Tidlakela Emhlabeni

NANGABE bekungenteka ubone umuntfu lomkhulu, lomudze locishe afike eluphahleni lwendlu yakini, bewungacabangani? Loyo muntfu bekungasho kutsi sidlakela. Kukhona sikhatsi lapho tidlakela take taba khona lapha emhlabeni. LiBhayibheli likhombisa kutsi tingilosi tasezulwini tatibobabe baletidlakela. Kepha beyingenteka kanjani intfo lenjena?

Khumbula phela kutsi ingilosi lembi lenguSathane yayilibele kubanga tinkinga letinyenti. Yayetama kwenta tingilosi taNkulunkulu kutsi nato tente lokubi. Letinye taletingilosi tacala kulalela Sathane. Tawuyekela umsebenti Nkulunkulu labetinikete wona ezulwini. Tehlela emhlabeni, futsi tagucula imitimba yato yafanana neyebantfu. Uyati yini kutsi takwentelani loko?

Kungoba liBhayibheli litsi letingilosi tabona bantfu labasikati labahle emhlabeni, futsi tatifuna kuhlala nabo. Tatsi natifika emhlabeni, tatitsatsela bafati kubo. LiBhayibheli litsi loku kwakukubi ngoba Nkulunkulu wadala tingilosi kutsi tihlale ezulwini.

Ngalesikhatsi letingilosi nebafati bato batfola bantfwana, labantfwana bato bebahlukile. Kungenteka nabasebancane bebangabonakali behluke kangako, kepha njengoba bachubeka bakhula, kancane kancane baba bakhulu futsi baba nemandla lamakhulu, baze bagcina batidlakela.

Letidlakela betibantfu labangakalungi. Ngenca yekutsi betinemandla lamkhulu betishaya bantfu futsi tibalimate. Betifuna bonkhe bantfu bente tintfo letimbi njengato.

Ngemuva kwekufa kwa-Enoki, kwasekunendvodza leyodvwa-vo emhlabeni lebeyilungile. Ligama layo kwakunguNowa. Yakwenta konkhe leyayalwa nguNkulunkulu kutsi ikwente.

Ngalelinye lilanga Nkulunkulu watjela Nowa kutsi besekufike sikhatsi sekutsi abhubhise bonkhe bantfu lababi. Kodvwa Nkulunkulu abetawusindzisa Nowa nemndeni wakhe kanye netilwane letinyenti. Ase sibone kutsi wakwenta njani loko.