Bobani Bangani BaNkulunkulu?

Jesu Khristu uyiNdvodzana yaJehova futsi ungumngani wakhe losedvute nalotsandzeka kakhulu kunabo bonkhe. Asengakaphili emhlabeni angumuntfu, Jesu abephila ezulwini asidalwa semoya lesinemandla. (Johane 17:5) Wabese uta emhlabeni kutewufundzisa bantfu liciniso ngaNkulunkulu. (Johane 18:37) Wanikela nangekuphila kwakhe kuze asindzise bantfu labalalelako esonweni nasekufeni. (Roma 6:23) Jesu manje sewuyiNkosi yeMbuso waNkulunkulu, hulumende wasezulwini lotawuletsa liPharadisi kulomhlaba.—Sembulo 19:16.

Tingilosi nato tibangani baNkulunkulu. Tingilosi atizange ticale kuphila tibantfu labebahlala emhlabeni. Tadalelwa ezulwini usengakadalwa umhlaba. (Jobe 38:4-7) Kunetigidzigidzi tetingilosi. (Danyela 7:10) Tibangani baNkulunkulu basezulwini futsi tifuna kutsi bantfu bafundze liciniso ngaye.—Sembulo 14:6, 7.

Nkulunkulu uphindze abe nebangani emhlabeni; ubabita ngekutsi bofakazi bakhe. Enkantolo fakazi usho loko lakwatiko ngemuntfu, nome ngentfo letsite. BoFakazi BaJehova batjela labanye ngaloko labakwatiko ngaJehova nangetinjongo takhe. (Isaya 43:10) Njengetingilosi, boFakazi bafuna kukusita kuze ufundze liciniso ngaJehova. Bafuna kutsi nawe ube ngumngani waNkulunkulu.