SILILO
א [Aleph]*
1 Awu! IJerusalema beyigcwele bantfu,+ nyalo seyisele ikhala libhungane!
Asenilibuke nje lelidolobha lebelinebantfu labanyenti kunaletinye tive,+ nyalo selifana nemfelokati!
Lelidolobha lelike laba yindlovukazi emkhatsini wetifundza, seligucuke laba sigcili!+
ב [Beth]
2 Ebusuku iJerusalema ikhala ingathuli,+ nasetihlatsini tayo kugeleta tinyembeti.
Kute ngisho namunye kulabo labayitsandzako loyidvudvutako.+
Bonkhe bangani bayo sebayilahlile;+ sebagucuke baba titsa tayo.
ג [Gimel]
3 Juda utfunjiwe,+ uyahlushwa futsi ugcilateka kabuhlungu.+
Uhlala emkhatsini wetive;+ kodvwa akakutfoli kuphumula.
Bonkhe lebebamgijimisa* sebamkhandzile, bamkhandze acindzetelekile.
ד [Daleth]
4 Imigwaco leya eSiyoni iyalila, ngobe sekute bantfu labaya emikhosini.+
Onkhe emagede aseJerusalema ephukile;+ nebaphristi bakhona bayalila.
Tintfombi takhona tiyalila, futsi lelidolobha lisebuhlungwini lobukhulu.
ה [He]
5 Titsa tayo setigucuke taba baphatsi* bayo; kute nalokutikhatsatako.+
Jehova uletsele lelidolobha lusizi ngenca yetono talo letinyenti.+
Sitsa sitfumbe nebantfwana bakhona.+
ו [Waw]
6 Sebuphele bonkhe lobukhatikhati baseSiyoni.*+
Tindvuna tayo setifana netinyamatane letingawatfoli emadlelo,
Futsi tiyatihudvula natihamba embikwaloyo lotitingelako.
ז [Zayin]
7 Ngemalanga ekuhlushwa kwayo nangemalanga ekundzindza kwayo, iJerusalema ikhumbula
Tonkhe letintfo letiligugu lebeyinato kadzeni.+
Ngesikhatsi bantfu bayo bancotjwa sitsa futsi kuba bete loyisitako,+
ח [Heth]
8 IJerusalema yone kakhulu.+
Ngiko nje seyenyanyeka.
Nyalo bonkhe bantfu lebebayihlonipha sebayayedzelela ngobe sebabubonile bungcunu bayo.+
Ikhala kabuhlungu+ futsi iyafulatsela ngobe ihlazekile.
ט [Teth]
9 Timphahla tayo tingcolile;
Futsi ayizange icabangisise ngelikusasa layo.+
Kumangalise kakhulu kuwa kwalelidolobha; sekute nalongalidvudvuta.
Awu Jehova, buka indlela lengihlushwa ngayo, ngobe sitsa siyatigabatisa.+
י [Yod]
10 Sitsa sitsetse wonkhe umcebo waseJerusalema.+
Lelidolobha libone tive tingena endzaweni yalo lengcwele,+
Ngisho nobe wena bewungakativumeli kutsi titihlanganise nebantfu bakho.
כ [Kaph]
11 Bonkhe bantfu bakhona bayalila; bafunana nekudla.+
Batsetse tintfo tabo letiligugu bashintjisa ngato kuze batfole kudla, batomane baphile.
Awu Jehova, ase ubuke nje, sengifana nemfati longasiti ngalutfo.*
ל [Lamed]
12 Anitsintseki yini nonkhe nine lenengca ngendlela?
Asenibuke nje!
Bukhona yini buhlungu lobufanana nanabu lengiviswe bona,
Lobo Jehova langivise bona ngelilanga lentfukutselo yakhe levutsako?+
מ [Mem]
13 Yena utfumele umlilo losuka ezulwini kutsi ushise onkhe ematsambo ami.+
Wendlale linethi kuze abambe tinyawo tami; wangiphocelela kutsi ngijike.
Ungente ngaba ngumfati lolahliwe.
Ngigula onkhe malanga.
נ [Nun]
14 Tono tami tiboshelwe entsanyeni yami kuhle kwelijoka; yena utibophe ngesandla sakhe.
Setibekwe entsanyeni yami, futsi sengiphelelwe ngemandla.
