INCWADZI YESIBILI YEMAKHOSI

1 Ngemuva kwekufa kwa-Ahabi, sive sakaMowabi+ savukela ema-Israyeli.

2 Ngaleso sikhatsi, Ahaziya wawela phansi esuka esitezi sendlu yakhe eSamariya, futsi walimala. Ngako watfumela titfunywa watsi kuto: “Hambani niyongibutela kuBhalzebubi nkulunkulu wase-Ekroni,+ ningitfolele kutsi ngitawelulama yini kulengoti lengiyitfolile.”+ 3 Kodvwa ingilosi yaJehova yefika ku-Elija*+ umThishbe yatsi: “Sukuma uhambe uyohlangana netitfunywa tenkhosi yaseSamariya ufike utsi kuto: ‘Akekho yini Nkulunkulu ka-Israyeli kutsi ungaze uhambe uyobuta kuBhalzebubi nkulunkulu wase-Ekroni?+ 4 Ngenca yaloko, naku lokushiwo nguJehova: “Angeke uvuke kulombhedze lolele kuwo, nakanjani utakufa.”’” Nakacedza kusho loko, Elija wahamba.

5 Ngesikhatsi letitfunywa tibuyela enkhosini Ahaziya, ngekushesha yatibuta yatsi: “Nijikeleni?” 6 Tona tayiphendvula tatsi: “Kunendvodza lesihlangene nayo yatsi, ‘Jikani nibuyele kulenkhosi lenitfumile nifike nitsi, “Naku lokushiwo nguJehova: ‘Akekho yini Nkulunkulu ka-Israyeli kutsi ungaze uhambe uyobuta kuBhalzebubi nkulunkulu wase-Ekroni? Ngenca yaloko, angeke uvuke kulombhedze lolele kuwo, nakanjani utakufa.’”’”+ 7 Nayikuva loko yabuta letitfunywa yatsi: “Lendvodza lenihlangene nayo yakhuluma lamavi beyibukeka kanjani?” 8 Letitfunywa tatsi kuyo: “Bekuyindvodza legcoke sembatfo lesineboya+ kantsi futsi beyibophe libhande lesikhumba elukhalo.”+ Ngekushesha lenkhosi yatsi: “Bekungu-Elija umThishbe.”

9 Inkhosi yabese itfumela indvuna yemasotja langu-50 nemasotja ayo langu-50 ku-Elija. Ngesikhatsi lendvuna ikhuphuka iya kuye, abehleti esicongweni sentsaba. Lendvuna yatsi kuye: “Nceku yaNkulunkulu+ weliciniso, inkhosi itsi: ‘Yehla lapho.’” 10 Kodvwa Elija waphendvula lendvuna yemasotja langu-50 watsi: “Nangabe ngiyinceku yaNkulunkulu, akwehle umlilo emazulwini+ ukucotfule nalamasotja akho langu-50.” Kwabese kwehla umlilo emazulwini wayicotfula nalamasotja ayo langu-50.

11 Ngemuva kwaloko, lenkhosi yaphindze yatfumela lenye indvuna yemasotja langu-50 nemasotja ayo langu-50 ku-Elija. Yaya kuye yafike yatsi: “Nceku yaNkulunkulu weliciniso, inkhosi itsi: ‘Yehla lapho ngekushesha.’” 12 Kodvwa Elija wabaphendvula watsi: “Nangabe ngiyinceku yaNkulunkulu weliciniso, akwehle umlilo emazulwini ukucotfule nalamasotja akho langu-50.” Kwabese kwehla umlilo waNkulunkulu emazulwini wayicotfula nalamasotja ayo langu-50.

13 Inkhosi yabese itfumela indvuna yesitsatfu yelibutfo lemasotja langu-50 kanye nemasotja ayo langu-50 kuye. Lendvuna yakhuphuka yafike yaguca embikwa-Elija, yamncenga kutsi abe nemusa yatsi kuye: “Nceku yaNkulunkulu weliciniso, ngicela kutsi imphilo yami kanye nemphilo yaletinceku takho* letingu-50, ibe ligugu emehlweni akho. 14 Umlilo sewuvele wehlile uvela emazulwini washisa lamadvodza lamabili labekatindvuna temasotja langu-50 kanye nalamasotja langemacembu lamabili abo-50, kodvwa nyalo ngicela kutsi kuphila* kwami kube ligugu emehlweni akho.”

15 Ingilosi yaJehova yabese itsi ku-Elija: “Yewuka kanye nayo. Ungayesabi.” Ngako Elija wasukuma wewuka nalendvuna waya enkhosini. 16 Elija wabese utsi enkhosini: “Naku lokushiwo nguJehova: ‘Wena utfumele titfunywa kutsi tiyobuta kuBhalzebubi nkulunkulu wase-Ekroni.+ Kute yini Nkulunkulu ka-Israyeli kutsi bewungaze wente njalo?+ Wentiwe yini kutsi ungafuni kuva livi lakhe? Ngenca yaloko, angeke uvuke kulombhedze lolele kuwo, nakanjani utakufa.’” 17 Ngako inkhosi Ahaziya yafa njengobe Jehova abeshito nga-Elija. Njengoba lenkhosi beyite indvodzana, Jehoramu*+ waba yinkhosi ngemuva kwayo ngemnyaka wesibili wekubusa kwaJehoramu+ indvodzana yaJehoshafati inkhosi yakaJuda.

18 Lomunye umlandvo wa-Ahaziya+ naloko lakwenta, kubhaliwe encwadzini yemlandvo wangetikhatsi temakhosi aka-Israyeli.

2 Ngesikhatsi Jehova asatawutsatsa Elija+ amyise emazulwini* ngemoya lomkhulu,+ Elija na-Elisha+ bahamba besuka eGilgali.+ 2 Elija watsi ku-Elisha: “Ngicela usale lana ngobe Jehova ungitfumele eBetheli.” Kodvwa Elisha wamphendvula watsi: “Ngifunga kuphila kwaJehova nekuphila* kwakho ngitsi angeke ngikushiye.” Ngako behlela eBetheli.+ 3 Emadvodzana ebaphrofethi* eBetheli abese ayaphuma aya ku-Elisha efika atsi: “Uyati yini kutsi lamuhla Jehova utawutsatsa inkhosi yakho ingasaphindzi ibe ngumholi wakho?”+ Yena wawaphendvula watsi: “Sengivele ngiyati. Asenithule.”

4 Elija wase utsi kuye: “Elisha, ngicela usale lana ngobe Jehova ungitfumele eJerikho.”+ Kodvwa yena wamphendvula watsi: “Ngifunga kuphila kwaJehova nekuphila* kwakho ngitsi, angeke ngikushiye.” Ngako bahamba baze bayofika eJerikho. 5 Emadvodzana ebaphrofethi lebekaseJerikho eta ku-Elisha atsi: “Uyati yini kutsi lamuhla Jehova utawutsatsa inkhosi yakho, ingasabi ngumholi wakho?” Yena wawaphendvula watsi: “Sengivele ngiyati. Asenithule.”

6 Elija wase utsi kuye: “Elisha, ngicela usale lana ngobe Jehova ungitfumele eJordane.” Kodvwa yena wamphendvula watsi: “Ngifunga kuphila kwaJehova nekuphila* kwakho ngitsi, ngeke ngikushiye.” Ngako bobabili bachubeka neluhambo lwabo. 7 Emadvodzana ebaphrofethi langu-50 abalandzela afike ema khashanyana ababuka ngesikhatsi bobabili beme eceleni kweJordane. 8 Elija wabese utsatsa sembatfo sakhe sebaphrofethi+ wasigoca washaya ngaso emanti ehlukana ekhatsi, lamanye aya ngesekudla lamanye aya ngesencele futsi bobabili bewela bahamba emhlabatsini lowomile.+

9 Ngekushesha nje nabacedza kwewela, Elija watsi ku-Elisha: “Cela noma ngabe yini lofuna ngikwentele yona ngaphambi kwekutsi ngitsatfwe kuwe.” Elisha watsi: “Ngicela kwemukela incenye lephindvwe kabili*+ yemoya wakho?”+ 10 Wamphendvula watsi: “Ucele intfo lematima. Nangabe utangibona nangitsatfwa kuwe, lentfo loyicelako itakwenteka; kodvwa nangabe ungeke ungibone, angeke yenteke.”

11 Njengobe bebachubeka neluhambo bacoca, ngekushesha kwefika incola yemlilo kanye nemahhashi langumlilo+ kwabehlukanisa, Elija wakhuphukela emazulwini* ngemoya lomkhulu.+ 12 Njengobe Elisha bekabukele, bekamemeta atsi: “Babe wami, babe wami! Incola nebagibeli bemahhashi baka-Israyeli!”+ Watsi nakangasamboni, Elisha wabamba tembatfo takhe watidzabula ekhatsi.+ 13 Ngemuva kwaloko, wabutsa lesembatfo semphrofethi+ Elija lebesiwele phansi wase ubuyela emuva wafike wema eceleni kweJordane. 14 Wabese utsatsa lesembatfo semphrofethi Elija lebesiwele phansi washaya ngaso emanti futsi watsi: “Uphi Jehova Nkulunkulu wa-Elija?” Watsi nakashaya lamanti ehlukana ekhatsi, lamanye aya ngesencele lamanye aya ngesekudla wase uyewela.+

15 Ngesikhatsi lamadvodzana ebaphrofethi laseJerikho ambona achamuka khashanyana, atsi: “Umoya wa-Elija sewuhleli etikwa-Elisha.”+ Abese ayomhlangabeta futsi aguca embikwakhe. 16 Atsi kuye: “Nankha emadvodza langu-50 langemachawe akanye netinceku takho. Sicela kuwatfuma ayofuna inkhosi yakho. Mhlawumbe umoya waJehova uyiphakamisile wase uyiphonsa kulenye yetintsaba nobe kulesinye sihosha.”+ Yena waphendvula watsi: “Ningawatfumeli.” 17 Lamadvodzana ebaphrofethi bekasolo amcela waze wadliwa ngemahloni, wase utsi: “Watfumeni.” Ngako bawatfuma lamadvodza langu-50 achubeka amfuna emalanga lamatsatfu kodvwa akazange amtfole. 18 Nakabuya lamadvodza, Elisha besekahlala eJerikho.+ Watsi kuwo: “Angikanitjeli yini kutsi ningahambi?”

19 Ngekuhamba kwesikhatsi, emadvodza elidolobha atsi ku-Elisha: “Inkhosi yami iyabona kutsi lelidolobha lisendzaweni lekahle+ kodvwa emanti akhona mabi nalelive alikhiciti.”* 20 Yena wawaphendvula watsi: “Ngiletseleni indishi lensha lencane nifake luswayi kuyo.” Ngako bamletsela. 21 Wase uyahamba uya emtfonjeni walamanti, wafike watsela loluswayi kuwo+ wase utsi: “Naku lokushiwo nguJehova: ‘Lamanti sengiwelaphile. Angeke asabangela kufa nome ente kutsi bantfu bangabatfoli bantfwana.’”* 22 Lamanti elapheka kuze kube ngulamuhla ngekuvumelana nelivi lelashiwo ngu-Elisha.

23 Wesuka lapho wakhuphukela eBetheli. Nakasasendleleni kwachamuka bafanyana edolobheni bacala kumedzelela+ futsi bebachubeka batsi: “Yenyuka, mphandla-ndzini! Yenyuka, mphandla-ndzini!” 24 Ekugcineni Elisha wagucuka wababuka futsi wabacalekisa egameni laJehova. Kwabese kuchamuka emabhele lamabili+ ehlatsini adzabudzabula labafanyana labangu-42 baba ticucu.+ 25 Wachubeka neluhambo lwakhe kusukela lapho waze wayofika eNtsabeni iKhameli+ futsi nakesuka kulentsaba wabuyela eSamariya.

3 Jehoramu,+ indvodzana ya-Ahabi, waba yinkhosi ka-Israyeli eSamariya ngemnyaka wesi-18 wekubusa kweNkhosi Jehoshafati yakaJuda, futsi wabusa iminyaka lengu-12. 2 Wachubeka enta lokubi emehlweni aJehova kodvwa akafikanga ezingeni lababe wakhe namake wakhe ngobe wasusa litje lelingcwele laBhali lebelentiwe ngubabe wakhe.+ 3 Nome kunjalo, wanamatsela etonweni taJerobowamu indvodzana yaNebati, lowabangela kutsi ema-Israyeli atente.+ Akazange asuke kuto.

4 Mesha inkhosi yakaMowabi bekafuye timvu. Bekavame kunika inkhosi yaka-Israyeli emazinyane etimvu langu-100 000 kanye netimvu letindvuna letingakahhulwa letingu-100 000 njengetetfulo. 5 Ngekushesha nje nakufa Ahabi,+ inkhosi yakaMowabi yavukela inkhosi yaka-Israyeli.+ 6 Ngako iNkhosi Jehoramu yaphuma ngalelolanga eSamariya yahlanganisa onkhe ema-Israyeli kutsi alungele kulwa. 7 Yaphindze yatfumelela iNkhosi Jehoshafati yakaJuda umlayeto yatsi: “Inkhosi yakaMowabi ingivukele, utawuhamba nami yini siyokulwa nebakaMowabi?” Jehoshafati wayiphendvula watsi: “Sitawuhamba.+ Mine ngifana nawe. Bantfu bami bafana nebantfu bakho. Emahhashi ami afana nemahhashi akho.”+ 8 INkhosi Jehoshafati yabese iyabuta itsi: “Sitakwenyuka ngayiphi indlela?” INkhosi Jehoramu yaphendvula yatsi: “Ngendlela yasehlane laka-Edomu.”

9 Inkhosi yaka-Israyeli yabese ihamba nenkhosi yakaJuda kanye nenkhosi yaka-Edomu.+ Ngemuva kwekuhamba ngendlela legegako emalanga langu-7, emasotja kanye nemfuyo lebeyibalandzela kwaphelelwa ngemanti. 10 Inkhosi yaka-Israyeli yatsi: “Kwaze kwaba kubi! Jehova ubite lamakhosi lamatsatfu kuze awanikele esandleni sebantfu bakaMowabi!” 11 Jehoshafati wase utsi: “Akekho yini umphrofethi waJehova lapha lesingabuta Jehova sisebentisa yena?”+ Lenye yetinceku tenkhosi yaka-Israyeli yaphendvula yatsi: “Kuna-Elisha+ indvodzana yaShafati lebekavame kutsela emanti etandleni ta-Elija.”*+ 12 Jehoshafati wabese utsi: “Livi laJehova linaye.” Ngako lenkhosi yaka-Israyeli naJehoshafati kanye nenkhosi yaka-Edomu baya kuye.

13 Elisha wakhuluma nenkhosi yaka-Israyeli watsi: “Ngingenelana ngani nawe mine?*+ Hamba uye kubaphrofethi bababe wakho nebaphrofethi bamake wakho.”+ Inkhosi yaka-Israyeli yona yatsi kuye: “Angeke ngiye ngobe nguJehova lobite lamakhosi lamatsatfu kuze awanikele esandleni sebantfu bakaMowabi.” 14 Kuloko, Elisha watsi: “Ngifunga Jehova Nkulunkulu wemabutfo lophilako futsi lengimkhontako* kutsi kube akusiko kutsi ngihlonipha iNkhosi Jehoshafati+ yakaJuda, bengingeke ngikubuke nekukubuka futsi bengingeke ngikunake.+ 15 Ngicela ningiletsele umuntfu loshaya lihabhu.”*+ Ngekushesha nje lomshayi welihabhu nakacala kulidlala, sandla saJehova sefika ku-Elisha.+ 16 Watsi, “Naku lokushiwo nguJehova: ‘Gubhani imisele leminyenti kulesihosha, 17 ngobe naku lokushiwo nguJehova: “Angeke ube khona umoya nemvula; kodvwa lesihosha sitawugcwala emanti+ bese nine niyanatsa kanye nemfuyo yenu naletinye tilwane tenu.”’ 18 Kodvwa loku kuyintfo lelula emehlweni aJehova+ ngobe utawuphindze anikele sive sakaMowabi esandleni senu.+ 19 Kufanele ubhidlite onkhe emadolobha+ labiyelwe nawo onkhe emadolobha elikhetselo, ujube tonkhe tihlahla letinhle, uvimbe yonkhe imitfombo yemanti futsi kufanele wone yonkhe indzawo lenhle ngekuyigcwalisa ematje.”+

20 Ekuseni ngesikhatsi semnikelo walokutinhlavu,+ kwachamuka emanti avela ngaka-Edomu futsi lonkhe live lagcwala emanti.

21 Bonkhe bantfu bakaMowabi beva kutsi emakhosi sekafikile atolwa nabo, ngako babita onkhe emadvodza lebekangakhona kuhloma ngetikhali* bema emnceleni. 22 Nabavuka ekuseni kakhulu, lilanga belicwebetelisa lamanti futsi sive sakaMowabi lebesingesheya, besibona lamanti abovu njengengati. 23 Bantfu bakaMowabi batsi: “Lena yingati! Lamakhosi abulelene ngenkemba. Manje Mowabi, shona khona etintfweni+ tawo uyotitsatsela!” 24 Nabefika lapho ema-Israyeli bekamise khona emathende, lama-Israyeli asukuma futsi acala kubulala bantfu bakaMowabi lebebabaleka.+ Ema-Israyeli abesolo abacosha abulala wonkhe umuntfu lebekamtfola endleleni, aze ayongena kaMowabi. 25 Abhidlita onkhe lamadolobha futsi wonkhe umuntfu abejikijela litje kuyo yonkhe indzawo lenhle yaze yagcwala ematje; avimba yonkhe imitfombo yemanti+ futsi ajuba tonkhe tihlahla letinhle.+ Kwagcine kusele lubondza lwaseKhiri-heresethi+ kuphela futsi emasotja lebekasebentisa tidubulelo alutungeleta, alulahla phansi.

26 Ngesikhatsi inkhosi yakaMowabi ibona kutsi seyincotjiwe, yatsatsa emadvodza langu-700 lahlome ngetinkemba badzabula ekhatsi, bayohlasela inkhosi yaka-Edomu;+ kodvwa abakhonanga kukwenta loko. 27 Ngako yatsatsa indvodzana yayo lelitibulo lebekufanele kutsi ibe yinkhosi ngemuva kwayo yanikela ngayo kutsi ibe ngumhlatjelo wekushiswa+ elubondzeni. Ema-Israyeli abese atfukutselelwa kakhulu, futsi ayekela kulwa nebantfu bakaMowabi, abuyela eveni lawo.

4 Lomunye webafati bemadvodzana ebaphrofethi+ wakhala ku-Elisha watsi: “Inceku yakho lebeyikadze iyindvodza yami seyifile futsi wena wati kahle kutsi lenceku yakho beyisolo imesaba Jehova.+ Nyalo umuntfu lebesimkweleta ufikile watsatsa bantfwabami bobabili wayobenta tigcili takhe.” 2 Elisha wamphendvula watsi: “Yini lofuna ngikwentele yona? Ngicela ungitjele, unani endlini?” Yena wamphendvula watsi: “Incekukati yakho ayinalutfo ngaphandle kwelijeke lemafutsa.”+ 3 Elisha wase utsi: “Phumela ngephandle uyocela kubomakhelwane bakho tintfo tekufaka emafutsa letingenalutfo. Ubocela letinyenti, nome tingaba tingakhi. 4 Ubobese ungena endlini nemadvodzana akho uvale umnyango. Ubotetsa tonkhe letintfo tekufaka emafutsa bese utibeka ndzawonye lesetigcwele.” 5 Ngako lomfati wamshiya.

Nasekangenile endlini akanye nemadvodzana akhe bavala umnyango, lamadvodzana ase amniketa letintfo tekutsela emafutsa futsi lomfati bekachubeka nekwetsa.+ 6 Ngesikhatsi letintfo tekufaka emafutsa setigcwele, lomfati watsi kulenye yalamadvodzana akhe: “Ngicela uletse lenye intfo yekufaka emafutsa.”+ Yona yamphendvula yatsi: “Setiphelile letintfo.” Ngaleso sikhatsi, lamafutsa abese ayancamuka kutfululeka.+ 7 Wahamba wayobikela lomuntfu waNkulunkulu weliciniso futsi yena watsi: “Hamba uyotsengisa lamafutsa bese ubhadala letikweleti takho futsi wena nemadvodzana akho ningaphila ngalokutawusala.”

8 Ngalelinye lilanga, Elisha wahamba waya eShunemu+ lapho bekunemfati lowatiwako futsi wamcela kutsi aphambukele kakhe kuze amphakele kudla.+ Njengobe bekavame kwendlula lapho, bekaphambukela lapho ayokudla. 9 Ngako watsi kumyeni wakhe: “Ngiyati kutsi ngumuntfu longcwele waNkulunkulu lona lovame kuhamba ngalendlela. 10 Ngicela sakhe likamelo lelincane etikwendlu+ futsi simfakele umbhedze, litafula, situlo kanye nesibane. Kutawutsi nakefika, ahlale kulo.”+

11 Ngalelinye lilanga, Elisha wafika lapho futsi waya kulelikamelo lelisetikwendlu kuze acambalale. 12 Wabese utsi kuGehazi+ inceku yakhe: “Bita lomfati longumShunemu.”+ Ngako wambita futsi wafike wema embikwa-Elisha. 13 Wabese utsi kuGehazi: “Ngicela utjele lomfati utsi: ‘Utihlupheleni kangaka ngenca yetfu?+ Ngingakwentelani?+ Ufuna ngikukhulumele enkhosini+ yini noma endvuneni yelibutfo lemphi?’” Yena waphendvula watsi: “Mine ngiphila emkhatsini webantfu bakitsi.” 14 Ngako watsi: “Yini langentelwa yona?” Gehazi waphendvula watsi: “Ute indvodzana+ futsi indvodza yakhe seyikhulile.” 15 Ngekushesha watsi: “Mbite.” Ngako wambita futsi lomfati wema emnyango. 16 Elisha wabese utsi: “Kulomnyaka lotako ngalesikhatsi, utawube sewunendvodzana.”+ Kodvwa yena waphendvula watsi: “Ngeke kwenteke nkhosi yami, muntfu waNkulunkulu weliciniso! Ungawakhulumi emanga encekukatini yakho.”

