lesitawuba ngumnikelo wekushiswa. 20 Utawunikela lomnikelo wekushiswa kanye nemnikelo walokutinhlavu+ e-al’thare kuze ente kutsi lomuntfu abuyisane naNkulunkulu,+ ngemuva kwaloko utawuba ngulohlantekile.+

21 “Kodvwa-ke nangabe lomuntfu eswele futsi angeke akhone kuletsa letintfo letidzingekako, kufanele aletse imvu lendvuna leseyincane ibe yinye, letawuba ngumnikelo welicala lotawujikitiswa, kuze atewubuyisana naNkulunkulu. Utawuletsa nafulaha locolisakele logcwele esikoteleni lesingemalitha lamabili* futsi lobhicwe nemafutsa kuze kube ngumnikelo walokutinhlavu, nemafutsa langetudlwana kwekota yelitha, 22 kanye nematuba lamabili nobe emazini emavukutfu lamabili, kuye ngekutsi yini layikhonako. Linye litawuba ngumnikelo wesono, lelelinye libe ngumnikelo wekushiswa.+ 23 Ngelilanga lesi-8,+ utawuletsa letintfo kumphristi emnyango welithende lekuhlangana embikwaJehova, kuze umphristi asho kutsi lomuntfu uhlantekile.+

24 “Lomphristi utawutsatsa lemvu lendvuna leseyincane lengumnikelo welicala+ kanye nalamafutsa langetudlwana kwekota yelitha akujikitise, kube ngumnikelo lojikitiswako embikwaJehova.+ 25 Utawubulala lemvu lengumnikelo welicala, bese utsatsa lenye yengati yalomnikelo welicala ayibhoce encenyeni lengephansi yendlebe yangesekudla yalomuntfu lohlanjululwako, nasesitfupheni sangesekudla kanye nakubhozo walomuntfu wangesekudla.+ 26 Lomphristi utawutsela lamanye alamafutsa esandleni sakhe sangesencele,+ 27 futsi antfontsise lamanye awo ngemuno wakhe wangesekudla tikhatsi letingu-7 embikwaJehova. 28 Lomphristi utawubese utsatsa lamanye alamafutsa lasesandleni sakhe, awabhoce encenyeni lengephansi yendlebe yangesekudla yalomuntfu lohlanjululwako, nasesitfupheni salomuntfu sangesekudla kanye nakubhozo wakhe wangesekudla, etikwalapho kubhocwe khona ingati yemnikelo welicala. 29 Utawutsatsa lamafutsa lasele lasesandleni sakhe awabhoce enhloko yalomuntfu lohlanjululwako, futsi loku utawukwenta embikwaJehova kuze lomuntfu abuyisane naNkulunkulu.

30 “Lomphristi utawutsatsa lamatuba nobe lamazini emavukutfu anikele ngawo, kuye ngaloko lomuntfu lakukhonako.+ 31 Linye kulawo lomuntfu lakhone kuwaletsa litawuba ngumnikelo wesono, lelelinye libe ngumnikelo wekushiswa,+ lihambe nemnikelo walokutinhlavu. Umphristi utawukwenta loku embikwaJehova kuze lomuntfu lohlanjululwako abuyisane naNkulunkulu.+

32 “Lona-ke ngumtsetfo lomayelana nemuntfu lonebulephelo kodvwa longakhoni kuletsa kumphristi loko lokudzingekako, kuze kutsiwe uhlantekile.”

33 Jehova wabese utsi kuMosi na-Aroni: 34 “Nanifika eveni laseKhenani,+ live lengitaninika lona kutsi libe lenu,+ futsi kwenteke kutsi ngivumele bulephelo buhlasele indlu letsite kulelo live,+ 35 umnikati wayo kufanele ete kumphristi, atsi: ‘Kunelibala elubondzeni lwendlu yami, futsi libonakala ngatsi bulephelo.’ 36 Lomphristi utawukhipha sicondziso sekutsi kukhishwe tonkhe tintfo letikulendlu ngaphambikwekutsi ete kutohlola lelibala lelivelile, kuze angafiki atsi tonkhe tintfo letikulendlu tingcolile. Nasetikhishiwe, umphristi utawukuta ateyihlola. 37 Utawufike ahlole lendzawo lenalelibala. Nangabe lelibala lelikulolubondza lwalendlu limtfubi sakuba luhlata nobe libovana futsi lingena ekhatsi kulolubondza, 38 lomphristi utawukuya emnyango walendlu, ayivale emalanga langu-7.+

39 “Utawuphindze abuye ngelilanga lesi-7 ateyihlola. Nangabe lelibala selandzile kulolubondza lwalendlu, 40 lomphristi utawukhipha sicondziso sekutsi lamatje lanalelibala akhishwe alahlwe ngephandle kwalapho kuhlalwa khona, endzaweni lapho kulahlwa khona tintfo letingakahlanteki. 41 Ngemuva kwaloko lubondza lwalendlu lutawuhwayisiswa ngekhatsi, bese kutsi lonkhe loludzaka loluhwayiwe lulahlwe ngephandle kwalapho kuhlalwa khona, endzaweni lapho kulahlwa khona tintfo letingakahlanteki. 42 Batawubese bafaka lamanye ematje kuletindzawo labakhiphe kuto lawo lebekanelibala. Kufanele kusetjentiswe ludzaka lolusha futsi lendlu ihucwe.

43 “Kodvwa nangabe kuphindza kuba nelibala lebulephelo kulendlu ngemuva kwekutsi kukhishwe lamatje futsi lendlu yahwaywa yaphindze yahucwa, 44 umphristi utawungena ngekhatsi kuyo ayihlole. Nangabe lelibala lebulephelo selandzile kulendlu, lendlu isuke inesifo sebulephelo lesibi,+ ngako ingcolile. 45 Utawubese ukhipha sicondziso sekutsi lendlu idzilitwe, kudzilitwe ematje ayo, tingodvo tayo, nalo lonkhe ludzaka lwayo. Konkhe loku kutawutsatfwa kuyewulahlwa ngephandle kwalapho kuhlalwa khona, endzaweni lapho kulahlwa khona tintfo letingakahlanteki.+ 46 Kodvwa nobe ngubani longena kulendlu kulamalanga lesuke ivalwe ngawo+ utawuba ngulongcolile kuze kuhlwe,+ 47 futsi nobe ngubani lolala kuyo kufanele awashe tingubo takhe, nanobe ngubani lodlela kuyo naye kufanele awashe tingubo takhe.

48 “Kodvwa-ke nangabe umphristi angena kulendlu, futsi atfole kutsi lelibala lebulephelo alikandzi ngemuva kwekutsi lendlu ihucwe kabusha, lomphristi utawubese uyasho kutsi lendlu ihlantekile, ngobe lelibala lebulephelo liphelile. 49 Kuze ahlambulule lendlu kulokungcola* kwayo, utawutsatsa tinyoni letimbili, sigodvo semsedari, indvwangu lebovu, kanye nehisophu.+ 50 Kufanele atsatse yinye yaletinyoni ayibulalele esitjeni selubumba lesinemanti lakhiwe esiyalwini. 51 Utawubese utsatsa lesigodvo semsedari, ihisophu, lendvwangu lebovu kanye nalenyoni lephilako, akwenye kulengati yalenyoni lebulewe kanye nakulamanti lakhiwe esiyalwini, ngemuva kwaloko afafate ngakulendlu tikhatsi letingu-7.+ 52 Utawusebentisa lengati yalenyoni, lamanti lakhiwe esiyalwini, lenyoni lephilako, sigodvo semsedari, ihisophu kanye nalendvwangu lebovu kuze ahlambulule lendlu kulokungcola.* 53 Nasacedzile utawukhulula lenyoni lephilako, indize iye esigangeni, ngephandle kwalendzawo lokuhlalwa kuyo. Ngaleyo ndlela utawususa kungcola kwalendlu,* ibe ngulehlantekile.

54 “Lona-ke ngumtsetfo lomayelana nanobe ngubuphi bulephelo, silondza lesisenhloko nobe esilevini,+ 55 bulephelo lobusengutjeni+ nobe endlini,+ 56 nalomayelana nekuvuvuka, tilondza, kanye nemabala,+ 57 kuze kutfolakale kutsi kunini lapho kungase kutsiwe intfo ingcolile nobe ihlantekile.+ Ngulona-ke umtsetfo lomayelana nebulephelo.”+

15 Jehova wachubeka akhuluma naMosi na-Aroni watsi: 2 “Khulumani nema-Israyeli, nitsi: ‘Nangabe kunalokutsite lokuphuma esitfweni* semuntfu sangasense, loko lokuphumako kutawumenta abe ngulongcolile.+ 3 Kutamngcolisa, ngisho nobe kuchubeka kuphuma esitfweni sakhe nobe sekusivalile, utawuchubeka angumuntfu longcolile.

4 “‘Nome ngumuphi umbhedze loyo muntfu lalala kuwo utawuba ngulongcolile, nanome yini lahlala kuyo nayo itawuba ngulengcolile. 5 Umuntfu lotsintsa lombhedze waloyo muntfu kufanele awashe tingubo takhe aphindze ageze ngemanti, futsi utawuba ngulongcolile kuze kuhlwe.+ 6 Nobe ngubani lohlala entfweni lebekuhleti kuyo loyo muntfu kufanele awashe tingubo takhe, ageze ngemanti, futsi utawuba ngulongcolile kuze kuhlwe. 7 Nome ngubani lotsintsa umtimba waloyo muntfu kufanele awashe tingubo takhe, ageze ngemanti, futsi utawuba ngulongcolile kuze kuhlwe. 8 Nangabe lomuntfu lonalokutsite lokuphuma esitfweni sakhe sangasense akhafulela umuntfu lohlantekile, loyo lokhafulelwe kufanele awashe tingubo takhe, ageze ngemanti, futsi utawuba ngulongcolile kuze kuhlwe. 9 Nangabe lomuntfu lonalokutsite lokuphuma esitfweni sakhe sangasense agibele silwane, lesihlalo lahleti kuso sitawuba ngulesingcolile. 10 Nobe ngubani lotsintsa tintfo loyo muntfu labehleti kuto utawuba ngulongcolile kuze kuhlwe, nanobe ngubani lotsatsa leto tintfo kufanele awashe tingubo takhe, ageze ngemanti, futsi utawuba ngulongcolile kuze kuhlwe. 11 Nangabe lomuntfu lonalokutsite lokuphuma esitfweni sakhe sangasense+ angakatigezi tandla bese utsintsa lomunye umuntfu, loyo muntfu lamtsintsile kufanele awashe tingubo takhe aphindze ageze ngemanti, futsi utawuba ngulongcolile kuze kuhlwe. 12 Nakwenteka lomuntfu lonalokutsite lokuphuma esitfweni sakhe sangasense atsintsa sitja selubumba, leso sitja kufanele siphihlitwe, futsi nobe ngusiphi sitja selugodvo lasitsintsile kufanele siwashwe ngemanti.+

13 “‘Nangabe loku lebekuphuma esitfweni saloyo muntfu sekungasaphumi, naye asaphilile, utawulindza emalanga langu-7, ngemuva kwaloko awashe tingubo takhe, futsi ageze ngemanti lakhiwe esiyalwini, bese uba ngulohlantekile.+ 14 Ngelilanga lesi-8, kufanele atsatse ematuba lamabili nobe emazini lamabili emavukutfu+ aye nawo embikwaJehova emnyango welithende lekuhlangana, awanike umphristi. 15 Umphristi utawunikela ngawo, linye libe ngumnikelo wesono, lelelinye libe ngumnikelo wekushiswa, futsi loku utawukwenta embikwaJehova kuze lomuntfu abuyisane naNkulunkulu ngenca yaloko lebekuphuma esitfweni sakhe sangasense.

16 “‘Nangabe kuphume sidvodza kumuntfu lomdvuna, kufanele ageze wonkhe umtimba wakhe ngemanti, futsi utawuba ngulongcolile kuze kuhlwe.+ 17 Nobe nguyiphi ingubo nobe sikhumba lesinalesidvodza, kufanele akuwashe ngemanti, futsi kutawuba ngulokungcolile kuze kuhlwe.