Jehova sewunginikele kulabo lengingeke ngikhone kulwa nabo.+
ס [Samekh]
15 Jehova uwalahlele khashane nami onkhe emadvodza lanemandla lebenginawo.+
Ubite sicumbi sebantfu kutsi simelane nami, sihlasele emajaha lebenginawo.+
Jehova ugcobagcobe iJerusalema* etjeni lekuhlutela liwayini.+
ע [Ayin]
16 Letintfo tiyangikhalisa;+ kuhushuka tinyembeti emehlweni ami.
Kute lodvutane nami longangidvudvuta nome angicinise.
Emadvodzana ami aphelelwe litsemba ngobe sincotjwe sitsa.
פ [Pe]
17 ISiyoni iphakamise tandla tayo;+ kute longayidvudvuta.
Jehova uyale bonkhe labatungelete Jakobe kutsi babe titsa takhe.+
IJerusalema seyiyenyanyeka kubo.+
צ [Tsade]
18 Jehova wente kahle+ ngekungijezisa, ngobe angikayilaleli imitsetfo* yakhe.+
Lalelani nonkhe nine bantfu, nibuke nelusizi lengikulo.
Setitfunjiwe tintfombi takami kanye nemajaha akami.+
ק [Qoph]
19 Ngibite labo lebebangitsandza, kodvwa bangijikele.+
Baphristi bami nemadvodza lamadzala bafele edolobheni
Ngesikhatsi bafuna kudla, bentela kutsi baphile.+
ר [Resh]
Inhlitiyo yami yephukile ngobe angikakulaleli sanhlobo.+
Ngephandle, inkemba ibulele bantfwabami;+ nangekhatsi endlini bantfu bayafa.
ש [Shin]
21 Bantfu bangivile nangilila; kodvwa kute longidvudvutako.
Tonkhe titsa tami tivile ngenhlekelele lengehlele.
Tijabulile ngobe lenhlekelele ngiyehliselwe nguwe.+
Kodvwa utawulenta lifike lilanga lowakhuluma ngalo,+ lilanga lekutsi nato tifane nami.+
ת [Taw]
22 Shengatsi ungakubona konkhe lokubi letikwentile, futsi shengatsi ungatijezisa+
Njengobe nami ungijezisile ngenca yato tonkhe tono tami.
Sengilile kakhulu, nenhlitiyo yami yephukile.
א [Aleph]
2 Asenibuke nje indlela Jehova layimbonye ngayo iSiyoni* ngentfukutselo yakhe kwaba shengatsi uyimbonye ngelifu!
Buhle baka-Israyeli ubususe ezulwini wabulahlela phansi emhlabeni.+
Ngelilanga lakhe lentfukutselo wasikhohlwa senabelo setinyawo takhe.+
ב [Beth]
2 Jehova ubhubhise tonkhe tindzawo tekuhlala taJakobe futsi wangatihawukeli.
Ngesikhatsi atfukutsele, wabhidlita tindzawo takaJuda* letivikelekile.+
Wehlisele phansi umbuso kanye netindvuna takhona, wawenta wedzeleleka.+
ג [Gimel]
3 Ngesikhatsi atfukutsele kakhulu, wawacedza onkhe emandla* aka-Israyeli.
Wasusa sandla sakhe sangesekudla ngesikhatsi abona sitsa sita,+
Futsi intfukutselo yakhe yachubeka ivutsela Jakobe njengemlilo locotfula yonkhe intfo.+
ד [Daleth]
4 Ugobe* butjoki bakhe kuhle kwesitsa; futsi sandla sakhe sangesekudla silungele kuhlasela kuhle kwesitsa lesibhubhisako;+
Bekasolo ababhubhisa bonkhe labaligugu kitsi.+
Futsi lulaka lwakhe ulutfulule kuhle kwemlilo+ ethendeni laseSiyoni.*+
ה [He]
5 Jehova sewufana nesitsa;+
Ubhubhise Israyeli.
Udzilite yonkhe imibhoshongo yaseSiyoni;
Wabhidlita tonkhe tindzawo takhona letivikelekile.
Wente kutsi kudzindvwe sililo kaJuda* futsi kukhalwe kakhulu.