17 Nome kunjalo, lomfati wakhulelwa futsi watala indvodzana emnyakeni lolandzelako, ngaso sona leso sikhatsi lebesishiwo ngu-Elisha. 18 Lomntfwana wakhula futsi ngalelinye lilanga waphuma waya kubabe wakhe lobekanebantfu labavunako. 19 Lomntfwana bekasolo akhala kubabe wakhe atsi: “Ngafa yinhloko, ngafa yinhloko!” Babe wakhe wabese ukhuluma nenceku yakhe utsi: “Mtsatse umyise kumake wakhe.” 20 Ngako yamtsatsa yamyisa kumake wakhe futsi wamgona kwaze kwaba semini, wagcine afile.+ 21 Make wakhe wamtsatsa wakhuphuka naye, wafike wamlalisa embhedzeni wenceku yaNkulunkulu weliciniso+ wase uvala umnyango uyamshiya. 22 Wabese ubita indvodza yakhe watsi: “Ngicela ungitfumelele inceku kanye nembongolo yinye futsi ngicela ungivumele ngiye encekwini yaNkulunkulu weliciniso ngekushesha, ngitawuphindze ngibuye.” 23 Kodvwa yona yatsi: “Yini lekwenta ufune kuyoyibona lamuhla? Isengaketfwasi mosi nenyanga+ futsi akusilo nelisabatha.” Lomfati waphendvula watsi: “Konkhe kuhamba kahle.” 24 Ngako wagibela lembongolo wase utsi encekwini yakhe: “Hamba ngekushesha. Ungalehlisi litubane ngaphandle kwanangabe utjelwa ngimi.”

25 Ngako lomfati wahamba waya kulomuntfu waNkulunkulu weliciniso eNtsabeni iKhameli. Ngekushesha nje lomuntfu waNkulunkulu weliciniso nakambona asesekhashane, watsi kuGehazi inceku yakhe: “Nanguya lomfati waseShunemu. 26 Ngicela ugijime uye kuye ufike umbute utsi, ‘Uyaphila yini? Indvodza yakho iyaphila yini? Umntfwanakho uyaphila yini?’” Lomfati waphendvula lenceku watsi: “Konkhe kuhamba kahle.” 27 Nakefika kulomuntfu waNkulunkulu weliciniso entsabeni, lomfati wabamba tinyawo takhe.+ Nakabona loko Gehazi wasondzela kuye wafike wamfusha, kodvwa lomuntfu waNkulunkulu weliciniso watsi: “Myekele ngobe ucindzeteleke kakhulu* kantsi Jehova usangifihlele ngaloko futsi usengakangitjeli.” 28 Lomfati wabese utsi: “Ngayicela yini indvodzana enkhosini yami? Angizange yini ngisho ngitsi: ‘Unganginiki litsemba lelingekho’?”+

29 Ngekushesha Elisha watsi kuGehazi: “Bopha tingubo takho elukhalo+ utsatse indvuku yami lesesandleni sakho uhambe. Nakwenteka uhlangana nemuntfu ungambingeleli; futsi nakwenteka ubingelelwa ngumuntfu, ungavumi. Hamba ufike ubeke lendvuku yami ebusweni balomfana.” 30 Nakeva loko make walomfana watsi: “Ngifunga Jehova Nkulunkulu lophilako kanye nangekuphila* kwakho, ngitsi angeke ngikushiye.”+ Ngako Elisha wasukuma wahamba nalomfati. 31 Gehazi wahamba embikwabo wafike wabeka lendvuku ebusweni balomfana, kodvwa kute lokwamkhombisa kutsi sewuyaphila.+ Wabuyela emuva ku-Elisha wafike watsi: “Lomfana akakavuki.”

32 Ngesikhatsi Elisha efika kulendlu, watfola lomfana asembhedzeni wakhe afile.+ 33 Wabese uvala umnyango waba ngekhatsi nalomfana lofile, wase ucala kuthantaza kuJehova.+ 34 Elisha wabese ugibela kulombhedze walala etikwalomntfwana wabeka umlomo wakhe emlonyeni walomfana, emehlo akhe wawabeka emehlweni alomfana netandla takhe watibeka kuleti talomfana. Umtimba walomntfwana wabese ucala kufutfumala.+ 35 Elisha wayaluka kulendlu, wabese ugibela kulombhedze waphindze walala etikwalomfana. Lomfana watsimula tikhatsi letingu-7 wabese uvula emehlo.+ 36 Elisha wabese ubita Gehazi watsi kuye: “Bita lomfati longumShunemu.” Ngako wambita futsi waya ku-Elisha. Elisha watsi kuye: “Tsatsa indvodzana yakho.”+ 37 Lomfati wangena wawela etinyaweni ta-Elisha futsi waguca phansi embikwakhe, wase utsatsa indvodzana yakhe uphumela ngephandle.

38 Ngesikhatsi Elisha abuyela eGilgali bekunendlala kuleyondzawo.+ Emadvodzana ebaphrofethi+ bekahleli embikwakhe futsi watsi encekwini yakhe:+ “Beka libhodo lelikhulu etiko bese uphekela lamadvodzana ebaphrofethi sitjulo.” 39 Ngako lomunye wabo wahamba waya esigangeni wayowukha umbhidvo, watfola tihlahla tesiganga wase ukha nemaselwa esiganga wawagcwalisa ingubo lebekayigcokile. Wabese ubuyela emuva wayowacoba wawafaka kulelibhodo lesitjulo angati kutsi ayini. 40 Ngemuva kwesikhatsi baphakela lamadvodza lesitjulo khona atokudla, kodvwa nawasasidla amemeta atsi: “Nceku yaNkulunkulu weliciniso, kunekufa kulelibhodo.” Abese akasakhoni kusidla. 41 Ngako Elisha watsi: “Letsani fulaha.” Wabese uyawutsela kulelibhodo, wase utsi: “Phakela labantfu.” Besekute butsi kulelibhodo.+

42 Indvodza letsite yeta isuka eBhali-shalisha,+ futsi yaphatsela lomuntfu waNkulunkulu weliciniso tinkhwa letingu-20 tebhali+ letibhakwe ngebhali yekucala futsi beyiphetse nelisaka lalokutinhlavu lokusha.+ Elisha wabese utsi: “Lokudla kunikete labantfu batokudla.” 43 Kodvwa lenceku yakhe yatsi: “Lokudla ngingakuphakela njani emadvodza langu-100?”+ Yena wayiphendvula watsi: “Kunike labantfu badle ngobe naku lokushiwo nguJehova, ‘Batakudla kuphindze kusale.’”+ 44 Wabese ubeka lokudla embikwabo, badla futsi lokunye kwasala,+ ngekuvumelana nelivi laJehova.

5 Namani bekayindvuna yelibutfo lenkhosi yaseSiriya, ayindvodza lesesikhundleni lesisetulu lebeyihlonishwa yinkhosi yayo ngobe Jehova bekamsebentisile ekuncobeni kwesive semaSiriya. Namani bekalichawe lelinemandla, nanobe bekaphetfwe sifo sebulephelo.* 2 Kulokunye kuhlasela kwawo, emaSiriya atfumba intfombatanyana yaka-Israyeli leyaba yincekukati yemfati waNamani. 3 Lentfombatanyana yatsi kumfati waNamani: “Kube inkhosi yami beyingavakashela umphrofethi+ eSamariya! Yena abengayelapha kulesifo sebulephelo.”+ 4 Wahamba-ke* waya enkhosini yakhe, wafike wayibikela loko lentfombatanyana yaka-Israyeli beyikushito.

5 Inkhosi yaseSiriya yabese itsi: “Hamba nyalo! Ngitawutfumelela inkhosi yaka-Israyeli incwadzi.” Ngako Namani wahamba nemathalenta* langu-10 elisiliva, tigadla teligolide letingu-6 000 kanye netembatfo letinsha tekushintja letingu-10. 6 Yatfumelela inkhosi yaka-Israyeli incwadzi lebeyitsi: “Ngitfumela kuwe inceku yami Namani kanye nalencwadzi, kuze umelaphe kulesifo sakhe sebulephelo.” 7 Ngekushesha nje inkhosi yaka-Israyeli nase iyifundzile lencwadzi, yadzabula timphahla tayo, yase itsi: “NginguNkulunkulu yini mine kutsi ngingabulala ngiphindze ngiphilise?+ Ngobe itfumele lendvodza kimi futsi ingitjela kutsi angiyelaphe kulesifo sayo sebulephelo! Nani niyatibonela-ke kutsi ifuna sicabane.”

8 Watsi Elisha umuntfu waNkulunkulu weliciniso nakeva kutsi inkhosi yaka-Israyeli idzabule timphahla tayo, ngekushesha watfumela livi kuyo lelitsi: “Utidzabuleleni letingubo takho? Ngicela umvumele ete kimi kuze ati kutsi kunemphrofethi ka-Israyeli.”+ 9 Ngako Namani weta nemahhashi kanye netincola takhe temphi wafike wema emnyango wendlu ya-Elisha. 10 Elisha watfumela sitfunywa kutsi simtjele sitsi: “Hamba uye eJordane+ ufike ugeze tikhatsi letingu-7.+ Umtimba wakho utakwelapheka futsi wena utawuhlanteka.” 11 Nakeva loko, Namani watfukutsela wase ucala kuhamba, watsi: “Mine bengititjela ngitsi: ‘Utawuphuma ete kimi, eme la embikwami bese ubita libito laJehova Nkulunkulu wakhe, ahambise tandla takhe tiye emuva nasembili kuze elaphe lobulephelo.’ 12 I-Abana nePhaphari, lokuyimifula yaseDamaseko,+ ayincono yini kunemifula yaka-Israyeli? Angeke yini ngigeze kuyo ngihlanteke?” Nakacedza kusho njalo, wagucuka wahamba atfukutsele kakhulu.

13 Tinceku takhe taya kuye futsi tatsi: “Babe, kube lomphrofethi utsite yenta intfo lemangalisako, bewungeke yini uyente? Kangakanani-ke njengobe umane nje watsi: ‘Geza utohlanteka’?” 14 Wabese uyehla-ke Namani waya eJordane wafike wangena* emantini tikhatsi letingu-7, njengobe lomuntfu waNkulunkulu weliciniso+ ashito. Ngemuva kwaloko umtimba wakhe welapheka wafana newemfana lomncane+ futsi wahlanteka.+

15 Ngemuva kwaloko, wabuyela kulomuntfu waNkulunkulu weliciniso+ ahamba nalabantfu labebamsingatsile,* wafike wema embikwakhe wase utsi: “Nyalo sengiyati kutsi kute Nkulunkulu kulenye indzawo emhlabeni wonkhe ngaphandle kwaka-Israyeli.+ Ngicela wemukele lesipho* kimi inceku yakho.” 16 Kodvwa Elisha watsi: “Ngifunga Jehova Nkulunkulu lophilako lengimkhontako* ngitsi, angeke ngisitsatse.”+ Abemncenga kutsi asitsatse, kodvwa Elisha bekasolo ala kusitsatsa. 17 Ekugcineni Namani watsi: “Nangabe ungasitsatsi, ngicela inceku yakho inikwe umhlabatsi wakulendzawo loyimitfwalo lemibili yeminyuzi ngobe inceku yakho angeke iphindze inikele umnikelo wekushiswa nobe umhlatjelo kunome ngabe ngumuphi lomunye nkulunkulu ngaphandle kwaJehova. 18 Shengatsi Jehova angayicolela inceku yakho ngentfo yinye: Nangabe inkhosi yami ingena endlini* yaRimona kute iguce lapho, isima ngekubambelela esandleni sami, ngako kufanele ngikhotsame endlini yaRimona. Nangikhotsama endlini yaRimona, shengatsi Jehova angayicolela inceku yakho ngaloko.” 19 Nakeva loko watsi kuye: “Hamba ngekuthula.” Wabese uyesuka kuye wahamba libanga lelitsite, 20 futsi Gehazi+ inceku ya-Elisha umuntfu waNkulunkulu weliciniso,+ watsi enhlitiyweni yakhe: ‘Inkhosi yami imyekele Namani+ umSiriya ngekutsi ingakwemukeli loko lete nako. Ngifunga Jehova Nkulunkulu lophilako ngitsi ngitawugijima ngimlandzele bese ngitsatsa lokutsite kuye.’ 21 Gehazi wabese uyagijima uya kuNamani. Watsi Namani nakabona kutsi kunemuntfu logijima emva kwakhe, wehla encoleni yakhe wayomhlangabeta futsi watsi kuye: “Kukhona yini lesekonakele?” 22 Yena watsi: “Kute lokonakele. Inkhosi yami ingitfume kuwe yatsi ngikutjele ngitsi: ‘Kusandza kufika emadvodza lamabili labuya esifundzeni lesinetintsaba saka-Efrayimu, futsi esuka emadvodzaneni ebaphrofethi. Ngicela uwanikete lithalenta lelisiliva netembatfo letimbili tekushintja letinsha.’”+ 23 Namani watsi: “Hamba uyotsatsa emathalenta lamabili.” Wachubeka amncenga+ futsi Namani wamfakela emathalenta lamabili elisiliva etikhwameni letimbili kanye netembatfo letimbili letinsha tekushintja wakunika tinceku takhe letimbili taphatsela Gehazi.

24 Nakefika e-Ofeli,* watitsatsa letintfo kuletinceku watifaka endlini wase utsi letinceku atihambe. Nasetihambile, 25 wangena wafike wema eceleni kwenkhosi yakhe. Elisha wambuta watsi: “Ubuyaphi yeGehazi?” Kodvwa yena watsi: “Inceku yakho ayikaze iye ndzawo.”+ 26 Elisha watsi kuye: “Ucabanga kutsi angati yini kutsi wena uyilandzele lendvodza nekutsi yehle encoleni yayo kute ikuhlangabete? Lesi sikhatsi sekwemukela lisiliva yini nobe tembatfo nobe tihlahla temncumo nobe emasimu emagilebisi nobe timvu nobe tinkhomo nobe tinceku nobe tincekukati?+ 27 Bulephelo baNamani+ sebutawunamatsela kuwe nasentalelwaneni yakho kuze kube phakadze.” Ngekushesha waphuma embikwa-Elisha sekanebulephelo futsi sekamhlophe njengelichwa.+

6 Emadvodzana ebaphrofethi+ atsi ku-Elisha: “Lendzawo lesihlala kuyo yincane kakhulu kunatsi. 2 Sicela kuhamba siye eJordane. Ngamunye wetfu atsatse lugodvo lapho bese sakha indzawo lesitawuhlala kuyo.” Watsi kuwo: “Hambani.” 3 Lenye yemadvodzana ebaphrofethi yatsi: “Sicela uhambe netinceku takho.” Elisha waphendvula watsi: “Ngitawuhamba.” 4 Ngako wahamba nawo futsi befika eJordane base bacala kugawula tihlahla. 5 Njengobe lenye yawo igawula sihlahla, lizembe lanyomuka emphinini walo lagcumkela emantini, yase iyamemeta itsi: “Awu nkhosi yami, belibolekiwe!” 6 Lomuntfu waNkulunkulu weliciniso watsi: “Ligcumkele ngakuphi?” Ngako yamkhombisa lendzawo lebeligcumkele kuyo. Wabese ujuba indvuku wayijikijela labekugcumkele khona lelizembe, labese liyandanda. 7 Watsi: “Litsatse.” Ngako lendvodza yelula sandla sayo yalitsatsa.

8 Inkhosi yaseSiriya yase iyahamba iyokulwa nema-Israyeli.+ Yancutfulisa etincekwini tayo yase itsi: “Ngitawumisa nani emathende endzaweni letsite.” 9 Lomuntfu waNkulunkulu weliciniso+ wabese utfumela livi enkhosini yaka-Israyeli lelitsi: “Ungalokotsi wendlule kuleyondzawo ngobe emaSiriya atakwehlela kuyo.” 10 Ngako inkhosi yaka-Israyeli yatfumela livi leliya kuleyondzawo umuntfu waNkulunkulu lamecwayisa ngayo. Elisha wachubeka ayecwayisa futsi ayizange iye kulendzawo tikhatsi letinyenti.+

11 Loku kwayitfukutselisa kakhulu inkhosi* yaseSiriya, kangangekutsi yaze yabita tinceku tayo yatsi kuto: “Asenisho, ngubani lamkhatsini wetfu losekela inkhosi yaka-Israyeli?” 12 Lenye inceku yalenkhosi yaphendvula yatsi: “Kute lakitsi nkhosi! Ngu-Elisha umphrofethi waka-Israyeli lona lotjela lenkhosi yaka-Israyeli tintfo wena lotikhuluma usekamelweni lakho.”+ 13 Ngako yatsi: “Hambani niyofuna kutsi ukuphi ngitotfumela emadvodza ambambe.” Ngekuhamba kwesikhatsi, yabikelwa kwatsiwa: “UseDothani.”+ 14 Ngekushesha yatfumela emahhashi netincola temphi kanye nelibutfo lelikhulu lemphi; lefika ebusuku futsi latungeleta lelidolobha.

15 Inceku* yalomuntfu waNkulunkulu weliciniso yatsi nayivuka ekuseni kakhulu futsi iphumela ngephandle, yabona libutfo nemahhashi netincola temphi kutungelete lelidolobha. Ngekushesha lenceku yatsi ku-Elisha: “Awu nkhosi yami! Sitakwenta njani?” 16 Kodvwa watsi kuyo: “Ungesabi!+ Ngobe banyenti labanatsi kunalabo labanabo.”+ 17 Elisha wabese uyathantaza utsi: “Awu Jehova, ngicela uvule emehlo akhe atobona.”+ Ngekushesha Jehova wawavula emehlo alenceku futsi yabona lesifundza lesinetintsaba sigcwele emahhashi netincola temphi temlilo+ kutungelete Elisha.+

18 Atsi emaSiriya nakehla eta kuye, Elisha wathantaza kuJehova watsi: “Ngicela wente lesive singaboni emehlweni.”+ Ngako Nkulunkulu wawenta angaboni emehlweni njengobe Elisha bekacelile. 19 Elisha wase utsi kuwo: “Lena akusiyo lendlela leniyifunako futsi akusilo nalelidolobha lenilifunako. Ngilandzeleni, ngitanimikisa kulendvodza leniyifunako.” Kodvwa wawaholela eSamariya.+

20 Batsi nabefika eSamariya, Elisha watsi: “Awu Jehova, vula emehlo abo batobona.” Ngako Jehova wawavula emehlo abo futsi babona kutsi bebasekhatsi neSamariya. 21 Inkhosi yaka-Israyeli nayibabona yatsi ku-Elisha: “Babe, ngibabulale yini, ngibabulale yini?” 22 Yena waphendvula watsi: “Ungababulali. Ubabulala ngenkemba nangebutjoki yini bantfu lobatfumbile? Banike sinkhwa nemanti khona batokudla banatse+ bese babuyela enkhosini yabo.” 23 Ngako yabentela lidzili lelikhulu, badla, banatsa, yase ibabuyisela enkhosini yabo. Lelibutfo lelihlaselako lemaSiriya+ alizange liphindze libuye eveni laka-Israyeli.

24 Ngemuva kwaloko, Bheni-hadadi inkhosi yaseSiriya wahlanganisa lonkhe libutfo* lakhe, futsi bakhuphukela eSamariya befike bayivimbetela.+ 25 Ngako kwaba nendlala lenkhulu+ eSamariya, futsi bayivimbetela kwaze kwaba ngulapho inhloko yembongolo+ ibita tinhlavu letingu-80 telisiliva futsi emangcoliso elituba, labekangephansi kwekota yelitha,* bekabita tinhlavu letisihlanu telisiliva. 26 Yatsi inkhosi yaka-Israyeli nayendlula ihamba etulu elubondzeni, umfati lotsite wamemeta watsi: “Awu nkhosi yami, sisite!” 27 Lenkhosi yatsi: “Nangabe Jehova angakusiti, mine ngingakutfolela kuphi lusito? Ebaleni lekubhulela yini nobe endzaweni yekuhlutela liwayini nobe endzaweni yekuhlutela emafutsa?” 28 Lenkhosi yambuta yatsi: “Yini inkinga yakho?” Yena watsi: “Lomfati utsite kimi, ‘Letsa indvodzana yakho siyidle lamuhla, leyami sitayidla kusasa.’+ 29 Sibese siyayipheka-ke lendvodzana yami sayidla.+ Ngelilanga lelilandzelako ngatsi kuye: ‘Letsa indvodzana yakho sitoyidla.’ Kodvwa yena uyifihlile.”

30 Ngekushesha nje lenkhosi nayiva emavi alomfati yadzabula timphahla tayo.+ Nayendlula etulu elubondzeni bantfu babona kutsi igcoke indvwangu yelisaka ngephansi kwetembatfo tayo.* 31 Yabese itsi: “Shengatsi Nkulunkulu angangijezisa kakhulu nangabe lamuhla litawushona inhloko ya-Elisha indvodzana yaShafati solo ikuye!”+

32 Elisha bekahleti endlini yakhe futsi emadvodza lamadzala abenaye. Inkhosi yatfumela indvodza kutsi ihambe kucala kunayo kodvwa satsi lesitfunywa sisengakefiki, Elisha watsi kulamadvodza lamadzala: “Nibonile yini kutsi lendvodzana yembulali+ itfumele lotsite kutengijuba inhloko? Nibonaka nakufika lesitfunywa, nivale umnyango niwubambe nisivalele ngephandle. Awuvakali yini umsindvo wetinyatselo tenkhosi yaso ngemuva kwaso?” 33 Watsi nakasakhuluma nawo, sefika lesitfunywa, inkhosi yatsi: “Lenhlekelele ibangelwe nguJehova. Kungani kufanele ngichubeke ngilindzele Jehova?”

7 Elisha wase utsi: “Lalelani livi laJehova. Naku lokushiwo nguJehova: ‘Kusasa ngalesikhatsi egedeni* laseSamariya, bhasikidi* wafulaha locolisakele utawube ubita lishekeli,* futsi bobhasikidi lababili bebhali batawube babita lishekeli.’”+ 2 Naliva loku liphini lemlawuli wemphi, lelo inkhosi lebeyitsembele kulo, latsi kulomuntfu waNkulunkulu weliciniso: “Ngisho nobe Jehova angavula emafasitelo emvula emazulwini, kungenteka yini loku?”*+ Yena waphendvula watsi: “Utakubona ngemehlo akho,+ kodvwa angeke ukudle.”+

3 Bekunebantfu labane lebebanebulephelo, lebebahleli esangweni lelidolobha,+ futsi bakhuluma bodvwana batsi: “Sihletileni lapha ngobe sitawuze sifele khona? 4 Nangabe sitsi: ‘Asambeni siye edolobheni,’+ kube kunendlala khona, sitawufela khona. Ngisho nobe singahlala lapha sitawuvele sife. Ngako nyalo asambeni siye enkambu yemaSiriya. Nangabe angasibulali, sitawuchubeka siphila, kodvwa nangabe asibulala, sitawufa.” 5 Babese bayavuka kusihlwa bahamba bayongena enkanjini yemaSiriya. Batsi nabefika eminceleni yalenkambu, batfola kungenamuntfu lapho.

6 Jehova wabangela kutsi emaSiriya eve umsindvo wetincola newemahhashi emphi, nemsindvo welibutfo lelikhulu.+ Atjelana atsi: “Inkhosi yaka-Israyeli icashe emakhosi emaHethi nemakhosi aseGibhithe kutsi atosihlasela!” 7 Ngekushesha lamaSiriya avuka abaleka ngalobo busuku, ashiya emathende awo, emahhashi, timbongolo kanye nayo yonkhe lenkambu futsi abaleka kuze asindzise kuphila* kwawo.