18 “‘Nangabe umuntfu lomdvuna aya ecansini nemuntfu lomsikati bese kuphuma sidvodza, kufanele bageze ngemanti futsi batawuba ngulabangcolile kuze kuhlwe.+

19 “‘Nangabe umuntfu lomsikati opha, utawuchubeka angcolile emalanga langu-7 ngenca yekuya kwakhe esikhatsini.+ Nobe ngubani lomtsintsako utawuba ngulongcolile kuze kuhlwe.+ 20 Nobe yini lalala kuyo nakasengcolile ngenca yekuya esikhatsini itawuba ngulengcolile, futsi nobe yini lahlala kuyo nayo itawuba ngulengcolile.+ 21 Nobe ngubani lotsintsa umbhedze wakhe kufanele awashe tingubo takhe aphindze ageze ngemanti, futsi utawuba ngulongcolile kuze kuhlwe. 22 Nome ngubani lotsintsa intfo lomuntfu labehleti kuyo kufanele awashe tingubo takhe aphindze ageze ngemanti, futsi utawuba ngulongcolile kuze kuhlwe. 23 Nangabe lomuntfu lowophako abehleti embhedzeni nobe kulenye intfo, umuntfu lotawutsintsa leyontfo utawuba ngulongcolile kuze kuhlwe.+ 24 Umuntfu lomdvuna nakaya naye ecansini bese uyangcola ngenca yengati yalona losesikhatsini,+ utawuba ngulongcolile emalanga langu-7, futsi nobe ngumuphi umbhedze lalala kuwo nawo utawuba ngulongcolile.

25 “‘Nakwenteka umuntfu lomsikati opha emalanga lamanyenti+ kube kungasiwo emalanga akhe ekuya esikhatsini,+ nobe nangabe opha sikhatsi lesidze kunalesivamile nakaye esikhatsini, utawuba ngulongcolile onkhe lawo malanga njengalapho asesikhatsini. 26 Nome ngumuphi umbhedze latawulala kuwo nakopha utawuba ngulongcolile njengembhedze lalala kuwo+ nakangcolile ngenca yekuya esikhatsini, futsi nome yini lahlala kuyo itawuba ngulengcolile njengalapho asesikhatsini. 27 Nome ngubani lotsintsa letintfo utawuba ngulongcolile. Kufanele awashe tingubo takhe aphindze ageze ngemanti, futsi utawuba ngulongcolile kuze kuhlwe.+

28 “‘Kodvwa nasekuphelile lokopha, lomuntfu labekopha kufanele alindze kuze kwendlule emalanga langu-7, ngemuva kwaloko utawuba ngulohlantekile.+ 29 Ngelilanga lesi-8, kufanele atsatse ematuba lamabili nobe emazini lamabili emavukutfu+ awaletse kumphristi emnyango welithende lekuhlangana.+ 30 Umphristi utawutsatsa lelelinye anikele ngalo libe ngumnikelo wesono, lelelinye libe ngumnikelo wekushiswa. Loku utawukwenta embikwaJehova kuze ente lomuntfu abuyisane naNkulunkulu ngenca yalokopha lobekumenta angcole.+

31 “‘Kufanele nisite ema-Israyeli kutsi ahlale ahlantekile, kuze angafeli ekungcoleni kwawo ngenca yekungcolisa lithende lami lekukhontela lelisemkhatsini wawo.+

32 “‘Lona-ke ngumtsetfo lomayelana nemuntfu lomdvuna lonalokutsite lokuphuma esitfweni sakhe sangasense, kanye nemuntfu lomdvuna longcolile ngenca yekutsi kuphume sidvodza,+ 33 nemuntfu lomsikati longcolile ngenca yekuya esikhatsini,+ nanobe ngumuphi umuntfu lonalokutsite lokuphuma esitfweni sakhe sangasense+ kanye nemuntfu lomdvuna loya ecansini nemuntfu lomsikati longakahlanteki.’”

16 Jehova wakhuluma naMosi ngemuva kwekufa kwemadvodzana a-Aroni lamabili. Lamadvodzana ngulawo lafa ngesikhatsi eta embikwaJehova.+ 2 Jehova watsi kuMosi: “Tjela Aroni umnakenu kutsi akukafaneli angene nobe kunini ngale kwendvwangu,+ eNgcwelengcwele,+ nasembikwesimbonyo seLibhokisi, kuze angafi+ ngobe mine ngitawubonakala efini+ etikwalesimbonyo.+

3 “Naku lokufanele Aroni ete nako naketa endzaweni lengcwele: inkunzana letawuba ngumnikelo wesono+ kanye nemvu lendvuna letawuba ngumnikelo wekushiswa.+ 4 Kufanele agcoke ingubo lengcwele yelineni,+ afake nesikhindi*+ selineni kuze afihle bungcunu* bakhe. Utawubopha neseshi yelineni elukhalo,+ afake nemshuculo welineni enhloko.+ Leti tembatfo letingcwele,+ ngako kufanele ageze ngemanti+ bese uyatigcoka.

5 “Kuma-Israyeli, kufanele atsatse+ timbuti letindvuna letimbili letisetincane letitawuba ngumnikelo wesono kanye nemvu lendvuna letawuba ngumnikelo wekushiswa.

6 “Aroni utawubese uletsa lenkunzi letawuba ngumnikelo wakhe wesono, futsi utawukwenta kutsi yena+ nendlu yakhe babuyisane naNkulunkulu.

7 “Ngemuva kwaloko utawutsatsa letimbuti letimbili atimise embikwaJehova emnyango welithende lekuhlangana. 8 Aroni utawehlukanisa letimbuti letimbili ngenkatho, yinye ibe yaJehova, lelenye ibe yekutfwala tono.* 9 Aroni utawuletsa lembuti leyehlukaniswe ngenkatho+ kutsi ibe yaJehova, ente ngayo umnikelo wesono. 10 Kodvwa lembuti leyehlukaniswe ngenkatho kutsi itfwale tono* kufanele iletfwe embikwaJehova iphila kuze kuyo kwentiwe kutsi bantfu babuyisane naNkulunkulu, bese iyahanjiswa iya ehlane.+

11 “Aroni utawuletsa lenkunzi lengumnikelo wakhe wesono, futsi ente kutsi yena nendlu yakhe babuyisane naNkulunkulu. Ngemuva kwaloko utayihlaba, ibe ngumnikelo wakhe wesono.+

12 “Utawubese utsatsa sitja sekufaka emalahle+ lesigcwele emalahle lavutsako latsetfwe e-al’thare+ lelisembikwaJehova, atsatse nemphepho lengagcwala tandla totimbili leneliphunga lelimnandzi futsi lecolisakele,+ angene nako ngale kwendvwangu.+ 13 Lemphepho utayifaka emlilweni embikwaJehova,+ futsi intfutfu lesuka kuyo itawugcwala ngetulu kwesimbonyo saleLibhokisi+ leBufakazi,+ kuze angafi.

14 “Utawutsatsa lenye yalengati yalenkunzi+ ayintfontsisele ngemunwe wakhe embikwalesimbonyo ngasemphumalanga, lenye ayintfontsisele ngemunwe wakhe embikwalesimbonyo tikhatsi letingu-7.+

15 “Ngemuva kwaloko utawuhlaba lembuti lengumnikelo wesono salabantfu,+ bese ungena nengati yayo+ ngale kwalendvwangu,+ ayintfontsisele ngakulesimbonyo nasembikwaso, njengobe entile ngalengati yenkunzi.

16 “Kufanele ahlambulule lendzawo lengcwele ngenca yekungcola lokwentiwa ngema-Israyeli nangenca yetiphambeko netono tawo.+ Nguloko lokufanele akwentele lelithende lekuhlangana lelisemkhatsini wema-Israyeli lenta tintfo letingcolile.

17 “Kute lomunye umuntfu lokufanele abe kulelithende lekuhlangana kusukela ngalesikhatsi Aroni angena kulo kutewukwenta iminikelo yekubuyisana naNkulunkulu endzaweni lengcwele, kuze kube ngulapho aphuma. Aroni utawukwenta kutsi yena nendlu yakhe,+ kanye nawo onkhe ema-Israyeli babuyisane naNkulunkulu.+

18 “Utawubese uyaphuma uya e-al’thare+ lelisembikwaJehova futsi alihlambulule. Utawutsatsa lenye yengati yalenkunzi nalenye yengati yalembuti ayibhoce kuto tonkhe timphondvo taleli-al’thare. 19 Lenye utayintfontsisela kuleli-al’thare ngemunwe wakhe tikhatsi letingu-7 kuze alihlambulule, ente nekutsi libe ngcwele ngenca yetintfo letingcolile letentiwa ngema-Israyeli.

20 “Aroni nasekacedzile kuhlambulula+ indzawo lengcwele nelithende lekuhlangana kanye neli-al’thare,+ utawubese uletsa lembuti lephilako.+ 21 Utawubeka tandla takhe totimbili enhloko yalembuti, avume onkhe emaphutsa lentiwe ngema-Israyeli, kanye netiphambeko netono tawo, ngaleyo ndlela atibeke enhloko yayo.+ Ngemuva kwaloko utayikhulula kutsi iye ehlane, ihanjiswe yindvodza lekhetfwe kutsi yente lowo msebenti.* 22 Lembuti itawetfwala tonkhe tiphambeko+ tema-Israyeli,+ futsi utayikhulula iye ehlane.+

23 “Aroni utawubese ungena ethendeni lekuhlangana akhumule tingubo telineni labetigcoke nakangena eNgcwelengcwele, futsi utatishiya khona lapho. 24 Kufanele ageze ngemanti+ endzaweni lengcwele bese ugcoka letinye tingubo takhe.+ Ngemuva kwaloko utawukwenta umnikelo wakhe wekushiswa+ kanye newalabantfu,+ ente kutsi yena nabo bonkhe labantfu babuyisane naNkulunkulu.+ 25 Utawushisa emanoni emnikelo wesono kuze intfutfu yawo ishunce isuka e-al’thare.

26 “Lendvodza lehambise lembuti letfwele tono*+ kufanele iwashe tingubo tayo futsi igeze ngemanti, ngemuva kwaloko seyingangena kulendzawo lokuhlalwa kuyo.

27 “Lenkunzi kanye nalembuti lebekungumnikelo wesono, lokutsetfwe ingati yako kwangenwa nayo endzaweni lengcwele nakwentiwa iminikelo yekubuyisana naNkulunkulu, kutawukhishelwa ngaphandle kwalendzawo lokuhlalwa kuyo. Sikhumba, inyama kanye nebulongo bako kutawushiswa ngemlilo.+ 28 Loyo lokushisako kufanele awashe tingubo takhe futsi ageze ngemanti, ngemuva kwaloko sekangangena endzaweni lokuhlalwa kuyo.

29 “Nangu umtsetfo lotawuhlala njalo lokufanele niwulandzele: Ngelilanga lesi-10 enyangeni yesi-7, kufanele nivete kutsi niva buhlungu* ngenca yetono tenu futsi kufanele ningasebenti sanhlobo ngalelolanga,+ kungaba ngum-Israyeli nobe umuntfu losihambi lohlala emkhatsini wenu. 30 Ngalelolanga, nitawentiwa kutsi nibuyisane naNkulunkulu,+ kuze kutsiwe nihlantekile. Nitawuba bantfu labahlantekile embikwaJehova kuto tonkhe tono tenu.+ 31 Leli lisabatha, ngako kufanele kungasetjentwa sanhlobo ngalelolanga, futsi kufanele nivete kutsi niva buhlungu ngenca yetono tenu.+ Lona ngumtsetfo lohlala njalo.

32 “Umphristi lotawugcotjwa+ futsi abekwe* kutsi abe ngumphristi+ esikhundleni sababe wakhe+ utawunenta kutsi nibuyisane naNkulunkulu. Utawugcoka letingubo letingcwele+ telineni.+ 33 Utawuhlambulula iNgcwelengcwele,+ lithende lekuhlangana+ kanye neli-al’thare,+ aphindze ente kutsi baphristi kanye nawo onkhe ema-Israyeli babuyisane naNkulunkulu.+ 34 Loku kutawuba ngumtsetfo lohlala njalo kini,+ futsi kutakwentiwa kanye ngemnyaka kuze ema-Israyeli abuyisane naNkulunkulu ngenca yato tonkhe tono tawo.”+

Ngako Aroni wenta njengobe nje Jehova atjele Mosi.

17 Jehova waphindze wakhuluma naMosi watsi: 2 “Khuluma na-Aroni nemadvodzana akhe kanye nawo onkhe ema-Israyeli, utsi: ‘Naku Jehova lakushito:

3 “‘“Nangabe um-Israyeli ahlabela inkunzi nobe imvu lendvuna leseyincane nobe imbuti endzaweni lokuhlalwa kuyo, nobe ayihlabele ngephandle kwaleyo ndzawo, 4 kunekutsi ayiletse emnyango welithende lekuhlangana, kuze ibe ngumnikelo loya kuJehova embikwelithende lekukhontela laJehova, loyo muntfu utawuba nelicala lengati. Ngako kufanele abulawe, ngobe ucitse ingati. 5 Loku kwentelwa kutsi lemihlatjelo ema-Israyeli lasayentela esigangeni ayiletse kuJehova, emnyango welithende lekuhlangana futsi ayinike umphristi. Lemihlatjelo ema-Israyeli kufanele ayente ibe yimihlatjelo yekuthula leya kuJehova.+ 6 Umphristi utawufafata lengati e-al’thare laJehova, emnyango welithende lekuhlangana bese ushisa emanoni alomhlatjelo kuze abe liphunga lelimnandzi* kuJehova.+ 7 Ngako lemihlatjelo kufanele bangaphindzi bayentele emadimoni,*+ lawo labagwadla nawo ngekutsi bawakhonte.+ Lona kutawuba ngumtsetfo lohlala njalo lokufanele niwulandzele kuto tonkhe titukulwane tenu.”’