ו [Waw]
6 Ulidzilitile lithende lakhe,+ kwaba shengatsi yindlu yetjani lesengadzeni.
Wente kutsi ingaphindzi ibe khona* imikhosi yakhe.+
Jehova wente kutsi imikhosi kanye nelisabatha kungasakhunjulwa eSiyoni,
Futsi ulahle inkhosi nemphristi atfukutsele kakhulu.+
ז [Zayin]
7 Jehova ulilahlile li-al’thare lakhe;
Uyilahlile nendzawo yakhe lengcwele.+
Lubondza lwemibhoshongo levikelekile yaseSiyoni ulunikele etitseni.+
Letitsa timemete endlini yaJehova+ kwaba ngatsi lilanga lemkhosi.
ח [Heth]
8 Jehova utimisele kubhidlita lubondza lwaseSiyoni.*+
Ukale lubondza ngentsambo yekukala.+
Uyekele sandla sakhe sabhubhisa.*
Wente kutsi kulile ludvonga nelubondza,
Futsi konkhe kwadzilika.
ט [Teth]
9 Emagede ashobele phansi emhlabatsini.+
Nkulunkulu wephule imishudo futsi wayiphihlita.
Inkhosi netindvuna tayo batfunjelwe etiveni.+
Umtsetfo* awusalandzelwa; nebaphrofethi abasayitfoli imibono levela kuJehova.+
י [Yod]
10 Emadvodza lamadzala aseSiyoni* ahlala phansi emhlabatsini abindze.+
Atitsela ngelutfuli enhloko futsi embatse tindvwangu temasaka.+
Tintfombi taseJerusalema tikhotsamise tinhloko taze tatsintsa phansi emhlabatsini.
כ [Kaph]
11 Sengikhale kwaze kwaba buhlungu emehlo.+
Ngiva buhlungu lobukhulu ngekhatsi.*
Inhlitiyo yami* yephuke kakhulu ngenca yekubhujiswa kwebantfu bakitsi,*+
Nangenca yekubona tinswane nebantfwana baculeka etimakethe talelidolobha.+
ל [Lamed]
12 Bebachubeka bakhalela bomake babo batsi: “Make, ngilambile futsi ngomile!”*+
Bagcine baculekile kuhle kwemuntfu logwazwe emakethe yalelidolobha,
Imphilo yabo yahhohloka kancane kancane baze bafela etandleni tabomake babo.
מ [Mem]
13 Ngusiphi nje sibonelo lengingakwentela sona?
Futsi ngingakufananisa nani wena Jerusalema?*
Awu nine bantfu baseSiyoni,* nginganifananisa nani kuze nginidvudvute?
Linceba lenu likhulu ngangelwandle.+ Ngubani nje longanelapha?+
נ [Nun]
14 Imibono baphrofethi benu lebebatsi bayibonile beyingemanga futsi ilite,+
Abanitjelanga liphutsa lenu, ngaleyondlela abazange banivikele kuze ningatfunjwa.+
Kodvwa bachubeka banitjela imibono lengemanga naledukisako.+
ס [Samekh]
15 Bonkhe labengca ngendlela bashaya tandla bakuhheletele.+
Bashaya inkwela bamangele+ futsi banikine tinhloko nababona iJerusalema,* batsi:
“Leli akusilo yini lelidolobha lebekutsiwa lihle kakhulu futsi lijabulisa wonkhe umhlaba?”+
פ [Pe]
16 Tonkhe titsa takho tikhulume kabi ngawe.
Tishaye inkwela futsi tacucudza ematinyo tase titsi: “Sesikubhidlitile.+
Leli lilanga lebesivele sililindzele!+ Selifikile futsi naku sesilibonile!”+
ע [Ayin]
17 Jehova ukwentile loko labekafuna kukwenta;+ sewukwentile loko lakusho,+
Lokunguloko lakusho kadzeni.+
Ukubhubhisile, wangakuhawukeli.+
Wente sitsa sajabula ngekutsi sikuncobile; wenta nekutsi titsa takho tibe nemandla lamakhulu.*
צ [Tsade]
18 Awu wena lubondza lwaseSiyoni,* bantfu bakhala kuJehova.
Shengatsi tinyembeti tingageleta busuku nemini kube shengatsi sikhukhula.
Ungaphumuli, futsi emehlo* akho nawo awangaphumuli.