8 Ngesikhatsi labantfu labanebulephelo bafika eminceleni yalenkambu, bangena kulelinye lithende bacala kudla nekunatsa. Bahamba nelisiliva, ligolide netingubo futsi bakufihla. Babese bayajika bangena kulelinye lithende bafike batsatsa letinye tintfo, bahamba bayotifihla.

9 Ekugcineni batsi kulomunye nalomunye: “Loku lesikwentako akusikahle. Leli lilanga letindzaba letimnandzi! Nasibindza futsi singenti lutfo kuze kuse, kutasifanela kujeziswa. Asambeni nyalo siyobika loku endlini yenkhosi.” 10 Ngako bahamba baya kubogadzi basegedeni lelidolobha futsi bafike bababikela batsi: “Besiye enkambu yemaSiriya kodvwa sitfole kungenamuntfu lapho, bekukhala libhungane. Bekusele emahhashi netimbongolo lebekuboshiwe kanye nemathende lebekashiywe odvwana.” 11 Ngaso leso sikhatsi, labogadzi bamemeta, futsi lendzaba yabikwa ngekhatsi endlini yenkhosi.

12 Ngekushesha inkhosi yavuka ebusuku yatsi etincekwini tayo: “Ngicela kunitjela loko emaSiriya lakucabangako ngatsi. Ayati kutsi silambile,+ ngako asukile enkambu yawo ayobhaca esigangeni ngobe atitjela atsi: ‘Ema-Israyeli atawuphuma edolobheni futsi sitawabamba asaphila siphindze singene kulelidolobha.’”+ 13 Ngako lenye yetinceku talenkhosi yatsi: “Ngicela lamanye emadvodza atsatse emahhashi lasihlanu kulasele kulelidolobha. Siphetfo sawo sitawufanana nesawo onkhe ema-Israyeli lasekhona lapha. Sitawufana nesawo onkhe ema-Israyeli lafile. Ngako asiwatfumele ayobuka.” 14 Lamadvodza atsatsa tincola temphi letimbili lebetidvonswa ngemahhashi, futsi lenkhosi yabatfumela kulenkambu yemaSiriya, yatsi kubo: “Hambani niyewubona.” 15 Awalandzela aze ayofika eJordane, futsi yonkhe lendlela beyigcwele tingubo kanye netitja emaSiriya lebekatilahlile ngesikhatsi abaleka etfukile. Letitfunywa tabuyela emuva futsi tabikela inkhosi ngaloko lebetikubonile.

16 Labantfu babese bayahamba befika batitsatsela tintfo enkambu yemaSiriya kangangekutsi bhasikidi wafulaha locolisakele besewubita lishekeli futsi bobhasikidi lababili bebhali besebabita lishekeli, njengobe Jehova bekakhulumile.+ 17 Inkhosi beyikhetse liphini lemlawuli wemphi lebeyiletsemba kutsi ligadze egedeni, kodvwa bantfu baligcobagcoba laze lafa likuleligede, kwenteka njengobe nje lomuntfu waNkulunkulu weliciniso bekayitjelile inkhosi ngesikhatsi yewukela kuye. 18 Kwenteka njengobe nje lomuntfu waNkulunkulu weliciniso bekashito enkhosini nakatsi: “Bobhasikidi lababili bebhali batawubita lishekeli futsi bhasikidi munye wafulaha locolisakele utawubita lishekeli kusasa ngalesikhatsi egedeni laseSamariya.”+ 19 Kodvwa liphini lemlawuli wemphi belitsite kulomuntfu waNkulunkulu weliciniso: “Ngisho nobe Jehova angavula emafasitelo emvula emazulwini, kungenteka yini loku?”* Elisha bekaphendvule watsi: “Utakubona ngemehlo akho, kodvwa angeke ukudle.” 20 Nguloko kanye lokwenteka kulo, ngobe bantfu baligcobagcoba laze lafa egedeni.

8 Elisha wakhuluma nalomfati lobekavuse indvodzana yakhe watsi:+ “Sukuma uhambe wena kanye nemndeni wakho, uyophila njengesihambi nome ngabe ngukuphi lapho ungaya khona, ngobe Jehova umemetele kutsi kutawuba nendlala lenkhulu,+ futsi itawufika kulelive, itsatse iminyaka lengu-7.” 2 Ngako lomfati wasukuma wenta njengobe lomuntfu waNkulunkulu weliciniso akhulumile. Wahamba nemndeni wakhe bayohlala eveni lemaFilisti+ iminyaka lengu-7.

3 Ekupheleni kweminyaka lengu-7, lomfati wabuya eveni lemaFilisti waya enkhosini wayocela indlu yakhe kanye nensimu yakhe. 4 Inkhosi yabese ikhuluma naGehazi inceku yemuntfu waNkulunkulu weliciniso yatsi: “Ngicela ungitjele yonkhe imisebenti yemandla leyentiwe ngu-Elisha.”+ 5 Gehazi nakasatjela lenkhosi ngendlela Elisha lavusa ngayo umuntfu lofile,+ lomfati lebekavuselwe indvodzana yakhe wefika enkhosini, atewucela indlu kanye nensimu yakhe.+ Gehazi wavele watsi: “Nkhosi yami, nangu lomfati, futsi nayi lendvodzana yakhe leyavuswa ngu-Elisha.” 6 Inkhosi nayiva loko yabuta lomfati ngako, futsi lomfati wayitjela konkhe lobekwentekile. Ngako inkhosi yatfuma indvuna, yatsi kuyo: “Buyiselani konkhe lokukwakhe nako konkhe lokutfolakele ensimini yakhe kusukela ngelilanga lahamba ngalo kute kube ngulamuhla.”

7 Elisha wefika eDamaseko+ ngesikhatsi Bheni-hadadi,+ inkhosi yaseSiriya, agula. Ngako wabikelwa kwatsiwa: “Umuntfu waNkulunkulu weliciniso+ ufikile.” 8 Nayiva loku, inkhosi yatsi kuHazayeli:+ “Tsatsa sipho uhambe naso uyohlangana nalomuntfu waNkulunkulu weliciniso.+ Mcele angibutele kuJehova atsi: ‘Ngitawusindza yini kulokugula?’” 9 Hazayeli wahamba wayohlangana naye futsi wamphatsela sipho, konkhe lokuhle kwaseDamaseko, lobekungalayishwa ngemakamela langu-40. Wafike wema embikwakhe wase utsi: “Indvodzana yakho Bheni-hadadi, inkhosi yaseSiriya, ingitfume kuwe kutsi ngikucele uyibutele kuNkulunkulu utsi: ‘Ngitawusindza yini kulokugula?’” 10 Elisha wamphendvula watsi: “Hamba ufike utsi kuye: ‘Nakanjani utawuphila,’ kodvwa Jehova ungikhombisile kutsi utawufa nakanjani.”+ 11 Hazayeli wachubeka wambuka waze wadliwa ngemahloni. Lomuntfu waNkulunkulu weliciniso wase uyakhala. 12 Hazayeli wambuta: “Inkhosi yami ikhalelani?” Waphendvula watsi: “Kungobe ngiyatati tinsizi lotatiletsela bantfu baka-Israyeli.+ Tindzawo tawo letibiyelwe utatishisa ngemlilo, emadvodza awo elikhetselo utawabulala ngenkemba, bantfwana bawo utabenta ticucu futsi bafati bawo labakhulelwe utabachacha tisu.”+ 13 Hazayeli watsi: “Mine nceku yakho lefanana nenja ngingayenta njani intfo lenjalo?” Kodvwa Elisha watsi: “Jehova ungikhombisile kutsi utawuba yinkhosi yaseSiriya.”+

14 Hazayeli wase uyamshiya Elisha wabuyela enkhosini yakhe, leyatsi: “Utsiteni Elisha kuwe?” Wayiphendvula watsi: “Ungitjele kutsi nakanjani wena utawuphila.”+ 15 Ngelilanga lelilandzelako Hazayeli watsatsa ingubo wayenya emantini, wayibeka ebusweni benkhosi yaze yafa.+ Hazayeli waba yinkhosi ngemuva kwayo.+

16 Ngemnyaka wesihlanu wekubusa kwaJehoramu+ indvodzana yenkhosi Ahabi yaka-Israyeli, ngesikhatsi Jehoshafati ayinkhosi yakaJuda, Jehoramu+ indvodzana yenkhosi yakaJuda lenguJehoshafati waba yinkhosi. 17 Bekaneminyaka lengu-32 budzala nakaba yinkhosi futsi wabusa iminyaka lengu-8 eJerusalema. 18 Wahamba ngendlela yemakhosi aka-Israyeli,+ njengobe emakhosi endlu ya-Ahabi bekentile,+ ngobe indvodzakati ya-Ahabi yaba ngumfati wakhe;+ futsi wachubeka enta lokubi emehlweni aJehova.+ 19 Nome kunjalo, Jehova akazange afune kubhubhisa sive sakaJuda ngenca yaDavide inceku yakhe,+ ngobe beketsembise kuniketa yena nemadvodzana akhe sibane+ lebesitawuhlala njalo.

20 Ngesikhatsi saJehoramu, sive saka-Edomu savukela sive sakaJuda+ saphindze satibekela inkhosi yaso.+ 21 Ngako Jehoramu wewela waya eSayire nato tonkhe tincola takhe temphi futsi wavuka ebusuku wancoba sive saka-Edomu lebesimtungeletile kanye netindvuna tetincola temphi; futsi lelibutfo labalekela emathendeni alo. 22 Sive saka-Edomu besisolo sichubeka nekuvukela sive sakaJuda kuze kube ngulamuhla. ILibna+ nayo yavukela ngaleso sikhatsi.

23 Lomunye umlandvo waJehoramu kanye nako konkhe lakwenta, kubhaliwe encwadzini yemlandvo wangetikhatsi temakhosi akaJuda. 24 Jehoramu wabese uyafa, wangcwatjwa lapho kwangcwatjwa khona bokhokho bakhe, wangcwatjwa eDolobheni laDavide.+ Indvodzana yakhe Ahaziya+ yaba yinkhosi ngemuva kwakhe.

25 Ngemnyaka wesi-12 wekubusa kwaJehoramu indvodzana ya-Ahabi inkhosi yaka-Israyeli, Ahaziya indvodzana yeNkhosi Jehoramu yakaJuda, waba yinkhosi.+ 26 Ahaziya bekaneminyaka lengu-22 budzala ngesikhatsi aba yinkhosi, futsi wabusa umnyaka munye eJerusalema. Libito lamake wakhe bekungu-Athaliya+ umtukulu* weNkhosi Omri+ yaka-Israyeli. 27 Ahaziya wahamba ngendlela yendlu yenkhosi Ahabi+ futsi wachubeka enta lokubi emehlweni aJehova njengobe bekwenta indlu ya-Ahabi, ngobe bekahlobene nendlu ya-Ahabi ngemshado.+ 28 Wahamba naJehoramu indvodzana ya-Ahabi wayokulwa imphi neNkhosi Hazayeli yaseSiriya eRamothi-gileyadi,+ kodvwa emaSiriya amlimata Jehoramu.+ 29 Ngako iNkhosi Jehoramu yabuyela eJezreyeli+ kute iyolulama kulamanceba leyawatfola kumaSiriya eRama ngesikhatsi ilwa neNkhosi Hazayeli yaseSiriya.+ Ahaziya indvodzana yaJehoramu inkhosi yakaJuda wehlela eJezreyeli kute ayobona Jehoramu indvodzana ya-Ahabi, ngoba abelimele.*

9 Umphrofethi Elisha wabese ubita lenye kumadvodzana ebaphrofethi, watsi kuyo: “Bopha tembatfo takho elukhalo bese ngekushesha utsatsa nayi imbita yemafutsa uye nayo eRamothi-gileyadi.+ 2 Nawufika lapho ubofuna Jehu+ indvodzana yaJehoshafati, indvodzana yaNimshi; ungene ngekhatsi futsi umsukumise emkhatsini wabomnakabo, uhambe naye niye ekamelweni lelingekhatsi. 3 Ubobese utsatsa lembita yemafutsa umtsele ngawo enhloko bese utsi: ‘Naku lokushiwo nguJehova: “Ngiyakugcoba kutsi ube yinkhosi yema-Israyeli.”’+ Ngemuva kwaloko ubobese uvula sivalo uyabaleka, ungaphotisi maseko.”

4 Ngako lenceku yemphrofethi yangenela indlela leya eRamothi-gileyadi. 5 Yatsi nayifika khona yatfola tindvuna telibutfo tihleti. Yatsi: “Kunemlayeto lengikuphatsele wona ndvuna.” Jehu wayibuta watsi: “Ucondzene nabani kitsi?” Yona yatsi: “Ucondzene nawe ndvuna.” 6 Jehu wabese uyasukuma ungena ngekhatsi endlini; lenceku yamtsela ngemafutsa enhloko yatsi kuye: “Naku lokushiwo nguJehova Nkulunkulu wema-Israyeli: ‘Ngiyakugcoba kutsi ube yinkhosi yebantfu baJehova, ube yinkhosi yema-Israyeli.+ 7 Kufanele ucotfule indlu ya-Ahabi inkhosi yakho futsi mine ngitawuphindzisela ngenca yengati yetinceku tami baphrofethi nangenca yato tonkhe tinceku taJehova letafela etandleni taJezebeli.+ 8 Yonkhe indlu ya-Ahabi itawuphela nya; futsi ngitawubulala bonkhe bantfu labadvuna* bendlu ya-Ahabi, lokufaka ekhatsi labangenamsiti nalababutsakatsaka baka-Israyeli.+ 9 Ngitakwenta indlu ya-Ahabi ibe njengendlu yaJerobowamu+ indvodzana yaNebati nanjengendlu yaBhasha+ indvodzana ya-Ahiya. 10 Jezebeli yena utawudliwa tinja ensimini leseJezreyeli+ futsi kute lotamngcwaba.’” Nayicedza kusho loko, lenceku yavula sivalo yabaleka.+

11 Watsi Jehu nakabuyela etincekwini tenkhosi yakhe, tambuta tatsi: “Konkhe kuhamba kahle? Belutofunani loluhlanya lakuwe?” Watiphendvula watsi: “Niyamati nani lomuntfu kutsi unjani, nendlela lakhuluma ngayo.” 12 Kodvwa taphendvula tatsi: “Loko akusilo liciniso! Sicela usitjele.” Jehu wase utsi: “Nguloko lakushito kimi futsi uchubeke watsi, ‘Naku lokushiwo nguJehova: “Ngiyakugcoba kutsi ube yinkhosi yema-Israyeli.”’”+ 13 Tatsi nativa loko, ngekushesha ngamunye wato watsatsa sembatfo sakhe wasendlala etitebhisini+ labekakuto futsi tashaya luphondvo tase titsi: “Jehu sewuyinkhosi!”+ 14 Ngemuva kwaloko, Jehu+ indvodzana yaJehoshafati indvodzana yaNimshi wakhela Jehoramu licebo.

Jehoramu bekasolo agadze iRamothi-gileyadi,+ yena nawo onkhe ema-Israyeli ngenca yeNkhosi Hazayeli+ yaseSiriya. 15 Ngemuva kwesikhatsi, iNkhosi Jehoramu yabuyela eJezreyeli+ kuze ilulame kulamanceba lebeyiwatfole kumaSiriya ngesikhatsi ilwa neNkhosi Hazayeli yaseSiriya.+

Jehu wabese utsi: “Nangabe nivumelana* nami, ningavumeli ngisho namunye umuntfu kutsi aphunyuke kulelidolobha futsi ayokubika loko eJezreyeli.” 16 Jehu wabese ugibela inkalishi yakhe wahamba waya eJezreyeli ngobe Jehoramu bekalele lapho alimele futsi neNkhosi Ahaziya yakaJuda beyewukile iyobona Jehoramu. 17 Ngesikhatsi gadzi asemile embhoshongweni loseJezreyeli wabona libutfo lelikhulu laJehu lita. Ngekushesha watsi: “Ngibona libutfo lelikhulu lemadvodza.” Jehoramu watsi: “Tfumela lisotja leligibela lihhashi kutsi liyohlangana nalo lifike litsi: ‘Nite ngekuthula yini?’” 18 Ngako umgibeli welihhashi wahamba wayohlangana naJehu, wafike watsi: “Naku lokushiwo yinkhosi: ‘Nite ngekuthula yini?’” Kodvwa Jehu watsi: “Wena ungenelana ngani nekuthula? Ngilandzele!”

Logadzi wase uyabika utsi: “Lesitfunywa sesifikile kubo kodvwa sisengakabuyi.” 19 Ngako wakhipha umgibeli welihhashi wesibili, lowafika kubo watsi: “Inkhosi itsi: ‘Nite ngekuthula yini?’” Kodvwa Jehu watsi: “Wena ungenelana ngani nekuthula? Ngilandzele!”

20 Logadzi wase uyabika utsi: “Lesitfunywa sifikile kubo kodvwa solo asibuyi. Lencola ihambisa kwencola leshayelwa nguJehu umtukulu* waNimshi ngoba uyishayelisa kweluhlanya.” 21 Jehoramu watsi: “Bophelani incola!” Ngako kwaboshelwa incola yakhe futsi iNkhosi Jehoramu yaka-Israyeli neNkhosi Ahaziya+ yakaJuda bahamba, nguloyo naloyo ngencola yakhe yemphi kuze bayohlangana naJehu. Bafike bamtfola ensimini yaNabothi+ umJezreyeli.

22 Ngekushesha nje Jehoramu nakabona Jehu watsi: “Ute ngekuthula yini yeJehu?” Kodvwa yena watsi: “Kungaba khona kanjani kuthula nangabe kusenebugwadla baJezebeli+ make wakho kanye nebutsakatsi bakhe lobunyenti?”+ 23 Jehoramu wavele wajikisa incola yakhe wabaleka futsi watsi ku-Ahaziya: “Basibambe ngebucili sabambeka ye-Ahaziya!” 24 Jehu watsatsa butjoki esandleni sakhe wadubula Jehoramu emhlane futsi umcibisholo wamhlaba inhlitiyo waphumela ngale, wase uyawa asencoleni yakhe. 25 Jehu wabese utsi kuBidkari, liphini lakhe: “Mtsatse uyomlahla ensimini yaNabothi umJezreyeli.+ Khumbula, mine nawe besigibele kanye kanye* sihamba ngemuva kwa-Ahabi babe wakhe ngesikhatsi Jehova akhipha simemetelo ngaye lesitsi:+ 26 ‘“Njengobe ngiyibonile ingati yaNabothi+ kanye nengati yemadvodzana akhe itolo,” kusho Jehova, “ngitawuphindzisela+ kuwe kulensimu,” kusho Jehova.’ Nyalo, mtsatse uyomlahla kuyo njengobe kusho livi laJehova.”+

27 Ngesikhatsi iNkhosi Ahaziya+ yakaJuda ibona loko lebekwenteka, yabaleka ngendlela leyendlula ngasengadzeni lenkhulu.* (Ngemuva kwesikhatsi Jehu wayigijimisa lenkhosi futsi watsi: “Naye mhlaseleni!” Ngako nayo bayigwaza isencoleni ikhuphukela eGuri, lengaseJibleyamu.+ Kodvwa lenkhosi yachubeka ibaleka yaze yayofika eMegido futsi yafela khona. 28 Tinceku tayo tase tiyayitsatsa tayilayisha encoleni taya nayo eJerusalema futsi tayingcwaba ethuneni layo lapho kwangcwatjwa khona bokhokho bayo, eDolobheni laDavide.+ 29 Bekungumnyaka wesi-11 wekubusa kwaJehoramu indvodzana ya-Ahabi, ngesikhatsi Ahaziya+ aba yinkhosi kaJuda.)

30 Watsi Jehu nakefika eJezreyeli,+ Jezebeli+ weva ngaloko. Ngako Jezebeli wapenda emehlo akhe ngapende lomnyama, walungisa inhloko yakhe, futsi walunguta phansi asefasitelweni. 31 Ngesikhatsi Jehu angena egedeni, Jezebeli wambuta watsi: “Konkhe kuhamba kahle yini kuZimri umbulali wenkhosi yakhe?”+ 32 Jehu wabuka etulu kulelifasitelo wase utsi: “Ngubani loseluhlangotsini lwami? Ngubani?”+ Ngekushesha tindvuna letimbili nobe letintsatfu tabuka phansi tambona. 33 Watsi: “Mjikijeleni phansi!” Ngako tamjikijela phansi futsi lenye yengati yakhe yatsela lubondza kanye nemahhashi, futsi Jehu wamgcobagcoba. 34 Ngemuva kwaloko Jehu wangena futsi wadla, wanatsa. Wabese utsi: “Ngicela nimnakekele lomfati localekisiwe futsi nimngcwabe. Phela uyindvodzakati yenkhosi.”+ 35 Kodvwa batsi nabaphuma bayomngcwaba bangatfoli lutfo, ngaphandle kwesikobho sakhe netinyawo netandla.+ 36 Batsi nababuyela emuva bayotjela Jehu ngaloko, watsi: “Loku kugcwalisa livi laJehova+ lalikhuluma ngenceku yakhe Elija umThishbe, lelitsi, ‘Ensimini leseJezreyeli tinja titakudla inyama yaJezebeli.+ 37 Sidvumbu saJezebeli sitawuba ngumcuba wensimu leseJezreyeli kuze bangatokusho batsi: “Lona nguJezebeli.”’”

10 Ahabi+ bekanemadvodzana langu-70 eSamariya. Ngako Jehu wabhala tincwadzi watitfumela eSamariya etikhulwini taseJezreyeli, emadvodzeni lamadzala,+ nakulabo labagadza bantfwana ba-Ahabi* watsi: 2 “Nakufika lencwadzi kini, emadvodzana enkhosi yenu atawube anani, lokufaka ekhatsi tinkalishi temphi, emahhashi, lidolobha lelibiyelwe kanye netikhali. 3 Emadvodzaneni enkhosi yenu, khetsani lekahle kakhulu nalefaneleka kahle* niyibeke esihlalweni sebukhosi sababe wayo. Ngemuva kwaloko, nibobese nilwela indlu yenkhosi yenu.”

4 Kodvwa befikelwa kwesaba base batsi: “Nangabe emakhosi lamabili ehlulekile kumelana naye,+ tsine-ke singakhona kanjani?” 5 Ngako umphatsi wesigodlo,* umphatsi welidolobha, emadvodza lamadzala kanye nalabo lebebagadza bantfwabenkhosi, batfumelela Jehu umlayeto lotsi: “Tsine sitinceku takho futsi sitawukwenta noma ngabe yini lotsi asiyente. Kute lesitambeka abe yinkhosi. Ungenta noma ngabe yini loyibona iyinhle emehlweni akho.”

6 Jehu wabese ubabhalela incwadzi yesibili watsi: “Nangabe ningakimi futsi nitimisele kungilalela, ngiletseleni tinhloko temadvodzana enkhosi yenu futsi nite kimi kusasa ngalesikhatsi eJezreyeli.”

