Umushi Wenkosazana Wekucala

UYAYATI yini intfo yekucala leyentiwa nguNowa ngalesikhatsi yena nemndeni wakhe baphuma emkhunjini? Wentela Nkulunkulu umnikelo nobe sipho. Lapha nje kulesitfombe lesingentasi wenta wona lomnikelo. Nowa wenta lomnikelo wetilwane kute abonge Nkulunkulu ngekusindzisa yena nemndeni wakhe kuzamcolo lomkhulu.

Ucabanga kutsi Jehova samjabulisa yini lesipho? Yebo samjabulisa. Wabese utsembisa Nowa kutsi angeke aphindze awubhubhise umhlaba ngazamcolo.

Ngekushesha, wonkhe umhlaba bese womile, futsi ngemuva kwekuphuma emkhunjini, Nowa nemndeni wakhe bacala imphilo lensha. Nkulunkulu wababusisa, watsi kubo: ‘Ababe nebantfwana labanyenti. Bandze bagcwalise umhlaba.’

Nangabe bekungenteka bantfu beve ngazamcolo lomkhulu, bebangahle bafikelwe kwesaba bacabange kutsi bewungaphindze ubekhona. Nkulunkulu wanika bantfu intfo lebeyitawubakhumbuta kutsi angeke aphindze abhubhise umhlaba ngazamcolo. Uyati kutsi yini lentfo labaniketa yona njengesikhumbuto? Bekungumushi wenkosazana.

Naselihhamukile litulu umushi wenkosazana uvamise kubonakala etulu esibhakabhakeni. Ubanemibala leminyenti lemihle. Wake wawubona yini umushi wenkosazana? Uyawubona yini lona lolapha esitfombeni?

Nguloku lokwashiwo nguNkulunkulu: ‘Ngenta sivumelwane nani kutsi angeke ngiphindze ngibhubhise bantfu netilwane ngazamcolo. Ngibeka umushi wenkosazana emafini. Nakubonakala lomushi, ngiyawukhumbula sivumelwane sami emkhatsini wami nani.’

Nawubona umushi wenkosazana, kufanele ukukhumbute ini? Kutsi Nkulunkulu wetsembise kungaphindze abhubhise umhlaba ngazamcolo.