ק [Qoph]
19 Vuka ukhale ebusuku nasekusikhatsi sekutsi kucale umsebenti wabogadzi.
Tfulula inhlitiyo yakho njengemanti embikwaJehova.
Phakamisela tandla takho kuNkulunkulu, uthantazele kuphila kwebantfwana bakho
ר [Resh]
20 Awu Jehova, buka futsi unake bantfu bakho lobajezise kabuhlungu.
Utsi kungiko nje kutsi bafati badle bantfwana*+ babo, lokubantfwana labaphile saka,
Nekutsi baphristi nebaphrofethi babulawelwe endzaweni lengcwele yaJehova?+
ש [Shin]
21 Bantfu labakhulile nebafana bafele etitaladini, balele batse nja.+
Tintfombi takami nemajaha akami babulewe ngenkemba.+
Ubabulele ngelilanga lakho lentfukutselo; futsi wangabahawukeli nawubabulala.+
ת [Taw]
22 Ungibitele tintfo lengitesabako, watibita kuto tonkhe tindzawo, kwaba shengatsi umemela bantfu emkhosini.+
Kute ngisho namunye lowaphunyula nalowasindza ngelilanga lentfukutselo yaJehova;+
Sitsa sami sabacotfula labo lengabatala* futsi ngabakhulisa.+
א [Aleph]
3 Ngibabonile bantfu bahlupheka ngenca yekutsi Nkulunkulu utfukutsele kakhulu wabese uyasijezisa.
2 Nkulunkulu ungicoshile futsi wangenta ngahamba ebumnyameni kunekutsi ngihambe ekukhanyeni.+
3 Sandla sakhe sihlale simelene nami onkhe malanga.+
ב [Beth]
4 Wente umtimba wami waba butsakatsaka, wenta nesikhumba sami saguga;
Futsi wephula ematsambo ami.
5 Ungivimbetele; wangitungeleta ngetinhlupheko nangetintfo letingangilimata.+
6 Ungihlalise ngenkhani etindzaweni letimnyama, kuhle kwebantfu labafa kadzeni.
ג [Gimel]
7 Ungivalele, khona ngingatophunyula;
Ungibophe ngetinketane telitfusi letisindzako.+
8 Nangikhala kamatima ngidzinga lusito, akawulaleli* umthantazo wami.+
9 Uvimbe tindlela lengihamba kuto ngelubondza lolwakhiwe ngematje lacetuliwe;
Wente tindlela tami tagwegwa.+
ד [Daleth]
10 Ugadze kungihlasela njengelibhele, nanjengelibhubesi lelibhacile.+
12 Ugobe* butjoki bakhe, wacondzisa umcibisholo wakhe kimi.
ה [He]
13 Ugwaze tinso tami ngemicibisholo* layikhiphe esikhwameni sakhe.
14 Bonkhe bantfu sebahlekisa ngami, malanga onkhe bahlabela tingoma babukise ngami.
15 Yena bekahlale angidlisa tintfo letibabako futsi anginatsisa sihlahla lesibabako.+
ו[Waw]
16 Wephule ematinyo ami ngemhlabatsi lonematje;
Futsi ungigcobagcobe emlotseni.+
17 Wena ungente ngaba bete kuthula; nalokuhle angisakwati.
18 Ngako ngacabanga ngatsi: “Bukhatikhati bami sebuphelile, nelitsemba lami kuJehova selishabalele.”
ז [Zayin]
19 Khumbula kutsi ngiyahlupheka futsi ngiyandzindza,+ ukhumbule nekutsi ngidla sihlahla lesibabako nashevu lobabako.+
20 Ngiyati kutsi wena utangikhumbula nekutsi utawugoba ungisite.+
21 Ngihlale ngikukhumbula loku; ngiko nje ngitawubeketela futsi ngilindzele wena.+
ח [Heth]
22 Jehova unelutsandvo lolucotfo, kungako singakacotfulwa saphela nya,+
Futsi umusa wakhe angeke uze uphele.+
23 Wena ukhombisa umusa njalo ekuseni;+ futsi uhlale wetsembekile.+
24 Ngako ngitsite: “Jehova usabelo sami,+ kungako ngitawubeketela ngilindzele yena.”+
ט [Teth]
25 Jehova muhle kuloyo lowetsembele kuye,+ muhle kumuntfu lochubeka amfuna.+
26 Maye kuhle kubeketela+ futsi ulindzele insindziso yaJehova.+
27 Kuhle nangabe umuntfu etfwala umtfwalo losindzako asesemusha.+
י [Yod]