Emadvodzana enkhosi langu-70 bekakanye nemadvodza lahloniphekile elidolobha labekawakhulisa. 7 Ngekushesha nje nakufika lencwadzi kuwo, atsatsa lamadvodzana enkhosi langu-70 awabulala+ futsi afaka tinhloko tawo kubobhasikidi, atitfumelela Jehu eJezreyeli. 8 Kwase kungena sitfunywa sefike satsi kuye: “Sebatiletsile letinhloko temadvodzana enkhosi.” Yena watsi: “Tibekeni tibe tindvundvuma letimbili ekungeneni kwelisango lelidolobha kuze kube sekuseni.” 9 Nakaphuma ekuseni, wema embikwabo bonkhe bantfu watsi: “Nine nimsulwa.* Ngimi lowakhele inkhosi yami licebo futsi ngiyibulele+ kodvwa ngubani-ke lolobulele bonkhe labantfu? 10 Yatini loku kutsi kute ngisho nalinye livi laJehova lelo Jehova lalikhuluma ngendlu ya-Ahabi lelingeke lihlale lingagcwaliseki*+ futsi Jehova sewukwentile loko lakukhuluma asebentisa inceku yakhe Elija.”+ 11 Ngetulu kwaloko, Jehu wahlasela bonkhe lebebasele bendlu ya-Ahabi eJezreyeli, kanye nemadvodza lahloniphekile, bangani bakhe kanye nebaphristi bakhe,+ wangashiyi ngisho namunye.+

12 Ngemuva kwaloko, wasukuma wangenela indlela leya eSamariya. Kulendlela bekunendlu yebelusi yekubopha.* 13 Nakalapho, Jehu wahlangana nabomnakaboNkhosi Ahaziya+ yakaJuda futsi watsi kubo: “Nibobani nine?” Bona batsi: “Sibomnakabo-Ahaziya futsi sehla ngalendlela kuze siyovusela emadvodzana enkhosi kanye nemadvodzana endlovukazi.” 14 Ngekushesha watsi: “Wabambeni aphila!” Ngako bawabamba aphila lamadvodza langu-42 bawabulalela emgodzini wemanti walendlu. Akazange ashiye ngisho namunye wawo.+

15 Nakesuka lapho, wahlangana naJonadabi+ indvodzana yaRekhabi+ labekete kuye. Ngesikhatsi Jehu ambingelela,* watsi kuye: “Inhlitiyo yakho iyahambisana* yini nenhlitiyo yami njengobe nje inhlitiyo yami ihambisana nenhlitiyo yakho?”

Jonadabi waphendvula watsi: “Iyahambisana.”

Jehu watsi: “Nangabe kunjalo, ngicela unginike sandla sakho.”

Ngako wamnika sandla sakhe futsi Jehu wamdvonsela ekhatsi encoleni yakhe. 16 Wase utsi: “Asambe, ubone kutsi angikubeketeleli kwedzelelwa kwaJehova.”+ Ngako bagibelisa Jonadabi encoleni yaJehu yemphi. 17 Jehu wabese uyefika eSamariya futsi wabulala bonkhe labebasele bendlu ya-Ahabi kwaze kwaba ngulapho sekabacotfulile,+ ngekuvumelana nelivi laJehova lebekalikhulumile ku-Elija.+

18 Ngetulu kwaloko, Jehu wahlanganisa bonkhe bantfu wase utsi: “Ahabi wamkhonta kancane Bhali+ kodvwa Jehu utamkhonta kakhulu. 19 Ngako-ke bitani bonkhe baphrofethi baBhali,+ bonkhe labamkhontako nabo bonkhe baphristi bakhe+ kutsi bete kimi. Ningavumeli ngisho namunye kutsi angabi khona ngobe nginemhlatjelo lomkhulu lengitawentela Bhali. Nome ngabe ngubani longeke ete lapha angeke aphile.” Kodvwa leli bekulicebo laJehu lekutsi abhubhise bonkhe labakhonta Bhali.

20 Jehu wachubeka watsi: “Memetelani* umbutsano lokhetsekile waBhali.” Ngako bawumemetela. 21 Ngemuva kwaloko, Jehu watfumela livi kulo lonkhe laka-Israyeli futsi befika bonkhe labakhonta Bhali. Kute ngisho namunye longazange ete. Bangena endlini* yaBhali+ futsi lendlu yagcwala nswi. 22 Wase utsi kuloyo lobekabuke likamelo lekubeka timphahla: “Khipha tembatfo utinike bonkhe labakhonta Bhali.” Ngako wabakhiphela letembatfo. 23 Jehu kanye naJonadabi+ indvodzana yaRekhabi base bayahamba bayongena endlini yaBhali. Jehu wabese utsi kulabantfu labakhonta Bhali: “Bukisisani futsi niciniseke kutsi lana kute bantfu labakhonta Jehova, kunalabakhonta Bhali kuphela.” 24 Ekugcineni, bangena batewunikela iminikelo kanye nemihlatjelo yekushiswa. Jehu bekabeke emadvodza langu-80 ngaphandle, futsi watsi: “Nangabe ukhona kini lotawuvumela lamadvodza lengiwanikela kini kutsi aphunyule, kutawufa yena esikhundleni sawo.”*

25 Ngekushesha nje Jehu nakacedza kunikela umhlatjelo wekushiswa, watsi kubogadzi* kanye nemaphini akhe: “Ngenani nihlasele! Ningavumeli ngisho namunye aphunyule!”+ Ngako labogadzi nemaphini akhe bahlasela labantfu labakhonta Bhali bababulala ngenkemba, bajika tidvumbu tabo ngephandle futsi bachubeka bahamba baze bayofika ekamelweni lelingekhatsi* lendlu yaBhali. 26 Ngemuva kwaloko, bakhipha ematje langcwele+ endlu yaBhali futsi bawashisa onkhe.+ 27 Babhidlita litje lelingcwele+ laBhali, babhidlita nendlu yaBhali+ bayenta imithoyi, njengobe solo kunjalo nalamuhla.

28 Jehu wamncoba ngaleyo ndlela-ke Bhali ka-Israyeli. 29 Kodvwa Jehu akazange atiyekele tono lebetentiwe nguJerobowamu indvodzana yaNebati lowabangela kutsi ema-Israyeli atente, lokutono letiphatselene nekukhonta ematfole eligolide lebekaseBetheli nakaDani.+ 30 Ngako Jehova watsi kuJehu: “Ngesizatfu sekutsi wente kahle futsi wente lokuhle emehlweni ami ngekwenta konkhe lobekusenhlitiyweni yami lebengifuna kukwenta endlini ya-Ahabi,+ emadvodzana akho atawuhlala esihlalweni sebukhosi saka-Israyeli kuze kube sesitukulwaneni sesine.”+ 31 Kodvwa Jehu akazange ahambe ngeMtsetfo waJehova Nkulunkulu wema-Israyeli ngayo yonkhe inhlitiyo yakhe.+ Akazange aphendvuke etonweni leto Jerobowamu labangela ema-Israyeli kutsi atente.+

32 Ngalawo malanga Jehova wacala kunciphisa ema-Israyeli, kancane kancane. Hazayeli bekachubeka nekuwahlasela kuyo yonkhe indzawo yaka-Israyeli,+ 33 kusukela eJordane kuya ngasemphumalanga, kuyo yonkhe indzawo yaseGileyadi, lokuyindzawo yebakaGadi, yebakaRubeni kanye nendzawo yebakaManase,+ lesukela e-Aroyeri leseceleni kweSihosha sase-Anoni kuya eGileyadi naseBhashani.+

34 Lomunye umlandvo waJehu, konkhe lakwenta nayo yonkhe imisebenti yakhe yemandla, kubhaliwe encwadzini yemlandvo wangetikhatsi temakhosi aka-Israyeli. 35 Jehu wabese uyafa wangcwatjwa lapho kwangcwatjwa khona bokhokho bakhe, bamngcwaba eSamariya; indvodzana yakhe Jehoyahazi+ yaba yinkhosi esikhundleni sakhe. 36 Budze besikhatsi* sekubusa kwaJehu aseSamariya, abusa ema-Israyeli, kwaba yiminyaka lengu-28.

11 Ngesikhatsi Athaliya,+ make wa-Ahaziya, abona kutsi indvodzana yakhe ifile,+ wasukuma wabulala yonkhe intalelwane yasebukhosini.*+ 2 Nome kunjalo, Jehosheba indvodzakati yeNkhosi Jehoramu, lobekangudzadzewabo-Ahaziya weba Jehowashi+ indvodzana ya-Ahaziya, wamsusa emadvodzaneni enkhosi lebekufanele abulawe, wamfihla ekamelweni lelingekhatsi akanye nemnakekeli wakhe. Bakhona kumfihla wangamboni Athaliya, kuze angabulawa. 3 Wahlala naye iminyaka lesitfupha afihlwe endlini yaJehova, ngesikhatsi Athaliya abusa lelive.

4 Ngemnyaka wesi-7, Jehoyada watfumela kutsi kulandvwe tindvuna temakhulu tasesigodlweni* nabogadzi besigodlo+ labaya kuye endlini yaJehova. Wenta sivumelwane nabo waphindze wabafungisa ngaso endlini yaJehova wabese ubakhombisa lendvodzana yenkhosi.+ 5 Wabatjela watsi: “Naku lokufanele nikwente: Yakhani emacembu lamatsatfu. Licembu lekucala litawugadza ngeliSabatha futsi litawube ligadze indlu* yenkhosi ngeliso lelibukhali,+ 6 licembu lesibili litawube liseSangweni Lesisekelo bese kutsi lelesitsatfu libe segedeni lelingemuva kwabogadzi besigodlo. Nitawushintjana ekugadzeni lendlu. 7 Lamacembu lamabili lokufanele kutsi aphumule ngeliSabatha, kufanele agadze lendlu yaJehova ngeliso lelibukhali kuze kuvikelwe inkhosi. 8 Kufanele nisingatse inkhosi tinhlangotsi tonkhe, nguloyo naloyo aphatse tikhali takhe ngesandla. Nome ngubani lonibhidlako kufanele abulawe. Kufanele nibe nenkhosi noma ngabe ngukuphi lapho iya khona.”*

9 Tindvuna temakhulu+ tenta njengobe nje Jehoyada umphristi abetiyalile. Ngako nguleyo naleyo yatsatsa licembu layo lebelisebenta ngeliSabatha kanye nalabo lebebangasebenti ngeliSabatha, baya kuJehoyada umphristi.+ 10 Lomphristi wabese unika letindvuna temakhulu tikhali kanye nemahawu layindingilizi lebekukweNkhosi Davide, lebekuhlala endlini yaJehova. 11 Bogadzi basesigodlweni+ bema etindzaweni tabo, nguloyo naloyo aphetse sikhali, bebeme kusukela ngesekudla salendlu kuya ngesencele sayo, beme ngase-al’thare+ naseceleni kwalendlu batungelete lenkhosi. 12 Jehoyada wabese uyikhiphela ngephandle lendvodzana yenkhosi,+ futsi wayifaka umchele kanye neBufakazi,*+ bayibeka yaba yinkhosi baphindze bayigcoba. Bacala kushaya tandla base batsi: “Lunwele loludze nkhosi!”+

13 Watsi Athaliya nakeva umsindvo webantfu lebebagijima, ngekushesha waya kulabantfu endlini yaJehova.+ 14 Wase ubona inkhosi ime lapho eceleni kwensika, njengobe lisiko belisho njalo.+ Tindvuna kanye nebashayi bemacilongo+ bebanenkhosi, kanye nabo bonkhe bantfu baleyondzawo futsi bebajabulile bashaya nemacilongo. Watsi Athaliya nakakubona loko, wadzabula timphahla takhe, wase uyamemeta utsi: “Ngemavukelambuso! Ngemavukelambuso!” 15 Kodvwa Jehoyada umphristi wayala tindvuna temakhulu,+ leto lebetihola lelibutfo, watsi kuto: “Mkhipheni emkhatsini walamasotja, futsi nakukhona lotamlandzela mbulaleni ngenkemba!” Ngobe lomphristi bekatsite: “Ningambulaleli endlini yaJehova.” 16 Ngako bambamba, bahamba naye futsi batsi nabefika naye lapho kungena khona emahhashi nakaya endlini* yenkhosi,+ bambulalela khona.

17 Jehoyada wabese wenta sivumelwane emkhatsini waJehova nenkhosi kanye nebantfu+ kutsi bebatawuchubeka babantfu baJehova, futsi waphindze wenta sivumelwane emkhatsini walenkhosi kanye nalabantfu.+ 18 Ngemuva kwaloko, bonkhe bantfu baleyondzawo befika endlini* yaBhali, babhidlita ema-al’thare akhe,+ baphihlita tithico takhe+ futsi babulala Mathani umphristi waBhali+ embikwema-al’thare.

Lomphristi wase ubeka babonisi kutsi bengamele indlu yaJehova.+ 19 Ngetulu kwaloko, watsatsa tindvuna temakhulu,+ tindvuna tasesigodlweni, bogadzi basesigodlweni+ kanye nabo bonkhe labantfu bakuleyondzawo kutsi bahambe nenkhosi behle nayo kusuka endlini yaJehova futsi befika endlini* yenkhosi ngendlela yeligede labogadzi basesigodlweni. Yabese ihlala esihlalweni sebukhosi.+ 20 Ngako bonkhe bantfu baleyondzawo bajabula, futsi lelidolobha laba nekuthula ngobe besebabulele Athaliya ngenkemba endlini yenkhosi.

21 Jehowashi+ bekaneminyaka lengu-7 budzala nakaba yinkhosi.+

12 Ngemnyaka wesi-7 wekubusa kwaJehu,+ Jehowashi+ waba yinkhosi futsi wabusa iminyaka lengu-40 eJerusalema. Libito lamake wakhe bekunguZibiya waseBherisheba.+ 2 Jehowashi wachubeka enta lokuhle emehlweni aJehova ngekuvumelana naloko lebekakufundziswa nguJehoyada umphristi sonkhe sikhatsi sekuphila kwakhe. 3 Noma kunjalo, tindzawo letiphakeme+ atizange tisuswe futsi bantfu bebasolo benta imihlatjelo neminikelo yekushiswa kuletindzawo letiphakeme.

4 Jehowashi watsi kubaphristi: “Tsatsani yonkhe imali leletfwa endlini yaJehova leyiminikelo lengcwele,+ imali lebekiwe lokufanele ikhokhwe ngumuntfu* ngamunye+ nemali umuntfu ngamunye lafunge kuyikhipha kanye nayo yonkhe imali umuntfu ngamunye inhlitiyo yakhe lemvumela kutsi ayiletse endlini yaJehova.+ 5 Baphristi ngibo labatawutsatsa lemali kubantfu labayinikelako, bayisebentisele kulungisa lendlu noma nini nakutfolakala umonakalo* kuyo.”+

6 Ngemnyaka wesi-23 wekubusa kweNkhosi Jehowashi, baphristi bebasolo bangakawulungisi lomonakalo lobewukulendlu.+ 7 Ngako iNkhosi Jehowashi yabita Jehoyada+ umphristi kanye nalabanye baphristi yase itsi kubo: “Kubangelwa yini kutsi ningawulungisi lomonakalo lokulendlu? Ningasayitsatsi-ke iminikelo kubantfu ngaphandle nangabe itawusetjentiselwa kulungisa lendlu.”+ 8 Ngenca yaloko, baphristi bavuma kungasayitsatsi imali kubantfu nekutsi ungasentiwa ngibo umsebenti wekulungiswa kwalendlu.

9 Jehoyada umphristi wabese utsatsa libhokisi+ walibhobosa imbobo esivalweni walibeka eceleni kweli-al’thare ngesekudla nawungena endlini yaJehova. Baphristi lebebabogadzi emnyango bebayifaka lapho yonkhe imali lebeyiletfwa endlini yaJehova.+ 10 Nome nini nababona kutsi sekunemali lenyenti kulelibhokisi, mabhalane wenkhosi kanye nemphristi lophakeme bebafika batsatse* lemali lebeyiletfwe endlini yaJehova bese bayayibala.+ 11 Bebatsi bangayibala, bayinikete labo lababekwe kutsi banakekele umsebenti lowentiwa endlini yaJehova. Bona bebabese babhadala ngayo bantfu lebebasebenta ngetingodvo kanye nebakhi lebebasebenta kulendlu yaJehova,+ 12 babhadale nabochwephesha bekwakha ngematje kanye nebantfu lebebasebenta kujuba ematje baphindze bawalungise kahle. Bebaphindze batsenge tingodvo kanye nematje lalungiswe kahle kuze balungise umonakalo lobewenteke endlini yaJehova futsi bebasebentisa lemali kuze kubhadalwe tonkhe letinye tindleko lebetiba khona nakulungiswa lendlu.

13 Nome kunjalo, kute kulemali lebeyiletfwa endlini yaJehova leyasetjentiswa kuze kwakhiwe tindishi, tintfo tekucisha umlilo, titja, emacilongo+ nanome ngutiphi tintfo teligolide netelisiliva tendlu yaJehova.+ 14 Bebayiniketa kuphela labo labente lomsebenti futsi bebasebentisa lemali kuze balungise lendlu yaJehova. 15 Bebangawalandzeleli lamadvodza labawanikete lemali kuze abhadale letisebenti ngoba abetsembekile.+ 16 Imali yeminikelo yelicala kanye nemali yeminikelo yesono+ ayiletfwanga endlini yaJehova; beyiyebaphristi.+

17 Kwaba ngaleso sikhatsi lapho Hazayeli+ inkhosi yaseSiriya akhuphuka khona wayokulwa nesive semaGathi+ futsi wasitfumba, ngemuva kwaloko wase uncuma kuyohlasela* iJerusalema.+ 18 Ngaleso sizatfu, iNkhosi Jehowashi yakaJuda yatsatsa yonkhe iminikelo lengcwele lebeyingcweliswe bokhokho bayo, emakhosi akaJuda, boJehoshafati, Jehoramu na-Ahaziya lokufaka ekhatsi iminikelo lengcwele yalenkhosi, lonkhe ligolide lelatfolakala lakuhlala khona umcebo endlini yaJehova nasendlini yenkhosi* futsi yakutfumela kuHazayeli inkhosi yaseSiriya.+ Ngako Hazayeli wase uyayekela kuhlasela iJerusalema.

19 Lomunye umlandvo waJehowashi nako konkhe lakwenta, kubhaliwe encwadzini yemlandvo wangetikhatsi temakhosi akaJuda. 20 Tinceku takhe tase tihlangana ngaye ngebucili tamakhela lisu lekumbulala+ futsi tahlasela Jehowashi tambulala endlini leseGcumeni*+ endleleni leyehlela eSila. 21 Tinceku takhe boJozakari indvodzana yaShimeyathi naJehozabadi indvodzana yaShomeri ngibo labamhlasela futsi bambulala.+ Bamngcwaba lapho kwangcwatjelwa khona bokhokho bakhe eDolobheni laDavide futsi indvodzana yakhe Amasiya yaba yinkhosi ngemuva kwakhe.+

13 Ngemnyaka wesi-23 wekubusa kwaJehowashi+ indvodzana ya-Ahaziya,+ inkhosi yakaJuda, Jehoyahazi indvodzana yaJehu+ waba yinkhosi yaka-Israyeli aseSamariya, futsi wabusa iminyaka lengu-17. 2 Wachubeka enta lokubi emehlweni aJehova futsi waphikelela ekwenteni sono Jerobowamu indvodzana yaNebati leyabangela ema-Israyeli kutsi asente.+ Akazange asuke kuso. 3 Intfukutselo yaJehova+ yase iyawavutsela ema-Israyeli+ futsi wawanikela esandleni seNkhosi Hazayeli+ yaseSiriya nasesandleni saBheni-hadadi,+ indvodzana yaHazayeli, konkhe kuphila kwabo.

4 Ngekuhamba kwesikhatsi Jehoyahazi wacela umusa* kuJehova futsi Jehova wamlalela ngobe bekabonile kutsi inkhosi yaseSiriya iwaphatsa kabi ema-Israyeli.+ 5 Ngako Jehova waniketa ema-Israyeli umkhululi+ lobekatawakhulula esandleni semaSiriya, futsi ema-Israyeli abese ayakhona kuhlala emakhaya awo njengasekucaleni.* 6 (Nome kunjalo, awazange ayekele kwenta sono sendlu yaJerobowamu labangela ema-Israyeli kutsi asente.+ Achubeka enta lesono* futsi insika lengcwele*+ yachubeka imile eSamariya.) 7 Jehoyahazi wasala nelibutfo lebagibeli bemahhashi labangu-50, tincola temphi letingu-10, nemasotja langu-10 000 lahamba ngetinyawo ngobe inkhosi yaseSiriya beyiwabulele lalamanye,+ yawagcobagcoba njengelutfuli ngesikhatsi sekubhula.+

8 Lomunye umlandvo waJehoyahazi, konkhe lakwenta kanye nemisebenti yakhe yemandla, kubhaliwe encwadzini yemlandvo wangetikhatsi temakhosi aka-Israyeli. 9 Jehoyahazi wabese uyafa wangcwatjwa lapho kwangcwatjwa khona bokhokho bakhe eSamariya,+ futsi indvodzana yakhe Jehowashi yaba yinkhosi esikhundleni sakhe.

10 Ngemnyaka wesi-37 wekubusa kweNkhosi Jehowashi yakaJuda, Jehowashi+ indvodzana yaJehoyahazi waba yinkhosi yaka-Israyeli eSamariya futsi wabusa iminyaka lengu-16. 11 Wachubeka nekwenta lokubi emehlweni aJehova, futsi akazange ayekele kwenta tonkhe tono Jerobowamu indvodzana yaNebati labangela ema-Israyeli kutsi atente.+ Wachubeka atenta letono.

12 Lomunye umlandvo waJehowashi, konkhe lakwenta, imisebenti yakhe yemandla kanye nendlela lalwa ngayo neNkhosi Amasiya yakaJuda,+ akukabhalwa yini encwadzini yemlandvo wangetikhatsi temakhosi aka-Israyeli? 13 Jehowashi wabese uyafa, wangcwatjwa lapho kwangcwatjwa khona bokhokho bakhe, futsi Jerobowamu*+ wangena esikhundleni sakhe. Jehowashi wangcwatjwa eSamariya kanye nemakhosi aka-Israyeli.+

14 Elisha+ wahlatjwa kugula lokwambangela kutsi agcine afile, kodvwa asengakafi, Jehowashi inkhosi yaka-Israyeli wehlela kuye wayomlilela, wafike watsi: “Babe wami, babe wami! Incola nebagibeli bemahhashi baka-Israyeli!”+ 15 Elisha wase utsi kuye: “Tsatsa butjoki kanye nemicibisholo.” Ngako wabutsatsa-ke lobutjoki kanye nemicibisholo. 16 Elisha wabese utsi kulenkhosi yaka-Israyeli: “Bamba lobutjoki ngesandla sakho.” Lenkhosi yabubamba, ngemuva kwaloko Elisha wabeka tandla takhe etandleni talenkhosi. 17 Elisha wabese utsi: “Vula lelifasitelo lelingasemphumalanga.” Lenkhosi yalivula. Elisha watsi: “Dubula!” Ngako yenta njalo. Elisha wabese utsi: “Umcibisholo waJehova wekuncoba, umcibisholo wekuncoba baseSiriya! Wena utawuhlasela* iSiriya e-Afeki+ uze uyicedze.”