8 “Naku lokufanele ubatjele kona: ‘Nobe ngumuphi um-Israyeli nobe umuntfu losihambi lohlala emkhatsini wenu lowenta umnikelo wekushiswa nobe umhlatjelo, 9 angawuletsi emnyango welithende lekuhlangana kuze awunikele kuJehova, kufanele abulawe.+

10 “‘Nangabe um-Israyeli nobe umuntfu wekuhamba lohlala emkhatsini wenu adla ingati,+ loyo muntfu ngitawumelana naye futsi ngitambulala ngimsuse kubantfu bakubo. 11 Ngobe kuphila* kusengatini,+ futsi mine ngininike yona kuze isetjentiswe e-al’thare,+ kwentiwe kutsi nibuyisane nami, ngobe ingati ngiyo leyenta kutsi nibuyisane nami+ ngenca yekuphila* lokukuyo. 12 Kungako ngitsite kuma-Israyeli: “Kute emkhatsini wenu lokufanele adle ingati, nemuntfu losihambi lohlala kanye nani+ akukafaneli ayidle.”+

13 “‘Nangabe um-Israyeli nobe umuntfu losihambi lohlala emkhatsini wenu atingela futsi abambe silwane sesiganga lesidliwako nobe inyoni ledliwako, kufanele aphomphise ingati yako+ bese uyimbonya ngemhlabatsi. 14 Ngobe ingati yayo yonkhe intfo lephilako ikuphila* kwayo, ngenca yekutsi kuphila* kusengatini. Kungako ngitsite kuma-Israyeli: “Ningayidli ingati yanobe ngusiphi silwane ngobe kuphila* kwesilwane kusengatini yaso. Nobe ngubani lodla ingati utawubulawa.”+ 15 Nakwenteka um-Israyeli nobe umuntfu losihambi adla silwane lasitfole sifile nobe lesibulewe silwane sesiganga,+ loyo muntfu kufanele awashe tingubo takhe aphindze ageze ngemanti futsi utawuba ngulongcolile kuze kuhlwe.+ Ngemuva kwaloko utawubese uba ngulohlantekile. 16 Kodvwa nangabe angatiwashi tingubo takhe futsi angagezi, utawuphendvula ngenca yalesono sakhe.’”+

18 Jehova wachubeka akhuluma naMosi watsi: 2 “Khuluma nema-Israyeli, utsi kuwo: ‘NginguJehova Nkulunkulu wenu.+ 3 Ningatiphatsi ngendlela labatiphatsa ngayo eveni laseGibhithe, live lebenihlala kulo, futsi ningatenti tintfo labatentako eveni laseKhenani, lapho nginiyisa khona.+ Kufanele ningayilandzeli nemikhuba yabo. 4 Nibolalela imitsetfo yami, nigcine nemiyalo yami futsi niyilandzele.+ NginguJehova Nkulunkulu wenu. 5 Kufanele nigcine imiyalo kanye nemitsetfo yami. Wonkhe umuntfu loyigcinako utawuphila ngenca yayo.+ NginguJehova.

6 “‘Kute umuntfu emkhatsini wenu lokufanele aye ecansini* nanome ngusiphi sihlobo sakhe sengati.+ NginguJehova. 7 Akukafaneli uye ecansini nababe wakho, futsi ungayi ecansini namake wakho, ngobe uyakutala, ngako akukafaneli uye naye ecansini.

8 “‘Akukafaneli uye ecansini nemfati wababe wakho,+ ngobe nawenta njalo utawube uhlazisa* babe wakho.

9 “‘Ungayi ecansini nadzadzewenu, kungaba kutsi uyindvodzakati yababe wakho nobe uyindvodzakati yamake wakho, ngisho nobe nitalwa endlini yinye nobe etindlini letehlukene.+

10 “‘Akukafaneli uye ecansini nemtukulu wakho, kungaba kutsi uyindvodzakati yendvodzana yakho nobe yendvodzakati yakho, ngobe uyingati yakho futsi nawenta njalo utawube utihlazisa wena.

11 “‘Akukafaneli uye ecansini nendvodzakati yemfati wababe wakho, ngobe ingudzadzewenu lotalwa ngubabe wakho.

12 “‘Ungayi ecansini na-anti wakho, ngobe usihlobo sengati sababe wakho.+

13 “‘Ungayi ecansini nasisi wamake wakho, ngobe usihlobo sengati samake wakho.

14 “‘Akukafaneli umhlazise* bhuti wababe wakho ngekutsi uye ecansini nemfati wakhe, ngobe lomfati usihlobo sakho.+

15 “‘Akukafaneli uye ecansini namalukatane wakho,+ ngobe ungumfati wendvodzana yakho, ngako-ke akukafaneli uye naye ecansini.

16 “‘Akukafaneli uye ecansini nemfati wemnakenu,+ ngobe nawenta njalo utawube uhlazisa* umnakenu.

17 “‘Ungayi ecansini nemfati kanye nendvodzakati yakhe.+ Ungayitsatsi nendvodzakati yendvodzana yakhe nobe yendvodzakati yakhe kuze uye nayo ecansini. Laba batihlobo takhe tengati, ngako loku kuyenyanyeka.*

18 “‘Ungamtsatsi dzadzewabomkakho kutsi abe nguzakwabo+ futsi uye naye ecansini, abe asaphila lomfati wakho.

19 “‘Akukafaneli uye ecansini nemuntfu lomsikati nakasengcolile ngenca yekuya esikhatsini.+

20 “‘Ungayi ecansini nemfati wemuntfu wakini,* ngobe nawenta njalo utawutingcolisa.+

21 “‘Ungavumeli kutsi bantfwana bakho banikelwe* kuMoleki.+ Ungalihlambalati libito laNkulunkulu wakho ngekwenta loku.+ NginguJehova.

22 “‘Ungayi ecansini nalenye indvodza,+ ngobe loku kuyenyanyeka.

23 “‘Umuntfu lomdvuna akukafaneli alale nesilwane futsi atingcolise ngaloko. Nemuntfu lomsikati akukafaneli aye esilwaneni kuze alale naso.+ Loku kuphambene nemvelo.

24 “‘Ningatingcolisi ngekwenta letintfo, ngobe letive lengiticosha embikwenu titingcolisile ngekwenta tonkhe letintfo leti.+ 25 Ngaleso sizatfu, lelive lingcolile futsi ngitalijezisa ngenca yesono salo, nebantfu labahlala kulo batawulahlelwa ngephandle.+ 26 Kodvwa nine kufanele nigcine imiyalo nemitsetfo yami,+ futsi ningatenti letintfo letenyanyekako, futsi loku kuyasebenta kum-Israyeli ngisho nakumuntfu wekuhamba lohlala emkhatsini wenu.+ 27 Ngobe tonkhe letintfo letenyanyekako betentiwa bantfu lebebahlala kulelive ngaphambi kwenu,+ futsi nyalo lelive selingcolile. 28 Ngenca yekutsi anikalingcolisi lelive, ngeke nilahlelwe ngephandle njengaletive lebetihlala kulo ngaphambi kwenu. 29 Nangabe kukhona bantfu labenta letintfo letenyanyekako, bonkhe kufanele babulawe. 30 Kufanele niyigcine lemitsetfo lengininike yona futsi ningenti nobe nguyiphi kuletintfo letenyanyekako lebetentiwa ngaphambi kwenu,+ kuze ningatingcolisi ngenca yato. NginguJehova Nkulunkulu wenu.’”

19 Jehova wachubeka akhuluma naMosi watsi: 2 “Khuluma nawo onkhe ema-Israyeli utsi: ‘Kufanele nibe ngcwele, ngobe mine Jehova Nkulunkulu wenu ngingcwele.+

3 “‘Ngamunye wenu kufanele ahloniphe* babe wakhe namake wakhe,+ agcine nelisabatha.+ NginguJehova Nkulunkulu wenu. 4 Ningabakhonti bonkulunkulu labangenamsebenti+ nobe nitentele bonkulunkulu labentiwe ngensimbi.+ NginguJehova Nkulunkulu wenu.

5 “‘Nanenta umhlatjelo wekuthula kuJehova,+ nibowunikela ngendlela letakwenta kutsi nemukeleke kuye.+ 6 Lomhlatjelo kufanele udliwe ngelilanga lonikelwa ngalo nobe ngelilanga lelilandzelako, kodvwa loko lokutawusala kuze kube lilanga lesitsatfu kufanele kushiswe ngemlilo.+ 7 Nangabe lomhlatjelo udliwa ngelilanga lesitsatfu, uyintfo leyenyanyekako futsi ngeke wemukeleke. 8 Umuntfu lowudlako utawulandzisa ngesono sakhe, ngobe usuke angcolise intfo yaJehova lengcwele. Loyo muntfu kufanele abulawe.

9 “‘Nanivuna emasimini enu, ningabovuna nize nifike emaphetselweni awo. Ningabokubutsa naloko lokusele nanivuna.+ 10 Ningawabutsi nemagilebisi lasele emasimini enu nobe lawo lawele phansi. Kufanele niwashiyele labeswele*+ kanye netihambi. NginguJehova Nkulunkulu wenu.

11 “‘Kufanele ningebi,+ futsi ningakhohlisi,+ kodvwa netsembeke kulomunye nalomunye. 12 Ningafungi emanga ngelibito lami,+ ngobe nanenta njalo nitawungcolisa libito laNkulunkulu wenu. NginguJehova. 13 Ungamebeli umuntfu wakini,+ nobe umgebenge.+ Liholo lesisebenti kufanele ungahlali nalo busuku bonkhe kuze kube lilanga lelilandzelako.+

14 “‘Ungamcalekisi umuntfu longeva etindlebeni futsi ungamtsiyi umuntfu longaboni emehlweni.+ Kufanele wesabe Nkulunkulu wakho.+ NginguJehova.

15 “‘Ubokwehlulela ngendlela lelungile. Ungakhombisi kukhetsa ngekutsi uphatse kabi umuntfu loweswele kodvwa umuntfu lonjingile yena ube umkhombisa umusa.+ Ubomehlulela ngendlela lelungile umuntfu wakini.

16 “‘Ungabohamba unyundzela umuntfu wakini+ futsi ungabofuna kumbulala.*+ NginguJehova.

17 “‘Ungamtondzi umnakenu enhlitiyweni yakho.+ Kufanele wente konkhe lokusemandleni akho kutsi umekhute umuntfu wakini+ kuze ungahlanganyeli naye esonweni sakhe.

18 “‘Ungatiphindziseleli+ nobe ubambele umuntfu wakini emagcubu. Kufanele umtsandze umuntfu wakini njengobe utitsandza wena.+ NginguJehova.

19 “‘Kufanele ulandzele nayi imitsetfo lengikunika yona: Ungabotikhwelanisa tilwane takho lotifuyile tetinhlobo letehlukene. Ungahlanyeli tinhlobo letehlukene tetinhlanyelo ensimini yakho,+ futsi ungatembatsi netingubo letentiwe ngekuhlanganisa imitiya letinhlobo letimbili letehlukene.+

20 “‘Nakwenteka indvodza iya ecansini nemuntfu lomsikati loyincekukati, losatawuba ngumfati walenye indvodza, kodvwa inkhosi yakhe layisebentelako ingakamhlengi futsi ingakamkhululi, kufanele labo bantfu bajeziswe. Kepha-ke akukafaneli babulawe, ngobe lomuntfu lomsikati bekasengakakhululwa. 21 Lendvodza kufanele iletse umnikelo welicala kuJehova emnyango welithende lekuhlangana. Lomnikelo kufanele ube yimvu lendvuna.+ 22 Ngalemvu lengumnikelo welicala lenikelwe embikwaJehova, umphristi utawukwenta kutsi lomuntfu abuyisane naNkulunkulu ngenca yesono lasentile, futsi utawucolelwa sona.

23 “‘Naningena eveni lengitaninika lona, bese nihlanyela tihlahla tetitselo, titselo tato titawuba nguletingcolile kini futsi akukafaneli nitidle.* Kutawuphela iminyaka lemitsatfu solo ningakavumeleki kutidla.* Ngako ningabotidla. 24 Kodvwa ngemnyaka wesine, tonkhe titselo tato titawuba ngcwele futsi leso kutawuba sikhatsi sekujabula lokukhulu embikwaJehova.+ 25 Ngako-ke ngemnyaka wesihlanu, ningatidla titselo tato, nesivuno senu sitawuba sikhulu. NginguJehova Nkulunkulu wenu.