28 Shengatsi angahlala yedvwa futsi athule lapho Nkulunkulu abeka lomtfwalo etikwakhe.+
29 Shengatsi angakhotsama aze atsintse ngebuso elutfulini;*+ mhlawumbe lingaba khona litsemba.+
30 Sihlatsi sakhe akasinike loyo lomshayako; futsi esutse tinhlamba.
כ [Kaph]
31 Ngobe Jehova angeke asilahle kuze kube phakadze.+
32 Nanobe asijezisile, utasentela umusa ngenca yelutsandvo* lwakhe lolukhulu.+
33 Ngobe akumjabulisi kuhlupha bantfu nobe kubavisa buhlungu.+
ל [Lamed]
34 Nangabe umuntfu atinyatsela tonkhe tiboshwa letisemhlabeni futsi atifihlite,+
35 Nalapho umuntfu angaphatfwa ngendlela lelungile embikwaLosetikwako Konkhe,+
36 Kanye nalapho umuntfu angehlulelwa kahle ecaleni labekwe lona,
Jehova akajabuli.
מ [Mem]
37 Ngubani-ke longakhuluma lokutsite futsi kwenteke, nangabe kungasiye Jehova lotsite akwenteke?
38 Emlonyeni waLosetikwako Konkhe,
Akwenteki kuphume lokuhle bese sekuphuma nalokubi.
39 Kungani umuntfu* kufanele akhonone ngemiphumela yesono sakhe?+
נ [Nun]
40 Asibukeni tindlela tetfu futsi sitihlolisise,+ bese sibuyela kuJehova.+
41 Asincengeni Nkulunkulu losezulwini ngenhlitiyo lecotfo futsi siphakamise tandla tetfu sitsi:+
42 “Sonile kuwe sangakulaleli,+ futsi wena awukasicoleli.+
ס [Samekh]
44 Utivale ngelifu, kuze umthantazo wetfu ungefiki kuwe.+
45 Usente saba tibi nenkhukhuma emkhatsini webantfu.”
פ [Pe]
46 Tonkhe titsa tetfu tihlekisa ngatsi.+
47 Sihlale sesaba futsi sitsiyiwe,+ silahliwe futsi sicotfuliwe.+
48 Tinyembeti tigeleta njengemfula emehlweni ami ngenca yelinceba lebantfu bakitsi.*+
ע [Ayin]
49 Ngikhala siphelane, ngingathuli+
50 Kuze kube ngulapho Jehova abuka phansi asezulwini futsi abone bantfu bakhe.+
51 Ngiva buhlungu nangibona lokwenteke kuwo onkhe emadvodzakati aseJerusalema.*+
צ [Tsade]
52 Titsa tami tingitingele shengatsi titingela inyoni, nanobe kute sizatfu sekutsi tingenyanye.
53 Tingibulalele emgodzini; futsi betisolo tingijikijela ngematje.
54 Emanti angimbonye inhloko, ngase ngitsi: “Sekuphelile ngami!”
ק [Qoph]
55 Awu Jehova, ngibite libito lakho ngisemgodzini loshonako.+
56 Vani livi lami; ungativali tindlebe nangikhalela lusito, nangikhalela kutsi ungikhulule.
57 Wena wasondzela kimi ngelilanga lengakubita ngalo. Watsi: “Ungesabi.”
ר [Resh]
58 Awu Jehova, ungimelele ecaleni lengibekwe lona, futsi wasindzisa kuphila kwami.+
59 Wena Jehova ukubonile lokubi labangente kona; ngicela wente kutsi ngehlulelwe ngekulunga.+
60 Ubabonile batiphindziselela kimi, futsi uwabone onkhe emacebo abo ekungilimata.
ש [Sin] nobe [Shin]