18 Wachubeka watsi: “Tsatsa lemicibisholo,” ngako lenkhosi yayitsatsa. Elisha wabese utsi kulenkhosi yaka-Israyeli: “Dubula phansi.” Ngako lenkhosi yadubula phansi katsatfu, yabese iyayekela. 19 Nayibona loko, lenceku yaNkulunkulu weliciniso yayitfukutselela kakhulu lenkhosi yase itsi: “Bekufanele kutsi udubule phansi emahlandla lasihlanu nobe lasitfupha! Ngaleyo ndlela bewutawuhlasela iSiriya uze uyincobe, kodvwa nyalo sewutayihlasela uphumelele emahlandla lamatsatfu kuphela.”+

20 Ngemuva kwaloko, Elisha wafa futsi wangcwatjwa. Bekunelibutfo lelihlaselako+ lakaMowabi lebelivamise kufika kulelive ekucaleni kwemnyaka.* 21 Ngesikhatsi lamanye emadvodza angcwaba lenye indvodza, abona lelibutfo lelihlaselako. Ngako ngekushesha ajikijela lesidvumbu ethuneni la-Elisha abese ayabaleka. Satsi lesidvumbu salendvodza nasitsintsana nematsambo a-Elisha, sidvumbu savuka saphila,+ lomuntfu wema ngetinyawo.

22 INkhosi Hazayeli+ yaseSiriya yasiphatsa kabi sive sema-Israyeli+ onkhe emalanga ekubusa kwaJehoyahazi. 23 Nome kunjalo, Jehova wawentela umusa+ nesihawu ema-Israyeli, futsi wakhatsateka ngawo ngenca yesivumelwane lasenta na-Abrahama,+ Isaka+ naJakobe.+ Bekangafuni kuwacotfula futsi akazange awakhweshise emehlweni akhe, kuze kube ngulamuhla. 24 Ngesikhatsi iNkhosi Hazayeli yaseSiriya ifa, indvodzana yayo Bheni-hadadi yaba yinkhosi esikhundleni sayo. 25 Jehowashi indvodzana yaJehoyahazi wabese wemuka Bheni-hadadi indvodzana yaHazayeli emadolobha lebekawatsetse nakalwa nababe wakhe Jehoyahazi. Jehowashi wamhlasela*+ emahlandla lamatsatfu, futsi wawabuyisa lamadolobha aka-Israyeli labetfunjiwe.

14 Ngemnyaka wesibili wekubusa kwaJehowashi+ indvodzana yaJehoyahazi inkhosi yaka-Israyeli, Amasiya indvodzana yeNkhosi Jehowashi yakaJuda waba yinkhosi. 2 Bekaneminyaka lengu-25 budzala nakaba yinkhosi futsi wabusa iminyaka lengu-29 eJerusalema. Libito lamake wakhe bekunguJehoyadini waseJerusalema.+ 3 Wachubeka enta lokuhle emehlweni aJehova, kodvwa akentanga njengaDavide+ khokho wakhe. Wenta konkhe lobekwentiwe ngubabe wakhe Jehowashi.+ 4 Nobe kunjalo, tindzawo letiphakeme atizange tisuswe+ futsi bantfu bebasolo benta imihlatjelo yekushiswa kuletindzawo letiphakeme, ngaleyo ndlela intfutfu yalemihlatjelo beyenyukela kubonkulunkulu babo.+ 5 Ngekushesha nje nase awusimamisile umbuso wakhe, wabulala tinceku takhe lebetibulele babe wakhe lobekayinkhosi.+ 6 Kodvwa akazange awabulale emadvodzana alababulali, ngekuvumelana nemyalo waJehova lobhalwe eMtsetfweni waMosi lotsi: “Bobabe akukafaneli babulawelwe tono tebantfwababo, nebantfwana akukafaneli babulawelwe tono tabobabe babo; kodvwa umuntfu kufanele afele sono sakhe.”+ 7 Wabulala emadvodza langu-10 000 esive saka-Edomu+ eSihosheni Seluswayi,+ wancoba iSela kulemphi+ futsi ligama laleyondzawo kwase kutsiwa yiJokthiyeli kuze kube ngulamuhla.

8 Amasiya wabese utfumela titfunywa kuJehowashi indvodzana yaJehoyahazi loyindvodzana yaJehu inkhosi yaka-Israyeli watsi: “Buya lapha sitokulwa.”*+ 9 INkhosi Jehowashi yaka-Israyeli yatfumela nangu umlayeto eNkhosini Amasiya yakaJuda: “Lukhula lwemanyeva loluseLebanoni lutfumelele umsedari waseLebanoni umlayeto lotsi, ‘Indvodzana yami yinikete indvodzakati yakho itoyenta umfati.’ Kodvwa silwane sesiganga saseLebanoni sendlulile sagcobagcoba lolukhula lwemanyeva. 10 Kuliciniso kutsi wena usincobile sive saka-Edomu,+ ngako inhlitiyo yakho seyidvwalile. Jabula ngeludvumo lwakho kodvwa hlala endlini* yakho. Utibitelelani inhlekelele ngekutsi utibangele wena kuwa kwakho kanye nesive sakaJuda?” 11 Kodvwa Amasiya akazange alalele.+

Ngako iNkhosi Jehowashi yaka-Israyeli yakhuphuka futsi yona kanye neNkhosi Amasiya yakaJuda balwela eBhethi-shemeshi,+ lokuyindzawo yakaJuda.+ 12 Sive sakaJuda sehlulwa sive saka-Israyeli, ngako nguloyo naloyo wabalekela ekhaya* lakhe. 13 INkhosi Jehowashi yaka-Israyeli yatfumba iNkhosi Amasiya yakaJuda letalwa nguJehowashi indvodzana ya-Ahaziya, eBhethi-shemeshi. Batsi nabefika eJerusalema babhidlita lubondza lwakhona kusukela eSangweni laka-Efrayimu+ kuya eSangweni Lelisekoneni,+ sigaba lesingaba ngemamitha langu-178. 14 Yatsatsa lonkhe ligolide, lisiliva nato tonkhe tintfo letatfolakala endlini yaJehova, yatitsatsa nalapho kuhlala khona umcebo endlini* yenkhosi, yaphindze yatfumba bantfu. Ngemuva kwaloko, yabuyela eSamariya.

15 Lomunye umlandvo waJehowashi, loko lakwenta, imisebenti yakhe yemandla kanye nendlela lalwa ngayo neNkhosi Amasiya yakaJuda, kubhaliwe encwadzini yemlandvo wangetikhatsi temakhosi aka-Israyeli. 16 Jehowashi wabese uyafa futsi wangcwatjwa lapho kwangcwatjwa khona bokhokho bakhe eSamariya.+ Wangcwatjwa kanye nemakhosi aka-Israyeli futsi indvodzana yakhe Jerobowamu*+ yaba yinkhosi esikhundleni sakhe.

17 Amasiya+ indvodzana yaJehowashi inkhosi yakaJuda waphila iminyaka lengu-15 ngemuva kwekufa kwaJehowashi+ indvodzana yaJehoyahazi inkhosi yaka-Israyeli.+ 18 Lomunye umlandvo wa-Amasiya ubhaliwe encwadzini yemlandvo wangetikhatsi temakhosi akaJuda. 19 Ngekuhamba kwesikhatsi kwahlanganwa ngaye kwakhiwa licebo lekumbulala+ eJerusalema, ngako wabalekela eLakhishi kodvwa batfumela emadvodza kutsi aye eLakhishi afike ambulalela khona. 20 Babese bayametfwala ngemahhashi bambuyisela emuva, bafike bamngcwaba lapho kwangcwatjwa khona bokhokho bakhe eJerusalema eDolobheni laDavide.+ 21 Ngemuva kwaloko bonkhe bantfu bakaJuda batsatsa Azariya*+ lebekaneminyaka lengu-16 budzala+ bambeka kutsi abe yinkhosi esikhundleni sababe wakhe Amasiya.+ 22 Azariya wakha kabusha i-Elathi+ futsi wayibuyisela kaJuda ngemuva kwekutsi inkhosi* seyingcwatjwe lapho kwangcwatjwa khona bokhokho bayo.+

23 Ngemnyaka wesi-15 wekubusa kwa-Amasiya indvodzana yaJehowashi inkhosi yakaJuda, Jerobowamu+ indvodzana yeNkhosi Jehowashi yaka-Israyeli waba yinkhosi eSamariya futsi wabusa iminyaka lengu-41. 24 Wachubeka nekwenta lokubi emehlweni aJehova. Akazange atiyekele tonkhe tono Jerobowamu indvodzana yaNebati labekabangele ema-Israyeli kutsi atente.+ 25 Wabuyisela umncele waka-Israyeli kusukela eLebo-hamathi*+ kuya eLwandle lwase-Arabha,*+ ngekuvumelana nelivi lelakhulunywa nguJehova Nkulunkulu wema-Israyeli asebentisa inceku yakhe Jona,+ indvodzana ya-Amithayi, umphrofethi waseGathi-heferi.+ 26 Ngobe Jehova bekakubonile kucindzeteleka kwema-Israyeli.+ Bekute ngisho namunye lobekangawasita. Bekute ngisho nalobekangasita labete umsiti nobe lababutsakatsaka. 27 Kodvwa Jehova beketsembise kutsi ngeke alisuse ligama la-Israyeli ngephansi kwemazulu.+ Ngako wawasindzisa ngesandla saJerobowamu indvodzana yaJehowashi.+

28 Lomunye umlandvo waJerobowamu, nako konkhe lakwenta nemisebenti yakhe yemandla kanye nendlela lalwa ngayo nalabuyisela ngayo iDamaseko+ neHamathi+ kuJuda ka-Israyeli, kubhaliwe encwadzini yemlandvo wangetikhatsi temakhosi aka-Israyeli. 29 Jerobowamu wase uyafa futsi wangcwatjwa lapho kwangcwatjwa khona bokhokho bakhe. Wangcwatjwa lapho kwangcwatjwa khona emakhosi aka-Israyeli futsi indvodzana yakhe Zakhariya+ yaba yinkhosi esikhundleni sakhe.

15 Ngemnyaka wesi-27 wekubusa kweNkhosi Jerobowamu* yaka-Israyeli, Azariya*+ indvodzana yeNkhosi Amasiya+ yakaJuda waba yinkhosi.+ 2 Bekaneminyaka lengu-16 budzala nakaba yinkhosi futsi wabusa iminyaka lengu-52 eJerusalema. Libito lamake wakhe bekunguJekoliya waseJerusalema. 3 Wachubeka enta lokuhle emehlweni aJehova, njengobe nje babe wakhe Amasiya bekentile.+ 4 Nome kunjalo, tindzawo letiphakeme atizange tisuswe+ futsi bantfu bebasolo benta imihlatjelo yekushiswa kuletindzawo letiphakeme, ngaleyo ndlela intfuntfu yalemihlatjelo beyenyukela kubonkulunkulu babo.+ 5 Jehova wayishaya ngesifo lenkhosi futsi yaba nebulephelo+ kwaze kwaba lilanga leyafa ngalo. Ngaleso sikhatsi beyihlala endlini yayo yodvwa+ futsi Jothamu+ indvodzana yalenkhosi nguye lobekabuke indlu,* ehlulela nebantfu balelive.+ 6 Lomunye umlandvo wa-Azariya+ nako konkhe lakwenta, kubhaliwe encwadzini yemlandvo wangetikhatsi temakhosi akaJuda. 7 Azariya wabese uyafa futsi wangcwatjwa lapho kwangcwatjwa khona bokhokho bakhe+ eDolobheni laDavide; futsi indvodzana yakhe Jothamu yaba yinkhosi ngemuva kwakhe.

8 Ngemnyaka wesi-38 wekubusa kweNkhosi Azariya+ yakaJuda, Zakhariya+ indvodzana yaJerobowamu waba yinkhosi yaka-Israyeli eSamariya futsi wabusa tinyanga letisitfupha. 9 Wenta lokubi emehlweni aJehova njengobe bebentile bokhokho bakhe. Akazange atiyekele tono Jerobowamu indvodzana yaNebati lebekabangele ema-Israyeli kutsi atente.+ 10 Shalumi indvodzana yaJabeshi wabese umakhela lisu futsi wambulala+ eJibleyamu.+ Ngemuva kwekumbulala, waba yinkhosi esikhundleni sakhe. 11 Lomunye umlandvo waZakhariya ubhaliwe encwadzini yemlandvo wangetikhatsi temakhosi aka-Israyeli. 12 Loku kwagcwalisa livi laJehova lebekalikhulume kuJehu lelitsi: “Emadvodzana akho atawuhlala esihlalweni sebukhosi saka-Israyeli+ kuze kube sesitukulwaneni sesine.”+ Kwenteka ngaleyondlela.

13 Shalumi indvodzana yaJabeshi waba yinkhosi ngemnyaka wesi-39 wekubusa kweNkhosi Uziya+ yakaJuda futsi wabusa inyanga legcwele eSamariya. 14 Ngemuva kwaloko, Menahemu indvodzana yaGadi wakhuphuka asuka eThisa+ waya eSamariya futsi lapho wafike wabulala Shalumi+ indvodzana yaJabeshi. Watsi nasekambulele, waba yinkhosi esikhundleni sakhe. 15 Lomunye umlandvo waShalumi kanye nelicebo lalakha, kubhaliwe encwadzini yemlandvo wangetikhatsi temakhosi aka-Israyeli. 16 Kungaleso sikhatsi lapho Menahemu lobekachamuka eThisa wefike wahlasela iThifsa, nabo bonkhe bantfu lebebakuyo kanye nendzawo leyitungeletile ngobe iThifsa ayizange imvulele emagede. Wayihlasela futsi wahhubhuta tisu tebafati balapho lebebakhulelwe.

17 Ngemnyaka wesi-39 wekubusa kweNkhosi Azariya yakaJuda Menahemu indvodzana yaGadi waba yinkhosi yaka-Israyeli futsi wabusa eSamariya iminyaka lengu-10. 18 Wachubeka enta lokubi emehlweni aJehova. Akatishiyanga tonkhe tono Jerobowamu indvodzana yaNebati lebekabangele ema-Israyeli kutsi atente,+ onkhe emalanga ekubusa kwakhe. 19 INkhosi Phuli+ yase-Asiriya yefika kulelive futsi Menahemu wanika Phuli emathalenta langu-1 000* elisiliva ambonga kutsi umsekelile ekuciniseni umbuso wakhe.+ 20 Ngako Menahemu watfola lisiliva ka-Israyeli ngekutsi alikhokhise emadvodza latiwako nalanjingile.+ Waniketa lenkhosi yase-Asiriya emashekeli elisiliva langu-50* lakhishwe yindvodza ngayinye. Lenkhosi yase-Asiriya yabese ibuyela emuva futsi yangahlali kuleyo ndzawo. 21 Lomunye umlandvo waMenahemu+ nako konkhe lakwenta, kubhaliwe encwadzini yemlandvo wangetikhatsi temakhosi aka-Israyeli. 22 Menahemu wabese uyafa futsi wangcwatjwa lapho kwangcwatjwa khona bokhokho bakhe; indvodzana yakhe Phekahiya yaba yinkhosi esikhundleni sakhe.

23 Ngemnyaka wesi-50 wekubusa kweNkhosi Azariya yakaJuda, Phekahiya indvodzana yaMenahemu waba yinkhosi yaka-Israyeli eSamariya, futsi wabusa iminyaka lemibili. 24 Wachubeka enta lokubi emehlweni aJehova. Akazange atishiye tono Jerobowamu indvodzana yaNebati lebekabangele ema-Israyeli kutsi atente.+ 25 Sikhulu sembutfo wempi yakhe, lokutsiwa nguPhekha+ indvodzana yaRemaliya, samakhela licebo futsi samhlasela eSamariya embhoshongweni lobiyelwe wendlu* yenkhosi sina-Agobhu kanye na-Ariye. Lesikhulu besinemadvodza langu-50 akaGileyadi futsi ngemuva kwekumbulala saba yinkhosi esikhundleni sakhe. 26 Lomunye umlandvo waPhekahiya nako konkhe lakwenta, kubhaliwe encwadzini yemlandvo wangetikhatsi temakhosi aka-Israyeli.

27 Ngemnyaka wesi-52 wekubusa kweNkhosi Azariya yakaJuda, Phekha+ indvodzana yaRemaliya waba yinkhosi yaka-Israyeli eSamariya futsi wabusa iminyaka lengu-20. 28 Wachubeka nekwenta lokubi emehlweni aJehova, futsi akatiyekelanga tono Jerobowamu indvodzana yaNebati lebekabangele kutsi ema-Israyeli atente.+ 29 Ngesikhatsi sekubusa kweNkhosi Phekha yaka-Israyeli, iNkhosi Thiglathi-phileseri+ yase-Asiriya yahlasela yaphindze yatsatsa i-Ijoni, i-Abela-bhethi-makha,+ iJanoha, iKhedeshi,+ iHasori, iGileyadi+ kanye neGalile, yonkhe indzawo yakaNaftali,+ yase itfumba bantfu balapho yaya nabo e-Asiriya.+ 30 Hosheya+ indvodzana ya-Ela wabese wakhela Phekha indvodzana yaRemaliya lisu lekumbulala, futsi wamhlasela wambulala; wase uba yinkhosi esikhundleni sakhe ngemnyaka wesi-20 wekubusa kwaJothamu+ indvodzana ya-Uziya. 31 Lomunye umlandvo waPhekha nako konkhe lakwenta kubhaliwe encwadzini yemlandvo wangetikhatsi temakhosi aka-Israyeli.

32 Ngemnyaka wesibili wekubusa kwaPhekha indvodzana yaRemaliya inkhosi yaka-Israyeli, Jothamu+ indvodzana yeNkhosi Uziya+ yakaJuda waba yinkhosi. 33 Bekaneminyaka lengu-25 budzala nakaba yinkhosi, futsi wabusa iminyaka lengu-16 eJerusalema. Libito lamake wakhe bekunguJerusha indvodzakati yaSadoki.+ 34 Jothamu wachubeka enta lokuhle emehlweni aJehova, njengobe bekwente babe wakhe Uziya.+ 35 Nome kunjalo, tindzawo letiphakeme atizange tisuswe futsi bantfu bebasolo benta imihlatjelo yekushiswa kuletindzawo letiphakeme,+ ngaleyo ndlela intfuntfu yalemihlatjelo beyenyukela kubonkulunkulu babo. Jothamu nguye lowakha ligede lelingenhla lendlu yaJehova.+ 36 Lomunye umlandvo waJothamu naloko lakwenta, kubhaliwe encwadzini yemlandvo wangetikhatsi temakhosi akaJuda. 37 Ngalawo malanga, Jehova wacala kutfumela Resini inkhosi yaseSiriya naPhekha+ indvodzana yaRemaliya kutsi bayohlasela lakaJuda.+ 38 Jothamu wabese uyafa futsi wangcwatjwa lapho kwangcwatjwa khona bokhokho bakhe eDolobheni laDavide khokho wakhe. Indvodzana yakhe Ahazi yaba yinkhosi esikhundleni sakhe.

16 Ngemnyaka wesi-17 wekubusa kwaPhekha indvodzana yaRemaliya, Ahazi+ indvodzana yeNkhosi Jothamu yakaJuda waba yinkhosi. 2 Ahazi bekaneminyaka lengu-20 budzala nakaba yinkhosi futsi wabusa iminyaka lengu-16 eJerusalema. Akazange ente lokuhle emehlweni aJehova Nkulunkulu wakhe, akamlingisanga khokho wakhe Davide.+ 3 Esikhundleni saloko, wahamba ngendlela yemakhosi aka-Israyeli,+ waze washisa nendvodzana yakhe emlilweni*+ alandzela imikhuba leyenyanyekako yaletinye tive,+ leto Jehova lebekaticoshile emkhatsini wema-Israyeli. 4 Wachubeka enta imihlatjelo yekushiswa etindzaweni letiphakeme,+ ngaleyondlela intfuntfu yalemihlatjelo beyenyukela kubonkulunkulu bakhe, wayenta nasemagcumeni kanye nangephansi kwato tonkhe tihlahla letinkhulu.+

5 Kwaba ngaleso sikhatsi lapho iNkhosi Resini yaseSiriya kanye naPhekha indvodzana yaRemaliya inkhosi yaka-Israyeli bahamba bayokulwa neJerusalema.+ Bavimbetela Ahazi kodvwa abakhonanga kuncoba lelidolobha. 6 Ngaleso sikhatsi, iNkhosi Resini yaseSiriya yabuyisela i-Elathi+ ka-Edomu, ngemuva kwaloko yawacosha emaJuda* e-Elathi. Bantfu baka-Edomu bangena e-Elathi futsi solo bahlala khona kuze kube ngulamuhla. 7 Ngako Ahazi watfumela titfunywa eNkhosini Thiglathi-phileseri+ yase-Asiriya watsi: “Ngiyinceku yakho nendvodzana yakho. Ngicela ukhuphuke utongisindzisa esandleni senkhosi yaseSiriya nasesandleni senkhosi yaka-Israyeli, naba bayangihlasela.” 8 Ahazi wase utsatsa lisiliva neligolide lebelisendlini yaJehova kanye nasendzaweni labekuhlala khona umcebo endlini* yenkhosi, wadiza ngako enkhosini yase-Asiriya.+ 9 Inkhosi yase-Asiriya yasilalela sicelo sakhe futsi yakhuphukela eDamaseko yafike yayincoba, yase itfumba nebantfu bakhona yaya nabo eKhiri+ yaphindze yabulala naResini.+

10 INkhosi Ahazi yabese iyahamba iya eDamaseko iyohlangana neNkhosi Thiglathi-phileseri yase-Asiriya. Nayibona li-al’thare lebeliseDamaseko, iNkhosi Ahazi yatfumelela Urija umphristi umdvwebo waleli-al’thare, lokhombisa kuma kwalo nendlela lebelakhiwe ngayo.+ 11 Urija+ umphristi wakha li-al’thare+ lelihambisana nato tonkhe ticondziso iNkhosi Ahazi lebeyimtfumelele tona iseDamaseko. Urija umphristi wacedza kwakha leli-al’thare iNkhosi Ahazi isengakabuyi eDamaseko. 12 Ngesikhatsi lenkhosi ibuya eDamaseko futsi ibona leli-al’thare, yaya kulo yase yenta iminikelo.+ 13 Kuleli-al’thare, yachubeka yenta iminikelo yekushiswa kanye neminikelo yekushiswa yalokutinhlavu; yaphindze yatfulula neminikelo yalokunatfwako futsi yafafata ingati yemihlatjelo yekuthula kulo. 14 Ngemuva kwaloko, yasusa li-al’thare lelitfusi+ lebelisembikwaJehova endzaweni yalo embikwalendlu. Yalisusa emkhatsini weli-al’thare layo nendlu yaJehova futsi yalibeka ngasenyakatfo yaleli-al’thare layo. 15 INkhosi Ahazi yatjela Urija+ umphristi yatsi: “Yenta umnikelo wekushiswa wasekuseni e-al’thare lelikhulu,+ nemnikelo walokutinhlavu+ wakusihlwa, umnikelo wekushiswa wenkhosi, nemnikelo wayo walokutinhlavu, kanye neminikelo yekushiswa, neyalokutinhlavu, neyalokunatfwako yabo bonkhe bantfu. Kufanele uphindze ufafate kulo yonkhe ingati yeminikelo yekushiswa nayo yonkhe ingati yaleleminye imihlatjelo. Mayelana neli-al’thare lelitfusi, ngimi lotawuncuma kutsi ngitakwentani ngalo.” 16 Urija umphristi wenta konkhe iNkhosi Ahazi lebeyimtjele kutsi akwente.+

17 Ngetulu kwaloko, iNkhosi Ahazi yajuba emaphanela lasemaceleni etincola+ aba ticucu yase isusa emabhavu lebekakuto+ yasusa neLwandle kuletinkunzi telitfusi+ lebetilusekele yalubeka esiyilweni sematje.+ 18 Sakhiwo lesimbonyiwe seliSabatha lebesakhiwe kulendlu kanye nendlela yangephandle yekungena yenkhosi, yakususa kulendlu yaJehova; loko yakwenta ngenca yenkhosi yase-Asiriya.