26 “‘Ningadli lutfo lolunengati.+

“‘Ningaphenguli nobe nente imilingo.+

27 “‘Ningatihhuli tinhloko* kanye netilevu* tenu emaceleni.+

28 “‘Ningatisiki imitimba ngenca yemuntfu* lofile,+ futsi ningayidvwebi imitimba yenu. NginguJehova.

29 “‘Ungayihlazisi indvodzakati yakho ngekuyenta ingwadla,+ kuze lelive lingatewuba nebugwadla bese ligcwala kutiphatsa lokubi.+

30 “‘Kufanele nigcine lisabatha,+ nikhombise nekutsi niyayihlonipha* indzawo yami lengcwele. NginguJehova.

31 “‘Ningayi kubantfu labatangoma+ futsi ningayi kuyobuta kulabaphengulako,+ kuze ningatewuba ngulabangcolile ngenca yabo. NginguJehova Nkulunkulu wenu.

32 “‘Uboyihlonipha imphunga,+ umhloniphe nemuntfu lomdzala,+ futsi umesabe Nkulunkulu wakho.+ NginguJehova.

33 “‘Kufanele ningamphatsi kabi umuntfu losihambi lohlala kanye nani eveni lenu.+ 34 Umuntfu losihambi lohlala kanye nani kufanele nimtsatse njengemuntfu wakini+ futsi kufanele nimtsandze ngendlela nani lenititsandza ngayo, ngobe nani nake naba tihambi eveni laseGibhithe.+ NginguJehova Nkulunkulu wenu.

35 “‘Nanikala budze, sisindvo nobe tintfo letingemanti, kufanele netsembeke.+ 36 Kufanele nisebentise tikali netisindvo letifanele, kanye netikali letingito tekukala tintfo letomile* netintfo letingemanti.*+ NginguJehova Nkulunkulu wenu, lowanikhipha eveni laseGibhithe. 37 Ngako-ke kufanele nigcine yonkhe imiyalo yami kanye nayo yonkhe imitsetfo lengininike yona, futsi niyilandzele.+ NginguJehova.’”

20 Jehova wachubeka akhuluma naMosi watsi: 2 “Ubokhuluma nema-Israyeli utsi kuwo: ‘Nobe ngumuphi um-Israyeli kanye nemuntfu losihambi lohlala ka-Israyeli lonikela ngemntfwana wakhe kuMoleki, nakanjani kufanele abulawe.+ Bantfu kufanele bamgcobe ngematje aze afe. 3 Loyo muntfu ngitawumelana naye, ngimncume* nakubantfu bakubo, ngobe unikele ngebantfwana bakhe kuMoleki, wangcolisa indzawo yami lengcwele+ futsi wahlambalata libito lami lelingcwele. 4 Nangabe bantfu bakuleyo ndzawo benta shengatsi abakuboni loko lomuntfu lakwentile futsi bangambulali, njengobe anikele ngebantfwana bakhe kuMoleki,+ 5 nakanjani mine ngitawumelana naloyo muntfu nemndeni wakhe.+ Ngitamncuma* kubantfu bakubo, yena kanye nabo bonkhe labahlanganyela naye ekugwadleni ngekutsi bakhonte Moleki.

6 “‘Nangabe umuntfu angetsembeki* kimi ngekutsi aye kubantfu labatangoma+ nakulababhulako,+ loyo muntfu ngitawumelana naye, ngimncume* nakubantfu bakubo.+

7 “‘Kufanele nitingcwelise kuze nibe ngcwele,+ ngobe nginguJehova Nkulunkulu wenu. 8 Nibogcina nemitsetfo yami niphindze niyilandzele.+ NginguJehova, loyo loningcwelisako.+

9 “‘Nakukhona umuntfu localekisa babe wakhe nobe make wakhe, kufanele nakanjani abulawe.+ Njengobe acalekise babe wakhe nobe make wakhe, ingati yakhe itawuba setikwakhe.

10 “‘Naku lokufanele kwentiwe ngendvodza lephinga nemfati walomunye umuntfu: Indvodza lephinge nemfati wemuntfu wakubo, kufanele nakanjani ibulawe, yona nalomfati lephinge naye.+ 11 Indvodza leya ecansini nemfati wababe wayo, isuke ihlazise* babe wayo.+ Ngako lendvodza nalomfati kufanele babulawe, nengati yabo itawuba setikwabo. 12 Nangabe indvodza iya ecansini namalukatane wayo, bobabili kufanele nakanjani babulawe. Basuke bente intfo lephambene nemvelo, futsi ingati yabo itawuba setikwabo.+

13 “‘Nangabe indvodza iya ecansini nalenye indvodza, lamadvodza omabili asuke ente intfo leyenyanyekako.+ Ngako kufanele abulawe, nengati yawo itawuba setikwawo.

14 “‘Nangabe indvodza itsatsa umfati iphindze iye ecansini namaketala wayo, loko kusuke kuyintfo leyenyanyekako.*+ Bonkhe kufanele bashiswe ngemlilo+ kuze kutiphatsa lokubi kungachubeki kukhona emkhatsini wenu.

15 “‘Nakwenteka indvodza ilala nesilwane, nakanjani kufanele ibulawe. Nalesilwane naso kufanele sibulawe.+ 16 Nangabe umuntfu lomsikati aya esilwaneni kuze alale naso,+ kufanele nimbulale, yena kanye nalesilwane. Ngako lendvodza nalomuntfu lomsikati kufanele babulawe, nengati yabo itawuba setikwabo.

17 “‘Nakwenteka indvodza iya ecansini nadzadzewabo, kungaba yindvodzakati yababe wayo nobe indvodzakati yamake wayo, futsi ibone bungcunu balodzadzewabo, naye abone bungcunu bayo, loko kulihlazo.+ Bobabili kufanele babulawe embikwebantfu bakubo. Lendvodza ihlazise* dzadzewabo, ngako kufanele iphendvule ngenca yesono sayo.

18 “‘Nangabe indvodza iya ecansini nemuntfu lomsikati losesikhatsini, bobabili basuke bakhombise kungayihloniphi ingati.+ Ngako kufanele babulawe.

19 “‘Ungabokuya ecansini nasisi wamake wakho nobe na-anti wakho, ngobe nawenta njalo utawube uhlazisa sihlobo sakho sengati.+ Nobabili nitawuphendvula ngenca yesono senu. 20 Indvodza leya ecansini nemfati wemnakabobabe wayo isuke ihlazise* umnakabobabe wayo.+ Lendvodza nalomfati kufanele baphendvule ngenca yesono sabo. Kufanele bafe futsi ngeke babe nebantfwana. 21 Nangabe indvodza itsatsa umfati wemnakabo, loko kuyenyanyeka.+ Isuke ihlazise* umnakabo, ngako lomfati nalendvodza ngeke babe nebantfwana.

22 “‘Kufanele nigcine yonkhe imiyalo yami nayo yonkhe imitsetfo lengininike yona+ futsi niyilandzele,+ kuze ningalahlelwa ngephandle kwalelive lengitaninika lona.+ 23 Ningayilandzeli imikhuba yaletive lengiticosha embikwenu,+ ngobe titente tonkhe letintfo leti, futsi ngiyatenyanya.+ 24 Kungako ngitsite kini: “Lelive lato leligeleta lubisi neluju nitawulitsatsa, futsi ngitaninika lona libe lenu.+ NginguJehova Nkulunkulu wenu, lonente nehluka kuletinye tive.”+ 25 Kufanele nehlukanise emkhatsini wesilwane lesihlantekile nalesingcolile, nasemkhatsini wenyoni lehlantekile nalengcolile.+ Ningatingcolisi ngetilwane nangetinyoni letingcolile, nanganobe ngusiphi silwane lesihumako emhlabatsini lengitsite singcolile kini.+ 26 Kufanele nibe ngcwele embikwami ngobe mine Jehova ngingcwele,+ futsi nginenta kutsi nehluke kuletinye tive kuze nibe bantfu bami.+

27 “‘Nobe nguyiphi indvodza nobe umfati losangoma nobe lobhulako,* kufanele nakanjani abulawe.+ Bantfu kufanele bamgcobe ngematje aze afe, futsi ingati yalowo muntfu itawuba setikwakhe.’”

21 Jehova wachubeka akhuluma naMosi, watsi: “Khuluma nemadvodzana a-Aroni labaphristi, utsi kuwo: ‘Kute emkhatsini wenu lokufanele atingcolise* ngemuntfu lofile kubantfu bakubo.+ 2 Kodvwa angakwenta loko nangabe kusihlobo sakhe sengati lesisedvute, kungaba ngumake wakhe, ngubabe wakhe, indvodzana yakhe, indvodzakati yakhe, nobe umnakabo. 3 Angakwenta nanakungudzadzewabo latalwa naye, loseyintfombi ntfo, futsi losengakatsatfwa. 4 Akukafaneli atibangele kutsi angabi ngcwele ngekutingcolisa ngemuntfu lomsikati longumfati wemuntfu wakubo. 5 Bangabolihhula lumanyule+ nobe bahhule tilevu tabo emaceleni nobe batisike emtimbeni.+ 6 Kufanele babe ngcwele kuNkulunkulu wabo+ futsi bangalingcolisi nelibito lakhe,+ ngobe ngibo labenta iminikelo leyentiwa ngemlilo kuJehova, lokukudla lokunikelwa kuNkulunkulu. Ngako kufanele babe ngcwele.+ 7 Nabatsatsa bafati, akukafaneli batsatse umuntfu lomsikati loyingwadla,+ lowoniwe nobe lodivosile,+ ngobe umphristi ungumuntfu longcwele kuNkulunkulu wakhe. 8 Umphristi kufanele nimtsatse njengemuntfu longcwele,+ ngobe nguye loletsa kudla lokunikelwa kuNkulunkulu. Lomphristi kufanele abe ngcwele kini, ngobe nami ngingcwele, mine Jehova lonenta nibe ngcwele.+

9 “‘Nangabe indvodzakati yemphristi itingcolisa ngebugwadla, isuke ingcolisa nababe wayo. Ngako kufanele ishiswe ngemlilo.+

10 “‘Umphristi lophakeme lokhetfwe emkhatsini wabomnakabo lababaphristi futsi logcotjwe ngemafutsa ekugcoba,+ wabekwa* nekutsi agcoke tingubo tebuphristi,+ akukafaneli angatinaki tinwele takhe nobe adzabule tingubo takhe.+ 11 Akukafaneli asondzele kumuntfu lofile.*+ Akukafaneli atingcolise ngisho nangababe wakhe nobe make wakhe. 12 Kufanele angaphumi endzaweni lengcwele futsi angayingcolisi lendzawo lengcwele yaNkulunkulu wakhe,+ ngobe ugcotjwe ngemafutsa aNkulunkulu ekugcoba laluphawu lwekutinikela kwakhe.+ NginguJehova.

13 “‘Nakatsatsa umfati kufanele atsatse intfombi ntfo.+ 14 Angabomtsatsa umfelokati, umfati lodivosile, umuntfu lomsikati lowoniwe nobe loyingwadla. Kodvwa kufanele atsatse intfombi ntfo. 15 Kufanele angabangcolisi bantfwana bakhe,*+ ngobe nginguJehova, loyo lomenta abe ngcwele.’”