61 Awu Jehova, ubevile nabangedzelela, futsi weva nangawo onkhe emacebo abo ekungilimata,+
62 Uwevile nemagama lashiwo ngulabangihlaselako kanye netintfo letimbi lebebatikhuluma, bangihleba lilanga lonkhe.
63 Asewubabuke nje; batsi bahleti nobe bemile babe bahlabela tingoma, babukise ngami!
ת [Taw]
64 Awu Jehova, wena utatiphindziselela kubo kuye ngemisebenti yabo.
65 Utawubacalekisa ngekutsi wente tinhlitiyo tabo tibe lukhuni.
66 Wena Jehova utabagijimisa utfukutsele futsi ubacotfule emhlabeni.
א [Aleph]
4 Asenibuke nje kutsi selihhwabe kanjani leligolide lebelicwebetela, ligolide lelicwengisisiwe!+
Asenibuke, ematje endzawo lengcwele+ sekasakateke kuwo onkhe emakona etitaladi!*+
ב [Beth]
2 Emadvodzana lahlonishwako aseSiyoni labekaligugu njengeligolide lelicwengisisiwe,
Nyalo sekafana netindziwo,
Lokutintfo letibunjwe ngumbumbi!
ג [Gimel]
3 Ngisho nabojakalazi bayayimunyisa imidlwane yabo,
Kodvwa bantfu bakitsi* abasenanhlitiyo,+ sebafana netinshi* tasehlane.+
ד [Daleth]
4 Lulwimi lwemntfwana lomunyako selunamatsele elwangeni lwakhe ngenca yekoma.
Bantfwana bacela kudla,+ kodvwa kute lobanikako.+
ה [He]
5 Labo lebebajwayele kudla tibiliboco, nyalo balele* etitaladini ngenca yendlala.+
Labo labakhule bagcoka timphahla letidulile,*+ nyalo balele emlotseni.
ו [Waw]
6 Sijeziso* sebantfu bakitsi* sibe sikhulu kunesijeziso lesatfolwa yiSodoma ngenca yekona kwayo,+
Futsi yabhujiswa ngesikhashana nje, kwaba bete naloyisitako.+
ז [Zayin]
7 EmaNaziri+ aseSiyoni abehlobile futsi amhlophe kunelubisi.
Bekabovu kunematje aselwandle laligugu;* futsi bekamanyatela njengesafire.
ח [Heth]
8 Kodvwa nyalo sekamnyama kwengca umsiti;*
Ngisho nasetitaladini akasabonakali nekutsi abobani.
Sikhumba sawo sesinamatsele ematsanjeni;+ futsi sesome njengelukhuni lolomile.
ט [Teth]
9 Labo lababulewe ngenkemba bancono khashane kunalabo lababulewe yindlala,+
Ngobe laba baphelelwa ngemandla ngenca yekweswela kudla emasimini, kube shengatsi bagwazwe ngenkemba.
י [Yod]
10 Bafati lebebanesihawu bapheke bantfwababo ngetandla tabo.+
Ngesikhatsi kucotfulwa bantfu bakitsi,* labantfwana bagucuke baba kudla* kwalabafati.+
כ [Kaph]
11 Jehova ukhombise lulaka lwakhe;
Utfulule intfukutselo yakhe levutsako,+
Futsi ucale umlilo eSiyoni locotfule tisekelo takhona.+
ל [Lamed]
12 Emakhosi emhlaba kanye nabo bonkhe bantfu labahlala khona bebangacabangi
Kutsi sitsa besitawungena emagedeni aseJerusalema.+
מ [Mem]
13 Kodvwa loko kwenteka ngenca yetono tebaphrofethi nangenca yemaphutsa ebaphristi+
Lababulala bantfu labamsulwa lebebahlala khona.+
נ [Nun]
14 Labaphrofethi nebaphristi sebazulazula etitaladini kuhle kwebantfu labangaboni emehlweni.+
Sebangcoliswe yingati,+
Futsi kute ngisho namunye lovumeleke kutsi atsintse tingubo tabo.
ס [Samekh]
15 Bantfu bayabamemeta batsi: “Sukani ningcolile! Sukani! Hambani la! Ningasitsintsi!”
Ngobe labaphrofethi nebaphristi sebayandzindza futsi bayazulazula.