19 Lomunye umlandvo wa-Ahazi naloko lakwenta, kubhaliwe encwadzini yemlandvo wangetikhatsi temakhosi akaJuda.+ 20 Ahazi wabese uyafa futsi wangcwatjwa lapho kwangcwatjwa khona bokhokho bakhe eDolobheni laDavide; futsi indvodzana yakhe Hezekiya*+ yaba yinkhosi esikhundleni sakhe.

17 Ngemnyaka wesi-12 wekubusa kweNkhosi Ahazi yakaJuda, Hosheya+ indvodzana ya-Ela waba yinkhosi yaka-Israyeli eSamariya; wabusa iminyaka lengu-9. 2 Wachubeka nekwenta lokubi emehlweni aJehova kodvwa akafikanga ezingeni lemakhosi aka-Israyeli lebekabuse ngaphambi kwakhe. 3 INkhosi Shalmaneseri yase-Asiriya yakhuphuka yayokulwa naye,+ futsi Hosheya wase uba yinceku yayo, wacala nekuletsa tetfulo kulenkhosi.+ 4 Nome kunjalo, inkhosi yase-Asiriya yeva kutsi Hosheya bekanencenye ekuyakheleni licebo lekuyibulala ngobe bekatfumele titfunywa ku-So inkhosi yaseGibhithe+ futsi abengasayiletseli lenkhosi yase-Asiriya letetfulo njengobe bekenta eminyakeni leyendlulile. Ngako lenkhosi yase-Asiriya yambopha futsi yamvalela ejele.

5 Inkhosi yase-Asiriya yahlasela lonkhe lelive, futsi yefika eSamariya yayivimbetela iminyaka lemitsatfu. 6 Ngemnyaka wesi-9 wekubusa kwaHosheya, inkhosi yase-Asiriya yatfumba iSamariya.+ Yabese itsatsa bantfu baka-Israyeli yabatfumbela+ e-Asiriya, yabahlalisa eHala naseHabori lesemfuleni iGozani+ kanye nasemadolobheni emaMede.+

7 Loko kwenteka ngobe bantfu baka-Israyeli bebonile kuJehova Nkulunkulu wabo lowabakhipha eveni laseGibhithe ngephansi kwesandla saFaro, inkhosi yaseGibhithe.+ Bakhonta* labanye bonkulunkulu,+ 8 balandzela emasiko etive Jehova bekaticoshile embikwabo futsi balandzela nemasiko labekasungulwe ngemakhosi aka-Israyeli.

9 Ema-Israyeli bekamatasa ngetintfo lebetingakalungi emehlweni aJehova Nkulunkulu wawo. Achubeka akha tindzawo letiphakeme kuwo onkhe emadolobha awo,+ kusukela esicongweni sekulindza kuya edolobheni lelibiyelwe.* 10 Achubeka nekutakhela ematje langcwele kanye netinsika letingcwele*+ kuwo onkhe emagcuma nangephansi kwato tonkhe tihlahla letinkhulu;+ 11 nakuto tonkhe tindzawo letiphakeme bekenta imihlatjelo yekushiswa alingisa tive lebeticoshwe nguJehova embikwawo watiyisa ekutfunjweni.+ Ema-Israyeli abechubeka enta tintfo letimbi lebetivisa Jehova buhlungu.

12 Achubeka akhonta tithico letenyanyekako,*+ leto Jehova bekawatjelile ngato watsi: “Akukafaneli nikwente loku!”+ 13 Jehova wachubeka ecwayisa ema-Israyeli nemaJuda asebentisa bonkhe baphrofethi bakhe nabo bonkhe baboni bemibono+ atsi: “Gucukani etindleleni tenu letimbi!+ Gcinani imiyalo yami kanye netimiso tami ngekuvumelana nayo yonkhe imitsetfo lengayala ngayo bokhokho benu naleyo lenginitfumelele yona ngetinceku tami baphrofethi.” 14 Kodvwa awazange alalele, achubeka anenkhani njengabokhokho bawo labangazange bakhombise kukholwa kuJehova Nkulunkulu wabo.+ 15 Achubeka nekungayilaleli imitsetfo yakhe, angasigcini nesivumelwane Nkulunkulu+ lebekasentile nabokhokho bawo futsi angatihloniphi tikhumbuto lebekawanikete tona kuze awecwayise,+ achubeka nekulandzela tithico letingenamsebenti,+ agcine angasasiyo intfo yalutfo,+ alingisa tive lebekakhelene nato Jehova lebekawayalile kutsi angatilingisi.+

16 Achubeka nekushiya yonkhe imiyalo yaJehova Nkulunkulu wawo futsi atakhela tithico tematfole+ lamabili ngensimbi* kanye nensika lengcwele*+ futsi akhotsamela lonkhe libutfo lasemazulwini,+ akhonta naBhali.+ 17 Aphindze ashisa emadvodzana awo nemadvodzakati awo emlilweni,*+ abhula, aphengula+ aphindze achubeka nekutinikela* etintfweni letimbi emehlweni aJehova, kuze amvise buhlungu.

18 Ngaleso sizatfu Jehova wawatfukutselela kakhulu ema-Israyeli kangangekutsi wawakhweshisa emehlweni akhe.+ Akavumelanga ngisho namunye kutsi asale ngaphandle kwesive sakaJuda kuphela.

19 Ngisho nesive sakaJuda asizange siyigcine imiyalo yaJehova Nkulunkulu waso,+ naso sahamba ngemasiko lebekalandzelwa ngema-Israyeli.+ 20 Jehova wabalahla bonkhe bantfu baka-Israyeli, wabatsela ngelihlazo futsi wabanikela esandleni sebatfumbi kwaze kwaba ngulapho sekabakhweshisile embikwakhe. 21 Wawasusa ema-Israyeli endlini yaDavide futsi wona abeka Jerobowamu indvodzana yaNebati waba yinkhosi.+ Kodvwa Jerobowamu wabangela kutsi ema-Israyeli aphambuke ekulandzeleni Jehova, wawabangela kutsi ente sono lesikhulu. 22 Ema-Israyeli achubeka nekwenta tonkhe tono Jerobowamu lebekatentile.+ Akasukanga kuto 23 kwaze kwaba ngulapho Jehova awasusa ema-Israyeli emehlweni akhe njengobe bekakhulumile asebentisa tonkhe tinceku takhe baphrofethi.+ Ngako ema-Israyeli atfunjwa esuka eveni lawo aya e-Asiriya,+ lapho ahlala khona kuze kube ngulamuhla.

24 Inkhosi yase-Asiriya yabese ilandza bantfu lebebaseBhabhulona, eKutha, e-Ava, eHamathi naseSefavayimu+ yabahlalisa eSamariya endzaweni yema-Israyeli; yabahlalisa eSamariya nasemadolobheni ayo. 25 Ngalesikhatsi labantfu bacala kuhlala lapho, bebangamesabi* Jehova. Ngako Jehova wabatfumelela emabhubesi+ futsi abulala labanye babo. 26 Inkhosi yase-Asiriya yabikelwa kwatsiwa: “Tive lotitfumbile futsi watihlalisa emadolobheni aseSamariya atiyati indlela lokufanele kukhontwe* ngayo Nkulunkulu walelive. Ngako uyachubeka nekutitfumelela emabhubesi latibulalako ngobe kute kuto lowati inkholo yaNkulunkulu walelive.”

27 Nayiva loko, inkhosi yase-Asiriya yakhipha umyalo lotsi: “Tsatsani munye walabaphristi lenabatfumba nimbuyisele emuva ayohlala lapho kuze afundzise labantfu inkholo yaNkulunkulu walelive.” 28 Ngako munye kulabaphristi baseSamariya lebebatfunjiwe, wabuyela emuva wayohlala eBetheli+ wase ucala kufundzisa labantfu indlela yekwesaba* Jehova.+

29 Nome kunjalo, sive ngasinye senta nkulunkulu* waso sambeka etindlini tekukhontela etindzaweni letiphakeme lebetakhiwe ngemaSamariya; sive ngasinye besenta loko edolobheni lebesihlala kulo. 30 Ngako emadvodza aseBhabhulona enta Sukhothi-bhenothi, emadvodza aseKutha enta Negali, emadvodza aseHamathi+ wona enta Ashima, 31 futsi ema-Ava enta Nibhazi naThataki. EmaSefavayimu bekashisa emadvodzana awo emlilweni,* awashisela Adrameleki na-Anameleki, lokubonkulunkulu baseSefavayimu.+ 32 Ngisho nobe bebamesaba Jehova, babeka baphristi etindzaweni letiphakeme babatsatsa kubantfu bakubo futsi labaphristi ngibo lebebahola kuletindlu tekukhontela lebetisetindzaweni letiphakeme.+ 33 Ngaleyo ndlela, bebamesaba Jehova kodvwa bebakhonta bonkulunkulu babo labahambisana nenkholo* yetive lebebasuka kuto.+

34 Kuze kube ngulamuhla, labantfu balandzela tinkholo* tabo letindzala. Kute kubo lokhonta* Jehova, lolandzela timiso takhe, tehlulelo takhe, uMtsetfo kanye nemyalo Jehova lawuniketa emadvodzana aJakobe, Nkulunkulu lashintja libito lakhe watsi sengu-Israyeli.+ 35 Ngesikhatsi Jehova enta sivumelwane nawo,+ wawaniketa umyalo lotsi: “Akukafaneli nesabe labanye bonkulunkulu futsi akukafaneli nibakhotsamele nobe nibakhonte nobe nibentele imihlatjelo.+ 36 Kodvwa Jehova lowanikhipha eveni laseGibhithe ngemandla lamakhulu nangesandla leselulekile,+ nguye lokufanele nimesabe,+ futsi nguye lokufanele nimkhotsamele niphindze nimentele umhlatjelo. 37 Timiso, tehlulelo, uMtsetfo kanye nemyalo lanibhalela wona,+ kufanele nihlale nikugcina ngekucophelela futsi kufanele ningabesabi labanye bonkulunkulu. 38 Kufanele ningasikhohlwa sivumelwane lengasenta nani+ futsi akukafaneli nesabe labanye bonkulunkulu. 39 Kodvwa nguJehova Nkulunkulu wenu lokufanele nimhloniphe, ngobe nguye lotanikhulula esandleni sato tonkhe titsa tenu.”

40 Kodvwa abazange balalele futsi balandzela inkholo* yabo lendzala.+ 41 Ngako letive tabese tiyamesaba Jehova,+ kodvwa betiphindze tikhonte tithico. Emadvodzana nemadvodzakati ato nebatukulu bato bachubeka benta njengabokhokho babo kuze kube ngulamuhla.

18 Ngemnyaka wesitsatfu wekubusa kwaHosheya+ indvodzana ya-Ela inkhosi yaka-Israyeli, Hezekiya+ indvodzana yeNkhosi Ahazi+ yakaJuda waba yinkhosi. 2 Bekaneminyaka lengu-25 budzala nakaba yinkhosi futsi wabusa iminyaka lengu-29 eJerusalema. Libito lamake wakhe bekungu-Abiya,* indvodzakati yaZakhariya.+ 3 Wachubeka enta lokuhle emehlweni aJehova+ njengobe nakhokho wakhe Davide bekentile.+ 4 Nguye lowasusa tindzawo letiphakeme,+ waphihlita ematje langcwele waphindze wabhidlita netinsika letingcwele.*+ Wasila nenyoka yelitfusi lebeyentiwe nguMosi;+ ngobe kuze kube nguleso sikhatsi bantfu baka-Israyeli bebasolo bayentela imihlatjelo yekushiswa futsi lenyoka beyivame kubitwa ngekutsi sithico senyoka yelitfusi.* 5 Hezekiya wetsembela kuJehova+ Nkulunkulu wema-Israyeli; bekute lonjengaye kuwo onkhe emakhosi akaJuda labusa emvakwakhe, ngisho nalabusa kucala kunaye. 6 Wabambelela kuJehova.+ Akazange ayekele kumlandzela; wachubeka nekugcina imiyalo Jehova lebekayinikete Mosi. 7 Jehova bekanaye. Nome ngabe ngukuphi lapho bekaya khona, bekenta tintfo ngekuhlakanipha. Wavukela inkhosi yase-Asiriya futsi wala kulawulwa ngiyo.+ 8 Wancoba nemaFilisti+ waze wayofika eGaza nasemaphandleni ayo, kusukela esicongweni sekulindza kuya edolobheni lelibiyelwe.*

9 Ngemnyaka wesine wekubusa kweNkhosi Hezekiya, lokungumnyaka wesi-7 wekubusa kwaHosheya+ indvodzana ya-Ela inkhosi yaka-Israyeli, iNkhosi Shalmaneseri yase-Asiriya yenyuka yayohlasela iSamariya futsi yacala kuyivimbetela.+ 10 Bayincoba+ ekupheleni kwaleminyaka lemitsatfu; ngemnyaka wesitfupha wekubusa kwaHezekiya, lokungumnyaka wesi-9 wekubusa kweNkhosi Hosheya yaka-Israyeli, iSamariya yancotjwa. 11 Inkhosi yase-Asiriya yabese itsatsa bantfu baka-Israyeli yabatfumbela+ e-Asiriya, yabahlalisa eHala naseHabori lesemfuleni iGozani kanye nasemadolobheni emaMede.+ 12 Loku kwenteka ngobe bebangakalilaleli livi laJehova Nkulunkulu wabo kodvwa bachubeka nekwedzelela sivumelwane sakhe, konkhe loko Mosi inceku yaJehova lebekabayale ngako.+ Abazange balalele futsi abazange bahloniphe.

13 Ngemnyaka wesi-14 wekubusa kweNkhosi Hezekiya, Senaheribi inkhosi yase-Asiriya+ wakhuphuka wayohlasela onkhe emadolobha labiyelwe akaJuda futsi wawatfumba.+ 14 Ngako iNkhosi Hezekiya yakaJuda yatfumela livi eLakhishi enkhosini yase-Asiriya yatsi: “Ngente liphutsa. Ungasangihlaseli, ngitakunika noma yini longase uyifune kimi.” Inkhosi yase-Asiriya yafuna inhlawulo yemathalenta langu-300* elisiliva nemathalenta langu-30 eligolide eNkhosini Hezekiya yakaJuda. 15 Ngako Hezekiya wayinika lonkhe lisiliva lebelitfolakala endlini yaJehova kanye nalapho bekuhlala khona umcebo endlini* yenkhosi.+ 16 Ngaleso sikhatsi, Hezekiya wakhipha* tivalo telithempeli+ laJehova kanye netinsika teminyango iNkhosi Hezekiya yakaJuda lebeyitihucile*+ yase itinika inkhosi yase-Asiriya.

17 Inkhosi yase-Asiriya yabese itfumela Tharithani,* Rabusarisi* kanye naRabushake* nelibutfo lelikhulu lebelisuka eLakhishi,+ yalitfumela eNkhosini Hezekiya yaseJerusalema.+ Benyuka baya eJerusalema bafike bamisa emathende eceleni kwemsele wesitiba lesingenhla, lesisemgwacweni lomkhulu wensimu yemwashi wetimphahla.+ 18 Batsi nababita inkhosi kutsi iphume iye kubo, Eliyakimu+ indvodzana yaHilkiya lobekabuke indlu,* Shebna+ mabhalane kanye naJowa indvodzana ya-Asafa umngcini mabhuku, baphuma baya kubo.

19 Ngako Rabushake watsi kubo: “Ngicela nitsi kuHezekiya: ‘Naku lokushiwo yinkhosi lenkhulu, inkhosi yase-Asiriya, itsi: “Wena wetsembeni?+ 20 Utsi, ‘Nginelichinga nemandla ekulwa imphi,’ kodvwa lawo mavi alite. Ulibeke kubani litsemba lakho kutsi ungaze ube nesibindzi lesingaka sekungivukela?+ 21 Wena wetsembele ekusitweni ngulomhlanga lofohlokile, lokuyiGibhithe,+ lokutsi ngisho umuntfu angatsi ubambelela kuwo angahlabeka sandla alimale. Unjalo-ke Faro inkhosi yaseGibhithe kubo bonkhe labetsembele kuye. 22 Naningatsi kimi: ‘Setsembele kuJehova Nkulunkulu wetfu,’+ akusiye yini lona Hezekiya lasuse tindzawo takhe letiphakeme nema-al’thare,+ abe atsi kubantfu bakaJuda nebaseJerusalema: ‘Kufanele nikhotsame embikwaleli-al’thare eJerusalema’?”’+ 23 Ngako nyalo ngicela ubheje nenkhosi yami, inkhosi yase-Asiriya: Ngitakunika emahhashi langu-2 000 nawungakhona kuwatfolela bagibeli.+ 24 Ungakwenta kanjani-ke kutsi ubuyisele emuva indvuna yembuso lenesikhundla lesiphansi kakhulu etincekwini tenkhosi yami, ube ubeke litsemba lakho eGibhithe kutsi ikunike tincola nebagibeli bemahhashi? 25 Akusiye yini Jehova lotse angikhuphuke ngitohlasela lendzawo? Jehova lucobo lwakhe utsite: ‘Khuphuka uyohlasela lelive uphindze ulincobe.’”

26 Nabeva loko, bo-Eliyakimu indvodzana yaHilkiya naShebna+ kanye naJowa batsi kuRabushake:+ “Sicela ukhulume netinceku takho ngelulwimi lwesi-Aramu*+ ngobe ngilo lesiluvako; ungakhulumi natsi ngelulwimi lwemaJuda ngobe kuva bonkhe labantfu labaselubondzeni.”+ 27 Kodvwa Rabushake watsi kubo: “Inkhosi yami ingitfume kutsi ngikhulume lamavi enkhosini yenu nakini kuphela yini? Ayikangitfumi yini kutsi ngiwakhulume nakulamadvodza lahleti elubondzeni, latakudla emangcoliso awo, anatse nemichamo yawo kanye nani?”

28 Rabushake wabese uyasukuma, wamemeta ngelulwimi lwemaJuda watsi: “Lalelani livi lenkhosi lenkhulu, inkhosi yase-Asiriya.+ 29 Naku lokushiwo yinkhosi, ‘Ningamvumeli Hezekiya aniyenge ngobe angeke akhone kunisindzisa esandleni sami.+ 30 Ningamvumeli Hezekiya kutsi anente netsembele kuJehova ngekutsi atsi: “Jehova utasikhulula nakanjani, futsi lelidolobha angeke linikelwe esandleni senkhosi yase-Asiriya.”+ 31 Ningamlaleli Hezekiya, ngobe naku lokushiwo yinkhosi yase-Asiriya: “Yentani kuthula nami futsi nitinikele. Ngamunye wenu utakudla ensimini yakhe yemagilebisi nasesihlahleni sakhe semakhiwa aphindze anatse emanti emtfonjeni wakhe, 32 kuze kube ngulapho ngita ngitonilandza nginiyise eveni lelinjengelive lenu,+ live lelinalokutinhlavu neliwayini lelisha, live lelinesinkhwa nemasimu emagilebisi, live lelinetihlahla temncumo neluju. Nitawubese niyaphila futsi ngeke nife. Ningamlaleli Hezekiya ngobe uyanidukisa ngekutsi atsi, ‘Jehova utasikhulula.’ 33 Ukhona yini kulabonkulunkulu betive lokhonile kusindzisa live lakhe esandleni senkhosi yase-Asiriya? 34 Baphi bonkulunkulu baseHamathi+ nase-Aphadi? Baphi bonkulunkulu baseSefavayimu,+ baseHena nebase-Iva? Bayikhululile yini iSamariya esandleni sami?+ 35 Ngumuphi emkhatsini wabo bonkhe labonkulunkulu balamave lokhonile kukhulula live lakhe esandleni sami, kangangekutsi Jehova angakhulula iJerusalema esandleni sami?”’”+

36 Kodvwa labantfu babindza futsi abashongo lutfo kuye, ngobe sicondziso senkhosi besitsi, “Ningamphendvuli.”+ 37 Kodvwa Eliyakimu indvodzana yaHilkiya, lobekabuke indlu,* Shebna mabhalane kanye naJowa umgcini mabhuku futsi loyindvodzana ya-Asafa, beta kuHezekiya badzabula tembatfo tabo futsi bamtjela emavi aRabushake.

19 Ngekushesha nje iNkhosi Hezekiya nayiva ngaloku, yadzabula tembatfo tayo, yagcoka indvwangu yelisaka yabese iya endlini yaJehova.+ 2 Yabese itfumela Eliyakimu lobekengamele indlu,* naShebna mabhalane kanye nebaphristi lababaholi, bonkhe bebagcoke tindvwangu temasaka futsi yabatfumela kumphrofethi Isaya+ indvodzana ya-Amozi. 3 Bafike batsi kuye: “Naku lokushiwo nguHezekiya: ‘Leli lilanga lekucindzeteleka, lilanga lekwetfukwa nelelihlazo; ngobe bantfwana sebalungele kutalwa* kodvwa kute emandla ekubabeleka.+ 4 Mhlawumbe Jehova Nkulunkulu wakho utaweva onkhe emavi aRabushake lotfunywe yinkhosi yase-Asiriya kutsi atohlambalata Nkulunkulu lophilako.+ Yena utamenta atiphendvulele ngemavi Jehova Nkulunkulu wakho lawevile. Ngako ngicela uthantazele+ labantfu labasele futsi labasindzile.’”