16 Jehova wachubeka akhuluma naMosi, watsi: 17 “Naku lokufanele ukutjele Aroni: ‘Kubantfwana bakho* nakuto tonkhe titukulwane tabo, kute umuntfu lomdvuna lonesici longaletsa kudla lokunikelwa kuNkulunkulu. 18 Umuntfu lomdvuna lonesici angeke ete kimi atewukwenta umnikelo: kungaba ngumuntfu longaboni, lochutako, lonebuso lobulimele,* lonemikhono nobe imilente lengalingani, 19 lowephuke lunyawo nobe sandla, 20 lonesifumbu nobe lonesitfombo lesincane,* loneliso lelinenkinga, locubukile, lonentsembutane nobe lolimele titfo tangasense.+ 21 Kute umuntfu lomdvuna lonesici kubantfwana* ba-Aroni umphristi longaletsa iminikelo leyentiwa ngemlilo kuJehova. Njengobe anesici, ngeke aletse kudla lokunikelwa kuNkulunkulu. 22 Angakudla kudla lokunikelwe kuNkulunkulu lokutsetfwe etintfweni letingcwele+ nakuleto letingcwele ngelizinga leliphakeme.+ 23 Kodvwa-ke ngeke asondzele edvute nendvwangu yekwehlukanisa,+ futsi ngeke asondzele nase-al’thare,+ ngobe unesici. Akukafaneli angcolise indzawo yami lengcwele,+ ngobe nginguJehova, loyo lobenta babe ngcwele.’”+

24 Ngako-ke Mosi wakhuluma na-Aroni nemadvodzana akhe kanye nawo onkhe ema-Israyeli.

22 Jehova waphindze wakhuluma naMosi, watsi: 2 “Tjela Aroni nemadvodzana akhe kutsi kufanele bacaphele bangatisebentisi kabi* tintfo letingcwele tema-Israyeli, futsi bangalingcolisi nelibito lami lelingcwele+ ngetintfo labatingcwelisela kutinikela kimi.+ NginguJehova. 3 Naku lotakusho kubo: ‘Kuto tonkhe titukulwane tenu, nobe ngubani kubantfwana benu lokutawutsi lapho angakahlanteki asondzele etintfweni letingcwele, leto ema-Israyeli latingcwelisela kutinikela kuJehova, utawubulawa.+ NginguJehova. 4 Kubantfwana ba-Aroni kute umuntfu lomdvuna lonebulephelo+ nobe lonalokuphuma esitfweni sangasense+ longadla tintfo letingcwele, kuze kube ngulapho aba ngulohlantekile.+ Umuntfu lophume sidvodza+ naye akukafaneli adle tintfo letingcwele, naloyo lotsintse umuntfu lotingcolise ngalofile,+ 5 nalotsintse lesinye setilwane letingcolile letihamba tisicumbi+ nobe longakahlanteki ngenca yekutsintsa umuntfu longcoliswe ngunobe yini lenye.+ 6 Umuntfu lotsintsa nobe ngukuphi kwaloku utawuba ngulongcolile kuze kuhlwe futsi ngeke atidle tintfo letingcwele, kodvwa kufanele ageze ngemanti.+ 7 Naselishonile lilanga utawuba ngulohlantekile, ngemuva kwaloko sekangatidla letintfo letingcwele, ngobe tisabelo sakhe.+ 8 Kufanele angadli nobe ngusiphi silwane lasitfole sitifele nobe lesibulewe silwane sesiganga, kuze angabi ngulongcolile ngenca yaso.+ NginguJehova.

9 “‘Kufanele bagcine imitsetfo yami kuze bangabi nesono ngenca yekungayigcini bese bayafa ngobe bangcolise tintfo letingcwele. NginguJehova, loyo lobenta babe ngcwele.

10 “‘Umuntfu longakavumeleki* akukafaneli adle tintfo letingcwele.+ Umuntfu losihambi lohlala nemphristi nobe losisebenti lesicashiwe naye ngeke atidle letintfo letingcwele. 11 Kodvwa nangabe umphristi atsenga umuntfu lotsite ngemali yakhe, loyo muntfu angadla. Tigcili letitalelwe endlini yemphristi, nato tingakudla lokudla lokungcwele.+ 12 Nakwenteka indvodzakati yemphristi iba ngumfati wemuntfu longasuye umphristi,* ngeke itidle tintfo letingcwele letinikelwe. 13 Kodvwa nangabe lendvodzakati iba ngumfelokati nobe idivosa futsi ibe ite bantfwana, bese ibuyela endlini yababe wayo lapho beyihlala khona isengakatsatfwa, ingakudla lokudla lokusabelo sababe wayo.+ Kodvwa-ke umuntfu longakavumeleki* angeke akudle.

14 “‘Nakwenteka umuntfu atidla ngeliphutsa tintfo letingcwele, kufanele atikhokhe leto tintfo futsi engete incenye yato leyodvwa kuletisihlanu, anike umphristi.+ 15 Ngako-ke baphristi akukafaneli bangcolise letintfo letingcwele, leto ema-Israyeli latinikela kuJehova+ 16 futsi babangele kutsi ema-Israyeli ajeziswe ngenca yelicala lekudla tintfo letingcwele. NginguJehova, loyo lobenta babe ngcwele.’”

17 Jehova wachubeka akhuluma naMosi, watsi: 18 “Khuluma na-Aroni nemadvodzana akhe kanye nawo onkhe ema-Israyeli, utsi: ‘Nangabe um-Israyeli nobe umuntfu losihambi aletsa umnikelo wekushiswa+ kuJehova kuze afeze sifungo sakhe nobe awuletse kutsi ube ngumnikelo wekutitsandzela,+ 19 loyo muntfu kufanele aletse silwane lesidvuna lesiphile kahle+ kuze emukeleke. Leso silwane kufanele asitsatse emhlambini wetinkhomo, nobe etimvini letindvuna letisetincane nobe etimbutini. 20 Akukafaneli niletse silwane lesinesici+ ngobe ngeke sinente kutsi nemukeleke.

21 “‘Nangabe umuntfu aletsa umhlatjelo wekuthula+ kuJehova kuze afeze sifungo sakhe nobe awuletse kutsi ube ngumnikelo wekutitsandzela, kufanele kube silwane lesiphile kahle lesitsetfwe emhlambini wetinkhomo, nobe wetimvu nobe wetimbuti, kuze loyo muntfu emukeleke. Lesilwane kufanele sibe bete sici. 22 Akukafaneli ninikele ngesilwane lesingaboni, lesephukile, lesisikekile, lesinensumphe, lesinelukhwekhwe nobe intsembutane. Tilwane letinjalo akukafaneli nitiletse kuJehova nobe nentele ngato Jehova umnikelo e-al’thare. 23 Inkunzi nobe imvu lenemikhono nobe imilente lengalingani yona ningayiletsa kutsi ibe ngumnikelo wekutitsandzela, kodvwa ngeke yemukeleke kutsi ibe ngumnikelo wekufunga. 24 Akukafaneli niletse kuJehova silwane lesidvuna lesinetitfo tangasense letilimele, letifihlitiwe, letikhishiwe nobe letijutjiwe. Tilwane letinjena ningabonikela ngato eveni lenu. 25 Ningabotinikela tilwane letinjalo letisuka kumuntfu wekuhamba kutsi tibe kudla lokunikelwa kuNkulunkulu, ngobe tisuke tinenkinga futsi tinesici. Letilwane ngeke temukeleke.’”

26 Jehova waphindze wakhuluma naMosi, watsi: 27 “Litfole lenkhomo nobe lizinyane lemvu nobe lembuti lelitelwe litawuhlala nenina emalanga langu-7,+ ngelilanga lesi-8 selingemukeleka-ke kutsi linikelwe, libe ngumnikelo lowentiwa ngemlilo kuJehova. 28 Ungaboyihlaba inkhomo nelitfole layo ngelilanga linye, nemvu ungaboyihlaba nelizinyane layo ngelilanga linye.+

29 “Nanenta umhlatjelo wekubonga loya kuJehova,+ kufanele niwunikele ngendlela letawunenta nemukeleke kuye. 30 Lomhlatjelo kufanele udliwe ngalelolanga. Akube bete lutfo lwawo lolusalako kuze kube sekuseni.+ NginguJehova.

31 “Nibogcina imitsetfo yami futsi niyilandzele.+ NginguJehova. 32 Ningalingcolisi libito lami lelingcwele.+ Kufanele ngingcweliswe emkhatsini wawo onkhe ema-Israyeli.+ NginguJehova, loyo lonenta nibe ngcwele,+ 33 futsi lowanikhipha eveni laseGibhithe kuze nginikhombise kutsi nginguNkulunkulu wenu.+ NginguJehova.”

23 Jehova wachubeka akhuluma naMosi, watsi: 2 “Khuluma nema-Israyeli utsi: ‘Imikhosi+ yaJehova latsi niboyigubha itawuba yimibutsano lengcwele. Ngako kufanele niyimemetele.+ Nayi lemikhosi:

3 “‘Ningasebenta emalanga lasitfupha, kodvwa lilanga lesi-7 lilisabatha lenitawuphumula ngalo,+ futsi litawuba ngumbutsano longcwele. Akukafaneli nisebente sanhlobo ngalelolanga. Litawuba lisabatha laJehova kuto tonkhe tindzawo lenitawuhlala kuto.+

4 “‘Nayi-ke lemikhosi yaJehova, letawuba yimibutsano lengcwele futsi lokufanele niyimemetele ngetikhatsi tayo: 5 Ngelilanga lesi-14 lenyanga yekucala,+ nitawugubha liPhasika+ laJehova kusengakahlwi.*

6 “‘Ngelilanga lesi-15 laleyo nyanga, kutawuba neMkhosi Wesinkhwa Lesite Imvubelo lowentelwa Jehova.+ Kufanele nidle sinkhwa lesite imvubelo emalanga langu-7.+ 7 Ngelilanga lekucala nitawuba nembutsano longcwele.+ Akukafaneli nente umsebenti lomatima ngalelolanga. 8 Kulamalanga langu-7 nitawuletsa umnikelo lowentiwa ngemlilo kuJehova. Kutawuba nembutsano longcwele ngelilanga lesi-7, futsi akukafaneli nente umsebenti lomatima ngalelolanga.’”

9 Jehova wachubeka akhuluma naMosi watsi: 10 “Tjela ema-Israyeli utsi: ‘Nasenifikile eveni lengininika lona futsi senivune naloko benikulimile, kufanele niletse kumphristi+ sitfungo sesivuno senu sekucala.+ 11 Umphristi utawujikitisa lesitfungo embikwaJehova kuze nemukeleke kuNkulunkulu. Kufanele asijikitise ngelilanga lelilandzela liSabatha. 12 Ngalelilanga lokutawujikitiswa ngalo lesitfungo, nibonikela ngemvu lendvuna lephile kahle lenemnyaka munye, ibe ngumnikelo wekushiswa kuJehova. 13 Kanye nalomnikelo wekushiswa, nitawunikela ngemnikelo walokutinhlavu, ube ngufulaha locolisakele logcwele esikoteleni lesingemalitha langaba sihlanu* lobhicwe nemafutsa, futsi ube ngumnikelo lowentiwa ngemlilo kuJehova, loliphunga lelimnandzi.* Umnikelo walokunatfwako lenitawunikela nalemvu kufanele ube yilitha* yeliwayini. 14 Kufanele ningasidli sinkhwa, nobe lokutinhlavu lokugayingiwe, nobe lokutinhlavu lokusandza kuvunwa kuze kube ngulelilanga, lapho nitawuletsa khona umnikelo waNkulunkulu wenu. Lona ngumtsetfo lotawuhlala njalo kuto tonkhe titukulwane tenu nakuto tonkhe tindzawo lapho nitawuhlala khona.

15 “‘Nibobala emasabatha* langu-7 kusukela ngelilanga lelilandzela liSabatha, lokulilanga leniletse ngalo sitfungo lesentiwe umnikelo lojikitiswako.+ Lawa kufanele kube ngemaviki lagcwele. 16 Ngako nitawubala emalanga langu-50+ kuze kube lilanga lelilandzela liSabatha lesi-7. Ngemuva kwaloko kufanele niletse lomunye umnikelo walokutinhlavu kuJehova.+ 17 Etindlini tenu nibotsatsa tinkhwa letimbili letitawuba ngumnikelo lojikitiswako. Kufanele tentiwe ngafulaha locolisakele logcwele esikoteleni lesingemalitha langaba sihlanu,* futsi tibe nemvubelo.+ Letinkhwa titawuba ngumnikelo wesivuno sekucala lowentelwa Jehova.+ 18 Naniletsa letinkhwa, niboletsa netimvu letindvuna letingu-7 letiphile kahle futsi letinemnyaka munye, niletse nenkunzana kanye netimvu letindvuna letimbili.+ Letilwane titawuba ngumnikelo wekushiswa loya kuJehova tihambisane nemnikelo walokutinhlavu nemnikelo walokunatfwako, tibe ngumnikelo lowentiwa ngemlilo naloliphunga lelimnandzi* kuJehova. 19 Niboletsa nembuti leseyincane letawuba ngumnikelo wesono+ kanye netimvu letindvuna letimbili letinemnyaka munye, letitawuba ngumhlatjelo wekuthula.+ 20 Umphristi utawujikitisa letimvu kanye naletinkhwa letingumnikelo wesivuno sekucala, tibe ngumnikelo lojikitiswako embikwaJehova. Titawuba ngcwele kuJehova futsi tibe temphristi.+ 21 Ngalelolanga nitawumemetela+ umbutsano longcwele, futsi kute nemsebenti lomatima lokufanele niwente ngalelolanga. Lona ngumtsetfo lotawuhlala njalo kuto tonkhe titukulwane tenu nakuto tonkhe tindzawo lapho nitawuhlala khona.

22 “‘Nanivuna emasimu enu, ningabokuvuna konkhe lokusemaphetselweni awo, ningakubutsi naloko lokusele nanivuna.+ Kufanele nikushiyele bantfu labeswele*+ kanye netihambi.+ NginguJehova Nkulunkulu wenu.’”

23 Jehova wachubeka akhuluma naMosi, watsi: 24 “Tjela ema-Israyeli utsi: ‘Ngelilanga lekucala lenyanga yesi-7, kutawuba lilanga lekuphumula, futsi litawumenyetelwa ngekushaywa kwelicilongo,+ kube ngumbutsano longcwele. 25 Kute umsebenti lomatima lokufanele niwente ngalelolanga, futsi nitawuletsa umnikelo lowentiwa ngemlilo kuJehova.’”