Bantfu bakuletinye tive batsite: “Angeke sikhone kuhlala nalabantfu.*+
פ [Pe]
Bantfu angeke babahloniphe baphristi,+ angeke bawavikele nemadvodza lamadzala.”+
ע [Ayin]
17 Sekuze kubaba emehlo solo sifuna lusito kodvwa singalutfoli.+
Besehla senyuka sifuna lusito esiveni lesingazange sikhone kusisita.+
צ [Tsade]
18 Titsa tetfu tihlale tigadze litfuba+ lekusihlasela, kangangekutsi asisakhoni nekuhamba etimakethe.
Sekusele kancane kutsi sife; emalanga sekasiphelele ngobe kufa kwetfu sekufikile.
ק [Qoph]
19 Labo lebebasigijimisa bebagijima kakhulu kwengca tinsweti letisesibhakabhakeni.+
Bebasigijimisa etintsabeni; nasisehlane bebasilalela endleleni kuze basihlasele.
ר [Resh]
20 Loyo logcotjiwe waJehova, longumoya wekuphila kwetfu,+ utfunjwe emgodzini wabo lomkhulu,+
Loyo lebesikhuluma ngaye sitsi: “Sitawuchubeka siphila emkhatsini wetive nasivikelwa nguye.”*
ש [Sin]
21 Wena Edomu,*+ jabula futsi utfokote njengobe uhlala eveni lase-Uzi.
Kodvwa nawe utawunikwa lendzebe,+ futsi utawudzakwa uze ububeke ebaleni bungcunu bakho.+
ת [Taw]
22 Awu Siyoni,* kujeziswa ngenca yesono sakho kuphelela la.
Angeke uphindze utfunjwe.+
Kodvwa wena Edomu,* Nkulunkulu utakujezisela emaphutsa akho.
Utatibeka ebaleni tono takho.+
5 Awu Jehova, kukhumbule loko lokusehlele.
Mane ubuke futsi ubone indlela lesihlazeke ngayo.+
2 Lifa letfu selinikwe bantfu lesingabati, netindlu tetfu tinikwe tihambi.+
3 Sesibantfwana labete bobabe; futsi bomake betfu bafana nebafelokati.+
4 Emanti etfu sesiyawabhadalela,+ ngisho netinkhuni tetfu sesiyatitsenga.
5 Titsa letisigijimisako tisihleli etitsendzeni;
Sesidziniwe, kodvwa asikutfoli kuphumula.+
6 Sesetsembele kubaseGibhithe+ nakubase-Asiriya+ kute sitfole kudla lokutasenela.
7 Bokhokho betfu labona sebafa, kodvwa tsine sekufanele sitfwale tono tabo.
8 Sesibuswa tigcili; futsi kute ngisho namunye longasikhulula kuto.
9 Sibeka kuphila kwetfu engotini kute sitfole kudla,+ ngobe ehlane kunemadvodza lahlomile.
10 Silambe size siyachachatela, ngiko nje sikhumba setfu sesishisa njengemlilo.+
11 Bafati betfu badlwenguliwe* eSiyoni, netintfombi tidlwenguliwe emadolobheni akaJuda.+
12 Tindvuna talengiswa ngesandla sinye,+ nemadvodza lamadzala akazange ahlonishwe.+
13 Emajaha atfwele litje lekusila, nebafana bayadzayitela ngenca yekutfwala inyandza yetinkhuni.
14 Emadvodza lamadzala ahambile esangweni lelidolobha;+ nemajaha asawuyekele umculo.+
15 Injabulo seyiphelile etinhlitiyweni tetfu; nekujayiva kwetfu sekugucuke kwaba kulila.+
16 Umchele udzilikile etinhloko tetfu. Maye kitsi, ngobe sonile!
17 Letintfo tephule tinhlitiyo tetfu,+
Nemehlo etfu akasaboni kahle,+
18 Ngenca yekutsi iNtsaba iSiyoni seyikhala libhungane,+ timphungushe setijangaza khona.
19 Kodvwa wena Jehova utawubusa kuze kube phakadze.
Sihlalo sakho sebukhosi sitawuhlala sikhona situkulwane ngesitukulwane.+
20 Kungani kufanele usikhohlwe kuze kube phakadze, futsi usilahleleni sikhatsi lesidze kangaka?+
21 Awu Jehova sibuyisele kuwe, tsine sikulungele kubuyela kuwe.+
Shengatsi tintfo tingabuyela tibe njengakadzeni.+
22 Kodvwa wena usilahle mbamba,
Solo usitfukutselele kakhulu.+
Tehluko 1-4 titingoma tekulila, emavesi ato acala ngetinhlavu tesiHebheru ngekulandzelana kwato.