5 Ngako letinceku teNkhosi Hezekiya taya ku-Isaya,+ 6 Isaya wase utsi kuto: “Naku lokufanele nikusho enkhosini yenu: ‘Nguloku lokushiwo nguJehova: “Ungesabi+ ngenca yalamavi lowevile, emavi tinceku tenkhosi yase-Asiriya letingihlambalate ngawo.+ 7 Ngifaka imicabango engcondvweni yayo,* futsi itawuva umbiko bese ibuyela eveni layo; ngitawubese ngibangela kutsi ibulawe ngenkemba eveni layo.”’”+

8 Ngemuva kwekutsi Rabushake sekavile kutsi inkhosi yase-Asiriya iyekele kuvimbetela iLakhishi,+ wabuyela kuyo wayikhandza ilwa neLibna.+ 9 Lenkhosi yase iyabikelwa ngeNkhosi Thihakha yaseTopiya kwatsiwa: “Nayi, seyifikile itokulwa nawe.” Ngako lenkhosi yase-Asiriya yaphindze yatfumela titfunywa+ kuHezekiya yatsi: 10 “Naku lokufanele nikusho eNkhosini Hezekiya yakaJuda: ‘Ungamvumeli loNkulunkulu wakho lowetsembele kuye kutsi akuyenge ngekutsi atsi: “IJerusalema ngeke inikelwe esandleni senkhosi yase-Asiriya.”+ 11 Uvile ngaloko emakhosi ase-Asiriya lakwenta kuwo onkhe emave ngekuwabhubhisa.+ Wena wedvwa-ke utawusindziswa yini? 12 Bonkulunkulu baletive letacotfulwa bokhokho bami batisindzisa yini? Iphi iGozani, iHarani,+ iResefu nebantfu base-Edeni lebebaseThelasari? 13 Iphi inkhosi yaseHamathi, inkhosi yase-Aphadi, nenkhosi yasedolobheni laseSefavayimu, laseHena nelase-Iva?’”+

14 Hezekiya watsatsa letincwadzi kuletitfunywa wase uyatifundza. Ngemuva kwaloko, wakhuphukela endlini yaJehova wafike watendlala* embikwaJehova.+ 15 Hezekiya wabese uyathantaza+ embikwaJehova watsi: “Awu Jehova Nkulunkulu wema-Israyeli, wena lohleti esihlalweni sebukhosi ngetulu* kwemakherubhi,+ nguwe wedvwa longuNkulunkulu weliciniso kuyo yonkhe imibuso yemhlaba.+ Wena wadala emazulu nemhlaba. 16 Beka indlebe yakho, awu Jehova, ulalele!+ Awu Jehova, vula emehlo akho,+ ubone! Lalela emavi Senaheribi lawatfumele kute ahlambalate Nkulunkulu lophilako. 17 Awu Jehova, kuliciniso kona kutsi emakhosi ase-Asiriya aticotfulile tive kanye nemave ato.+ 18 Ajikijele nabonkulunkulu bato emlilweni, ngobe bebangesibo bonkulunkulu+ kodvwa bebayimisebenti yetandla temuntfu,+ batingodvo nematje. Kungako akhonile kubabhubhisa. 19 Kodvwa manje, awu Jehova Nkulunkulu wetfu, ngicela usisindzise esandleni sakhe kuze yonkhe imibuso yemhlaba yati kutsi wena wedvwa unguNkulunkulu, awu Jehova.”+

20 Isaya indvodzana ya-Amozi wabese utfumela umlayeto kuHezekiya lotsi: “Naku lokushiwo nguJehova Nkulunkulu wema-Israyeli: ‘Ngiwuvile umthantazo wakho+ lomayelana neNkhosi Senaheribi yase-Asiriya.+ 21 Nali livi lelikhulunywe nguJehova mayelana nayo:

“Indvodzakati yaseSiyoni leyintfombi ntfo iyakwedzelela, ikuhleka bulima.

Indvodzakati yaseJerusalema ikunikinela inhloko.

22 Ngubani lona lomedzelele nalomhlambalatile?+

NguLongcwele Waka-Israyeli!+

23 Ngetitfunywa takho+ wedzelele Jehova+ watsi:

Ngitawujuba imisedari yayo lemidze, nemijunipha yayo yelikhetselo.

Ngitawungena nasemajukujukwini emahlatsi ayo lamnyama.

25 Awukeva yini? Kusukela kadzeni, kwahlelwa.*+

Kusukela emalangeni lendlula, loko ngakulungiselela.*+

Nyalo ngitakuletsa.+

Wena utawugucula emadolobha labiyelwe abe tindzala letingahlali muntfu.+

29 “‘Nalu luphawu lotawubona ngalo:* Kulomnyaka utawudla tintfo letitimilelako;* emnyakeni wesibili utawudla lokutinhlavu lokutawuhluma kuto;+ kodvwa emnyakeni wesitsatfu utawuhlanyela inhlanyelo uvune, futsi utawuhlanyela emasimu emagilebisi udle titselo tawo.+ 30 Labo bendlu yakaJuda labaphunyukako, lokungulabo labatawusala,+ batawufaka phansi imphandze ivete titselo ngetulu. 31 Ngobe labasele batawuphuma eJerusalema nalabasindzile baphume eNtsabeni iSiyoni. Inshisekelo yaJehova wemabutfo itakwenta loko.+

32 “‘Ngako naku lokushiwo nguJehova ngenkhosi yase-Asiriya:+

35 Ngalobo busuku, ingilosi yaJehova yaphuma futsi yabulala emadvodza langu-185 000 lapho ema-Asiriya+ bekamise khona emathende. Batsi bantfu nabavuka ekuseni ngeluvivi, babona tidvumbu tigcwele yonkhe indzawo.+ 36 Ngako iNkhosi Senaheribi yase-Asiriya yabese iyahamba ibuyela eNineve+ yafike yahlala khona.+ 37 Yatsi isagucile endlini* yankulunkulu wayo Nisroki, emadvodzana ayo, bo-Adrameleki naShareseri, ayibulala ngenkemba+ ase abalekela eveni lase-Ararathi.+ Indvodzana yayo Esahadoni+ yaba yinkhosi esikhundleni sayo.

20 Kulawo malanga Hezekiya wahlatjwa kugula futsi besekagulela kufa.+ Umphrofethi Isaya indvodzana ya-Amozi weta kuye watsi: “Naku lokushiwo nguJehova: ‘Niketa umndeni wakho ticondziso, ngobe utakufa; angeke welulame.’”+ 2 Nakeva loko, wagucuka wabuka elubondzeni futsi wacala kuthantaza kuJehova watsi: 3 “Awu Jehova, ngiyakuncenga, ngicela ukhumbule indlela lengihambe ngayo embikwakho ngekwetsembeka nangenhlitiyo lephelele, futsi ngente lokuhle emehlweni akho.”+ Hezekiya wabese ucala kudzindza sililo.

4 Isaya bekasengakafiki ebaleni* lelisemkhatsini nakufika livi laJehova kuye litsi:+ 5 “Buyela emuva ufike utsi kuHezekiya, umholi webantfu bami: ‘Naku lokushiwo nguJehova Nkulunkulu waDavide khokho wakho: “Ngiwuvile umthantazo wakho. Ngitibonile tinyembeti takho.+ Nyalo ngitakwelapha.+ Ngelilanga lesitsatfu, utakwenyukela endlini yaJehova.+ 6 Ngitakwengetela iminyaka lengu-15 ekuphileni* kwakho, futsi wena ngitakusindzisa kanye nalelidolobha esandleni senkhosi yase-Asiriya,+ ngiphindze ngilivikele lelidolobha ngenca yelibito lami nangenca yaDavide inceku yami.”’”+

7 Isaya wabese utsi: “Letsani likhekheba lelomisiwe lemakhiwa.” Ngako baliletsa futsi bamtfoba ngalo lelitfumba, wase uyelulama kancane kancane.+

8 Hezekiya abebute Isaya watsi: “Luyini luphawu+ lwekutsi Jehova utangelapha, nelwekutsi ngelilanga lesitsatfu ngitawukhuphuka ngiye endlini yaJehova?” 9 Isaya waphendvula watsi: “Nalu luphawu loluvela kuJehova lwekukukhombisa kutsi Jehova utaligcwalisa livi lalikhulumile: Wena ufuna kutsi sitfunti sasetitebhisini* siye embili ngetitebhisi letingu-10 yini nobe siye emuva ngetitebhisi letingu-10?”+ 10 Hezekiya watsi: “Kuyintfo lelula kutsi sitfunti siye embili ngetitebhisi letingu-10, kodvwa hhayi kutsi siye emuva ngetitebhisi letingu-10.” 11 Ngako umphrofethi Isaya wathantaza kuJehova, futsi Nkulunkulu wase wenta lesitfunti kuletitebhisi ta-Ahazi kutsi sibuyele emuva ngetitebhisi letingu-10, kantsi besesiye embili ngaletitebhisi letingu-10.+

12 Ngaleso sikhatsi, inkhosi yaseBhabhulona Merodaki-baladani, indvodzana yaBaladani, yatfumela tincwadzi kanye nesipho kuHezekiya ngobe beyivile kutsi bekagula.+ 13 Hezekiya watemukela* letitfunywa futsi watikhombisa yonkhe indlu lehlala umcebo+ lobewufaka ekhatsi lisiliva, ligolide, emafutsa ebhalisamu kanye nalamanye emafutsa laligugu, tikhali takhe kanye nako konkhe lobekukhona etindzaweni takhe tekubeka umcebo. Kute Hezekiya langazange atikhombise kona letitfunywa endlini* yakhe nakuyo yonkhe indzawo lebeyingaphansi kwakhe.

14 Ngemuva kwaloko Isaya umphrofethi wefika eNkhosini Hezekiya, wayibuta watsi: “Atsiteni lamadvodza, futsi bekabuyaphi?” Hezekiya watsi: “Bekabuya eveni lelikhashane, eBhabhulona.”+ 15 Wachubeka wambuta watsi: “Yini layibonile endlini* yakho?” Hezekiya waphendvula watsi: “Abone konkhe lokusendlini* yami. Kute lengingakawakhombisi kona etindzaweni tami letihlala umcebo.”

16 Isaya wabese utsi kuHezekiya: “Lalela nali livi laJehova,+ 17 Jehova utsi: ‘Kuta emalanga lapho konkhe lokusendlini* yakho nako konkhe lobekucongelelwe bokhokho bakho kuze kube ngulamuhla, kuyawutsatfwa kuyiswe eBhabhulona.+ Kute lokuyawusala. 18 Lamanye emadvodzana akho lotawatala ayawutsatfwa+ futsi ayawuba tindvuna tasesigodlweni senkhosi yaseBhabhulona.’”+

19 Hezekiya wabese utsi ku-Isaya: “Livi laJehova lolikhulumile lihle.”+ Wengeta watsi: “Kuhle nangabe kutawuba nekuthula nenhlalakahle nangisaphila.”*+

20 Lomunye umlandvo waHezekiya, yonkhe imisebenti yakhe yemandla, nendlela lakha ngayo lichibi lemanti+ kanye nemsele wemanti, nangendlela langenisa ngayo lamanti edolobheni,+ kubhaliwe encwadzini yemlandvo wangetikhatsi temakhosi akaJuda. 21 Hezekiya wabese uyafa, futsi wangcwatjwa lapho kwangcwatjwa khona bokhokho bakhe;+ indvodzana yakhe Manase+ yaba yinkhosi esikhundleni sakhe.+

21 Manase+ bekaneminyaka lengu-12 budzala nakaba yinkhosi, futsi wabusa iminyaka lengu-55 eJerusalema.+ Libito lamake wakhe bekunguHefsiba. 2 Wenta lokubi emehlweni aJehova, walandzela imikhuba leyenyanyekako yetive+ lebeticoshwe nguJehova embikwema-Israyeli.+ 3 Wakha kabusha tindzawo letiphakeme lebetibhidlitwe+ ngubabe wakhe Hezekiya, waphindze wakha nema-al’thare aBhali kanye nensika lengcwele*+ njengobe Ahabi inkhosi yaka-Israyeli bekentile.+ Wakhotsamela lonkhe libutfo lemazulu futsi walikhonta.+ 4 Waphindze wakha ema-al’thare endlini yaJehova,+ leyo Jehova lebekatsite ngayo: “Libito lami litawuhlala eJerusalema.”+ 5 Wakhela lonkhe libutfo lasemazulwini+ ema-al’thare emabaleni lamabili endlu yaJehova.+ 6 Manase washisa indvodzana yakhe emlilweni; bekenta imilingo,+ aphengula, futsi wacasha tangoma kanye nalababhulako.+ Wenta lokubi emehlweni aJehova ngelizinga lelikhulu, kuze amvise buhlungu.

7 Wabeka sithico lesibatiwe sensika lengcwele*+ lasenta endlini yaJehova leyo Nkulunkulu lebekakhulume ngayo kuDavide nakuSolomoni indvodzana yakhe watsi: “Kulendlu naseJerusalema lengiyikhetsile kuto tonkhe tive taka-Israyeli, ngitalibeka khona libito lami kuze kube phakadze.+ 8 Ngeke ngiphindze ngente ema-Israyeli azulazule eveni lengalinika bokhokho bawo,+ kuphela nje nakangakugcina ngekucophelela konkhe lengiwayale ngako,+ nawo wonkhe uMtsetfo inceku yami Mosi leyawanika kutsi awulandzele.” 9 Kodvwa ema-Israyeli awazange alalele futsi Manase wachubeka nekuwaphambukisa, awabangela kutsi ente bubi lobukhulu kwendlula tive Jehova labekaticotfulile embikwawo.+

10 Jehova wachubeka akhuluma ngetinceku takhe baphrofethi,+ atsi: 11 “Manase inkhosi yakaJuda wente tonkhe letintfo letenyanyekako; wente lokubi kakhulu kwendlula ngisho nema-Amori+ labakhona kucala kunaye,+ futsi ubangele emaJuda kutsi one ngaletithico takhe letenyanyekako.* 12 Ngako-ke, naku lokushiwo nguJehova Nkulunkulu wema-Israyeli: ‘Ngiletsa inhlekelele lenkhulu eJerusalema+ nakaJuda kangangekutsi wonkhe umuntfu lovako ngayo utawushaceka.*+ 13 EJerusalema ngitawubeka intsambo yekukala,+ leyasetjentiswa naseSamariya,+ ngisebentise nelithulusi lekucondzisa* lelasetjentiswa endlini ya-Ahabi,+ ngitawuphindze ngishanyele iJerusalema, kuhle kwemuntfu akhotsa indishi, ayikhotse aze ayibhekise phansi.+ 14 Ngitabalahla labasele lebebalifa lami,+ ngibanikele esandleni setitsa tabo, futsi tonkhe titsa tabo titabatfumba, tibatsatsele netintfo tabo+ 15 ngobe bente lokubi emehlweni ami futsi bebasolo bangivisa buhlungu kusukela ngelilanga bokhokho babo labaphuma ngalo eGibhithe kuze kube ngulamuhla.’”+

16 Manase waphindze wacitsa ingati lengenacala ngelizinga lelikhulu kakhulu, waze wayigcwalisa yonkhe iJerusalema kusukela kulenye incenye yayo kuye kulenye,+ ngetulu kwesono labangela emaJuda kutsi asente ngekwenta lokubi emehlweni aJehova. 17 Lomunye umlandvo waManase, nako konkhe lakwenta kanye netono latenta, kubhaliwe encwadzini yemlandvo wangetikhatsi temakhosi akaJuda. 18 Manase wabese uyafa wangcwatjwa lapho kwangcwatjwa khona bokhokho bakhe, ensimini yendlu yakhe, lokuyinsimu ya-Uza;+ futsi indvodzana yakhe Amoni yaba yinkhosi esikhundleni sakhe.

19 Amoni+ bekaneminyaka lengu-22 budzala nakaba yinkhosi futsi wabusa iminyaka lemibili eJerusalema.+ Libito lamake wakhe bekunguMeshulemethi, indvodzakati yaHarusi waseJotbha. 20 Wachubeka nekwenta lokubi emehlweni aJehova njengobe babe wakhe Manase bekentile.+ 21 Wachubeka ahamba ngetindlela babe wakhe lebekahambe ngato futsi wachubeka akhonta tithico letenyanyekako lebetikhontwa ngubabe wakhe waphindze watikhotsamela.+ 22 Ngako wamshiya Jehova Nkulunkulu wabokhokho bakhe futsi akahambanga ngendlela yaJehova.+ 23 Ngekuhamba kwesikhatsi, tinceku ta-Amoni tamakhela lisu lekumbulala futsi tambulalela endlini yakhe. 24 Kodvwa bantfu bakuleyo ndzawo bababulala bonkhe labantfu lebebakhe lelisu lekubulala iNkhosi Amoni futsi babeka Josaya indvodzana yayo waba yinkhosi esikhundleni sayo.+ 25 Lomunye umlandvo wa-Amoni kanye naloko lakwenta, kubhaliwe encwadzini yemlandvo wangetikhatsi temakhosi akaJuda. 26 Ngako bamngcwaba ethuneni lakhe lelisensimini ya-Uza+ futsi indvodzana yakhe Josaya+ yaba yinkhosi ngemuva kwakhe.

22 Josaya+ bekaneminyaka lengu-8 budzala nakaba yinkhosi, futsi wabusa iminyaka lengu-31 eJerusalema.+ Libito lamake wakhe bekunguJedida indvodzakati ya-Adaya waseBhoskhathi.+ 2 Wenta lokulungile emehlweni aJehova futsi walingisa Davide khokho wakhe,+ akazange aphambukele ngesekudla noma ngesencele.

3 Ngemnyaka wesi-18 wekubusa kweNkhosi Josaya, inkhosi yatfumela Shafani mabhalane, loyindvodzana ya-Asaliya indvodzana yaMeshulamu, endlini yaJehova+ yatsi: 4 “Khuphukela kuHilkiya+ umphristi lophakeme umtjele akweleke yonkhe imali leletfwa endlini yaJehova,+ leyo bogadzi basemnyango lesebayikolekile kubantfu.+ 5 Batjele bayinikete labo labakhetselwe kubuka umsebenti wendlu yaJehova, futsi bona batayiniketa tisebenti tendlu yaJehova lokufanele tilungise umonakalo* losewenteke kulendlu,+ 6 lokutisebenti letinelikhono, bakhi, nebantfu labasebenta ngematje; kufanele bayisebentisele kutsenga tingodvo kanye nematje lalungiswe kahle, kuze balungise lendlu.+ 7 Kodvwa akukafaneli kulandzelelwe kutsi lamadvodza ayisebentise njani lemali lanikwa yona ngobe etsembekile.”+

8 Ngemuva kwesikhatsi, Hilkiya umphristi lophakeme watsi kuShafani mabhalane:+ “Ngitfole incwadzi yeMtsetfo+ endlini yaJehova.” Ngako Hilkiya watsatsa lencwadzi wayiniketa Shafani, lowabese uyayifundza.+ 9 Shafani mabhalane wase uya enkhosini wafike watsi kuyo: “Tinceku takho tiyikhiphile lemali letfolakele kulendlu futsi setiyinikete labo lababekwe kutsi babuke lomsebenti wendlu yaJehova.”+ 10 Shafani mabhalane waphindze watjela inkhosi watsi: “Kunencwadzi+ lengiyinikwe nguHilkiya umphristi.” Shafani wabese ucala kuyifundza embikwenkhosi.

11 Ngekushesha nje inkhosi nayiva emavi alencwadzi yeMtsetfo, yadzabula tembatfo tayo.+ 12 Inkhosi yabese inika Hilkiya umphristi, Ahikamu+ indvodzana yaShafani, Akbori indvodzana yaMikhaya, Shafani mabhalane kanye na-Asaya inceku yenkhosi, umyalo lotsi: 13 “Hambani niyongibutela kuJehova, nibutele nalabantfu niphindze nibutele naso sonkhe sive sakaJuda mayelana nemavi alencwadzi letfolakele; ngobe intfukutselo yaJehova letasivutsela yinkhulu+ ngobe bokhokho betfu abazange bawalalele lamavi alencwadzi, abakakugcini konkhe lokubhalwe kuyo mayelana natsi.”

14 Ngako boHilkiya umphristi, Ahikamu, Akbori, Shafani na-Asaya bahamba baya kuHulda umphrofethikati.+ Lomphrofethikati bekangumfati waShalumi indvodzana yaThikva loyindvodzana yaHahasi lobekanakekela indzawo lokugcinwa kuyo timphahla futsi Hulda bekahlala eNcenyeni Lensha Yelidolobha iJerusalema; bafike bakhuluma naye lapho.+ 15 Watsi kubo: “Naku lokushiwo nguJehova Nkulunkulu wema-Israyeli: ‘Tjelani lendvodza lenitfume kimi nitsi: 16 “Naku lokushiwo nguJehova: ‘Ngitawuletsa inhlekelele kulendzawo nakubantfu labahlala kuyo, ngekuvumelana nawo onkhe emavi alencwadzi inkhosi yakaJuda lewafundzile.+ 17 Ngesizatfu sekutsi bangishiyile futsi bashuncisela labanye bonkulunkulu+ imihlatjelo kuze bangivise buhlungu ngayo yonkhe imisebenti yetandla tabo,+ intfukutselo yami itayifikela lendzawo futsi ngeke iphele.’”+ 18 Kodvwa lenkhosi yakaJuda lenitfumele kutsi nibute kuJehova, nibotsi kuyo: “Naku lokushiwo nguJehova Nkulunkulu wema-Israyeli: ‘Mayelana nemagama lowevile, 19 njengobe inhlitiyo yakho ilalele* nekutsi utitfobile+ embikwaJehova nawuva lengikukhulumile mayelana nalendzawo nebantfu labahlala kuyo, kutsi batawuhlangabetana nelusizi nesicalekiso, futsi wena udzabule tembatfo takho+ wakhala embikwami, nami ngikuvile, kusho Jehova. 20 Kungako ngitakuyisa kubokhokho* bakho futsi utawungcwatjwa ethuneni lakho ngekuthula, nemehlo akho angeke ayibone yonkhe lenhlekelele lengitayiletsa kulendzawo.’”’” Labantfu babese baletsa imphendvulo enkhosini.