26 Jehova wachubeka akhuluma naMosi, watsi: 27 “Ngelilanga lesi-10 kulenyanga yesi-7 kutawuba Lilanga Lekubuyisana NaNkulunkulu.+ Nitawuba nembutsano longcwele futsi kufanele nikhombise kutsi niva buhlungu* ngenca yetono tenu,+ niletse nemnikelo lowentiwa ngemlilo kuJehova. 28 Kute umsebenti lokufanele niwente ngalelolanga, ngobe leli lilanga umphristi lenta ngalo kutsi nibuyisane+ naJehova Nkulunkulu wenu. 29 Ngalelolanga, nobe ngubani* longeke akhombise kutsi uva buhlungu* ngenca yetono takhe kufanele abulawe.+ 30 Wonkhe umuntfu lotawusebenta ngalelolanga ngitambhubhisa kubantfu bakubo. 31 Ngako kute umsebenti lokufanele niwente. Lona ngumtsetfo lotawuhlala njalo kuto tonkhe titukulwane tenu nakuto tonkhe tindzawo lapho nitawuhlala khona. 32 Leli liSabatha futsi akukafaneli nisebente sanhlobo. Kusihlwa ngelilanga lesi-9 kuleyo nyanga, kufanele nikhombise kutsi niva buhlungu ngenca yetono tenu.+ Nitawugcina lisabatha kusukela kusihlwa ngalelolanga kuze kube kukusihlwa ngelilanga lelilandzelako.”

33 Jehova wachubeka akhuluma naMosi watsi: 34 “Khuluma nema-Israyeli utsi: ‘Ngelilanga lesi-15 kulenyanga yesi-7 kutawuba neMkhosi Wemadlangala* lowentelwa Jehova. Lomkhosi utawutsatsa emalanga langu-7.+ 35 Kutawuba nembutsano longcwele ngelilanga lekucala futsi kute umsebenti lomatima lokufanele niwente. 36 Kulamalanga langu-7 nitawuletsa umnikelo lowentiwa ngemlilo kuJehova. Ngelilanga lesi-8 kufanele nibe nembutsano longcwele,+ niletse nemnikelo lowentiwa ngemlilo kuJehova. Lona kutawuba ngumbutsano lokhetsekile. Kute umsebenti lomatima lokufanele niwente ngalelolanga.

37 “‘Lena ngulemikhosi+ yaJehova letawuba yimibutsano lengcwele nalokufanele niyimemetele,+ kuze kuletfwe umnikelo lowentiwa ngemlilo kuJehova,+ lokungumnikelo wekushiswa nemnikelo walokutinhlavu+ lohambisana nawo, kanye nemnikelo walokunatfwako,+ kuye ngaloko lokudzingekako ngalelolanga. 38 Lena nguleminye iminikelo lenitayenta ngetulu kwaleyo leniyentela Jehova ngeliSabatha,+ nangetulu kwetipho lenitentako,+ neminikelo yekufunga+ neminikelo yekutitsandzela,+ lokufanele niyentele Jehova. 39 Ngelilanga lesi-15 enyangeni yesi-7, nasenibutse sivuno semasimu enu, kufanele nigubhe umkhosi waJehova emalanga langu-7.+ Ngelilanga lekucala nelesi-8 akukafaneli nisebente sanhlobo.+ 40 Ngelilanga lekucala nitawutsatsa titselo tetihlahla letinhle, emagala etihlahla telusundvu,+ emagala etihlahla letinemacembe lamanyenti kanye newetihlahla* tasesihosheni, futsi kufanele nijabule+ embikwaJehova Nkulunkulu wenu emalanga langu-7.+ 41 Umnyaka ngamunye, lomkhosi waJehova nitawugubha emalanga langu-7.+ Kufanele niwugubhe ngenyanga yesi-7, futsi lona ngumtsetfo lotawuhlala njalo kuto tonkhe titukulwane tenu. 42 Kufanele nihlale emadlangaleni emalanga langu-7.+ Onkhe ema-Israyeli kufanele ahlale khona, 43 kuze titukulwane letitako titewukwati+ kutsi ngahlalisa ema-Israyeli emadlangaleni ngesikhatsi ngiwakhipha eveni laseGibhithe.+ NginguJehova Nkulunkulu wenu.’”

44 Ngako Mosi watjela ema-Israyeli ngalemikhosi yaJehova.

24 Jehova wachubeka akhuluma naMosi, watsi: 2 “Tjela ema-Israyeli kutsi aletse emafutsa emncumo lacengekile latawusetjentiselwa kukhanyisa tibane, kuze tihlale tikhanya.+ 3 Njalo kusihlwa, Aroni utawukhanyisa tibane letisembikwendvwangu lengasebhokisini lesivumelwane ethendeni lekuhlangana, aciniseke nekutsi tihlala tikhanya embikwaJehova kuze kube sekuseni. Lona ngumtsetfo lotawuhlala njalo kuto tonkhe titukulwane tenu. 4 Ngaso sonkhe sikhatsi kufanele atibeke kahle letibane+ embikwaJehova, kulolutsi lwesibane lolwentiwe ngeligolide.

5 “Kufanele utsatse fulaha locolisakele, ubhake tinkhwa letiyindingilizi letingu-12. Sinkhwa ngasinye sibokwentiwa ngafulaha logcwele esikoteleni lesingemalitha langaba sihlanu.* 6 Utawutibeka embikwaJehova etafuleni lelentiwe ngeligolide lelicengekile, tibe titaki letimbili, sitaki ngasinye sibe netinkhwa+ letisitfupha.+ 7 Ubobeka emakha lahlantekile esihlahla semphepho etikwesitaki ngasinye. Lamakha atawumelela* lesinkhwa, abe ngumnikelo+ lowentiwa ngemlilo kuJehova. 8 Njalo ngeliSabatha, lesinkhwa kufanele sibekwe embikwaJehova.+ Lesi sivumelwane lesitawuhlala njalo emkhatsini wami nema-Israyeli. 9 Lesinkhwa sitawuba sa-Aroni nemadvodzana akhe.+ Kufanele basidlele endzaweni lengcwele,+ ngobe siyintfo lengcwele ngelizinga leliphakeme kumphristi futsi sitsetfwe eminikelweni leya kuJehova leyentiwa ngemlilo. Lona ngumtsetfo lotawuhlala njalo.”

10 Kuma-Israyeli, bekunendvodza lebeyitalwa ngumfati longum-Israyeli, babe wayo angumGibhithe.+ Lendvodza yalwa nalenye indvodza lengum-Israyeli endzaweni lebekuhlalwa kuyo. 11 Yahlambalata libito laNkulunkulu futsi yalicalekisa,+ ngako yaletfwa kuMosi.+ Make wayo bekunguShelomithi, indvodzakati yaDibri wesive sakaDani. 12 Bayivalela kwaze kwaba ngulapho Jehova abacacisela kutsi kufanele bente njani.+

13 Jehova wabese utsi kuMosi: 14 “Mkhipheleni ngephandle lomuntfu localekise libito lami, futsi bonkhe labamvile kufanele babeke tandla tabo enhloko yakhe, ngemuva kwaloko sonkhe lesive kufanele simgcobe ngematje.+ 15 Ubotjela ema-Israyeli utsi: ‘Nangabe umuntfu acalekisa Nkulunkulu, utawuphendvula ngenca yesono sakhe. 16 Umuntfu lohlambalata libito laJehova nakanjani kufanele abulawe.+ Sonkhe sive sibomgcoba ngematje. Umuntfu losihambi lohlambalata libito laNkulunkulu abobulawa, njengobe nje nem-Israyeli lolihlambalatako naye abulawa.

17 “‘Nangabe umuntfu abulala lomunye, naye kufanele abulawe.+ 18 Nobe ngubani loshaya silwane lesifuywako asibulale* kufanele asibhadale, kwenanwe kuphila ngekuphila. 19 Nakwenteka umuntfu alimate lomunye umuntfu, loko lakwentile kubokwentiwa nakuye.+ 20 Kwephuka ngekwephuka, liso ngeliso, litinyo ngelitinyo. Naye kufanele alinyatwe ngendlela lalimete ngayo lona lomunye.+ 21 Umuntfu loshaya silwane asibulale kufanele asibhadale,+ kodvwa loyo loshaya umuntfu ambulale, naye abobulawa.+

22 “‘Kutawusebenta umtsetfo lofananako, kungaba kumuntfu losihambi nobe kum-Israyeli,+ ngobe nginguJehova Nkulunkulu wenu.’”

23 Ngemuva kwaloko Mosi wakhuluma nema-Israyeli, futsi amkhiphela ngaphandle lomuntfu localekise libito laNkulunkulu, abese amgcoba ngematje.+ Ngako ema-Israyeli enta njengobe nje Jehova abetjele Mosi.

25 Jehova waphindze wakhuluma naMosi eNtsabeni iSinayi watsi: 2 “Khuluma nema-Israyeli, utsi kuwo: ‘Nanifika eveni lengitaninika lona,+ kufanele nigcine umtsetfo waJehova welisabatha,+ ningawulimi umhlaba kulelo live. 3 Nitawulima emasimu enu niphindze nitsene netihlahla tenu temagilebisi iminyaka lesitfupha, nivune nemkhicito walelive.+ 4 Kodvwa ngemnyaka wesi-7, nibogcina umtsetfo waJehova welisabatha futsi ningawulimi sanhlobo umhlaba walelo live. Kufanele ningawalimi emasimu enu nobe nitsene tihlahla tenu temagilebisi. 5 Ningabokuvuna loko lokutimilele nasenivunile, ningawabutsi nemagilebisi etihlahla tenu letingakatsenwa. Lelive lingabolinywa sanhlobo kuloyo mnyaka. 6 Kodvwa ngalomnyaka welisabatha ningakudla loko lokutimilelako. Loku ningakudla nine netigcili netigcilikati tenu, kanye netisebenti tenu leticashiwe, nebantfu labahleti nani kwesikhashana, 7 kanye netilwane tenu letifuywako netilwane tesiganga letikulelive. Konkhe lelive lelitawutikhicitela kona ningakudla.

8 “‘Nitawubala iminyaka lengu-7 yelisabatha, lokuyiminyaka lengu-7 lephindvwe kangu-7. Seyiyonkhe itawuba yiminyaka lengu-49. 9 Ngemuva kwaloko, ngelilanga lesi-10 enyangeni yesi-7 niyawushaya luphondvo. Leli kutawube kuLilanga Lekubuyisana NaNkulunkulu,+ futsi umsindvo waloluphondvo kufanele uvakale kulo lonkhe live lenihlala kulo. 10 Umnyaka wesi-50 nibowenta ube ngcwele futsi nimemetele inkhululeko kubo bonkhe bantfu labahlala kulelive.+ Loyo kuyawuba nguMnyaka Wekukhululwa.* Ngamunye wenu uyawubuyela endzaweni yakhe nasemndenini wakhe.+ 11 Lomnyaka wesi-50 uyawuba nguMnyaka Wekukhululwa kini. Ningawalimi emasimu enu nobe nivune loko lokutimilele nasenivunile, ningawabutsi nemagilebisi etihlahla tenu letingakatsenwa.+ 12 Njengobe loyo mnyaka kunguMnyaka Wekukhululwa, uboba ngcwele kini. Ningadla kuphela loko lelive lelitatikhicitela kona.+

13 “‘KuloMnyaka Wekukhululwa, ngamunye wenu kufanele abuyele endzaweni yakhe.+ 14 Nangabe utsengisela umuntfu wakini intfo letsite nobe utsenga lokutsite kuye, ungasitakali ngaye.+ 15 Nawutsenga kumuntfu wakini, ubobala kutsi semingakhi iminyaka kwendlule uMnyaka Wekukhululwa, futsi naye kufanele abale kutsi mingakhi iminyaka yekulima lesele.+ 16 Nangabe kusesele iminyaka leminyenti, angayikhulisa lentsengo, kodvwa nangabe kusele iminyaka lembalwa kufanele ayehlise, ngobe usuke akutsengisela sivuno lesitawutfolakala kuleyo minyaka. 17 Kute kini lokufanele asitakale ngemuntfu wakubo.+ Nibomesaba Nkulunkulu wenu,+ ngobe mine nginguJehova Nkulunkulu wenu.+ 18 Nanilandzela imitsetfo yami niphindze nigcine nemiyalo yami, nitawuhlala ngekuthula kulelive.+ 19 Litanikhicitela kudla,+ futsi nitawukudla nitenetise, nihlale kulo ngekuthula.+

20 “‘Kungenteka nitibute nitsi: “Sitawudlani ngemnyaka wesi-7 nangabe singalimi futsi singavuni lutfo?”+ 21 Kodvwa ningesabi, mine ngitawuletsa sibusiso sami ngemnyaka wesitfupha, futsi lelive litawukhicita kudla lokutawenela iminyaka lemitsatfu.+ 22 Kutawutsi ngemnyaka wesi-8 nilime emasimu enu, futsi kutawuze kufike umnyaka wesi-9 nisadla lokusele kulenikuvune emnyakeni wesitfupha. Lokudla nitakudla kuze kufike sikhatsi sekuvuna.