Nobe “lebebamhlupha.”
NgesiHebheru kutsi, “yinhloko.”
NgesiHebheru kutsi, “bendvodzakati yaseSiyoni.”
Nobe “tajabula.”
Lesi simuntfutiso lesibhekisele eJerusalema.
NgesiHebheru kutsi, “indvodzakati leyintfombi ntfo yakaJuda.”
NgesiHebheru kutsi, “umlomo.”
NgesiHebheru kutsi, “Ematfumbu ami ayagubhutela.”
NgesiHebheru kutsi, “indvodzakati yaseSiyoni.”
NgesiHebheru kutsi, “tendvodzakati yakaJuda.”
NgesiHebheru kutsi, “tonkhe timphondvo.”
NgesiHebheru kutsi, “Usebentise lunyawo kuze agobe.”
NgesiHebheru kutsi, “lendvodzakati yaseSiyoni.”
NgesiHebheru kutsi, “indvodzakati yakaJuda.”
Nobe “Uyicedzile.”
NgesiHebheru kutsi, “lwendvodzakati yaseSiyoni.”
NgesiHebheru kutsi, “sagwinya.”
Nobe “Sicondziso.”
NgesiHebheru kutsi, “endvodzakati yaseSiyoni.”
NgesiHebheru kutsi, “Ematfumbu ami ayagubhutela.”
NgesiHebheru kutsi, “Sibindzi sami sitfululeke emhlabatsini.”
NgesiHebheru kutsi, “indvodzakati yebantfu bami.” Lesi simuntfutiso lesiyinkondlo, lokungenteka siyindlela yekuveta luvelo.
NgesiHebheru kutsi, “Kuphi kudla neliwayini?”
NgesiHebheru kutsi, “ndvodzakati yaseJerusalema.”
NgesiHebheru kutsi, “ndvodzakati leyintfombi ntfo yaseSiyoni.”
NgesiHebheru kutsi, “indvodzakati yaseJerusalema.”
NgesiHebheru kutsi, “tiphakamise luphondvo.”
NgesiHebheru kutsi, “lwendvodzakati yaseSiyoni.”
NgesiHebheru kutsi, “nendvodzakati yeliso lakho.”
NgesiHebheru kutsi, “etinhloko tato tonkhe titaladi.”
Nobe “inhlanyelo.”
Nobe “lengabatala baphile saka.”
Nobe “uyawuvimba; uwuvalela ngephandle.”
Kungaphindze kubekwe ngekutsi, “wangishiya ngingakhoni nekwentani.”
NgesiHebheru kutsi, “Usebentise lunyawo kuze agobe.”
NgesiHebheru kutsi, “ngemadvodzana.”
Lokusho, kutitfoba ngalokuphelele.
Nobe “yelutsandvo lolucotfo.”
NgesiHebheru kutsi, “umuntfu lophilako.”
NgesiHebheru kutsi, “lendvodzakati yebantfu bami.”
NgesiHebheru kutsi, “emadvodzakatini asedolobheni lami.”
NgesiHebheru kutsi, “etinhloko tato tonkhe titaladi.”
NgesiHebheru kutsi, “indvodzakati yebantfu bami.”
NgesiNgisi kutsiwa yi-Ostrich.
NgesiHebheru kutsi, “basele bodvwa.”
NgesiHebheru kutsi, “letibovu.”
NgesiHebheru kutsi, “Sono.”
NgesiHebheru kutsi, “sendvodzakati yebantfu bami.”
Lana ematje laligugu asho emakhorali. Fundza Tinchazelo Temagama.
NgesiHebheru kutsi, “intfo lemnyama tsu.”
NgesiHebheru kutsi, “indvodzakati yebantfu bami.”
Nobe “kudla kwesililo.”
Nobe “kuhlala nebantfu bekuhamba.”
NgesiHebheru kutsi, “Buso baJehova.”
NgesiHebheru kutsi, “ngephansi kwemtfunti wakhe.”
NgesiHebheru kutsi, “ndvodzakati yase-Edomu.”
NgesiHebheru kutsi, “ndvodzakati yaseSiyoni.”
NgesiHebheru kutsi, “ndvodzakati yaka-Edomu.”
Nobe “bahlazekile.”