23 Ngako inkhosi yatfumela livi, base babita onkhe emadvodza lamadzala akaJuda newaseJerusalema.+ 2 Ngemuva kwaloko, lenkhosi yenyukela endlini yaJehova nawo onkhe emadvodza akaJuda, takhamuti taseJerusalema, baphristi nebaphrofethi—bonkhe bantfu, kusukela kulomncane kuya kulomkhulu. Yafundza onkhe emavi alencwadzi+ yesivumelwane+ lebeyitfolakele endlini yaJehova,+ bonkhe labantfu beva. 3 Lenkhosi yema eceleni kwensika yase yenta sivumelwane* embikwaJehova,+ isentela yona nalabantfu, sekutsi itawulandzela Jehova iphindze igcine imiyalo yakhe, tikhumbuto takhe kanye nemitsetfo yakhe ngayo yonkhe inhlitiyo yayo, nangawo wonkhe umphefumulo* wayo ngekutsi igcine onkhe emavi alesivumelwane labekabhalwe kulencwadzi. Bonkhe labantfu nabo bavuma kutsi batasigcina lesivumelwane.+

4 Lenkhosi yabese itjela Hilkiya+ umphristi lophakeme, baphristi labasesigabeni sesibili, kanye nabogadzi basemnyango kutsi abakhiphe tonkhe titja letisethempelini laJehova letentelwe Bhali, titja tensika lengcwele*+ netelibutfo lasemazulwini. Lenkhosi yabese itishisela ngephandle kweJerusalema etindzaweni letehlelako taseKhidroni futsi yatsatsa umlotsa wato yaya nawo eBetheli.+ 5 Ngako yayekelisa baphristi bankulunkulu waletinye tive, labo emakhosi akaJuda bekabakhetsile kutsi bente imihlatjelo yekushiswa etindzaweni letiphakeme emadolobheni akaJuda nasetindzaweni letibomakhelwane beJerusalema, kanye nebaphristi labebentela Bhali umhlatjelo wekushiswa, bawentela lilanga, inyeti, libutfo letinkhanyeti kanye nalo lonkhe libutfo lemazulu.+ 6 Yakhipha insika lengcwele*+ endlini yaJehova yayibeka emaphandleni aseJerusalema, eSihosheni saseKhidroni, yase iyayishisa+ kulesihosha futsi yayigaya yaba yimphuphu. Yase itsatsa umlotsa wayo iwusakata emathuneni ebantfukatana.+ 7 Yaphindze yabhidlita tindlu tetingwadla letindvuna tasethempelini+ lebetisendlini yaJehova, lapho bafati bebalukela khona tindvwangu temathende ensika lengcwele.*

8 Inkhosi Josaya yabese ikhipha bonkhe baphristi emadolobheni akaJuda futsi yenta tindzawo letiphakeme tangafaneleki kutsi kukhontelwe kuto, lapho labaphristi bebentela khona umhlatjelo wekushiswa, kusukela eGeba+ kuze kuyofika eBherisheba.+ Yaphindze yabhidlita tindzawo letiphakeme, lebetisegedeni laJoshuwa indvuna yelidolobha, ngesencele nawungena egedeni lelidolobha. 9 Baphristi betindzawo letiphakeme bebangasebenti e-al’thare laJehova eJerusalema+ kodvwa bebasidla sinkhwa lesite imvubelo bakanye nabomnakabo. 10 Yaphindze yenta kutsi iThofethi+ leseSigodzini Semadvodzana aHinomu*+ ingafaneleki kutsi kukhontelwe kuyo, kuze kungabi khona umuntfu loshisa* indvodzana yakhe noma indvodzakati yakhe kuMoleki.+ 11 Yaphindze yangawavumeli emahhashi, lawo emakhosi akaJuda lebekawanikele* elangeni, kutsi angene endlini yaJehova ngelikamelo* laNathani-meleki indvuna yesigodlo, lebelisevulandi; yashisa netincola temphi telilanga.+ 12 Inkhosi yaphindze yabhidlita ema-al’thare, lawo emakhosi akaJuda bekawakhe etikwelikamelo+ la-Ahazi lelingetulu, kanye nema-al’thare Manase lebekawakhe emabaleni lamabili endlu yaJehova.+ Yawaphihlita yase itsatsa ticucu tawo itisakata eSihosheni saseKhidroni. 13 Lenkhosi yaphindze yenta tindzawo letiphakeme lebetisembikweJerusalema, ngaseningizimu* yeNtsaba Yekonakala* kutsi tingasakulungeli kutsi kungakhontelwa kuto, leto Solomoni inkhosi yaka-Israyeli bekatakhele Ashtarothe nkulunkulukati lowenyanyekako webantfu baseSidoni; naKhemoshi nkulunkulu lowenyanyekako wakaMowabi; naMilkhomi+ nkulunkulu lowenyanyekako wema-Amoni.+ 14 Yabhidlita ematje langcwele aba ticucu futsi yajuba letinsika letingcwele,*+ yaphindze yafaka ematsambo ebantfu esikhundleni sako. 15 Yaphindze yabhidlita li-al’thare eBetheli, nendzawo lephakeme lebeyentiwe nguJerobowamu indvodzana yaNebati kuze abangele ema-Israyeli kutsi one.+ Ngemuva kwekubhidlita leli-al’thare nalendzawo lephakeme, yashisa lendzawo lephakeme yayisila yaba yimphuphu yase ishisa lensika lengcwele.*+

16 Watsi Josaya nakagucuka futsi abona emathuna entsabeni, watsi akutsatfwe ematsambo kulamathuna futsi wawashisa e-al’thare, kuze lingakulungeli kutsi kukhontelwe kulo, ngekuvumelana nelivi laJehova lebelimenyetelwe ngumuntfu waNkulunkulu weliciniso lowasho kutsi letintfo betitakwenteka.+ 17 Wase utsi: “Ngibona naliya litje lelithuna. Labani lelithuna?” Lamadvodza elidolobha amphendvula atsi: “Lithuna lemuntfu waNkulunkulu weliciniso wakaJuda+ lowasho letintfo lotentile e-al’thare leliseBetheli.” 18 Yena wabese utsi: “Ningavumeli muntfu kutsi atsintse ematsambo akhe, wayekeleni njengobe anjalo.” Ngako bawayekela lamatsambo akhe, lokufaka ekhatsi nematsambo emphrofethi lobekachamuke eSamariya.+

19 Josaya waphindze wasusa tonkhe tindlu tekukhontela etindzaweni letiphakeme lebetisemadolobheni aseSamariya,+ leto emakhosi aka-Israyeli bekatakhile kuze avise Nkulunkulu buhlungu futsi wenta intfo lefanako njengobe bekentile endzaweni lephakeme yaseBetheli.+ 20 Ngako wenta umhlatjelo ema-al’thare ngabo bonkhe baphristi betindzawo letiphakeme lebetilapho futsi washisa ematsambo ebantfu kulama-al’thare.+ Ngemuva kwaloko, wabuyela eJerusalema.

21 Lenkhosi yase inika bonkhe bantfu umyalo lotsi: “Yentelani Jehova Nkulunkulu wenu liPhasika+ njengobe kubhaliwe kulencwadzi yesivumelwane.”+ 22 Kute liPhasika lelifana naleli lebelike laba khona kusukela ngetikhatsi lapho behluleli bebahlulela Israyeli nobe ngetikhatsi temakhosi aka-Israyeli newakaJuda.+ 23 Kodvwa ngemnyaka wesi-18 wekubusa kweNkhosi Josaya, leliPhasika laJehova lentelwa eJerusalema.

24 Josaya waphindze wasusa tonkhe tangoma, bantfu labaphengulako,+ tithico,*+ netithico letenyanyekako* nato tonkhe tintfo letenyanyekako lebetikhona eveni lakaJuda naseJerusalema kuze agcine emavi eMtsetfo+ lebekabhalwe encwadzini lebeyitfolwe nguHilkiya umphristi endlini yaJehova.+ 25 Kute inkhosi lebeyinjengaye ngaphambi kwakhe, leyabuyela kuJehova ngayo yonkhe inhlitiyo yayo nangawo wonkhe umphefumulo*+ wayo nangawo onkhe emandla ayo, ngekuvumelana neMtsetfo waMosi; kute lenye lenjengaye leyaba khona ngemuva kwakhe.

26 Noma kunjalo, intfukutselo yaJehova levutsako yawavutsela emaJuda ngenca yato tonkhe tintfo letimbi lebetentiwe nguManase letamvisa buhlungu.+ 27 Jehova watsi: “Ngitawasusa nemaJuda emehlweni ami+ njengobe ngiwasusile ema-Israyeli+ futsi ngitalilahla lelidolobha lengalikhetsa, iJerusalema, kanye nendlu lengatsi ngayo: ‘Libito lami litawuhlala kuyo.’”+

28 Lomunye umlandvo waJosaya kanye nako konkhe lakwenta, kubhaliwe encwadzini yemlandvo wangetikhatsi temakhosi akaJuda. 29 Ngesikhatsi saJosaya, Faro Nekho inkhosi yaseGibhithe, wahamba wayohlangana nenkhosi yase-Asiriya ngaseMfuleni iYufrathe futsi iNkhosi Josaya yahamba yayokulwa naye; kodvwa watsi Nekho nakayibona, wayibulalela eMegido.+ 30 Ngako tinceku tayo tetfwala sidvumbu sayo ngencola kusukela eMegido tasiletsa eJerusalema futsi tamngcwaba ethuneni lakhe. Bantfu bakaJuda babese batsatsa Jehoyahazi indvodzana yaJosaya bamgcoba futsi bambeka waba yinkhosi esikhundleni sababe wakhe.+

31 Jehoyahazi+ bekaneminyaka lengu-23 budzala nakaba yinkhosi futsi wabusa tinyanga letintsatfu eJerusalema. Libito lamake wakhe bekunguHamutali+ indvodzakati yaJeremiya waseLibna. 32 Wacala kwenta tintfo letimbi emehlweni aJehova, alingisa konkhe lebekwentiwe bokhokho bakhe.+ 33 Faro Nekho+ wabopha Jehoyahazi, wamfaka ejele eRibla+ eveni laseHamathi kuze amvimbele angabusi eJerusalema, waphindze wahlawulisa lelive emathalenta* langu-100 elisiliva kanye nelithalenta leligolide.+ 34 Ngetulu kwaloko, Faro Nekho wabeka indvodzana yaJosaya lengu-Eliyakimu kutsi ibe yinkhosi esikhundleni sababe wayo Josaya futsi washintja libito layo yaba nguJehoyakimu; kodvwa watsatsa Jehoyahazi wammikisa eGibhithe+ lapho agcine afele khona.+ 35 Jehoyakimu waniketa Faro ligolide nelisiliva kodvwa wakhiphisa bantfu bakhe umtselo kuze anike Faro lelisiliva lebekalifuna. Wancumela umuntfu ngamunye kutsi kufanele akhiphe lisiliva neligolide lelingakanani eveni lakhe kuze alinikete Faro Nekho.

36 Jehoyakimu+ bekaneminyaka lengu-25 budzala nakaba yinkhosi futsi wabusa iminyaka lengu-11 eJerusalema.+ Libito lamake wakhe bekunguZebida indvodzakati yaPhedaya waseRuma. 37 Wachubeka enta lokubi emehlweni aJehova+ alingisa konkhe lebekwentiwe bokhokho bakhe.+

24 Ngemalanga ekubusa kwaJehoyakimu, iNkhosi Nebukhadnezari+ yaseBhabhulona yamhlasela futsi Jehoyakimu waba yinceku yalenkhosi iminyaka lemitsatfu. Jehoyakimu wabese uyayijikela lenkhosi futsi wayivukela. 2 Jehova wabese ucala kumtfumelela emabutfo lahlaselako emaKhaledi,+ newesive saseSiriya, newesive sakaMowabi kanye newesive saka-Amoni. Wachubeka awatfumela lamabutfo esiveni semaJuda kuze asibhubhise njengobe Jehova bekakhulumile+ asebentisa tinceku takhe baphrofethi. 3 Loko kwenteka kumaJuda ngenca yemyalo waJehova kutsi awasuse emehlweni akhe+ ngenca yato tonkhe tono lebetentiwe nguManase,+ 4 nangenca yengati lengenacala labeyicitsile,+ ngobe bekagcwalise iJerusalema ngengati lengenacala, futsi Jehova bekangakatimiseli kuwacolela.+

5 Lomunye umlandvo waJehoyakimu kanye nako konkhe lakwenta, kubhaliwe encwadzini yemlandvo wangetikhatsi temakhosi akaJuda.+ 6 Jehoyakimu wabese uyafa futsi wangcwatjwa lapho kwangcwatjwa khona bokhokho bakhe;+ indvodzana yakhe Jehoyakhini yaba yinkhosi esikhundleni sakhe.

7 Inkhosi yaseGibhithe ayizange iphindze itfumele emasotja ayo kutsi ayohlasela, ngobe inkhosi yaseBhabhulona beyitsetse tonkhe tintfo tenkhosi yaseGibhithe+ kusukela eSihosheni saseGibhithe+ kuze kuyofika eMfuleni iYufrathe.+

8 Jehoyakhini+ bekaneminyaka lengu-18 budzala nakaba yinkhosi futsi wabusa tinyanga letintsatfu eJerusalema.+ Libito lamake wakhe bekunguNehushta indvodzakati ya-Elnathani waseJerusalema. 9 Wachubeka enta lokubi emehlweni aJehova, walingisa konkhe lebekwentiwe ngubabe wakhe. 10 Ngaleso sikhatsi, tinceku teNkhosi Nebukhadnezari yaseBhabhulona takhuphuka tayohlasela iJerusalema futsi lelidolobha lavinjetelwa.+ 11 INkhosi Nebukhadnezari yaseBhabhulona yefika kulelidolobha ngesikhatsi letinceku tayo tisalivimbetela.

12 INkhosi Jehoyakhini yakaJuda yaphuma yaya enkhosini yaseBhabhulona+ ihamba namake wayo, tinceku tayo, tindvuna letisesigabeni lesisetulu,* kanye netindvuna tesigodlo;+ futsi inkhosi yaseBhabhulona yayitfumba ngemnyaka wesi-8 wekubusa kwayo.+ 13 Ngemuva kwaloko, yatsatsa wonkhe umcebo wendlu yaJehova kanye nemcebo wendlu* yenkhosi.+ Yaphihlita tonkhe titja teligolide, leto Solomoni inkhosi yaka-Israyeli lebekatentile ethempelini laJehova.+ Loku kwenteka njengobe Jehova bekashito. 14 Yancoba iJerusalema, tonkhe tindvuna lebetisesigabeni lesisetulu,+ emachawe lanemandla, tonkhe tingcweti temisebenti yetandla kanye nabo bonkhe bantfu labasebenta ngensimbi,*+ yancoba labangu-10 000. Kute leyamshiya, ngaphandle kwebantfu labebaphuye kakhulu kulelive.+ 15 Yamtsatsa kanjalo-ke Jehoyakhini+ yamtfumbela eBhabhulona;+ yaphindze yatsatsa make wenkhosi, bafati benkhosi, tindvuna tayo, kanye nemadvodza lamcoka kulelive, yabatsatsa eJerusalema yabatfumbela eBhabhulona. 16 Inkhosi yaseBhabhulona yaphindze yatfumbela eBhabhulona onkhe emasotja latingwazi, langu-7 000, kanye netingcweti temisebenti yetandla nalabasebenta ngensimbi* labangu-1 000, bonkhe bebangemachawe lanemandla futsi baceceshelwe imphi. 17 Inkhosi yaseBhabhulona yabeka Mathaniya, babe lomncane+ waJehoyakhini, waba yinkhosi esikhundleni sakhe futsi yashintja nelibito laMathaniya yatsi nguSedekiya.+

18 Sedekiya bekaneminyaka lengu-21 budzala nakaba yinkhosi futsi wabusa iminyaka lengu-11 eJerusalema. Libito lamake wakhe bekunguHamutali+ indvodzakati yaJeremiya waseLibna. 19 Wachubeka enta lokubi emehlweni aJehova, walingisa konkhe lebekwentiwe nguJehoyakimu.+ 20 Letintfo tenteka eJerusalema nakaJuda ngenca yentfukutselo yaJehova, kwaze kwaba ngulapho abasusa emehlweni akhe.+ Sedekiya wavukela inkhosi yaseBhabhulona.+

25 Ngemnyaka wesi-9 wekubusa kwaSedekiya, ngelilanga lesi-10 enyangeni yesi-10, iNkhosi Nebukhadnezari+ yaseBhabhulona yeta nalo lonkhe libutfo layo yatohlasela iJerusalema.+ Yemisa khona emathende futsi yakha lubondza lwekuyivimbetela lolwayitungeleta,+ 2 futsi lelidolobha lavinjetelwa kwaze kwaba ngumnyaka wesi-11 wekubusa kweNkhosi Sedekiya. 3 Ngelilanga lesi-9 enyangeni yesine, indlala yaba matima kakhulu+ kulelidolobha futsi bantfu bakhona besebete kudla.+ 4 Lubondza lwalelidolobha lwabhidlitwa+ futsi onkhe emasotja abaleka ebusuku ngematubane egedeni lebelisemkhatsini wetibondza letimbili ngasengadzeni yenkhosi ngesikhatsi emaKhaledi atungelete lelidolobha; futsi inkhosi yahamba ngendlela yase-Arabha.+ 5 Kodvwa libutfo lemaKhaledi lagijimisa inkhosi Sedekiya, layikhandza endzaweni lebekile lelugwadvule yaseJerikho. Onkhe emasotja akhe abaleka amshiya. 6 Lelibutfo labese liyayibamba lenkhosi+ layiyisa enkhosini yaseBhabhulona lebeyiseRibla futsi bakhipha sigwebo sayo. 7 Lelibutfo labulala emadvodzana aSedekiya embikwemehlo akhe; Nebukhadnezari wabese umkupuluta emehlo, wambopha ngetinketane telitfusi wase uya naye eBhabhulona.+

8 Ngelilanga lesi-7 enyangeni yesihlanu, lokungumnyaka wesi-19 wekubusa kweNkhosi Nebukhadnezari, inkhosi yaseBhabhulona, Nebuzaradani+ indvuna yabogadzi, inceku yenkhosi yaseBhabhulona, wefika eJerusalema.+ 9 Washisa indlu yaJehova,+ indlu* yenkhosi+ nato tonkhe tindlu taseJerusalema;+ waphindze washisa tindlu tabo bonkhe bantfu labadvumile.+ 10 Lonkhe libutfo lemaKhaledi lebelikanye nendvuna yabogadzi ladzilita lubondza lobelutungelete iJerusalema.+ 11 Nebuzaradani indvuna yabogadzi watfumba labantfu lebebasele kulelidolobha, bantfu lebebabalekele enkhosini yaseBhabhulona, kanye naso sonkhe sive.+ 12 Kodvwa lendvuna yabogadzi yashiya labanye balabo labaphuye kakhulu kulelive kuze basebente emasimini emagilebisi futsi babe tigcili.+ 13 EmaKhaledi aphihlita tinsika telitfusi+ lebetisendlini yaJehova, netincola+ kanye neLwandle lwelitfusi,+ konkhe bekusendlini yaJehova futsi atsatsa lelitfusi alimikisa eBhabhulona.+ 14 Atsatsa netikotela, emafosholo, tintfo tekucima umlilo, tindzebe kanye nato tonkhe tintfo telitfusi lebetisetjentiselwa kwenta imisebenti yasethempelini. 15 Lendvuna yabogadzi yatsatsa titja tekufaka emalahle netindishi letakhiwe ngeligolide lelingakahlanganiswa nalutfo+ nelisiliva lelingakahlanganiswa nalutfo.+ 16 Letinsika letimbili, Lwandle kanye naletincola Solomoni labekatakhele indlu yaJehova; litfusi lebekwakhiwe ngalo letintfo belingakaleki ngenca yebunyenti.+ 17 Insika ngayinye beyingemamitha langu-8* budze,+ ingcongwane lebeyisetikwensika ngayinye beyingetulu kwemitha* kuphakama, umhlobiso nemahananandza* lebekatungelete lengcongwane, konkhe bekwentiwe ngelitfusi.+ Insika yesibili nemanetha ayo bekufana nalena yekucala.

18 Lendvuna yabogadzi yaphindze yatsatsa Seraya+ umphristi lomkhulu, Zefaniya+ umphristi wesibili kanye nabogadzi basemnyango labatsatfu.+ 19 Kulelidolobha yatsatsa indvuna yesigodlo lebeyiphetse emasotja, yatsatsa bantfu labasihlanu lebebasondzelene kakhulu nenkhosi leyabatfola kulelidolobha, namabhalane wendvuna yelibutfo, lobekabita bantfu balelo live kuze bahlangane, kanye nemadvodza langu-60 kubantfu labavamile balelive lebebasekhona kulelidolobha. 20 Nebuzaradani+ indvuna yabogadzi wabatsatsa wabamikisa enkhosini yaseBhabhulona eRibla.+ 21 Inkhosi yaseBhabhulona yabahlasela futsi yababulalela eRibla eveni laseHamathi.+ Ngaleyondlela, sive sakaJuda satsatfwa eveni laso, satfunjwa.+

22 INkhosi Nebukhadnezari yaseBhabhulona yabeka Gedaliya+ indvodzana ya-Ahikamu+ loyindvodzana yaShafani+ kutsi aphatse bantfu lebeyibashiye eveni lakaJuda.+ 23 Ngesikhatsi tonkhe tindvuna telibutfo kanye nemadvodza lebekangephansi kwato beva kutsi inkhosi yaseBhabhulona seyibeke Gedaliya, ngekushesha baya kuGedaliya eMispa. Laba bekubo-Ishmayeli indvodzana yaNethaniya, Johanani indvodzana yaKhareya, Seraya indvodzana yaThanhumethi wesive semaNethofa naJazaniya indvodzana yemMakhathi kanye nalamadvodza lebekangephansi kwabo.+ 24 Gedaliya wafunga kubo nakulamadvodza futsi watsi kubo: “Ningesabi kuba tinceku temaKhaledi. Chubekani nihleli kulelive futsi nisebentele inkhosi yaseBhabhulona, nanenta njalo tintfo titanihambela kahle.”+

25 Ngenyanga yesi-7, Ishmayeli+ indvodzana yaNethaniya loyindvodzana ya-Elishama lobekatalwa ebukhosini,* wefika nemadvodza langu-10 batohlasela Gedaliya bambulala kanye nemaJuda nemaKhaledi lebekanaye eMispa.+ 26 Ngemuva kwaloko, bonkhe labantfu kusukela kulabancane kuya kulabakhulu, lokufaka ekhatsi tindvuna telibutfo bahamba baya eGibhithe+ ngoba bebawesaba emaKhaledi.+

27 Ngemnyaka Evili-merodaki inkhosi yaseBhabhulona lacala ngawo kubusa, wakhulula* Jehoyakhini+ inkhosi yakaJuda ejele. Lona bekungumnyaka wesi-37 wekutfunjwa kwaJehoyakhini inkhosi yakaJuda, ngenyanga yesi-12 ngelilanga lesi-27 laleyo nyanga.+ 28 Evili-merodaki wakhuluma naye ngemusa futsi wamphakamisa wambeka esikhundleni lesisetulu kunalalamanye emakhosi lebekanaye eBhabhulona. 29 Ngako Jehoyakhini wakhumula tembatfo takhe tasejele futsi bekahlale adla nalenkhosi, onkhe emalanga ekuphila kwakhe. 30 Bekahlale anikwa kudla lokuvela enkhosini lilanga nelilanga, onkhe emalanga ekuphila kwakhe.