23 “‘Indzawo ningaboyitsengisa liwonkhe,+ ngobe lelive ngelami.+ Emehlweni ami, nine nitihambi nebantfu labahleti kwesikhashana.+ 24 Kuyo yonkhe indzawo lenihlala kuyo kufanele bantfu babe nelilungelo lekutsi nabatsengise umhlaba baphindze bawutsenge kuze ubuyele kubo.

25 “‘Nangabe umuntfu wakini eswele bese utsengisa indzawo yakhe, sihlobo sakhe sengati kufanele siphindze siyitsenge lendzawo layitsengisile kuze ibuyele kuye.+ 26 Nangabe ete sihlobo lesingaphindze siyitsenge, kodvwa yena bese uyandlondlobala, futsi akhone kuphindze ayitsenge, 27 kufanele abale umehluko wemali labeyitsengise ngayo neyesivuno lesitfolakele kuyo kusukela ayitsengisa, bese ubhadala leyo mali. Ngemuva kwaloko angabuyela endzaweni yakhe.+

28 “‘Kodvwa nangabe angakhoni kuyitsenga kuze ibuyele kuye, leyo ndzawo layitsengisile itawuchubeka iyaloyo lamtsengisele kuze kufike uMnyaka Wekukhululwa.+ Ngalowo mnyaka lendzawo itawubuyiselwa kuye, bese naye ubuyela kuyo.+

29 “‘Nakwenteka umuntfu atsengisa likhaya lelisedolobheni lelibiyelwe, lilungelo lakhe lekuphindze alitsenge litawuchubeka likhona kusukela ngesikhatsi lalitsengise ngaso kuze kuphele umnyaka alitsengisile. Ngako lelilungelo litawuba lemnyaka wonkhe.+ 30 Kepha nangabe lomuntfu angalitsengi uze uphele wonkhe lomnyaka, lelikhaya selitawuhlala liyindzawo yaloyo lolitsengile kuto tonkhe titukulwane takhe. NgeMnyaka Wekukhululwa, akukafaneli libuyiselwe kuloyo lebelitsengwe kuye. 31 Kodvwa-ke emakhaya lasetindzaweni letingakabiyelwa abotsatfwa njengencenye yendzawo levulekile. Lilungelo lekutsi loyo lolitsengisile aphindze alitsenge litawuhlale likhona, futsi ngeMnyaka Wekukhululwa, lelikhaya kufanele libuyiselwe kuloyo lebelitsengwe kuye.

32 “‘Nangabe emaLevi atsengisa emakhaya awo langekhatsi emadolobheni awo,+ atawuhlale analo njalo lilungelo lekuphindze awatsenge. 33 Nangabe indzawo lebeyitsengiswe ngemaLevi ingakaphindzi yatsengwa kuze ibuyele kuwo, leyo ndzawo kufanele ibuyiselwe kuwo ngeMnyaka Wekukhululwa,+ ngobe emkhatsini webantfu baka-Israyeli, tindlu letisemadolobheni emaLevi tiyimphahla yawo.+ 34 Ngetulu kwaloko, tindzawo letivulekile+ letiseceleni kwemadolobha awo akukafaneli titsengiswe, ngobe tiyawuhlala tiyimphahla yawo.

35 “‘Nangabe umuntfu wakini lohlala edvute nawe eswele futsi angakhoni nekutisekela, ubomsita+ ngendlela lebewungasita ngayo sihambi nemuntfu lohleti kwesikhashana kulelive,+ kuze achubeke aphila. 36 Ungafuni intalo kuye nobe wente inzuzo* ngaye.+ Ubowesaba Nkulunkulu wakho,+ futsi ngaleyo ndlela umuntfu wakini utawuchubeka aphila kanye nawe. 37 Ungafuni intalo nawumboleke imali, nobe umuphe kudla kuze utfole inzuzo.+ 38 NginguJehova Nkulunkulu wenu, lowanikhipha eveni laseGibhithe+ kuze ngininike live laseKhenani, ngikhombise nekutsi nginguNkulunkulu wenu.+

39 “‘Nangabe umuntfu wakini lohlala edvute nawe eswele bese utiletsa kuwe kuze umtsenge,+ akukafaneli umsebentise kwesigcili.+ 40 Ubomphatsa njengesisebenti lesicashiwe+ nobe umuntfu lohleti kwesikhashana kulelive. Utakusebentela kuze kufike uMnyaka Wekukhululwa. 41 Ngaloyo mnyaka uyawuhamba akanye nebantfwana* bakhe, abuyele emndenini wakubo. Kufanele abuyele ayohlala endzaweni yabokhokho bakhe.+ 42 Ema-Israyeli atigcili tami lengatikhipha eveni laseGibhithe.+ Ngako akukafaneli atitsengise ngendlela sigcili lesitsengiswa ngayo. 43 Ungabomphatsa kabi lomuntfu wakini,+ futsi kufanele wesabe Nkulunkulu wakho.+ 44 Labo labangaba tigcili netigcilikati takho ubobatsatsa etiveni letisedvute nawe. Ngako kukuleto tive lapho ungatsenga khona tigcili netigcilikati. 45 Tigcili ungatitsenga nasemadvodzaneni ebantfu labahleti kwesikhashana eveni lenu+ kanye nasemindenini yawo letalelwe kulelive, futsi letigcili titawuba yimphahla yakho. 46 Letigcili ungatendlulisela kumadvodzana akho kutsi tibe lifa futsi tihlale tiyimphahla yawo. Tingaba tisebenti takho, kodvwa akukafaneli umphatse kabi umuntfu wakini longum-Israyeli.+

47 “‘Nakwenteka umuntfu losihambi nobe lohleti kwesikhashana eveni lenu anjinga, futsi umuntfu wakini yena eswele, bese kudzingeka kutsi atinikele kuze atsengwe ngulomuntfu losihambi nobe lohleti kwesikhashana, nobe atsengwe lilunga lemndeni waloyo muntfu, 48 lomuntfu wakini uyawuhlale anelilungelo lekuphindze atitsenge. Lomunye kubanakabo naye angaphindze amtsenge.+ 49 Angatsengwa nangumnakabobabe wakhe nobe yindvodzana yemnakabobabe wakhe, nobe atsengwe ngulesinye sihlobo sakhe sengati lesisasemndenini wakhe.

“‘Nangabe naye sekandlondlobele, angaphindze atitsenge.+ 50 Ngemnyaka lomuntfu latsengwa ngawo, kufanele avumelane naloyo lomtsengako mayelana nesikhatsi latasicitsa kuze kufike uMnyaka Wekukhululwa,+ futsi imali latawutsengwa ngayo kufanele ihambisane naleso sikhatsi.+ Imali yemalanga lawasebentile iyawulingana neyesisebenti lesicashiwe.+ 51 Nangabe kusasele iminyaka leminyenti kutsi kufike uMnyaka Wekukhululwa, kufanele akhokhe imali latsengwa ngayo lehambisana naleyo minyaka lesele. 52 Kodvwa nangabe sekusele iminyaka lembalwa kutsi kufike uMnyaka Wekukhululwa, utawubala imali lokudzingeka ayikhokhe kuze akhululeke futsi kufanele ihambisane naleyo minyaka lesele. 53 Yingci nje nakasengaphansi kwalomuntfu lomtsengile, uyawuchubeka umnyaka nemnyaka asisebenti sakhe lesicashiwe, futsi kufanele nigadze kutsi angaphatfwa kabi.+ 54 Kodvwa-ke nakangakhoni kuphindze atitsenge, utawukhululeka ngeMnyaka Wekukhululwa,+ yena kanye nebantfwana* bakhe.

55 “‘Ema-Israyeli atigcili tami lengatikhipha eveni laseGibhithe.+ NginguJehova Nkulunkulu wenu.

26 “‘Ningatenteli bonkulunkulu labangenamsebenti,+ futsi ningatibekeli tithico letibatiwe+ nobe ematje langcwele. Ningabobeka ematje labatiwe+ eveni lenu bese niyawakhotsamela,+ ngobe nginguJehova Nkulunkulu wenu. 2 Nibogcina lisabatha, nihloniphe* nendzawo yami lengcwele. NginguJehova.

3 “‘Nanichubeka nilandzela imitsetfo nemiyalo yami niphindze niyigcina,+ 4 ngiyawuniletsela imvula lenyenti ngesikhatsi lesifanele,+ futsi lelive liyawukhicita,+ netihlahla titsele titselo. 5 Sikhatsi senu sekubhula sitawuchubeka kuze kufike sikhatsi sekuvunwa kwemagilebisi, nesikhatsi sekuvuna emagilebisi sitawuchubeka kuze kufike sikhatsi sekuhlanyela. Nitawudla sinkhwa nenetiseke, niphindze nihlale ngekuphepha eveni lenu.+ 6 Ngiyawuletsa kuthula eveni,+ nine nihlale kulo futsi kube bete lonesabisako.+ Ngitawucosha tilwane tesiganga letiyingoti, kute nalotanihlasela ngenkemba kulo lonkhe live lenu. 7 Titsa tenu niyawuticosha, niphindze nitincobe ngenkemba. 8 Bantfu labasihlanu kini bayawucosha titsa letingu-100, nalabangu-100 bacoshe titsa lengu-10 000. Letitsa tenu nitawutibulala ngenkemba.+

9 “‘Ngitawunibusisa, nginente nibe nebantfwana labanyenti futsi nandze,+ ngiphindze ngigcine sivumelwane lengasenta nani.+ 10 Nitawutsi lapho nisadla kudla lenikuvune emnyakeni lowendlulile, bese kudzingeka nikususe, nivule sikhala salokusha. 11 Lithende lami lekukhontela ngitalibeka emkhatsini wenu+ futsi ngeke nginilahle. 12 Ngitawuhamba emkhatsini wenu, ngibe nguNkulunkulu wenu,+ nani nibe bantfu bami.+ 13 NginguJehova Nkulunkulu wenu, lowanikhipha eveni laseGibhithe kuze ningasachubeki nitigcili tabo, ngaphindze ngephula nelijoka lebebanigcilata ngalo, nganenta nahamba nikhululekile.*

14 “‘Kodvwa-ke nangabe ningeke ningilalele nobe nangabe ningeke niyigcine yonkhe lemitsetfo,+ 15 nobe ningeke niyigcine nemiyalo yami,+ nanangabe nitawutenyanya timiso tami nize ningayilaleli yonkhe imiyalo yami, nephule nesivumelwane sami,+ 16 mine ngitawukwenta naku lokulandzelako: Ngitawunenta nikhatsateke, nginijezise ngesifo sesifuba sengati nangemkhuhlane lomatima, emehlo enu aze angaboni kahle futsi nihhohloke nasemtimbeni. Nitawuhlanyela kodvwa ngeke nivune lutfo, ngobe titsa tenu titawudla loko lenikuhlanyele.+ 17 Angeke ngisaninaka, netitsa tenu titawunincoba.+ Labo labanitondzako bataninyatsela+ futsi nitawubaleka ngisho nome kute lonicoshako.+

18 “‘Nangabe ningangilaleli ngisho nobe senehlelwe nguletintfo, sijeziso senu ngitasikhulisa siphindzeke kangu-7 kunakucala ngenca yetono tenu. 19 Kutigcabha kwenu ngitakucedza, naseveni lenu emazulu atawufana nensimbi,*+ umhlaba wona ufane nelitfusi.* 20 Nitawukhandlekela lite, ngobe umhlaba ngeke usakhicita,+ netihlahla letiseveni lenu ngeke tisatsela.

