Kusukela Ekukhululweni EGibhithe Kuya ENkhosini Yekucala Yaka-Israyeli

Mosi wahola ema-Israyeli wawakhipha ebugcilini baseGibhithe wawayisa eNtsabeni iSinayi. Kulapho Nkulunkulu awaniketa khona imitsetfo yakhe. Kamuva, Mosi watfumela emadvodza langu-12 kutsi ayewuhlola live laseKhenani. Kodvwa langu-10 kuwo, abuya nembiko lomubi. Enta ema-Israyeli afuna kubuyela emuva eGibhithe. Ngenca yekutsi ema-Israyeli abete lukholo, Nkulunkulu wawajezisa ngekuwenta azulazule iminyaka lengu-40 ehlane.

Ekugcineni, Joshuwa wakhetfwa kutsi ahole sive sema-Israyeli asingenise eveni laseKhenani. Kuze awasite angene, Jehova wenta timangaliso letinkhulu. Wabangela kutsi uMfula iJordani ume kugeleta, netindvonga taseJerikho tiwe, kanye nelilanga kutsi likhanye lingashoni. Ngemuva kweminyaka lesitfupha lelive latsatfwa kubaseKhenani.

Ema-Israyeli abuswa tikhulu iminyaka lengu-356 kusuka kuJoshuwa. Sifundza ngaletinyenti tikhulu, lokufaka ekhatsi Bharaki, Gideyoni, Jeftha, Samsoni kanye naSamuweli. Siphindze sifundze ngalabasikati, labafaka ekhatsi boRahabi, Debhora, Jayeli, Ruthe, Nawomi kanye naDelila. Seyiyonkhe iminyaka yemlandvo lehlanganisiwe Encenyeni YESITSATFU, ingu-396.