21 “‘Kodvwa nangabe nichubeka nimelene nami futsi ningangilaleli, sijeziso senu ngitasikhulisa siphindzeke kangu-7 ngenca yetono tenu. 22 Ngitawuletsa tilwane tesiganga eveni lenu.+ Titawubulala bantfwana benu,+ ticotfule netilwane tenu letifuywako futsi nani nisale nimbalwa, ngaleso sizatfu imigwaco yenu ngeke ibe namuntfu.+

23 “‘Nangabe ningasemukeli siyalo sami nangetulu kwaletintfo+ futsi nichubeka nimelene nami, 24 nami-ke ngitawumelana nani, sijeziso senu ngisikhulise siphindzeke kangu-7 ngenca yetono tenu. 25 Ngitawukwenta titsa tenu tinihlasele ngenkemba kuze nginijezise ngenca yekwephula kwenu sivumelwane sami.+ Nanibalekela emadolobheni enu, ngitawuniletsela sifo,+ futsi nitawunikelwa etitseni tenu.+ 26 Nasengivale tindzawo* lenitfola kuto sinkhwa,*+ bafati labangu-10 batawunibhakela sinkhwa kuhhavini munye bese basehlukanisa ngekusikala.+ Nitawukudla kodvwa angeke nesutse.+

27 “‘Nangabe ningangilaleli nangetulu kwaloku futsi nichubeka nimelene nami, 28 nami ngitawuchubeka ngimelene nani kakhulu,+ sijeziso senu ngiphindze ngisikhulise tikhatsi letingu-7 ngenca yetono tenu. 29 Ngako nitawudla imitimba yemadvodzana enu, nidle nemitimba yemadvodzakati enu.+ 30 Ngitawubhubhisa netindzawo lenikhontela kuto bonkulunkulu benu,*+ ngiwise netindzawo tenu tekushisela imphepho, netidvumbu tenu ngitilakanyise etikwaletithico tenu letenyanyekako*+ futsi letingaphili, ngiphindze nginishiye ngenyanyile.+ 31 Ngitawukwenta kutsi emadolobha enu ahlaselwe ngenkemba,+ ngente nekutsi tindzawo tenu letingcwele tisale tingenalutfo, neliphunga lelimnandzi* lemihlatjelo yenu ngeke ngilihogele. 32 Mine ngitawukwenta kutsi lelive lisale lingenalutfo,+ netitsa tenu letitawube tihlala kulo titalibuka timangele.+ 33 Ngitanihlakata nigcwale etiveni,+ ngikhiphe nenkemba yami nginicoshe ngayo.+ Live lenu litawusala lingenalutfo,+ nemadolobha enu atawubhujiswa.

34 “‘Umhlaba wenu utawusala ungenalutfo futsi uphumule* ngalesikhatsi nine niseveni letitsa tenu. Ngaleso sikhatsi lomhlaba utawuphumula kuze kwenanwe sonkhe sikhatsi lebeningawuphumuti ngaso.+ 35 Lomhlaba utawuphumula kuso sonkhe lesikhatsi lotawube ungenalutfo ngaso, ngobe awuzange uphumule ngesikhatsi selisabatha nanisahlala kuwo.

36 “‘Ngitawubangela kutsi tinhlitiyo talabo labatawusindza+ tigcwale kwesaba emaveni etitsa tabo. Batawetfuswa ngisho nangumsindvo welicembe lelipheshulwa ngumoya, futsi babaleke kuhle kwemuntfu abalekela inkemba, bawe ngisho nome kute lobacoshako.+ 37 Batawugilana bawe kube kute lobacoshako, kuhle kwebantfu babalekela inkemba. Angeke nikhone kumelana netitsa tenu.+ 38 Nitawufela emkhatsini webantfu betive,+ futsi live letitsa tenu litanicedza. 39 Ngenca yetono lenitentile, labo labatawusala emkhatsini wenu batawugcine baphelile kulamave etitsa tenu.+ Batawuphela ngenca yetono tabobabe wabo.+ 40 Ngemuva kwaloko batativuma tono tabo,+ netono tabobabe wabo kanye nekungetsembeki kwabo, bavume nekutsi abazange batiphatse ngekwetsembeka ngesikhatsi bamelana nami.+ 41 Batawuvuma nekutsi nami ngamelana nabo+ ngekutsi ngibayise eveni letitsa tabo.+

“‘Mhlawumbe ngaleso sikhatsi inhlitiyo yabo lelukhuni itawutsamba,+ bese batfola sijeziso sesono sabo. 42 Ngitasikhumbula sivumelwane lengasenta naJakobe,+ nesivumelwane lengasenta na-Isaka+ kanye nesivumelwane lengasenta na-Abrahama,+ ngilikhumbule nalelive. 43 Ngesikhatsi lelive balishiyile, belenana sikhatsi lebelingaphumuli ngaso+ futsi ngaleso sikhatsi belingenalutfo, nabo bebatfola sijeziso sesono sabo ngobe abazange bayemukele imitsetfo yami, futsi bayenyanya nemiyalo yami.+ 44 Kodvwa nangetulu kwato tonkhe letintfo, nabaseveni letitsa tabo ngeke ngibashiye ngalokuphelele+ nobe ngibalahle ngize ngibacedze, ngobe loko kungasephula sivumelwane+ lengasenta nabo. NginguJehova Nkulunkulu wabo. 45 Ngenca yabo, ngitasikhumbula sivumelwane lengasenta nabokhokho babo+ lengabakhipha eveni laseGibhithe letinye tive tibuka,+ kuze ngifakazele kutsi nginguNkulunkulu wabo. NginguJehova.’”

46 Leti-ke nguletimiso, nemiyalo, kanye nemitsetfo Jehova layibeka emkhatsini wakhe nema-Israyeli asebentisa Mosi eNtsabeni iSinayi.+

27 Jehova wachubeka wakhuluma naMosi, watsi: 2 “Khuluma nema-Israyeli utsi kuwo: ‘Nangabe umuntfu enta sifungo lesikhetsekile+ sekutsi utawunikela kuJehova ngemali lelingana nentsengo yemuntfu, 3 leyo ntsengo itawuba ngemagremu langu-570* elisiliva nangabe kungumuntfu lomdvuna loneminyaka lesukela kulengu-20 kuya kulengu-60. Lentsengo kufanele ikalwe ngesisindvo lesisemtsetfweni sasendzaweni lengcwele.* 4 Kodvwa nakungumuntfu lomsikati, lentsengo itawuba ngemagremu langu-342* elisiliva. 5 Nakungumuntfu loneminyaka lesukela kulesihlanu kuya kulengu-20 budzala, intsengo yakhe nakamdvuna itawuba ngemagremu langu-228* elisiliva, kodvwa nangabe amsikati itawuba ngemagremu langu-114* elisiliva. 6 Nangabe kungumuntfu lonenyanga yinye kuya kuloneminyaka lesihlanu budzala, intsengo yakhe nakamdvuna itawuba ngemagremu langu-57* elisiliva, kodvwa nakamsikati itawuba ngemagremu langaba ngu-34* elisiliva.

7 “‘Nakungumuntfu loneminyaka lengu-60 kuya etulu budzala, intsengo yakhe nakamdvuna itawuba ngemagremu langu-171* elisiliva, kantsi nakamsikati itawuba ngemagremu langu-114* elisiliva. 8 Kodvwa nangabe eswele kakhulu, angakhoni kubhadala lentsengo,+ utawuletsa lomuntfu embikwemphristi kuze umphristi ancume kutsi intsengo yakhe ingaba ngakanani, kuye ngaloko lona lowente lesifungo langakhona kukukhipha.+

9 “‘Nangabe kusifungo sekunikela ngesilwane lesemukelekako kutsi sibe ngumnikelo kuJehova, nobe ngusiphi silwane lesitawunikelwa kuJehova sitawuba yintfo lengcwele. 10 Akukafaneli aletse lesinye esikhundleni saso nobe asishintjise, aletse lesihle nobe aletse lesibi kunaso. Kodvwa nakatawusishintjisa ngalesinye, totimbili titawuba ngcwele, lesi sekucala nalesi lashintjise ngaso. 11 Nangabe kusilwane lesingcolile+ futsi lokungeke kunikelwe ngaso kuJehova, leso silwane utasiletsa embikwemphristi. 12 Lomphristi utawubese uncuma intsengo yaso, kuye ngekutsi sihle yini nobe cha. Lentsengo letawuncunywa ngumphristi akukafaneli ishintjwe. 13 Kepha nakwenteka lomuntfu afuna kuphindze asitsenge, kufanele akhokhe lentsengo yaso futsi ngetulu engete incenye yayo leyodvwa kuletisihlanu.+

14 “‘Nakwenteka umuntfu anikela* ngendlu yakhe kuze ibe yintfo lengcwele kuJehova, umphristi utawuncuma intsengo yayo, kuye ngekutsi leyondlu isesimeni lesihle yini nobe cha. Ngako-ke intsengo yaleyondlu itawuba nguleyo lebekwe ngumphristi.+ 15 Kodvwa nangabe lomuntfu lonikele ngendlu yakhe asafuna kuphindze ayitsenge, kufanele akhokhe intsengo yayo aphindze engete incenye yayo leyodvwa kuletisihlanu. Ngemuva kwaloko lendlu itawuphindze ibe ngeyakhe.

16 “‘Nakwenteka umuntfu anikela kuJehova ngencenye yemhlaba wakhe, intsengo yawo itawukalwa ngenhlanyelo ledzingekako nawuhlanyelwa: lihomeri* lenhlanyelo yebhali litawuba ngemagremu langu-570* elisiliva. 17 Nangabe lomhlaba anikela ngawo ngeMnyaka Wekukhululwa,+ intsengo yawo akukafaneli ishintjwe. 18 Nangabe anikela ngawo ngemuva kweMnyaka Wekukhululwa, umphristi kufanele ayehlise intsengo yawo, abuke kutsi sekusele iminyaka lemingakhi kufike uMnyaka Wekukhululwa lolandzelako.+ 19 Kepha nangabe lomuntfu lonikele ngalomhlaba asafuna kuphindze awutsenge, kufanele akhiphe intsengo yawo aphindze engete incenye yayo leyodvwa kuletisihlanu. Ngemuva kwaloko lomhlaba utawuphindze ube wakhe. 20 Nakangakawutsengi lomhlaba kuze ubuyele kuye futsi sewutsengiselwe lomunye umuntfu, angeke asakhona kuphindze awutsenge. 21 NgeMnyaka Wekukhululwa, lapho lomhlaba sewusuka etandleni taloyo bekawutsengile, utawuba yintfo lengcwele kuJehova futsi ube yintfo lenikelwe kuye. Ngako utawubese uba yimphahla yebaphristi.+

22 “‘Nangabe umuntfu anikela kuJehova ngemhlaba lawutsengile, longasiyo incenye yelifa lakhe,+ 23 umphristi utawubala kutsi lomhlaba utawubita kanganani kusukela ngaleso sikhatsi kuze kufike uMnyaka Wekukhululwa, bese ngalelolanga ubeka intsengo yawo.+ Lomhlaba utawuba yintfo lengcwele kuJehova. 24 NgeMnyaka Wekukhululwa, lomhlaba utawubuyiselwa kuloyo lebewutsengwe kuye, lokunguye longumnikati wawo.+

25 “‘Intsengo ngayinye kufanele ikalwe ngesisindvo selishekeli lesisemtsetfweni sasendzaweni lengcwele. Lishekeli kufanele libe ngemagera langu-20.*

26 “‘Kodvwa kute lokufanele anikele ngelitibulo lesilwane, ngobe litalwa lilitibulo laJehova.+ Lisuke selivele lilaJehova, kungaba kutsi litibulo lenkhomo nobe lemvu.+ 27 Nangabe kulitibulo lesilwane lesingcolile futsi alihlenga ngentsengo lebekiwe, kufanele akhokhe intsengo yalo aphindze engete incenye yayo leyodvwa kuletisihlanu.+ Kodvwa nakangalitsengi kuze libuyele kuye, litawutsengiswa ngentsengo lebekiwe.

28 “‘Kute intfo umuntfu layinikele ngalokuphelele* kuJehova lengatsengiswa nobe iphindze ibuyiselwe kuloyo lonikele ngayo, kungaba kutsi kunikelwe ngemuntfu, silwane nobe ngemhlaba. Tonkhe tintfo letinikelwe kuJehova tingcwele kuye.+ 29 Ngetulu kwaloko, umuntfu lolahliwe* kuze abhujiswe akukafaneli ahlengwe.+ Loyo muntfu kufanele abulawe nakanjani.+

30 “‘Konkhe kwelishumi kwemkhicito+ wemhlaba, kungaba ngulokutsetfwe esivunweni nobe etitselweni, kutawuba kwaJehova. Kuyintfo lengcwele kuJehova. 31 Nangabe umuntfu afuna kuphindze atsenge lokwelishumi kwakhe, kufanele akhokhe intsengo yako aphindze engete incenye yayo leyodvwa kuletisihlanu. 32 Konkhe kwelishumi lokutsetfwe emhlambini wetinkhomo, wetimbuti newetimvu, lokusilwane* selishumi lesitawendlula ngaphansi kwendvuku yemelusi, kutawuba yintfo lengcwele kuJehova. 33 Akukafaneli abuke kutsi sihle yini nobe cha, futsi akukafaneli asishintjise ngalesinye. Kodvwa nangabe asishintjisa, totimbili titawuba ngcwele, lesi lashintjise ngaso kanye nalesi sekucala.+ Ngeke akhone kuphindze asitsenge.’”

34 Ngulena-ke imitsetfo Jehova layitjela Mosi eNtsabeni iSinayi kutsi ayinike ema-Israyeli.+